التكوين 13
13
بركة أبرام
أبرام يعطي لول خوه ارض زينة
1وامشا أبرام من مصر وامعاه ساراي ولوط وكل أملاكو شور النقب فكنعان. 2وكان أبرام عندو ياسر من الحيوان والفظة والذهب. 3وامشا من النقب شور بيت إيل إلى لبليدة اللي ڮط ابنا فيها خيمتو فلول، اللي امبين بيت إيل وعاي. 4وهاذي هي لبليدة اللي فيها مذبح مولانا اللي ڮط ابنا. وفم صلى لله تعالى. 5وكان املي لوط اللي امشا امع أبرام عندو لغنم ولبڮر ولخيام. 6وامتلات لارض من أملاكهم يلين ما اتلا فم بل امنين يعيشو فيه فبلد. 7وخلڮت اخصومة امبين رعيان أبرام ورعيان لوط فالوقت اللي كانو يعيشو فيه الكنعانيين والفرزيين فلارض.
8وڮال أبرام للوط : ما يالتنا نتخاصمو امبيناتنا، ولا يالتهم يتخاصمو رعياننا بيهلي نحنا خوت، 9ولارض واسعة ڮدامك. خلينا نتفاصلو. وإلين تمشي اعلى زرك العربي، نمشي اعلى زري العسري. وإلين تمشي اعلى زرك العسري، نمشي آنا شور زري العربي. 10واتلفت لوط اعلى زرو وشاف واد الأردن كامل يلين صوغر. وكانت لارض املانة من لخظار وكيفت جنة الله تعالى، وتشابه لارض مصر. وهاذا كان سابڮ يهلك الله تعالى سدوم وعمورة. 11واختار لوط لراصو واد الأردن كامل، وامشا شور الشرڮ. واتفرڮ كلهم عن صاحبو. 12واسكن أبرام فارض كنعان، واسكن لوط فابلد لخظار، وابنا اخيامو اڮريب من سدوم. 13وكانو أهل سدوم اشرار وعاصين حته لله تعالى.
14وڮال الله تعالى لأبرام عاڮب ما امشا عنو لوط: رڮب عينيك واتلفت من حولك من لبليدة اللي انتا فيها، الشمال والجنوب والشرڮ والغرب، 15بيهلي هاذي لارض اللي انتا شايف لاهي نعطيهالك ولنسلك إلى الابد. 16ولاهي انعدل نسلك كيفت احصي التراب، إلى عاد آراڮاج يڮد يحسب احصي التراب يتمكن من عد ذريتك . 17ڮوم وامشي فطول لارض وعرظها بيلي اعطيتهالك. 18وڮام أبرام وارفد اخيامو وابناها احذا اصدر ممرا اللي احذا حبرون. وابنا مذبح لله تعالى فم.
Trenutno odabrano:
التكوين 13: الحسانية
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/