Luku 22
22
Zudasi Ne Va Uvei Ta Mala Namaha Seboina Zisas
Matiu 26:1-5,14-16; Maki 14:1-2,10-11
1Ia Mahai Varigharana Ia Bereti Ta Falao Kakato, ta tataniga ka ia ravata va manemanena ia Ghahe Fuludu neke to la zukuru meha. 2Ira hiama ta kenu, nia ira ta vari va kakahe ghini ia vetula beana e ghua, dike puina ridiridi vato ghinina, ta mala va lemeina Zisas, ghe dike maughedi ka ira tehi noni.
3Ghe kaike ghu ka ira tazoi palu mane ta nonofoi, ta va kudo ghini Zudasi Isikarioti, neke to sukui Satana, 4neke lao ghu manei ka ira hiama ta kenu, nia ka ira paudi ira ta kopu ka ia Sugana God e ghua, dike nonogele ghini ghu heve mo ghaghahena ta torai vehana, mala namaha sebo vanadina Zisas. 5Maneri dike va manemane ghini ta va tanai toka ghidi ini Zudasi, dike va bebereana ghu ta mala vanani tabarana. 6Veha mo neke ghua Zudasi, neke tataniga hadui ghu manei ia fafata ta veha mala la namaha seboina Zisas, ta vanadi laona ghu ira ta kana ghini, ka ia fafata ta deo gedi au liloho ghu ira varigharadi noni.
Ia Va Nonoghana Mahai Va Sasaighona
Matiu 26:17-19; Maki 14:12-16
7Neke to dufu tuna ia ravata mala Mahai Varigharana Ia Bereti Ta Falao Kakato, ta mala veala ghidi ira rekahadi sipisipi malana ia Ghahe Fuludu. 8Zisas neke tuhu kenu laori Pita ghe Zone kahe ghuana iahi, “Lao o la va tanai ghu ia mahai va sasaighonana ia Ghahe Fuludu, mala age mahai varigharana ka ghita.”
9“?Hae no kabai ghini ghaina agho, ta la va tanaina ghai?” dike ghua notohina.
10Zisas neke ungene tughuri, “Haghele lao noto ghua ghu ghau Zerusalemu, kaike mane ta hurei kaike zagi ketuhu ta la dufu ghauna ghatu. O leghu laoi ka suga ta la haghele ani manei, 11o la kahe ghua ghu iahi ka ia ta kutamai suga, ‘Ia mane vari va kakahei ne notoho: ?Hae mo mu ia ringifota ta boka meha mahainina ara ia va sasaighonana Ghahe Fuludu, taremehadi nogu mane ta nonofoau idi?’ o la ghua. 12Manei e age hio vona ghau ghatu fate, ka kaike ringifota leghaha tato kusu va tanai. O lao o la va tanai ghu ia mahai va sasaighona ka ghita aianimu.”
13Di lao ghu ka ia malau leghaha, maneri dike la finiri ira vahina leghutau nga, taghe neke kaheriro lama Zisas, dike la va tanai ghu ia mahai va sasaighonana Ghahe Fuludu aianimu.
Ia Va Manemanena Ia *Ghahe Fuludu
Matiu 26:20-29; Maki 14:17-25
14Ne la dufu meha ghu ia toraina fafata mala mahainina ia mahaina Ghahe Fuludu, Zisas nia ira tazoi palu mane nonomoho e ghua, dike nohe hinae dike va tanai mahai varighara ghu. 15Zisas neke va kahe ghidi, “Ara nake puina kabai ghini fuludu ta mahainina mahaina Ghahe Fuludu iahi taremehamu ghau, ghe ga age vavahagala nga. 16A va kahe ghini ghau ghu ara, e deo ke age mahainigunani ara mahai iahi, e vuhai age ghuduvu ghu ka ia Ravutu God.”
17Ianimu tuna ghe neke hioi nga ia panikeni waeni Zisas, neke kudo vehai ghu God, ghe neke kahei nga, “Hioi iahi o tufa ghini ghu ka vari taghomu. 18Vununa ara e deo ke age ketuhu waenigunani, e vuhai la meha ghu ia Ravutu ka God.”
19Ianimu tuna ghe neke hioi nga manei ia kamotona bereti, neke kudo vehai ghu God, ghe neke kipekipei nga neke vanadi lao ghu ira nona mane nonomoho, neke kahei ghu, “Iahi mu tinigu ara, a vanamu ghu ghau. O riva ghini ghu iahi, mala ngana leghuauna ara.”
