Mateo 2
2
Ro Pagbisita ku mga Mangin-aeamon nga Halin sa Maeayo nga Lugar sa Sidlangan
1Natawo si Jesus sa banwa it Betlehem nga sakop ku probinsya it Judea. Ro hari ku tyempo ngato hay si *Herodes. Pagkatawo ni Jesus hay may nag-abot sa Jerusalem nga mga mangin-aeamon nga tawo halin sa maeayo nga lugar sa sidlangan nga mga mayad magbasa kon ano ro kahueugan it mga bituon. 2Pag-abot idto, nagpinangutana sanda sa mga tawo, “Siin ro natawo nga hari it mga Judio? Kat idto pa kami sa amon sa sidlangan hay hakita namon nga nagtunga ro bituon nga paeatandaan nga natawo eon imaw. Ngani nag-adto kami riya sa pagsimba kana.”
3Pagkabati kara ni Haring Herodes hay nabangat imaw pati man ro tanan nga mga tagaJerusalem.#2:3 Abo ro mga kaaway ni Haring Herodes ag nabangat imaw nga magpanggulo sanda ag bue-on imaw sa anang pagkahari ay may natawo eon nga mangin hari. Nabangat ma't-a ro mga tawo ay basi kon ano ro obrahon ni Herodes kanda dahil sa anang kaakig. 4Ngani ginpatawag ni Herodes ro tanan nga mga pinuno it mga *saserdote, ag ro mga *maestro it *Kasuguan ag ginpangutana kon siin matawo ro Maneueuwas nga ginpromisa it Dyos nga ginsueat ku mga propeta. 5Nagsabat sanda, “Imaw hay matawo sa Betlehem nga iya sa probinsya it Judea, ay makaraya ro ginpasueat kato it Dyos sa propeta,
6 ‘Sa tanan nga kabanwahan it Juda,
Ikaw Betlehem hay mangin pinakaimportanti,
tungod inha kimo matawo ro sangka manogdumaea,
nga magatatap sa akong mga katawhan nga *Israel kon tawgon.’ ”#2:6 Micas 5:2.
7Pagkabati karon ni Herodes, ginpatawag nana it hipos rondatong mga mangin-aeamon nga nag-abot sa Jerusalem ag ginsiguro kon kan-o una nga nagtunga ro bituon nga andang hakita. 8Pagkatapos, ginpaadto nana sanda sa Betlehem ag ginbilinan, “Usuya ninyo it mayad ro unga ngaron ag kon hikita ninyo imaw hay balik eagi kamo iya ag sugiran ako agod maadto man ako idto sa pagsimba kana.”
9Pagkatapos it hambae ku hari hay nagpanaw paadto sa Betlehem ro mga mangin-aeamon ngato. Tag nagapanaw sanda, hakita nanda it uman ro bituon ngato nga hakita anay nanda tag idto pa sanda sa andang lugar sa sidlangan. Gin-giyahan sanda ku bituon ngato ag nagpundo rato sa baeay kon siin ro unga. 10Nalipay gid sanda it duro ay hakita nanda it uman ro bituon ngato. 11Pag-abot idto, nagsueod sanda sa baeay ag hakita nanda idto ro unga ag ro anang ina nga si Maria. Nageuhod sanda sa atubang it unga sa pagsimba kana. Anda dayon nga ginbukad ro andang mga maeahaeon nga regalo nga bueawan, insenso ag mira#2:11 Ro insenso ag mira hay maeahaeon ag mahumot nga tagok it mga kahoy. Ro mira hay ginagamit sa pag-obra it mga bueong ag pangbalsamar. Ro insenso ma't-a hay ginabayo hasta mangin pulbos. Kon ginasunog ra, ro aso kara hay mahumot ag ginagamit ra sa pagsimba sa Dyos. ag ginhaead rato sa unga.
12Pagkatapos kara hay ginpadamgo it Dyos ro mga mangin-aeamon ngato nga indi eon magbalik sa baeay ni Herodes. Ngani sa eain nga daean sanda nag-agi pabalik sa anda.
Nagpaeagiw sanday Jose sa Egipto
13Pagkapanaw ku mga mangin-aeamon ngato, ginpadamgo eon man it Dyos si Jose ag may sangka anghel it Ginuong Dyos nga nagpakita kana sa anang damgo. Hambae ku anghel kana, “Bangon ag magpaeagiw eagi kamo ku unga ag ku anang ina idto sa Egipto. Ayaw kamo idto it halin hasta indi ako maghambae nga maghalin eon kamo tungod sa indi magbuhay hay ipausoy eon ni Herodes ro unga agod patyon.” 14Ngani nagbangon si Jose it tungang gabii ag pumanaw sanda ku mag-ina paadto sa Egipto. 15Idto sanda nag-istar hasta namatay si Haring Herodes. Natabo ra agod matuman ro ginpasueat it Dyos sa anang propeta nga, “Gintawag ko ro akong Unga nga magguwa sa Egipto.”#2:15 Hos 11:1.
Ginpapatay ni Herodes ro mga Unga
16Pagkasayod ni Herodes nga ginluko imaw ku mga mangin-aeamon ngato, naakig gid imaw it duro. Ginsugo nana ro anang mga soldado nga pamatyon ro tanan nga mga unga nga eaki sa Betlehem ag sa kaeapit nga mga kabaryuhan nga nagapang-idaron hasta sa daywang dag-on. Daya ra sugo ay suno sa mga mangin-aeamon hay daywang dag-on eon ro nagtaliwan tag primero nandang hakita ratong bituon. 17Ngani natuman gid ro ginpasueat it Dyos kay Propeta Jeremias nga,
18 “Grabi ro ueahab nga habatian sa lugar it Rama ag nagkasubo gid sanda.
Ro mga kaapuhan ni Raquel hay nagainueahab.
Indi sanda maaeam-aeaman
tungod nadueaan sanda it mga unga.” # 2:18 Jer 31:15. Sa isip ni Jeremias, si Raquel hay ginabilang nga ina it tanan nga mga Judio ag ro anang mga unga hay ro mga inapo ku mga unga ni Israel nga nagkaeaperdi ag gin-ulipon sa Babilonya. Kon kay Mateo ma't-a, si Raquel hay kahalimbawa ku mga ina sa Betlehem nga namatyan it mga unga.
Nagbalik Sanday Jose Halin sa Egipto
19Tag idto pa sanday Jose sa Egipto hay namatay si Herodes. Pagkatapos, ginpadamgo eon man it Dyos si Jose ag may sangka anghel it Ginuong Dyos nga nagpakita kana sa anang damgo ag naghambae, 20“Bangon eon ag mag-uli kamo ku unga ag ku anang ina sa inyong nasyon nga Israel, tungod ro mga gustong magpatay sa unga hay nagkaeamatay eon.” 21Ngani nagbangon si Jose ag gindaea pabalik sa Israel ro mag-ina. 22Pero pagkasayod nana nga ro unga ni Herodes nga si Arkelaus ro nagbueos sa anang ama bilang hari sa Judea hay kinuebaan si Jose ngani owa eon imaw idto magbalik. Ginpadamgo eon man imaw it Dyos ag ginhambae nga idto sanda mag-adto sa probinsya it Galilea ag idto mag-istar. 23Ngani nag-adto sanda idto ag idto nag-istar sa banwa it Nazaret. Ngani natuman ro ginpasueat sa mga propeta kato anay parti kay Jesus nga,
“Tawgon imaw nga tagaNazaret.”
Trenutno odabrano:
Mateo 2: akl
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
2024 (Active) Wycliffe Bible Translators, Inc.
