San Mateo 18

All eñotateney ñeñth acheñer eꞌñe poꞌñoxh atarr asherben enteñ Yompor

(Mr. 9.33-37; Lc. 9.46-48)

1Allempoña Jesúspaꞌ aꞌphthoꞌteñaꞌ poeyochreshaꞌ, ñeñthpaꞌ ateth ochet:

—Ñeñthey allponey ñeñthchaꞌ eꞌñe poeyochreshaꞌ perr Yompor ñeñth poeꞌntañoꞌtsen, yapaꞌ añ yemnen theꞌpaꞌ oꞌch photey, ¿erraꞌtsenotheytheꞌñakaꞌyeña ñeñthey atarr sherbets ñeñthey atarr amhchaꞌtarethoyen entyenyet?

2Jesúsñapaꞌ cheshatholla xhoreꞌtpaꞌ thomach eꞌñe alloꞌtsaꞌyenet. 3Allempoñapaꞌ ateth otanet:

—Poꞌñoxh napaꞌ oꞌch notas: Ñerraꞌm ama xho sekexhpaꞌwerro sommoꞌcheña atthoch oꞌch ateth sepena kowen ñerraꞌmrratheꞌ añ cheshatholl ñeñth ama eñotenanaꞌ oꞌch ommoꞌchena, sañapaꞌ amatheꞌ errothenoth es soꞌpaterroña attho atarr ayochreshathtena Yompor poeꞌntañoth. 4Ñeñth allpon ñeñthchaꞌ eꞌñe poeyochreshaꞌ perr Yompor ñeñthña acheñer attho oꞌwañ kowen enta ñañeña ñeñthpaꞌ oꞌ eꞌñe ateth perra ñerraꞌm cheshatholl ñeñth ama eñotenanaꞌ pommoꞌcheña. Ñeñthñapaꞌ atarr nanak asherben enteñ Yompor. 5Erraꞌtsenothes sa ñerraꞌm eꞌñe sameꞌñeñothen na eꞌñe kowen sagëñ amaꞌt ñeñth ama asherbenayeꞌ entyeneto ateth ñerraꞌm añ cheshatholl, naꞌnaña eꞌñe kowen sagën.

Attho xhokmach waponaya ñeñthchaꞌ yetpatyeneꞌ oꞌch ateth phatyesey ñeñth ama pokteyeꞌ enteno Yompor

(Mr. 9.42-48; Lc. 17.1-2)

6‘Amaꞌt erraꞌtsena ñeñth ama pommoꞌcheñotheyeꞌ ameꞌñenno ateth ñerraꞌm cheshatholl ñeñth ama eñotenanaꞌ oꞌch ommoꞌchena, tharraña ñerraꞌm eseshaꞌña poꞌpsheñeñ oꞌch ateth phatach ñeñth ama pokteyeꞌ enteno Yompor, ñeñthña acheñerpaꞌ atarrchaꞌ yoroxhenoꞌtsen tharroꞌmar ñapaꞌ aña oꞌpatenaya koñcheñets ñeñth atarr womenk. Amaꞌt ñokoppaꞌ ama tama yoroxhenayayñe ñerraꞌm ama ateth phatenanaꞌ poꞌpsheñeñ, eꞌñech allorokma oꞌch xharachetañ mapoeꞌ añekmoen paꞌxhnopho allpon ñerraꞌm poetseꞌtamets oꞌch waporeꞌchet oño epo allchaꞌ ñoꞌshach mapoeꞌ. 7Atarr llekëñets acheñeneshakop arr patsro ñerraꞌm esempo eseshaꞌpaꞌ oꞌch ateth phatyenanet ñeñth ama pokteyeꞌ enteno Yompor. Tharroꞌmar xhokmach waponaya ñeñthchaꞌ yetpatyeneꞌ oꞌch ateth phatey ñeñth ama pokteyeꞌ enteno Yompor. Tharraña napaꞌ oꞌch notas, atarrchaꞌ yoroxhenoꞌtsen amaꞌt erraꞌtsena acheñer ñeñth orrtateneꞌ ñeñthchaꞌ topatyeneꞌ poꞌpsheñeñ ñeñth nameꞌñenaya oꞌch ateth phatyenanet ñamet ñeñth amaꞌt mameshapaꞌ ama pokteyeꞌ enteno Yompor.

