लूका 19
19
यीशु जक्कइय्या के घरा म
1जिद यीशु यरीहों शहरा माहला होई जाया करया। 2ओठ्ठै जक्कई नावाँ का एक बन्दा थिया, जो चूंगी लैणै आळैं का प्रधान अर अमीर थिया। 3वो या देखणा चाहता थिया कि यीशु कोण है। पर भीड़ होणैं किया वजाह थ कोइन देक्खी सख्या, क्योंकि वो गिठ्ठा थिया। 4पिछैं वो उसकु देखणैं वास्तै आग्गै भाज्जीकना एक्की गुलरा के दरखता पर चढ़ी गया, क्योंकि यीशु उसी रस्ते थ होई जाणैं आळा थिया। 5अर जिद यीशु उस जाघ्घा पर पौंहच्या, तो यीशुऐं उप्पर उसकु देक्खिकना कैहया, “हे जक्कई बेग्गा थल्लै उतरी आ। क्योंकि आज मिस्कु तेरे ही घरा म रहणा है।”
6वो जिधी थल्लै उतरीकना खुश होई यीशुआ कु आपकै घरै लेई गया। 7या देक्खी सारे लोक कुढ़िकना कैहणैं लाग्गी गये, “वो तो एक्की पापिया के घरा म महमान बणी रैहणैं चल्या गया!”
8जक्कई उब्भा होई प्रभुआ थ कैहणैं लाग्गी गया, “हे प्रभु, देख हूँ मेरी आद्धी जयजात कंगलैं कु देत्ता हैं। अर अगर किसी थ भी ठगिया थ काइं लिया है तो उसकु च्यार गुणा पुठ्ठा देत्ता हैं।”
9पिछैं यीशुऐं कैहया, “आज इस घरा म उद्धार आया है, क्योंकि या भी अब्राहम्मा का बेट्टा है। 10#मत्ती 18:11क्योंकि इन्सान्ना का बेट्टा गुमोड़ैं कु लाभणैं, अर उनका उद्धार करनै आया है।”
दस सोन्ने के सिक्के
(मत्ती 25:14–30)
11जिद वो इन बात्तैं कु सुणया करे, तो यीशुऐं एक उधाहरण बताया, क्योंकि वो यरुशलेम शहरा क धौरै थिया, अर वो समझते थिये कि परमेश्वरा का राज इभी आणैं आळा है। 12यीशुऐं कैहया कि, “एक बारी एक महान इन्सान राजपद हासील करीकना पुठ्ठा आणैं वास्तै, किसी दूसरे देस्सा म गया। 13अर आपके दस दास्सैं कु बुलाइकना उनकु दस सोन्ने के सिक्के दिए, अर उनथै कैहया कि, ‘मेरे आणैं ताइं काम करीयो।’ 14पर उसके शहरा के रैहणैं आळे उसथै बैर राखते थिये, अर उसकै गैल्लै कुछ बन्दैं क हाथ उनूर कही घलाया कि ‘हम नाही चांहवां कि याह म्हारै पर राज करै।’
15“फेरी इदा होया, कि जिद वो राजपद लेइकना पुठ्ठा आया, तो उनु आपके उन दास्सैं कु जिनकु सोन्ने के सिक्के दिए थिये, आपकै धौरै बुलाया, ताकी पता करै कि उनूर लैण-दैण करीकना क्या कुमाया है? 16पिछैं पैहलै दास्सैं आइकना कैहया, ‘हे मालक, तेरे एक्की सिक्के थ मैं दस सिक्के होर कुमाये हैं।’ 17मालकैं इस्थै कैहया, ‘हे मेरे भले दास, तैं आच्छा काम करया है। तौं थोड़े म ही विश्वास्सा लायक निकळया, तौं इब दस शैहरैं का अधिकारी होंग।’ 18फेरी दूसरा दास आया अर उनु मालका थ कैहया, ‘हे मालक, तेरे एक्की सिक्के थ मैं पाँच सिक्के होर कुमाये।’ 19फेरी मालकैं उसथै कैहया, ‘तौं पाँच शैहरैं क उप्पर अधिकारी होंग।’ 20पिछैं तीसरे दास्सैं आइकना कैहया, ‘हे मालक, देख, तेरा सोन्ने का सिक्का या रैहया, जिस्कु मैं कापड़े म बाध्धी राख्या थिया। 21क्योंकि हूँ तेरै थ डरता थिया। क्योंकि तौं एक ठोस इन्सान हैं, तौं जो नाही धरैं वो चाई लेत्ता हैं, अर जो तौं नाही बीज्जैं वो काट्टी लेत्ता हैं।’ 22मालकैं उसकु कैहया, ‘हे बुरे सेवक, हूँ तेरीयैं ही बात्तैं थ चिकु दोषी ठहरात्ता हैं। तौं मिस्कु जाणता थिया, कि हूँ एक ठोस इन्सान हैं, जो हूँ नाही धरैं वो हूँ चाई लेत्ता हैं, अर जो हूँ नाही बीज्जैं, वो हूँ काटता हैं। 23तो तैं मेरा पैसा ब्याज्जा पर कि कोइन दिया, ताकी हूँ पुठ्ठा आइकना ब्याज्जा समेत लेई लवैं?’ 24पिछैं मालकैं उनथै जो धौरै उब्भे थिये कैहया, ‘वो सिक्का इस्थै लेई लवो, अर जिस्कै धौरै दस सिक्के हैं उसकु देई देवो।’ 25इसपर उनूर मालका थ कैहया, ‘हे मालक, उसकै धौरै तो दस सिक्के पैहलै ही हैं।’ 26#मत्ती 13:12; मर 4:25; लूका 8:18मालकैं कैहया, ‘हूँ थमकु कैहता हैं, हर एक्की उस इन्सान्ना कु जिस्कै धौरै घणा है होर भी ज्यादा दिया जाग। अर जिस्कै धौरै कोइना, उसथै वो भी लेई लिया जाग जो काइं उसकै धौरै है। 27#मत्ती 25:14–30पर मेरे उन बैरीयैं कु जो या कोइ चाहते थिये, कि हूँ उनकै उप्पर राज करैं, उनकु एठ्ठै ल्याइकना मेरै साम्है मारी दवो।’”