20Taghe iala molamo leghuna ia va sasaighona, manei neke hioini kaike panikeni waeni, neke kahei ghu, “Waeni iahi mu ia zago ka God malana ia nona foforuna varivehai ta hio va doli ghau ka ia busakagu ta oraha vanamu ghau.
21“Ghe ta nohe taghe mane baere ta ghua iahi ka vari hoataida ghita mu, ia mane ta age namaha seboau ara. 22Ara, ia Tuuna Noni mu, a mala age leme leghuina ia nakai puhi ta gigima ka God. !Ghe ka age lelemeana fuludura ka ia noni ta namaha seboau ara!” 23Ianimu tuna ghe, dike tatanigai vari nonotoho nga ira mane ta nonofoi, taghe ghini hei mo ta boka age riva ghinina mu kokolona leghutau ianimu.
Ira Mane Ta Nonofoi Di Vari Tuufuai Ghini Hei Mo Ta Varangana
24Maneri dike tatanigai age vari tuufuai tuna di ghua, ghini hei mo ka taghodi mu ta age varangana ghatu, ka ia Ravutu ta la meha. 25Ghe Zisas neke va kahe ghidi, “Ka malau iahi peka mu, ira mane ginitaukela nia ira manefaa e ghua, edi mana kaputuri ira nodi noni, edi varituhu ghidi ghu mala riva vanadira ira ta kabai ghidi taghodi. Ianimu tuna ghe taghodi mu ‘ira baere ka ira noni,’ gedi ghua nga, ira mane ginitaukela nia ira ta babatu. 26Ghe taghe maneri oka ghua ghu ghau. Hei ia ta kenu ka ghau mu, geala e hioi ia papala ta au pekani, nia ia ta babatu mu geala taghe kaike noniriva, e ghua. 27?Hei mo mu ta kenuna, ia noni ta nohe hinae ta mahai ghu, ba, ia noni ta va tana vanani mahai? !Ia noni ta nohe hinae ta mahai ghu lamu! Ghe ara mu kaike ghu ma ka hoataimu ghau taghe heiri ira ta mala riva, a ghua. 28Ghau no au va gima taremehagu ara ka ia hohoghona, ka ira leghu mamarutana nga ara. 29Nia taghe neke ghuao la nogu Mama neke vanaguo ia Ravutu a ghua, a vanamu ghu ara ia mana ghatunaina 30ta mala mahai, ketuhu taremehaguna ka ia nogu Ravutu. Ghau o age nohe ghu ghatu ka ira nonohe ginitaukela, faterira ira tazoi palu butubutudi Isiraeli.
Zisas Ne Kahe Kenui, Ne Deo Ge Avohi Ghu Zisas, Ia Ta Age Ghua Pita Ghatu
Matiu 26:31-35; Maki 14:27-31; Zone 13:37-38
31“!Saemoni, Saemoni, o nonomoho! Satana neto hio va malumu, ta mala va sisiva ghini ghau haroharona ghau, ta fotarira ghu ira ta veha ka ira ta muko, taghe ia noni ponogara ta fotari la ira witi ka ira kafudi. 32Ghe ara nake to tarai toka ghinigho Saemoni, mala eka paeke la ghu ia va hohoghona ka agho. Ka ia age holara hihingo agho ta ke fihiki leghu meha ghu ka ara, agho o ke va gigimari ira va hohoghona ka ira keha tahiu mane.”
33Pita neke kahe ghua iahi, “Lod, ara na va tana ta mala laona ka pipiliga taremehau agho, nia mala leme taremehauna, e ghua.”
34Ghe Zisas neke kaheina mu, “Pita, a va kahe ghinigho ghu ara kaike leghutau. Ghe ge age nakele nga ia kokorako ka fufugho ani fugho, agho o age tuufu lito fafata ta deona go avohoau ghu ara.”
35Ianimu tuna ghe neke notohori nga Zisas, “?Ka ia fafata tuhu kave ghau ara ka ia deo ghau rongo, ba mogoha nanapisi, ba sadolo, ta la tuturi beana ghini ghu ia Nonomoho Ta Veha, heve mu leghutau noke la malanga ghinina ghau?”
“Deo ma,” dike ghua ungene tughudira.