8-9‘Ñamha oꞌch noterrserr: Ñerraꞌm sechets phatyenes ñeñth ama pokteyeꞌ enteno Yompor ateth ñerraꞌm sot, setak, seklleꞌ, añ poktetsa oꞌch sekexhpoerr ñeñth xhokma ateth phatseꞌtatyenes sechets. Ñeñthpaꞌ eꞌñe ateth ñerraꞌmrratheꞌ eꞌñe allorokma oꞌ sepecherr sot, setak, oꞌ serrotherr seklleꞌ, oꞌch sewaporeꞌter. Añ kowen sokop amaꞌt eꞌñe sepoꞌyotaꞌteñoth korretsasach thayotheñ errponowañen. Añña ama kowenayaye sokop esempowañenpaꞌ eꞌñech ora epoꞌmar sotpaꞌ oꞌch waporeꞌterrset koñchaꞌpoetso all parraren tsoꞌ ñeñth ama awañaño amaꞌt errponaña. Ñamha añ kowen sokop amaꞌt eꞌñe setkothpaꞌ sepshemhtatkëñoth korretsasach thayotheñ errponowañen. Añña ama kowenayaye sokop esempowañenpaꞌ eꞌñech ora epoꞌmar setakpaꞌ oꞌch waporeꞌterrset koñchaꞌpoetso all parraren tsoꞌ ñeñth ama awañaño amaꞌt errponaña. Ñamha añ kowen sokop amaꞌt seklloyoth sepshemhtaklloꞌyeñoth korretsasach thayotheñ errponowañen. Añña ama kowenayaye sokop esempowañenpaꞌ eꞌñech ora epoꞌmar seklleꞌpaꞌ oꞌch waporeꞌterrset koñchaꞌpoetso all parraren tsoꞌ.

Acheñ ñeñth ama ameꞌñetsopaꞌ arrpaꞌ all atmaꞌntatarethtet ateth ñerraꞌm carnero ñeñth chenkëtsa

(Lc. 15.3-7)

10Jesúspaꞌ alla oterranerr poeyochreshaꞌ:

—Eꞌñech señota, añepaꞌchña atarr asherben senten ñeñth ama ommoꞌchetso ñeñth ateth petsa ñerraꞌm cheshatholl ñeñthñapaꞌ eꞌñech poeñmañeshaꞌ yemtenna. Tharroꞌmarña theꞌpaꞌ oꞌch notas, ñeñth ama pommoꞌcheñotheyeꞌ nameꞌñenayo ñokpoetpaꞌ eñalletkaꞌyeña poꞌmhllañotheñer ñeñthchaꞌ kowampenawet. Ñeñthña poꞌmhllañotheñretpaꞌ xhokma Yomporeshoꞌtsenet allña eꞌñe kowen eꞌmhñotenanetña Yompor poeꞌntaño. 11Poꞌñoxh na Ñeñthen Acheñetosets añekopña nowapa atthoch naꞌkeshphatyesos acheñeneshaꞌ ñeñth chenkëtsa.

12‘Ñewa, ¿amaꞌt ateth senteñeña? Amaꞌt erraꞌtsen acheñer ñeñth echeneꞌ shonteꞌ poꞌcarneror, xharroch xharraꞌ echen tharraña ñerraꞌm poemokarrña machayotha aꞌchenkachpaꞌ pamoꞌmteꞌñapaꞌ oꞌch saꞌnman allowen poꞌpotantañ ñeñth oꞌ noventa nuebhamha all aspentho oꞌch awoꞌ eꞌnerrayaꞌ poemokarr ñeñth chenkëtsa. Allchaꞌ eꞌnameꞌtyeraꞌpaꞌ atthothach enter. 13Ñerraꞌm ña oꞌch enterpaꞌ ñeñthchaꞌña atarr koshaterreꞌ. Elloch metanan attho koshenana poꞌpotantañ noventa nueve poꞌcarneror ñeñth ama payaꞌtetso. 14Atethkaꞌye penaña ñamha Sompor ñeñth poeꞌntañoꞌtsen; ñapaꞌxhoꞌña amakaꞌ moeno oꞌch chenka amaꞌt poesheñarrotholla acheñ.