यीशुआ का यरुशलेम्मा म आदर
(मत्ती 21:1–11; मरकुस 11:1–11; यूहन्ना 12:12–19)
28इन बात्तैं के कैहणैं के बाद्दाम, यीशु यरुशलेम शहरा वळ उनकै आग्गै जाणैं लाग्या। 29अर जिद यीशु बैतफगे अर बैतनिय्याह इलाक्के क धौरै जैतून नावाँ किया पहाड़िया पर पौंहच्या, तो यीशुऐं आपके चेल्लैं माहलैं दौ चेल्लैं कु या कही घलाया, 30“साम्है के गाँवाँ म जाओ। अर ओठ्ठै पोंहचतैं ही थमकु एक गधिया का बच्चा बधया मिलग, जिसपर कोइ सवार नाही होया, उसकु खोल्लीकना लेई आओ। 31अर अगर थारै थ कोइ बुझ्झै, ‘थम इस्कु कि खोया करो?’ तो कही दियो, ‘प्रभुआ कु इसकी लोड़ है।’”
32घलाओड़ैं कु सारा काइं इदा ही मिल्या, जिदाकि यीशुऐं उनथै कैहया थिया। 33जिद वो उस गधिया के बच्चे कु खोलणै लाग्गे, तो उसके मालकैं आइकना उनथै बुझ्झया, “थम इस बच्चे कु कि खोया करो?”
34उनूर कैहया कि, “प्रभुआ कु इसकी लोड़ है।” 35फेरी वो उसकु यीशुआ धौरै लेई आये, अर उनूर आपके कापड़े उस गधिया के बच्चे पर बिछाई दिये, अर यीशुआ कु उसपर बिसाई दिया। 36जिद यीशु जाया करया, तो लोक रस्ते म आपके कापड़े बिछाणैं#19:36 कापड़े बिछाणैं कापड़े बिछाणैं का मतलब कि वो यीशुआ कु राजा स्वीकार करया करते हैं, या उसकिया महीमा वास्तै करया गया। अर उसके अधिकारा म रैहणैं त्यार हैं। लाग्गी गये।
37अर जिद वो जैतुन्ना किया पहाड़िया किया रूढ़ाणा पर पौंहच्या, तो चेल्लैं कि सारी मण्डळी उन अदभूद बड़े काम्मैं किया वजाह थ जो उनूर देक्खे थिये, खुश होइकना ऊँचिया अव्वाज्जा म परमेश्वरा कि बड़ाई करनै लाग्गी गये।
38“धन्य है वो राजा, जो प्रभुआ के नावाँ थ आवता है, स्वर्गा म शान्ती होवै, अर आसमान्ना म परम-परमेश्वरा कि बड़ाई होवै।”
39भीड़ा म कुछ फरीसी भी उब्भे थिये, उनूर कैहया, “हे गुरू, आपके चेल्लैं कु झिड़क।”
40यीशुऐं उनकु कैहया, “हूँ थमकु कैहता हैं, कि अगर ये चुप भी होई जावैं, तो पत्थर कुक्की पड़ंगड़े।”
यरुशलेम्मा वास्तै यीशुआ का रोणा
41जिद यीशुऐं धौरैं आइकना यरुशलेम शहरा कु देख्या, तो वो उसपर रोई पड़या। 42अर कैहया, “कितना भला होत्ता, कि चिकु शान्ती मिलणैं का रस्ता पता होत्ता। पर हाल्ले वो तेरीयैं आँख्खी थ छप्या है। 43क्योंकि वो दिन आँगड़े जिद तेरे दुश्मण तेरै च्यारैं पास्सै घेरा घाल्ली घेरी लैंगड़े, वो चिकु घेरी लैंग अर च्यारैं पास्सै थ दबांगड़े। 44अर वो थमकु अर थारीयैं उलाद्दी कु माटिया म मिलाई दैंग। वो थारे पत्थर भी पत्थरा पर कोइन रैहैंण दैंवैं। क्योंकि तैं उस मौक्के कु कोइन पहचाण्या, जिद परमेश्वर चिकु बचाणैं आया।”
परमेश्वरा के भवना म यीशु
(मत्ती 21:12–17; मरकुस 11:15–19; यूहन्ना 2:13–22)
45पिछैं यीशु परमेश्वरा के भवना अन्दर गया, अर जो ओठ्ठै लैण-दैण करया करे उनकु बाहर काढणैं लाग्गी गया। 46अर यीशुऐं उन लोक्कैं थ कैहया, “लिखोड़ा है, ‘मेरा घर प्रार्थना का भवन होग।’ पर थमु इस्कु डाकुऐं का अड्डा बणाई राख्या है।”
47 #
लूका 21:37
यीशु हर दिन परमेश्वरा के भवना म उपदेश देत्ता थिया। अर प्रधान याजक अर यहूदी शास्त्री अर लोक्कैं के प्रधान अधिकारी, उसकु मारनै का मौक्का देखते थिये। 48पर उनकु ऐस्सा काइं करनै का मौक्का कोइ मिली सख्या, क्योंकि लोक यीशुआ के वचनैं कु गौर लगाई सुणते थिये।
Trenutno odabrano:
लूका 19: Sansi
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
