SAN MATEO 8
8
Jesús joinchexingamehe ná tti vechonda lepra
(Mr. 1.40‑45; Lc. 5.12‑16)
1Are Jesús vaniaxin de ngain jna mé, anto tsje chojni rroé. 2Co conchienhe ná xí que veninxin chin dinhi lepra. Xí mé vettoxin nttajochjihi xa ngattoxon con Jesús co ndac̈ho xa:
―Si rinao soixin, nchao nchexingamana de ixin chin que janha rrichonda.
3Cottimeja Jesús catte xí mé co ndac̈ho ngain xa:
―Ján, rinaho. Co jaxon oxingamaha jaha.
Co are Jesús ndac̈ho yá jehe tti venihi mé xingamehe de ixin tti chin que jehe vechonda. 4Co Jesús ndac̈ho ngain tti xí mé:
―Tsjenxin, ẍonhi chojni ndache. Jeho ttji co tonchienhe ngain xidána para que jehe xa sicon xa ixin jaha oxingamaha, co danjo para ixin Dios inchin ttetonha ley que vayé Moisés, para que cain chojni nttiha tsonohe na que jaha oxingamaha de ixin tti chin que joarichonda.
Jesús joinchexingamehe ná xanxí, xinchehe ẍé ná xicapitán romano
(Lc. 7.1‑10)
5Are joigaha Jesús rajna Capernaum, ná xisoldado capitán romano conchienhe xa co joinchetsenhe xa ñao Jesús, 6co ndac̈ho xa:
―Nttatsanha ñao soixin nchexingamehe ná xinchehe ẍana ixin nihi xa. Tajitsinga xa ngain nchia co c̈hoha ttingui xa co cai anto jittín xa.
7Jesús ndac̈ho:
―Janha tsji sinttaxingamá xí mé.
8Co xicapitán mé ndac̈ho xa:
―Nttatsanha ñao soixin, janha ni jiquininxinha na para soixin sixinhi nchiania. Jeho rinaho janha que soixin ttetonha co xinchehe ẍana orroxingamehe xa. 9Janha nona jamé ixin janha ditticanho cain tti ttetonna xichonda icha tsje joachaxin que janha, co cai janha chonda joachaxin de ttetoan cain xisoldadona. Are janha ndattjan ná de jehe xa que tsji xa quexeho parte, jehe xa ttji xa. Co are ndattjan xa que tsí xa, jehe xa ttí xa. Co are ttetoan ná de xinchehe ẍana de sinchehe xa quexeho ẍa, jehe xa nchehe xa ẍa mé.
10Are Jesús coinhi jihi jehe goan admirado co ndac̈ho ngain chojni que jidicao:
―Janha rrindattjo ra ndoa que cainxin rajna de Israel ẍonhi chojni vetan janha que anto jian ditticaon inchin xí jihi. 11Janha rrondattjo ra que tsje chojni de icha nación inchin xisoldado romano jihi tsji na siguintte na ngain Abraham, co Isaac co Jacob nttiha ngajni tti ttetonha Dios. 12Co tsje chojni Israel que tequininxin tsji nttiha, pero tsjiha na nttiha ixin Dios rrorroanha na ngain tti naxin xehe, nttiha tti puro rrotsjanga na, co hasta sinetaon neno na.
13Cottimeja Jesús ndac̈ho ngain xicapitán mé:
―Sattji nchiandoi, co tsonhe inchin jaha ditticaon.
Co xinchehe ẍé mé xingamehe xa ngain rato mé.
Jesús joinchexingamehe jannché Pedro
(Mr. 1.29‑31; Lc. 4.38‑39)
14Jesús cjoi nchiandoha Pedro, co nttiha vicon Jesús jannché Pedro tajitsinga jan de ixin soa. 15Jesús jeho tsehe rá jan co ondavac̈hjehe jan soa que veyá jan, co vingattjen jan para joincheatendehe jan na.
Jesús joinchexingamehe tsje chojni nihi
(Mr. 1.32‑34; Lc. 4.40‑41)
16Co are ondaconaxin xehe, tsje chojni joiaohe na Jesús tsje chojni que chonda espíritu jianha, co jehe, conixin nacoa palabra que jehe nichja, vengui cain espíritu jianha mé. Co cai ngain rato mé jehe joinchexingamehe cainxin chojni nihi que conchienhe ngain. 17Jihi conhe para que joiconhe tti dindac̈ho profeta Isaías are jehe dicjin: “Jehe mismo vayé chinha na co sajoicao tti anto ttín cuerpoa na.”
