ဒေါ ဂုဝ် 11
11
လွင် ဂေ ဒူအီ လာယ် ကာယဝ်း
1ဒေါ အန် တီ ဂေ ဒူအီ အီ ကွယ် ဒဲင် ကာဒါယ်၊ ဂေ ဘောကာဂ့လျီတ် ကာလာင် ဂြုဝ်း အူ မျုဝ်။ 2ဒေါ လေး ဟာဝ် ဂေ ဒူအီ နာ လေး ဆီငဲ၊ ဝီ ဟာဝ် ပေါ ပ့လုဝ့်၊ ဂေ ဝီ ယိုဝ် ဂ့လင် အီ ကွယ် ကာတတ် မိူင် ဆီနာ တွိုန်။ ဂေ ဘော ကွယ် ဒူင် တီ။
3ဒူအီ ဂေ တီ ဝီ လာယ် ကာမွုန် တဝ်း၊ “တဲး အေ ဘူင် မာ မာအုတ်၊ တဲး အေ ဂိုမ် ခဲင် ငဝ်၊ တဲး ကော ပ့လူမ်။” ပါယ် တီ ဂေ တာ မာ မာအုတ် တီ၊ ပီ အီ တာ မာဝ်။ ဂေ ဘော တာ ယာင် ပီ အီ တာ ပုန်။ 4ဂေ ဝီ တဝ်း၊ တဲး အေ ဒဲ မိူင် အေ ဘော ဟုဝ် တာင်၊ ဟုဝ် စာ၊ တဲး န့ ကော ဇမ် ဂါင်ဟြာဝ်။ ပါယ် တီ စိူဝ် အေ ဒီ ဘော လိုဝ်း ဟာဝ် ဒွန် ဘ့လာက်။ အေ ဒီ ဘော ပွိုန် ကွယ် ရိုမ်၊ အာဝ် လုဝ် ကာယဝ်း၊ ဟာဝ် ဘဲန် ပ့လုဝ့် ဘဲန် ပ့လုဝ့် ဒဲင် ကာဒါယ်။
5ဒေါ ဘူင် ဂေ ပါယ် တီ ဇဝ်ဖြာ လေး လူင်၊ တဲး အန် ယွတ် ဘော မိူင်။ အန် ဘော ယိုဝ် ဟုဝ် တာင်၊ ဟုဝ် စာ ပီ ဘူင် ဂေ။ 6ဇဝ်ဖြာ ယီ တဝ်း၊ “ဂေ မုး ဒူအီ အူ မျုဝ်။ ဂေ ဘော ကာလာင် ဂြုဝ်း အူ မျုဝ်။ ဆေ ဂေ ဟဲ့ စုး ဒီ ဘူင် ပါယ် တီ။ အူ ဆိန့် ဒေါ တီ နီ ဟာဝ် နာ အာတ့် ဂေ ဒီ ပဲ ဒီ ဘူင် တူတ့် ဒွန် မျုဝ် ပီ ခြာမ် ဂေ။ 7အိုဝ်၊ တဲး အေ လူင်၊ တဲး အေ ကာယဝ်း ဂြုဝ်း ဂေ၊ ကွဲ့ တဲး ဒူအီ လာယ် ထူမ်၊ လာယ် နပ် ပီ တဝ်း ဂေ။”
8ပါယ် တီ ဇဝ်ဖြာ ဘူင် တဲး ဂေ ဒူအီ ဝီ လာယ် ကာယဝ်း ဟာဝ် ကွယ် ဘဲန် ပ့လုဝ့် ဘဲန် ပ့လုဝ့် ဒဲင် ကာဒါယ်။ ဂေ အာဝ် ဟူ ပွိုန် ဘူင် ဟုဝ် စာ တွိုန်။ 9ဒူင် ကွယ် ဂေ တီ၊ ဂေ တဲး န့ စိူဝ် မိူင် ဘာဘဲ။#11:9 လွင် ဒါင် ‘ဘာဘဲ’ ခဲင် ဂြုဝ်း ဟဲဘြဲ မုး ‘ကာယဝ်း’ ခုဝ်၊ ခဲင် မိူင် တီ ဇဝ်ဖြာ ဟဲ့ ကာယဝ်း ဂြုဝ်း ဒူအီ ဒဲင် ကာဒါယ်။ အန် ဘော တဲး ဂေ ဝီ ကွယ် ဒဲင် ကာဒါယ် ဘဲန် ပ့လုဝ့် ဘဲန် ပ့လုဝ့်။
လွင် လှုက်လှာန် အာဆေမ်
10အာနီ ဝီ မုး စိူဝ် ဂေ လှုက်လှာန် အာဆေမ်။
