ဒေါ ဂုဝ် 8
8
လွင် ဇဝ်ဖြာ ဝီ လှုဝ်း ဒူအီ
1ဝါယ် အန် တီ ဟဲ့ ဟွတ့် နုဝ့် အူ မာယဝ်း ဒီ ဖန် ဂိုဝ် ဆီငဲ၊ ဇဝ်ဖြာ ဝီ လှုဝ်း ဒါ အာနုဝ် တွိုန်။ အန် ဝီ လှုဝ်း ဘော ဂေ ဒူအီ ဘော ဂေ ဒုဝ် ဆတ်ဒါဝါ ဂေ အီ ကွယ် ရိုမ် ဒူပ် အန် ခဲင် ရိုဝ် ဆင်ဖုဝ်။ ဇဝ်ဖြာ မိူဝ် တဲး န့ မိုဝ်း ခုန် တး ဘုတ် ဒဲင် ကာဒါယ် တဲး အိုမ် ဝီ ကြဲ ဒီ ယူမ် လူင်။ 2ပန် တီ အိုမ် အီ တုဝ်း နာ ခြိုမ် ဝီ ဟိတ်။ ဘော မာလုဝ်း ခဲင် ဘ့လေန့် ဝီ ကာဘိတ်။ ဂ့လာယ် ဘော ဝီ ဟး။ 3န့ ဘော ပွိုန် အူ မာယဝ်း ဒီ ဖန် ဂိုဝ် ဆီငဲ၊ အိုမ် အီ ကွယ် ဒဲင် ကာဒါယ် ဝီ ကြဲ ဒီ ယူမ်။ 4ဘော နုဝ့် ဘူ မာဂျီန် ဂိုဝ် ဒီ ဘူ ဆီငဲ၊ ရိုဝ် ဆင်ဖုဝ် တာင် တွိုန် ဝီ ကြဲ ဒီ လူင်၊ ကွယ် ဒဲင် နွန်။ နွန် တီ စိူဝ် နွန် အာရာရာတ်။ 5အိုမ် ယီ ကြဲ ဒီ ယူမ် လူင် ကော ဇမ် ဂိုဝ် မာဂျီန်။ ဒေါ ဇမ် ဆီငဲ လှေး မာဂျီန် ဂိုဝ်၊ န့ ဟဲ့ ပွိုန် ယိုဝ် ကာဒဲ့ နွန်။
6ဘော ဝီ နုဝ့် ပေါ ဖွုန် ဂိုဝ် ဆီငဲ၊ ဒါ အာနုဝ် တွိုန် ဝိုဝ်း မာလုဝ်း ပဲ့ ဟဲ့ ဘူင် အန် ခဲင် ရိုဝ် ဆင်ဖုဝ် တာင် တွိုန်။ 7အန် မိူဝ် ဒိုဝ်း မာကာအ အူ ဒုဝ်၊ ဘ့လေး နာ ရေတ့်၊ တဲး အန် ဘိုန့်။ မာကာအ ယီ ဘိုန့် ဝိဝ်၊ ဘိုန့် ဝေန့်၊ ကော ဇမ် အာခြာဝ် ဟိတ် အိုမ်။ 8ဟဲ့ ဟွတ့် ပန် တီ အာနုဝ် ဝီ ဘ့လေး ဟာဝ် မာဘ့လူယ် အူ ဒုဝ်၊ တဲး အန် နပ် ယုဝ် အိုမ် ဒဲင် ကာဒါယ် ဟဲ့ ဟိတ်။ 9မာဘ့လူယ် တီ ယီ တူ ယိုဝ် ဒူင် ဒီ ပွိုန် စုး။ ဟဲ့ ဟွတ့် အန် ဘော ဝီ တး။ အိုမ် ညှမ် ဟိတ် ဒဲင် ကာဒါယ်။ အာနုဝ် ယီ ဆူင့် ဒဲ အန်၊ မှေတ့် မာဘ့လူယ်၊ တဲး အန် ဝီ လိုပ် ခဲင် ရိုဝ် ဆင်ဖုဝ်။ 10ဝါယ် အန် တီ အန် ဝီ နှဝ့် ပေါ ဘူ ဆီငဲ။ ဟဲ့ ဟွတ့်၊ အန် ဝီ တဲး မာဘ့လူယ် လေး ပေါ အူ စိုပ်။ 11ဆီငဲ တီ ဘာ ဒီ အပ် မာဘ့လူယ် ဝီ တး။ အန် မိူဝ် ကာပ် တး လှာ ဟေ နာမန် အီ လတ့် ကာမာယ်။ ပန် တီ အာနုဝ် ဟဲ့ နပ်၊ အိုမ် ဟဲ့ ဟိတ် ဒဲင် ကာဒါယ်၊ အာဝ် ဟူ မိုဝ်း။ 12ပန် တီ အန် ဝီ နှဝ့် ပေါ ဘူ ဆီငဲ။ ဟဲ့ ဟွတ့်၊ အန် ဝီ တဲး မာဘ့လူယ် လေး။ ခါ နီ မာဘ့လူယ် ယီ တူ ဝီ တး။
13ဒေါ ဟဲ့ နုဝ့် အာဆာက် အာနုဝ် ဒဝ် မာယဝ်း ဒီ အူ ဆီနမ်၊ ဟဲ့ ဇမ် မာဂျီန် လှေး ဆီငဲ လှေး၊ အိုမ် ဟဲ့ ဟိတ် တူတ့် ဒဲင် ကာဒါယ်။ ဒေါ အန် တီ အာနုဝ် တွိုန် ဘော ဝိုဝ်း ကာတု ရိုဝ် ဆင်ဖုဝ် အန်။ တဲး အန် ပွိုန် ဒီ ယွတ် ဒဲင် ကာဒါယ်။ 14ဆီနမ် တီ န့ ဘော ဇမ် မာဂျီန် ဟာအာ ဆီငဲ အာ ဂိုဝ် ဒီ မ့ဘူ၊ ကာဒါယ် ဘော ကာဟဝ်း တူတ့်။