Tti chojni que joinao rrogacao Jesús
(Lc. 9.57‑62)
18Are Jesús vicon que anto tsje chojni ẍatte ngain, jehe coetonhe chojni que vacao para vatto na conixin jehe para toenxin lago. 19Co ngain rato mé conchienhe ná ximaestroe ley Israel ngain Jesús co ndac̈ho xa:
―Maestro, janha rinaho sacjin na tti soixin sacji.
20Jesús ndac̈ho:
―Cain condaniẍa chonda va cuevé va co cain conttoa chonda va caqué va; pero janha, tti Xí que joixin de ngajni, chondaha ni ttinó saric̈hin.
21Co iná de tti chojni que vacao Jesús ndac̈ho:
―Janha ján sacjin na, pero chonna na hasta ndasenja ndodana para que janha tsjavá ndo.
22Co Jesús ndac̈ho:
―Chjin na co tanc̈hjanda tti chojni que ditticaonha na janha tsjavá chó na.
Jesús tajoaquehe c̈hintto conixin olé lago
(Mr. 4.35‑41; Lc. 8.22‑25)
23Cottimeja Jesús conixin chojni que vacao coani na ná barco co sacjoixin na de nttiha. 24Co are ongataonhe jinda mé, cjoa ná c̈hintto anto soji que tsín olé jinda que hasta cjoanotaon barco mé. Co Jesús tajijoa ngaxinhi barco hora mé. 25Cottimeja cain chojni que joicao cjoi na joinchexingamehe na Jesús co ndac̈ho na ngain:
―Nttatsanha na ñao soixin, tanc̈hjandaha ni ra ndasenhe na ixin barco ndajixincanjingui jinda.
26Jesús ndac̈ho ngain na:
―¿Quedonda anto ẍaon ra? ¡Jaha ra antoha jian ditticaon ra tti janha ndattjo ra!
Cottimeja vingattjen Jesús co nichjé c̈hintto conixin jinda, co ngain rato mé tavehe c̈hintto conixin jinda. 27Co cain chojni mé vinttegoan na admirado, co vinttendac̈ho na:
―¿Quehe joachaxin chonda xí jihi que hasta c̈hintto co jinda ditticaon tti ndac̈ho xa?
Xí de ngain nonttehe Gadara que vinttechonda espíritu jianha
(Mr. 5.1‑20; Lc. 8.26‑39)
28Are Jesús joiji toenxin lago mé ongain nonttehe Gadara, yó xí vinttegac̈hjexin xa de ngaxinhi cueva tti vaguittohe cuerpoe chojni que ndavaguenhe ngain tiempo mé. Co xí mé vintteconchienhe xa ngain Jesús. Cayoi xí mé vinttechonda xa espíritu jianha ngaxinhi cuerpoe xa, co anto c̈hintto vintte xa que ni ẍonhi chojni nchao vagattoxin ngain lugar mé. 29Co vinttendac̈ho xa sén:
―¿Quedonda joihi nganji na, jaha Jesús, Xenhe Dios? ¡Ẍa jeha tiempo para que jaha sincheguetan ni ra tangui!
30Co nonttiha chiaon rridinttene anto tsje cocochi. 31Co cain espíritu jianha joinchetsenhe ñao Jesús co ndac̈ho:
―Si senguixin na de ngaxinhi cayoi cuerpo tehe, nttatsanha na ñao tanc̈hjanda na sixinhi na ngaxinhi cocochi taha.
32Cottimeja Jesús ndac̈ho:
―Ján, diguixinhi ra nttiha remé.
Co cain espíritu jianha vac̈hjexin de ngaxinhi cayoi cuerpoe xí mé co savixinhi ngaxinhi cain cocochi mé. Cottimeja cain jehe va ndavinttecoloco va co coinga va xincanji va ngain ná lago nttiha, co nttiha joingui va jinda co nttiha ndavintteguenxin cainxin va ixin vinttecjonhe va jinda.
33Co tti chojni que vaquingaria cain cocochi mé vintteẍaon na co coinga na cjoi na ngain rajna que jí icha chian para joindac̈ho na tti conhe cain cocochi, co tti conhe ngain cayoi xí que vinttechonda espíritu jianha. 34Cottimeja cain chojni de ngain rajna mé vinttecji na tti jí Jesús. Co are vicon na Jesús, jehe na joinchetsenhe na ñao Jesús que satsjixin de ngain nonttehe na.
Trenutno odabrano:
SAN MATEO 8: plsNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 1982, Wycliffe Bible Translators, Inc.
