Matta 15
15
Zzek ba̱tyyi a̱kwop
(Markut 7:1-13)
1Ba̱nyet Farisa a̱yaan bu ba̱malam Truwang ba̱yaan a̱ nyyai a̱ ba di Yesu. Ba yin nyyai Urushalima. A̱ bu ku zzim a̱ hywa, 2“A̱nzan a̱n byyi na̱won pfong nwan na ban dak tssup zzek a zi san di ba̱tyyi njit ba ni? Ba na tssu mbvak mba na ansham a̱ si nat ya kyangya na ba.”
3Yesu a̱ hywa da̱ mba, “Nyin a̱nzan a̱n byyi yi ma̱n dak tssup truwang Ka̱za ji, tssup zzek nyin na? 4Rot Ka̱za a̱ hywa, ‘Tyong a̱tyyi nwan ba̱ a̱naa nwan. A̱yin nu a̱ ma̱n pfwei a̱tyyi nu ko a̱naa nu ni ba ku hywat.’ 5Ma nyin ba zzek di ka̱ a̱yin a̱ byyi kyang a na̱ nin brang a̱tyyi nu ko a̱naa nu ni a̱ kpo yei nying Ka̱za 6a̱ bo byyi tyong a̱tyyi nu ba. A̱mi yin wwon zzek Ka̱za na i tssup zzek nyin. 7Nyin ba̱nyet raai ba̱nyet, Ishaya a̱ntyok tyyei ba̱ryat Ka̱za nu a̱ yin dyat bu ka̱ryong i ba̱ryat ba na̱ yin dyat tazwa nyin ni,
8‘Ka̱za a̱ hywa, ba̱nyet bani a̱ n dyep bu da̱ a̱kpa na̱nu,
ma ndya mba na shyi gba̱gbang ba̱ nzuk.
9Sujada ji ba n yya mi ni byyi kpungtun ba,
rot truwang ba̱nyet a̱mi ba zzek anye nying Ka̱za.’ ”
Nkyang a tyei a̱yin dishishik i
(Markut 7:14-23)
10Yesu a̱ yei ka̱tswa ba̱nyet ka a̱ hywa da̱ mba, “Yi rot a̱pfo nyin gi bvwo ansham. 11Ba kyang a nwai ka̱nu a̱yin a̱mi ku tyei dishishik ti ba, se kyang a wwut ka̱nu nu ka ni nkpa ku tyei dishishik ti.”
12Wwon na̱won pfong Yesu na a̱ nyyai a̱ bu hywa da̱ nu, “A si wu bvwo, kyang a a hywa ni di ku byyan ba̱nyet Farisa ndya ba̱t o?”
13Yesu a̱ hywa da̱ mba, “Ka̱kon ka A̱tyyi nzuk u a̱ shyi Tazwa na̱ tup ni ba ba ni ka̱ wat ba̱ a̱nan na. 14Yi ryok kula ba̱ mba ba. Ba yet ba̱gbyik ba̱nyet kwak ka̱son. Ka̱ a̱ntyok a̱tutwan a̱ kwak a̱ntyok a̱tutwan a̱yaan, sa̱rei mba ba ni kwei i dibvong.”
15Bitut a̱ hywa, “Za tyyei kyang a misali jini zi yet i.”
16Yesu a̱ hywa da̱ mba, “Yi ma̱ ri sang a̱za̱ncyi na di kpikpit ba̱nyet a ni e? 17Yi bvwo baa? Kyang a a̱yin na̱ ya ni ku swrap naat ka̱hwa i si seyak wruk. 18Ma kyang a wwut ka̱nu a̱yin ka ni ku nyyai ka̱yat mpfwa. Ntaka̱i nkyang iya a̱mi tyei dishishik ti. 19Rot nyyai mpfwa ka a̱mi a̱ka̱tuk a̱huhwa nu na̱n wwut, nkpa na tyyi a̱yin nu a̱n hywat a̱yanyet, ko na̱ kan-a̱naan, ko na̱ zzing, ko na̱ bvei diraa, ko na̱ shwwang ba̱nyet. 20Ntaka̱i nkyang ani a̱mi tyei dishishik ti, ma ba̱ryat wi tssu mbvak n za yak, da̱ni di hywa mba na ni, ni tyyi a̱yin dishishik ba.”