Atthoch eꞌñe kowen yamoꞌtstera yemoꞌnasheñ

(Lc. 17.3)

15Jesúsñapaꞌ alla oterraneterr; ñeñthpaꞌ ateth otanet:

—Ñerraꞌm errothen phonas semoꞌnasheñpaꞌ oꞌch awes ñesho eꞌñech sapoeth oꞌch sokthapeꞌchateraꞌ eꞌñe kowen. Ñerraꞌm xho eꞌmhñoterrespaꞌ allempoñapaꞌ oꞌch amoꞌtsoth senterra. 16Ñerraꞌm sokthapeꞌchatweñaꞌ amach eꞌmhñotasopaꞌ seꞌñ poesheñarr amapaꞌ epsheña ñeñthchaꞌ saꞌpoktatapreterreꞌ. Atethchaꞌ sepha allochñapaꞌ ñeñthchaꞌ eñosets epsheña amapaꞌ maꞌpsheñoꞌmareschaꞌ eñosets allempopaꞌ eꞌñech poꞌñoxh sameꞌña ñeñth ñoñets tharroꞌmar eꞌñech atthekma otenet. 17Ñerraꞌmña atethña oꞌ sephowerñaꞌ amach eꞌmhñoterrsopaꞌ allempoñapaꞌ oꞌch soch allowenet ñeñth xhokma apxhetsa pameꞌñeñoth Yompor. Kothapeꞌchateretepaꞌ ñamet. Ñerraꞌm oꞌch kothapeꞌchatwet allowenetñaꞌ, amaꞌt ñetña amach eꞌmhñoterranetopaꞌ sañapaꞌ eꞌñech attha senter ñerraꞌm poꞌpoñ acheñer ñeñth ama semoꞌnasheñeyaye. Eꞌñech ateth senteñ ñeñth acheñer ñeñth ama ameꞌñetso, ateth ñerraꞌmrratheꞌ ñeñth poeshkëñotheꞌna cobraꞌyeneꞌ acheñeneshaꞌ kelle ñeñth gobiernokop.

18‘Ñewa, theꞌ poꞌñoxhpaꞌ oꞌch alla noterrserr: Ñerraꞌm errothenchaꞌ eꞌñe pokteꞌ sent ñeñthchaꞌ senaꞌyes arr patsro, Yomporpaꞌxhoꞌña ñeñth entoꞌtsen eꞌñech atthekma eꞌñech pokteꞌ enterranet. Ñamha ñeñthchaꞌ ama pokteyeꞌ senteno ñeñthchaꞌ senaꞌyes arr patsro, Yomporpaꞌxhoꞌña ñeñth entoꞌtsen eꞌñech atthekma amach pokteyeꞌ enterraneto.

19‘Ñamha oꞌch alla noterrserr: Poꞌñoxh ñerraꞌm epsheñas arr patsro oꞌch eꞌñe saꞌpoktatwe epsheñoꞌmares ñeñthchaꞌ senamoennan Nompor ñeñth poeꞌntañoꞌtsen ñapaꞌ amaꞌt erraꞌtsena senamoeñ xhokmach eꞌñe ateth pennas. 20Tharroꞌmar ñerraꞌm erroꞌtsen amaꞌt eꞌñe epsheña amapaꞌ maꞌpsheña ñeñth apxhetsa eꞌñe pameꞌñeñothetan na, naña allpaꞌ alloꞌtsenenchaꞌ eꞌñe ñesheto.

21Allempoña Pedropaꞌ aꞌphthoꞌtenanaꞌ Jesús, ñeñthpaꞌ ateth otos:

—Partseshachaꞌ, ñerraꞌm xhokma epayeꞌ erroth penen namoꞌts, taꞌm ¿errponocheꞌtchaꞌña nephretneꞌ ñatoꞌ eꞌñech kanxhrrocha nephretneꞌ?

22Jesúsñapaꞌ ateth och:

—Napaꞌ ama notenpe eꞌñech kanxhrrocha pephretneꞌ, añña noteneph atonochchaꞌ pephretneꞌ—amaꞌt kanxhrrochchaꞌ xharraꞌ, ñamha poꞌpoñ kanxherr, allponochchaꞌ sephretneꞌña samoꞌts.

