Génesis 9
9
Yuus Noéjai tuke atinan chichaman umikmau
1Yuus Noén nina uchirijai pegkernum chicharuk: Uchirmakrum nugkanam pampaartarma. 2Ashi kuntin nugkanam matsamin aina, nanamtin aina, entsanam matsamin ainasha, atumin ashamramiartinaiti. 3Yamaika kuntin aina nuka, tura árak aina nusha wakerakrumka ashi yumain ainarme tusan inaitajrume. 4Turasha numpajai iwáku pujutai asamtai, kuntin aina nu maa yuakrumsha numpe yuatin airpa. 5Shuar chikichan maamtaigka, tura kuntin yukartin shuaran maamtaisha wii iistatjai. 6Shuarnaka wiya numamtinnak najanawaitjai. Turamu asamtai shuar chikichan maaka nisha turusrik maam atinaiti. 7Turasha atumka nukap uchirmakrum nugkanam pampaartarma, tusa tinaiti. 8Nuiyasha Yuus Noén uchirijai irumar chicharuk: 9-11Yamai nagkamsanka atum ainatirminka, atumin uchiri ainan, kuntin ainan, tagku ainan, tura nanamtin ainancha atak awenanka nujagjaigka ijinashtinaitjarme. Wii atumin tajarum nunaka pegke yapajiashtinaitjai. 12-13Wii atumin, tura kuntin ainan pachisan timaj nuna yapajiashtinaitjai tusan, iwainakun yamaika yuragminam tuntiapan awajajai, tusa tinaiti. 14Tura wii tajarum nu kajinmatkirum tusan, yuragminam tuntiapan awajtinaitjai. 15Wii tajarum junaka kajinmatkishtinaitjai. Tuma asan ashi nugkanam matsataina nunaka atak awenanka nujagjaigka ijinashtinaitjai. 16Tuntiap yuragminam wajakaigka, ashi shuar ainan, tura ashi kuntin ainajai, tuke atinan anajmatawaitaj nuna aneartinaitjai. 17Tuntiapka tuke atinan shuar ainan, tura kuntin ainan, wii anajmatamaj nuna iwainawai, tusa tinaiti.
Noé uchiri aina
18Noé uchiri aina arcanmaya jintrarua nuka ju ainawai: Sem, Cam, Jafet. Camka Canaánkan apari ajakuiti. 19Noé uchiri tres ajakarua nuka ashi nugkanam pampagkaru ainawai. 20Tura Noéka arakmatan nagkama uvan arakmawaiti. 21Tura ni aramunmayan uva yumiri vino tutain umar nampek nina jeen ajapeen misu tepes kanaruiti. 22Tuman Canaánkan apari, Cam wainak nina yachi aa matsatun ujaktasa wuwaiti. Tuma yachi ainan jeari chicharuk: Ina apari misu tepawai tusa ujakuiti. 23Turawaram Sem Jafetjai apari misu tepettamaun iitan nakitaina asar, jaanchin jukiar yakainum awagkak ukunmani jeariar nukukaruiti. 24Turam tepes Noé nampekmaurin atsaar, nina uchiri Cam, misu tepau wainkamun nekamawaiti. 25Tuma Camman chicharuk: Amina uchiram Canaánka yatsum aina nuna inatairi nagkasau inatai atinaiti. 26Nuiyasha chichaak: Wina Yuusur pegkernum yaigti. Antsu Canaánnaka nita inatairi atii tusa titii, tinaiti. 27Tura Jafetnaka chichame anturtai amajas Sem pujamunam Yuus apujsatnaiti, tura Canaánka nina takarin atii tusa Noé tinaiti. 28Nujag shuaran ijinawa nui nagkamas Noéka trescientos cincuenta uwí pujusuiti. 29Tuma novecientos cincuenta uwí ejé jakauwaiti.
Trenutno odabrano:
Génesis 9: hubDBL
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2010, Wycliffe Bible Translators, Inc. All rights reserved.