लूका 3
3
यूहन्ना बपतिस्मा देनबारे को सन्देस
(मत्ती 3:1-12; मरकुस 1:1-8; यूहन्ना 1:19-28)
1जौ सम्राट तिबिरियुस के सासन को पन्द्रमों साल रहै; पुन्तियुस पिलातुस यहूदिया को राज्यपाल रहै, हेरोद अंतिपास गलील देस को सासक रहै, और बाको भईय्या फिलिप्पुस इतूरैया और तरखोनीतिस के इलाका को सासक रहै; लिसानियास अबिलेने इलाका को सासक रहै, 2और हन्ना और कैफा बड़ो पुजारी#3:2 बड़ो पुजारी रहै, बौ समय परमेस्वर को बचन जकर्याह को लौड़ा यूहन्ना के झोने पुगो जो रेगिस्तान मैं रहत रहै। 3जौ बजह से यूहन्ना यरदन नदिया के आस-पास पूरे इलाका मैं गौ, प्रचार करी, “अपने पापन से मन फिराबौ और बपतिस्मा लेबौ, और परमेस्वर तुमरे पापन कै माफ कर देगो।” 4जैसो कि यसायाह भविस्यवक्ता#3:4 आनबारे समय के बारे मैं बतान बारो कि किताब मैं लिखो गौ है:
“कोई रेगिस्तान मैं पुकार रौ है:
कि प्रभु के ताहीं रहा सूदी करौ;
सफर के लै प्रभु के ताहीं एक सीधी रहा बनाबौ!
5हर एक घाट कै भर दई जागी,
हर पहाड़ी और पहाड़ कै नीचो कर दौ जागो;
और जो टेहड़ी रहा है बाकै सीधी करो जानो चाहिए,
और ऊबड़-खाबड़ रहा मुलायम बनैगो।
6पूरी इंसान की जाति परमेस्वर के उद्धार कै देखैगी!”
7बड़ी भीड़ यूहन्ना से बपतिस्मा लेन के ताहीं निकरकै आत रहै, उनसे यूहन्ना कहत रहै, “साँप के बालकौ, तुमकै कौन चिताओ, कि आनबारे गुस्सा से भाजौ? 8बे कामन कै करौ जिनसे पता चलै कि तुम अपने पापन से मन फिराए लै हौ। और आपस मैं जौ ना कहियो कि अब्राहम तुमरो पुरखा है। मैं तुमसे कहथौं कि परमेस्वर जे चट्टानन कै लैकै अब्राहम को बंसज बनाए सकथै! 9और अब कुल्हाड़ी पेंड़ कै जड़ से काटन के ताहीं तैयार है; अच्छो फल ना देनबारे हर पेंड़ कै काटकै आगी मैं डार दौ जागो।”
10और लोग बासे पूँछीं, “तौ हम का करैं?”
11यूहन्ना जबाब दई, “जोके पास दुई कुरता होमैं, बौ बाकै एक कुरता देबै जोके पास ना है, और जोके पास खानु है बहो बाँटनों चाहिए।”
12और कुछ लगान#3:12 चुंगी लेन बारे भी बपतिस्मा लेन आए, और बे यूहन्ना से कहीं, “गुरु, हम का करैं?”
13यूहन्ना उनसे कही, “जित्तो तुमरे ताहीं तैं करो गौ है, बासे जद्धे मत लियो।”
14और कुछ सिपईय्या यूहन्ना से पूँछीं, “हमैं का करनो चाहिए?”