36“Ghe ghatunaina mu, o hio nomu rongo, nia mogoha nanapisi, e ghua. !Nia neto deoigho la leboto sisilufu mala magara, o la tatabara ghini ia nou koti, o tabari ghu kaike ghu!” neke ghua ghidi. 37“Vununa ia fafata to meha, mala va ghorevuraina neke kaheio ka ira Kakangava Ta Maduana ghinaguna ara, ia ta ghua iahi: ‘Manei dike taho taremehadi haroma ira noni ta muko,’#22:37 Asaea 53:12 ia ta ghua. Uve, vahina leghutau nga dike kakangava ghidiro ira mane porofeti ghinaguna ara mu, e age hohoghona ghatu.”
38“Lod, palu leboto sisilufu mala magara ta au irahi,” dike ghua ira mane ta nonofoi.
“Iamu to fata ma,” neke ghua ghidi.
Zisas Ne Tarai Ka Ia Vuhukuna Olivi
Matiu 26:36-46; Maki 14:32-42
39Ianimu tuna ghe dike ghahe kaini nga ringifota ani fate, Zisas nia ira mane ta nonofoi e ghua, dike lao ghu ka ia Vuhukuna Olivi taghe ta fani ghua tudu lama. 40Aianimu neke va kahe ghidi ghuana iahi, “O tarai, eka paufu ghau la ghu ia auau.”
41Ghahe kave lao tuna neke ghua ka ia ta boka dufu lao kaike feferai ghahipa, neke la torongaghituturu hinae ghu mala taraina, 42“Mama, noto lao hihingou la agho, o hio kaini ko panikenina vavahagala iahi ka ara. Ghe, riva ghini ia lao hihingo ka agho mo, nga eka ghua ghu ia lao hihingo ka ara.” 43Meha podolo ghini tuna neke ghua kaike engizeli ka malauo God fate, neke va gigimai ghu. 44Ka ia faa vanani muko hihingo nia ngangana neke tarai va gigima laoni ghu Zisas. Ira gotogotona taghe busaka dike ghua kotoro hinaena ka ia kava.#22:44 Keha kusu va kenudi kakangavara e deo ge au ghu papaguaidi 43 nia 44 45Ka ia tetu vonana ka ia tarai, manei neke leghu lao ka ira mane ta nonofoi, neke la finiri ghu epu malasadira ka muko hihingo. 46“?Ne heve ghe, no epu nga?” neke ghua notohorina. “Baghunu o tarai ghu. Ghatu e age paufu ghau ia auau.”
Zudasi Ne Namaha Seboi Zisas Di Sakomi Ghu
Matiu 26:47-56; Maki 14:43-50; Zone 18:2-11
47Ngengene ngama manei, to meha dufu ghu ia varigharana noni, neke batu ghidiro Zudasi, ia keha mane ka ira tazoi palu mane ta nonofoi. Zudasi neke vona lao ka Zisas, ghe neke la vanani nga kaike angoho va vonavona. 48Ghe Zisas neke kahe ghua iahi, “?Zudasi, heve ghe go boka namaha seboau nga ara, ia Tuuna Noni ka kaike angoho va vonavona?”
49Di finini ghu ira keha mane ta nonofoi heve neke dufuna, dike kahe ghua iahi, “?Lod, no kabai ghini ghai mo ta magarana ghai ka nomai leboto sisilufu mala magara idi?” dike ghua. 50Tetu tuna kaike mane ka maneri ge salo kaini ghu ia talinga mautuna ia nona maneriva ia hiama pauna, neke ghua.
51Ghe Zisas neke kahe ghua iahi, “To fata iamu,” neke ghua. Posi laoi tuna ia talingana ia mane, ge va vehai ghu, neke ghua.
52Ianimu tuna ghe neke ngengeneri nga Zisas ira hiama ta kenu, ira manefaadi ira ta kopu ka ia Sugana God, nia ira keha mane babatu dike batu ghini mehao ia varigharana noni aianimu, e ghua. “?Ara mu keha mane ta muko nia ta mamaghuana no ghua ghinagu, ghe no hio ghinagu leboto sisilufu mala magara nia papakure, no ghua nga mala meha sakomo hioauna ara? 53?Neke heve ghe noke deo nga sakomo hioauna ka giliona ia Sugana God? Ara nake au ma aianimu leleghu ravata. Ghe ghatunaina mu nomu fafata ghau, ia fafata ta kurui mana ia nagoromo.”