15-16ပန် တီ ဇဝ်ဖြာ ဝီ ကာလာင် ဒီ အာနုဝ် တဝ်း၊ “တဲး မဲ လေး ခဲင် ရိုဝ် ဆင်ဖုဝ် တီ။ ဘော မဲ၊ ဘော အီဘိုန့် မဲ၊ ဘော ဂေ ဂွန် အီမာယ် မဲ၊ ဘော ဂေ အဝ် မဲ၊ တဲး ဘေ လေး ဒွန် အီ။ 17ဘော ဒုဝ် ဆတ် အီ ကွယ် ရိုမ် ဒူပ် မဲ ဘော မာဆိမ်၊ ဂေ ဒုဝ် ဆတ် အီ ကွယ် ခဲင် နာ၊ ဘော ဒုဝ် ဆတ် အီ မွိုန် ဒဲင် ကာဒါယ်၊ တဲး မဲ တဲး ဂေ လေး ဒူပ် မဲ။ တဲး ဂေ ဝီ မိုဝ်း ဂွန်၊ တဲး ဂေ ဝီ ကြဲ ဒီ ကိူန် ဒဲင် ကာဒါယ်။”
18ဇဝ်ဖြာ ဟဲ့ ဟွတ့် ကာလာင် ပါယ် တီ ဂေ ဒွန် အီ ဝီ လေး ခဲင် ရိုဝ် ဆင်ဖုဝ်။ ဘော အာနုဝ် ဘော ဂွန် အန် ဘော အီဘိုန့် အန် ဂေ အဝ် အန်၊ ဂေ လေး တူတ့်။ 19ဘော မာဒုဝ် ပြဲ ဘော မာဆိမ် ဘော ဒုဝ် ဆတ် အီ မွိုန် ဒဲင် ကာဒါယ်၊ အာမျုဝ် ဂေ တီ ဒွန် မျုဝ် ဘော လေး ခဲင် ရိုဝ် ဆင်ဖုဝ်။
20ဝါယ် အန် တီ အာနုဝ် တွိုန် ဝီ ဘူင် ကာစှူင့် လှူ ဒီ ဇဝ်ဖြာ။ ခဲ့ မိုဝ်း မာဒုဝ် ဆတ် အီ မွှိုမ် ဒွန် မျုဝ်၊ အန် ဒိုဝ်း မင် ဒုဝ်။ ဘော မာဆိမ် အီ မွှိုမ် ဒွန် မျုဝ်၊ အန် ဒိုဝ်း မင် ဒုဝ်၊ ဘ့လေး ဒဲင် ကာစှူင့် လှူ ဒီ ဇဝ်ဖြာ၊ ဝီ တဲး န့ ဘဲန် ပီ လှူ အီ ဒုဝ့် ဒီ ငဝ်။ 21ဇဝ်ဖြာ ယီ ယိုဝ် အုး၊ န့ ဘဲန် အုး ငှုန် ဒီ အန်။ အန် ပီ ဝီ တဝ်း၊ “ကူပ် ကာဝေ အုဝ် ဂေ ဒူအီ အီ ကွယ် ဒဲင် ကာဒါယ် ဒွန် မျုဝ်၊ အုဝ် အာဝ် ဟူ ဒိူင် ကာဒါယ် ဒေါ မှဝ်။ အုဝ် ဟဲ့ နပ်၊ ပီ ဇေန့်ဇာ ဂေ ဒူအီ၊ ပီ အိုင် ဂေ၊ န့ တူ အး။ အူ ဆိန့် ဒီ ဒဲ ဂေ၊ နဝ်း ဂေ အာဝ် မွှိုမ်။ မာလဲ၊ အုဝ် ဒီ တူ ဝီ ပျာတ့် ဝဲန် မျုဝ် အီ မိုဝ်း ဖွိုမ် အီ ကွယ် ဒဲင် ကာဒါယ်။ အုဝ် တူ ဝီ ဘူင် ပီ ပဲ့ ဟဲ့ ဘူင် အုဝ် ဇိုဝ် တီ ပေါ အူ ဇေန့်။
22ဆေ န့ ဆီ မိုဝ်း ကာဒါယ် နီ၊ န့ ဒီ မိုဝ်း အာခြာဝ် ဆမ်၊ အာခြာဝ် ဆုဝ့်။ န့ ဒီ မိုဝ်း ခြာဝ် ဒီရဝ် ဘော အာခြာဝ် ဂတ် ဂျီတ်၊ အာခြာဝ် ဆောဒါတ် ဘော အာခြာဝ် ဂတ်။ န့ ဒီ မိုဝ်း ကာတဲ ဆီငဲ ဘော ခဲင် မှိုဝ်၊ ဟာဝ် ပါယ် တီ အာဝ် တူတ့် ဒေါ မှဝ်။”
Trenutno odabrano:
ဒေါ ဂုဝ် 8: pce
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2023, Wycliffe Bible Translators, Inc. All rights reserved.