Yesu a̱ creng ka̱won a̱mbyring Kan'ana
(Markut 7:24-30)
21Yesu a̱ drok ka̱ yemi a̱ nat ka̱byen Sur bu Saida. 22A̱mbyring Kan'ana a̱yaan i ka̱byen iya a̱ nyyai a̱ ba di Yesu, a̱ bu yrek diwan nu ti tazwa a̱ hywa, “A̱gwam njit, ka̱mbvon Dawuda, hok dizot nzuk. A̱ka̱tuk tswa a̱ nwa ka̱baneyang nzuk, ka sswa ka̱bvung ba̱t.”
23Ma ko ba̱ncwwa Yesu a̱ ku ta mi ba. Na̱won pfong a a̱ hywa di Yesu, “Ku tun na̱ nat ho a̱ za shwu a̱pfo di ka̱nak.”
24Yesu a̱ hywa da̱ mba, “Nzuk, bu di bvon-tsaap Isreila ji brik ni a̱mi ba ni n tom.”
25A̱mbyring a̱ywu a̱ seyak a̱ bu ta̱gbok a̱ta̱ssi Yesu, a̱ hywa, “A̱gwam njit, n brang a̱ra.”
26Yesu a̱ hywa da̱ nu, “Ku myim ba sook kyangya na̱won a̱ krok na̱bvwu mi ba.”
27A̱mbyring a̱ywu a̱ hywa, “E-e, n bvwo a̱mi, ma na̱bvwu na a̱ na tang a̱nying nu a̱ kwei ka̱byen ka̱bvwa ya a̱ntyok ka̱ryi kani.”
28Yesu a̱ hywa da̱ nu, “A̱ra̱mbyring, ntyyi rya nwan na byyi cet. Da̱ nat, ku ni ryi ka̱sak ka an cat i.” Bu ka̱baram iya ka̱won ka a̱ creng.
Yesu a̱ creng ba̱nyet ba̱gingang
29Yesu a̱ drok ka̱bvwa iya a̱ sook a̱mbeyang kei ba̱shekwot Galili nu a̱ si wrak tsok a̱n swrang. 30Ba̱nyet ba tang ndang a̱ cong bu ba̱nyet ta̱ruk nkap bu ba̱nyet a̱tutwan, bu ba̱nyet cong gbuut bu ba̱momom bu ba̱nyet nhywu nzaan ba̱ a̱zi ntaka̱i, a̱ bu ba̱ myyi a̱ta̱ssi Yesu na̱ ba̱ creng. 31Ba̱nyet ba a̱ yya ka̱hat ka̱ram ka ban dyi ba̱momom ba ryat i, ba̱nyet a̱tutwan a̱ cyang, ba̱nyet ta̱ruk a̱tak a̱ creng, ba̱nyet gbuut ba cong ansham, ba dyep Ka̱za Isreila ka.
Yesu a̱ tssung ba̱nyet ncyi kop nyaai
(Markut 8:1-10)
32Yesu a̱ yei na̱won pfong nu na a̱ hywa da̱ mba, “N pfong dizot ba̱nyet tini; nom tat naani ba shyi ba̱ nzuk, di ba byyi kyangya nnanini ba. N cat ba̱ tun cihywat ba, ho ba̱yanyet a̱ bu tsseng a̱ kwi a̱zi ryen.”
33Na̱won pfong a a ku zzim, “Ke zi nin shya kyangya na ka̱yit kani ku maai ka̱tswa ba̱nyet ka ni?”
34Yesu a̱ hywa da̱ mba, “A̱kukwang burodi a̱mang yi byyi?”
Ba hywa, “A̱kukwang a̱tiyring bu hwon ba̱cincong.”
35Yesu a̱ tyyi ka̱tswa ba̱nyet ka a̱ swrang ka̱byen. 36Na̱ sook a̱kukwang burodi na ba̱ na a̱tiyring bu hwon ji, a̱ dyep Ka̱za mi, a̱ sam a̱ wrak na̱won pfong a ba ka ba̱nyet ba. 37Ba ya sa̱rei a̱ swei, na̱won pfong a a̱ kok na̱nshang a̱tiyring a̱n tyyi nkpikpit a a̱n tyei a̱n hywaai. 38Ka̱yat ba̱nyet ka a̱ yin za ni, bu ba̱ntyok ba a̱ yin yet cyi kop nyaai, ba twang ba̱nyring ba bu na̱mawon na a̱n tyyi ba.
39Yesu a̱ si tun ba̱nyet ba ba nat, nu na̱ nwa kpongo a̱ byyek a̱ nat ka̱ma̱nyyi ka̱byen Magadan.
Trenutno odabrano:
Matta 15: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