Pita Ne Tuufu Ta Deona Ge Avohi Ghu Zisas
Matiu 26:57-58,69-75; Maki 14:53-54,66-72; Zone 18:15-18,25-27
54Sakomo hioi tuna Zisas gedi batu ghini lao ghu ka ia sugana ia hiama pauna, dike ghua. Ghe Pita mu neke leghuri neke lao ghu leghuni. 55Ira mane kopu dike va doli totoi ka giliona ia tatalana ta babara, ghe dike nohe liloho nga. Pita neke la holara nohe taremehadi haroma aianimu. 56Kaike ghaseriva neke fini avohi Pita ka ia fegalana totoi, neke tataniga mato dodoghohoti ghu, ghe neke kahe ghua nga iahi, “!Mane iahi neke au taremehana molamo Zisas!” neke ghua.
57Ghe Pita neke tuufu kahe ghuana iahi, “Fotati agho, ara e deo ghe ga avohi ghu mane iamu,” neke ghua ghini.
58Birusuna fafata leghuna ianimu, kaike nonini neke fini fata laoi Pita, neke kahe ghua ghu iahi, “!Agho mu toraina kaike ghu ma ka maneri!” neke ghua ghini.
“!E deo mighei, ara mu e deo!” neke ghua Pita.
59Kaike aoa bana leghuna ianimu, kaike noni neke kahe ghuani iahi, “Mane iahi mu toraina kaike ghu ma ka ira mane ta nonofoi Zisas, vununa manei mu tanina haroma Galili.”
60Ghe Pita neke kaheina mu, “Mighei, ara e deo ga avohi ghegu ghu, heve mo no turi ghinina agho,” neke ghua. Selu laoi ma kahe ghuana ianimu manei, to nakele ghu ia kokorako. 61Ka fafata ianimu, ia Lod neke fihiki neke mato lao ghu ka Pita. Ianimu tuna ghe neke ngana leghui nga Pita, ia ngengene ka Zisas neke kahe ghuao iahi manei, “Ghe ge nakele nga ia kokorako ka fufugho nia fugho, agho o age tuufu lito fafata ta deona go avohoau ghu ara,” neke ghuao manei. 62Ghahe kaini tuna ia tatalana ta babara neke ghua Pita, toraina nakele dudumana ghenana.
Di Puruasimini Zisas
Matiu 26:67-68; Maki 14:65
63Ka fafata iahi, ira mane dike kopu ghinio Zisas, dike age tataniga vela ghini nia botai, dike ghua. 64Dike piha kaputuri ira nahalina, ghe dike dupai nga dike notohi ghu, “?Agho ia porofeti, hei mu neke dupaighono?” dike ghua ghini. 65Va fera ghini lao tuna leghu kokolodi ngengene ta muko nga, dike ghua.
Zisas Ka Kenuna Ia Nonohe Faghina Kamoto Ira Ziu
Matiu 27:1; Maki 15:1
66Ka ia pagasana ia fugho, ira leghu mane babatu nga ka ira noni dike varighara taremehadi ira hiama ta kenu, nia ira ta vari va kakahe ghini ia vetula beana, e ghua. Maneri dike hio laoi Zisas ka kenuna ia Nonohe Faghina kamoto ira Ziu. 67“!Va kahe ghini ghai! ?Agho lamu ia Mesaea?” dike ghua ghini.
Ghe manei neke ungene tughuri, “Geta va kahe ghini ghau ghu ara ghe, ghau e deo go age va hohoghonau ghu. 68Nia nato notoho ghau la ara, ghau e deo go age ungene tughuau ghu ghatu. 69Ghe ghatunaina e vai vona ghu, ia Tuuna Noni, e age nohe ghatu ka ia kame mautuna God ta torai mana.”
70Maneri haroharo dike notoho lao, “?Agho lamu Tuunana ghu God?”
Ungene tughuri tuna neke ghua manei, “Hoghomu mamu, ara, ta ghua nia ghau.”
71“E deo heve turini ta ke kabai ghinina ghita ka ira keha noni,” dike ghua kudokudodira. “Ghita dato nomohi taghodai heve neke kahei ani manei,” dike ghua.
Trenutno odabrano:
Luku 22: kji
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022, Islands Bible Ministries. All rights reserved.