ဒေါ ဟဲ့ နုဝ့် အာဆာက် အာဆေမ် အူ မာယဝ်း ဆီနမ်၊ အန် မိုဝ်း ဂွန် အီ စိူဝ် အာဖာဆာတ်။ ဒေါ အန် တီ ဟဲ့ နုဝ့် အာ ဆီနမ် ဝါယ် အိုမ် တာင် ဟဲ့ ပုန် ကာဒါယ်။ 11ဝါယ် အန် တီ အာဆေမ် တွိုန် ကွယ် ပေါ ဖန် မာယဝ်း ဆီနမ်။ အန် ဘော မိုဝ်း ဂွန် အီမာယ် ဘော ဂွန် အီဘိုန့်။
12ဒါ အာဖာဆာတ် တွိုန်၊ အာဆာက် အန် ဘော နုဝ့် အူယ် ဂိုဝ် ဒီ ဖန် ဆီနမ်၊ အန် ဝီ မိုဝ်း ဂွန် အီ စိူဝ် အာဆေလာ။ 13ဝါယ် အန် တီ အာဖာဆာတ် တွိုန် ဝီ ကွယ် ပေါ ဖွုန် မာယဝ်း ဒီ အူယ် ဆီနမ်။ အန် ဘော မိုဝ်း ဂွန် အီမာယ် ဘော ဂွန် အီဘိုန့်။
14အာဆေလာ တွိုန်၊ အာဆာက် အန် ဝီ နုဝ့် အူယ် ဂိုဝ် ဆီနမ်၊ အန် မိုဝ်း ဂွန် အီ စိူဝ် အာအေဘာ။ 15ဝါယ် အန် တီ အာဆေလာ ဝီ ကွယ် ပေါ ဖွုန် မာယဝ်း ဒီ အူယ် ဆီနမ်။ အန် ဘော မိုဝ်း ဂွန် အီမာယ် ဂေ ဂွန် အီဘိုန့်။
16အာအေဘာ တွိုန်၊ အာဆာက် အန် ဘော နုဝ့် အူယ် ဂိုဝ် ဒီ ဖွုန် ဆီနမ်၊ အန် မိုဝ်း ဂွန် အီ စိူဝ် အာဖေလေ။ 17ဝါယ် အန် တီ အာအေဘာ တွိုန် ဝီ ကွယ် ပေါ ဖွုန် မာယဝ်း ဒီ အူယ် ဂိုဝ် ဆီနမ်။ အန် ဘော မိုဝ်း ဂွန် အီမာယ် ဂေ ဂွန် အီဘိုန့်။
18အာဖေလေ တွိုန်၊ အာဆာက် အန် ဟဲ့ နုဝ့် အူယ် ဂိုဝ် ဆီနမ်၊ အန် မိုဝ်း ဂွန် အီ စိူဝ် အာရေဂူ။ 19ဝါယ် အန် တီ အန် ဝီ ကွယ် ပေါ အာ မာယဝ်း ဒီ ဒိမ် ဆီနမ်။ အန် မိုဝ်း ဂွန် အီမာယ် ဂေ ဂွန် အီဘိုန့်။
20အာရေဂူ တွိုန်၊ အာဆာက် အန် ဟဲ့ နုဝ့် အူယ် ဂိုဝ် ဒီ အာ ဆီနမ်၊ အန် မိုဝ်း ဂွန် အီ စိူဝ် အာဆေရုက်။ 21ဝါယ် အန် တီ အာရေဂူ ကွယ် ပေါ အာ မာယဝ်း ဒီ ဘူ ဆီနမ်။ အန် ဘော မိုဝ်း ဂွန် အီမာယ် ဘော ဂွန် အီဘိုန့်။
22အာဆေရုက် တွိုန်၊ အာဆာက် အန် ဘော နုဝ့် အူယ် ဂိုဝ် ဆီနမ်၊ အန် မိုဝ်း ဂွန် အီ စိူဝ် အာနာဟုဝ်။ 23ဝါယ် အန် တီ အာဆေရုက် ဝီ ကွယ် ပေါ အာ မာယဝ်း ဆီနမ်။ အန် ဘော မိုဝ်း ဂွန် အီမာယ် ဂေ ဂွန် အီဘိုန့်။