Attho Jesúspaꞌ eñotatanet ñerraꞌm amach eꞌñe kowen yephretnannenopaꞌ Yomporpaꞌxhoꞌña amach peretnerrye yamha

23Jesúspaꞌ ateth oterraneterr:

—Ñeñthoꞌmarña Yompor poꞌkowenña ñeñth attho ayochreshathtena ña poeꞌntañoth ñeñthpaꞌ ateth ñerraꞌmrratheꞌ poesheñarr amhchaꞌtareth. Ñeñthñapaꞌ añchaꞌ moenen oꞌch aꞌpoktatyesan attho tebhaꞌyeñ allowen paꞌtarwasañrexhno. 24Allempoña all eꞌñe aꞌpoktatyesanetpaꞌ allñapaꞌ wapatoñet poesheñarr paꞌcheñer ñeñth tebeneꞌ patoner kelle ñeñth allpon tebenpaꞌ ñeñth oteñet shonteꞌ millones. 25Ñañapaꞌ ama echenano allpon kelle alloch tsaꞌterra ñeñth allpon teben. Poꞌpatronarñapaꞌ ateth otanet: “Theꞌpaꞌ oꞌch sepomoer epoet poethapor epoet ñamha poechemereshaꞌ ñamha oꞌch sepomwerrñañ errpontheꞌ echyen allochñapaꞌ amaꞌt allapaꞌ oꞌch tsaꞌterrna attho tebenen.” 26Allempoñapaꞌ allentha konkorpanaꞌcha paꞌtarwasañer ñeñth tebeneꞌ, ñeñthpaꞌ ateth otareꞌch: “Amach nomporchaꞌ pemaꞌyoreꞌtatsetno, netsaꞌtwerrphach akopha.” 27Poꞌpatronarñapaꞌ alla morrentera allentha aꞌrroyer allempokma eꞌshowerrñañ all kellkëññañet ñeñth allpon teben. 28Ñeñthña paꞌtarwasañerpaꞌ oꞌ xhaꞌnerr entwerran poꞌpsheñeñ ñeñth parro atarwasatarethtenet ñeñth tebeneꞌ ñamha, ñeñthpaꞌ eꞌñe koñeꞌtha kelle. Ñañapaꞌ xha rremaꞌwerreꞌpaꞌ allentha moeñoxheꞌ ateth otwer: “Petsaꞌterrnañakaꞌye ñeñth allpon petebenen.” 29Aꞌrroyerpaꞌ ñañapaꞌ allentha konkorpanaꞌtana ñamha ñeñth oꞌ moeñoxhoꞌtwe. Allñapaꞌ ateth och: “Amach pemaꞌyoreꞌtatsetno, netsaꞌterrphach akopha allpon ñeñth netebeneph.” 30Ñañapaꞌ amaꞌt mameshapaꞌ ama pokteyeꞌ eñche, ñeñthapaꞌ anemh allchaꞌ yottamphsach. Allñapaꞌ allach esempowach eꞌñe tsaꞌtwerra ñeñth allpon teben. 31Añña poꞌpotantañexhnoña ñeñth parro atarwasatarethtenetpaꞌ ñetñapaꞌ amaꞌt mameshapaꞌ ama pokteyeꞌ eñcheto ñeñth ateth pha ñeñth eꞌñe attha eꞌshowarethterrtsa ñeñth allpon tebhaneꞌth poꞌpatronar. Allempoña ñetpaꞌ allentha awanmoet poꞌpatronaresho. Allñapaꞌ aꞌmethamperet. 32Allempoñapaꞌ oꞌ alla agotater poꞌpatronar. Oꞌ xherr poꞌpatronareshopaꞌ ateth otapoer: “Pha naꞌtarwasañre, amaꞌt mamesha ama koweneshayaype. Phañapaꞌ attha photareꞌten napaꞌ awoꞌch nephretnerreph nañapaꞌ eꞌñe attha neꞌshowerrnaph ñeñth allpon petebenen. 33Amaꞌt eꞌñe pokteñ phapaꞌxhoꞌña oꞌch pemoeryañ ñeñth parro petarwasen. Ateth nepena na eꞌñe kowen nemoererrpha.” 34Allempoña poꞌpatronarpaꞌ eꞌñe patsrreꞌmoeñeshaꞌ pomoer, oꞌ apoer ñeñthchaꞌ koñchateꞌ esempowañen allchaꞌña eꞌñe tsaꞌtwerrana ñeñth allpon teben.

35‘Sapaꞌxhoꞌña eꞌñe poesheñaꞌttsosña ñerraꞌm amach sephretnere samoꞌtspaꞌ eꞌñech atthekma perres samha Nompor ñeñth poeꞌntañoꞌtsen. Xhokmoepaꞌch eꞌñe kowen sephretnannenaña sa eꞌñe seyoxhrokmañen.

Trenutno odabrano:

San Mateo 18: ame

Istaknuto

Podijeli

Kopiraj