यूहन्ना उनसे कही, “कोई के ताकत दिखाए कै बासे पैसा मत लियो या फिर कोई के ऊपर झूठो इल्जाम मत लगइयो, अपनी तनखा से सन्तुस्ट रहबौ।”
15लोगन की उमीद बढ़न लगी और बे अचम्मे और मन मैं सोचन लगे कि कहीं सायद यूहन्ना मसीह तौ ना है। 16फिर यूहन्ना बे सबन के जबाब मैं कही, “मैं तौ तुमकै पानी से बपतिस्मा देथौं, लेकिन बौ आनबारो है, जो मोसे ताकतबर है; मैं तौ जहो काबिल ना हौं, कि बाके जूतन की तनी खोल सकौं, बौ तुमकै पवित्र आत्मा और आगी से बपतिस्मा देगो। 17बाके पास अपनो खुद को सूपो है, और बौ अपनो खेत खलियान कै अच्छे से साफ करैगो; और गेंहूँ कै अपने खाते मैं इखट्टो करैगो, लेकिन गेंहूँ छान कै बौ भूसा कै अलग करकै आगी मैं जलागो जो कहु बुझत ना है।”
18यूहन्ना भौत सी सिक्छा दै दैकै लोगन कै सुसमाचार सुनात भइ मन फिरान के ताहीं नहोरे करत रहै। 19लेकिन यूहन्ना गवर्नर हेरोद कै फटकार लगाई, काहैकि हेरोद अपने भईय्या फिलिप्पुस की बईय्यर हेरोदियास से बिहा करी रहै, और भी भौत से बुरे काम करी रहै। 20तौ हेरोद यूहन्ना कै कैदखाना मैं डारकै औरौ बड़ो काम करी।
ईसु को बपतिस्मा
(मत्ती 3:13-17; मरकुस 1:9-11)
21सब जनी के बपतिस्मा लेन के बाद, ईसु भी बपतिस्मा लई। जब बौ प्रार्थना करत रहै, तौ स्वर्ग खुल गौ, 22और पवित्र आत्मा सारीरिक रूप मैं कबूतर के हानी ईसु के ऊपर उतरो, और स्वर्ग से जौ आकासवाड़ी भइ, “तैं मेरो प्रिय लौड़ा है, मैं तोसे खुस हौं।”
ईसु के पुरखा
23जब ईसु अपनो काम सुरु करी तौ बौ लमसम तीस साल को रहै और जैसी लोग समझत रहैं कि बौ यूसुफ को लौड़ा रहै; जो कि यूसुफ एली को लौड़ा रहै, 24और एली मत्तान को, और मत्तान लेवी को, और लेवी मलाकी को, और मलाकी यन्नाई को, और बौ यूसुफ को, 25और यूसुफ मत्तित्याह को, और बौ आमोस को, और बौ नहूम को, और नहूम असल्याह को, और असल्याह नोगह को, 26और नोगह मात को, और मात मत्तित्याह को, और बौ सिमी को, और बौ योसेख को, और योसेख योदाह को, 27और योदाह यूहन्ना को, और यूहन्ना रेसा को, और रेसा जरूब्बाबेल को, जरूब्बाबेल सालतियेल को, और सालतियेल नेरी को, 28और नेरी मलकी को, और मलकी अद्दी को, और अद्दी कोसाम को, और कोसाम इलमोदाम को, और इलमोदाम एर को, 29और एर जोस्वा को, जोस्वा एलीएजेर को, और एलीएजेर योरीम को, और योरीम मत्तात को, और मत्तात लेवी को, 30और लेवी सिमौन को, और सिमौन यहूदा को, और यहूदा यूसुफ को, और यूसुफ योनान को, और योनान एलयाकीम को, 31और एलयाकीम मलेआह को, और मलेआह मिन्नाह को, और मिन्नाह मत्तता को, और मत्तता नातान को, और नातान दाऊद को, 32और दाऊद यिसै को, और यिसै ओबेद को, और ओबेद बोअज को, और बोअज सलमोन को, और सलमोन नहसोन को, 33और नहसोन अम्मीनादाब को, और अम्मीनादाब आदमिन को, आदमिन अरनी को, और अरनी हेस्रोन को, और हेस्रोन पेरेस को, और पेरेस यहूदा को, 34और यहूदा याकूब को, और याकूब इसहाक को, और इसहाक अब्राहम को, और अब्राहम तेरह को, और तेरह नाहोर को, 35और नाहोर सरूग को, और सरूग रऊ को, और रऊ पेलेग को, और पेलेग एबिर को, और एबिर सिलह को, 36और सिलह केनान को, और केनान अरफक्छद को, और अरफक्छद सेम को, और सेम नूह को, और नूह लेमेक को, 37और लेमेक मथूसिलह को, और मथूसिलह हनोक को, और हनोक यिरिद को, और यिरिद महललेल को, महललेल केनान को, 38और केनान एनोस को, और एनोस सेत को, और सेत आदम को, और आदम परमेस्वर को लौड़ा रहै।#उत्पत्ति 5:1-3; 1 इतिहास 1:1-4
Trenutno odabrano:
लूका 3: NTRTu2023
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Rana Tharu Language ©The Word for the World International and Rana Tharu Translation Samithi, Khatima, UttraKhanda, India. 2024