24အာနာဟုဝ်၊ အာဆာက် အန် ဟဲ့ နုဝ့် အာ ဂိုဝ် ဒီ ဒိမ် ဆီနမ်၊ အန် ပွိုန် ဂွန် အီ စိူဝ် အာထေရာ။ 25ဝါယ် အန် တီ အန် ဝီ ကွယ် ပေါ အူ မာယဝ်း ဒီ ဂိုဝ် ဒီ ဒိမ် ဆီနမ် ဘော မိုဝ်း ဂွန် အီမာယ် ဘော ဂွန် အီဘိုန့်။
26အာထေရာ တွိုန်၊ အာဆာက် အန် ဘော နုဝ့် ဘူ ဂိုဝ် ဆီနမ်၊ အန် မိုဝ်း ဂွန် အီ စိူဝ် အာဘြာမ်၊ အာနာဟုဝ် ဘော အာဟာရာန်။
27အာ တီ ဟဲ့ မုး လှုက်လှာန် အာထေရာ တွိုန်။
အာထေရာ မိုဝ်း ဂွန် အီ စိူဝ် အာဘြာမ်၊#11:27 အာဘြာမ် ဂါယ် အာဘြာဟမ် မုး အူ ဝီ။ အာနာဟုဝ် ဘော အာဟာရာန်။ အာဟာရာန် မိုဝ်း ဂွန် အီ စိူဝ် အာလူတ်။ 28အာဟာရာန် တွိုန် ယီ ယမ် ဒေါ ဆီ ကွယ် အန် ခဲင် မိူင် အူရ အီ မုး မိူင် ဘြိမ် အန်။ ဘော ဂုန့် အန် အီ စိူဝ် အာထေရာ ဟဲ့ ကွယ် ခဲင် မိူင် တီ။ မိူင် အူရီ တီ၊ န့ ဝီ ကွယ် ခဲင် မိူင် တာင် အီ စိူဝ် မိူင် ကာလာဒေ။ 29အာဘြာမ် ဂေ အာနာဟုဝ် တွိုန်၊ ဂေ ဝီ ခတ် ဒိုဝ်း အီဘိုန့်။ အီဘိုန့် အာဘြာမ် တွိုန် စိူဝ် နာင် ဆာရာယ်။ အီဘိုန့် အာနာဟုဝ် တွိုန် စိူဝ် နာင် မဲက်။ အာဟာရာန် တွိုန် မုး ဂုန့် နာင် မဲက် ဘော ဂုန့် နာင် ယိက်။ 30နာင် ဆာရာယ် တွိုန် ယီ ဟဲ့ မှန်၊ အာဝ် မိုဝ်း ဂွန်။
31အာထေရာ တွိုန် ယီ ယဲတ့် ဂွန် အန် အီ စိူဝ် အာဘြာမ်။ အန် ဒဲ့ ဘော လှာန် အန် အီ စိူဝ် အာလူတ် အီ မုး ဂွန် အာဟာရာန်။ အန် ဒဲ့ ဘော အဝ် အန် အီ စိူဝ် နာင် ဆာရာယ်၊ အီ မုး အီဘိုန့် ဂွန် အီမာယ် အန် အီ စိူဝ် အာဘြာမ်။ အာထေရာ တွိုန် ဒဲ့ ဂေ တီ ဘောကာဂ့လျီတ်၊ တဲး ဂေ ဟာဝ် ရိုမ်၊ လေး ခဲင် မိူင် အူရ အီ ကွယ် ခဲင် ကာဒါယ် မိူင် ကာလာဒေ တွိုန်၊ တဲး ဂေ ဟာဝ် ဇမ် မိူင် ကာနန့်။ ဂေ ယီ ဟာ ဇမ် ဒီ မိူင် ဟာရာန် ဘော ကွယ် ခဲင် မိူင် တီ။
32အာထေရာ တွိုန်၊ အာဆာက် အန် ဟဲ့ နုဝ့် အာ မာယဝ်း ဒီ ဖန် ဆီနမ်၊ အန် ဘော ယမ် ခဲင် မိူင် ဟာရာန် တွိုန်။
Trenutno odabrano:
ဒေါ ဂုဝ် 11: pce
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2023, Wycliffe Bible Translators, Inc. All rights reserved.