Matta 11
11
Na̱won pfong nyyai di Yohana A̱yya Baptisma
(Luka 7:18-35)
1Yesu na̱ bu tyak zzek ba̱pfong nu ba swak bu ba̱hwa, a̱ drok a̱ nat a̱ zzek a̱ bo yya wa'azi i na̱nkrang na̱yaan ka̱ yemi Galili ka.
2Ka̱ram iya Yohana A̱yya Baptisma na̱ shyi a jaru nu a̱ hok kyang a Yesu Kristi na̱ yya ni, a̱ tom na̱won pfong na̱yaan nu di Yesu. 3Ba si zzim Yesu a̱ hywa, “Nwan a̱mi yet a̱tuba nu Yohana na̱ yin tyyei di a̱ bai ni e? Ki zi tot a̱yanyet?”
4Yesu a̱ hywa da̱ mba, “Nde, yi brek si tyyei Yohana kyang a a̱ssi nyin na bu ryi ni, a̱pfo nyin a̱ bo hok ni: 5Ba̱nyet a̱tutwan a̱ nwa cyang, ba̱nyet ta̱ruk nkap a̱ nwa ka̱cyet, ba̱nyet ngbap a̱ creng, ba̱nyet ba a̱ ka̱n kpa diran ni a̱ nwa pfong, nkom ma i tang sso, ba bo byin a̱ yya wa'azi Ka̱sham Ba̱ryat Ka̱za ka a a̱pfo ba̱nyet dizot. 6A̱yin nu na̱ kpa zihywak nzuk ni ba, Ka̱za a̱ ku wwon nda.”
7Ka̱rom ka na̱won pfong Yohana na ba nshyi bvwot a ni, Yesu a̱ nwa ryat bu ka̱tswa ba̱nyet ka tazwa Yohana. A̱ ba̱ zzim, “Ka̱ram ka yi yin wruk nat di Yohana ka̱yit ka ni, a̱nzan yi yin hwa naat si ryi? A̱tankwo na wun ku hywap ee? 8A̱nzan yi yin wruk nat ryi na? Yi yin hwa si ryi a̱yin nu a̱ kup na̱sham ba̱tro ni ee? Ba̱nyet tssup ntaka̱i ba̱tro iya a̱ swat i na̱sa dityok. 9To, yi n tyyei kyang a yi yin wruk nat cyang a ni. A̱ntyok tyyei ba̱ryat Ka̱za a? Ee, to n ya shim mi, yi si ryi a̱tuba nu a̱ ra̱u a̱ntyok tyyei ba̱ryat Ka̱za nu ni ma. 10Rot nu Yohana nu a̱mi ba̱ryat Ka̱za ba ba yin hywa a̱za̱ nu: Ka̱za a̱ hywa, ‘Cyang a̱pfong nzuk u n tssop, nu a̱ ni sook ka̱son nwan a̱ si na̱ yrang ryen na.’ 11Ka̱ryong n ya tyyei: sa̱rei a̱yin nu a̱ ka̱n yet a̱cet i, Yohana a̱ ku ra̱u. Ma a̱yin nu a̱ yet ka̱baan ka ni sa̱rei i Dityok Tazwa ti ni a̱ ra̱u Yohana. 12Nyyai a̱zi nom Yohana na ba̱ka̱tuk ba̱nyet a̱ ka̱n yya di Dityok Tazwa ti hat a̱n ta̱ bvwo ya ka̱son. 13Truwang Musa ji bu sa̱rei ba̱nyet tyyei ba̱ryat Ka̱za ba a̱ bu tat ka̱ram Yohana ka, ba̱ryat Dityok bani a̱mi ba yin dyat. 14Ki yi cat san ba̱ryat mba ba, to, Yohana a̱mi a̱ yet Iliya nu ba yin dyat a̱wwon da̱ a̱ bai ni. 15A̱yin nu a̱ byyi a̱pfo ni, ryok na̱ hok.
16“Ba̱nyet zamani bani a̱ ryi da̱ a̱nzan ni? Ba ryi di na̱mawon na a̱ swat a̱tyekon a̱ shyi an bvwo ni. Ba̱yanyet ba yei ba̱yaan a̱ yya, 17‘Zi ya tyap shwrya, da̱ nyin ba song ba, zi ya sook a̱bvom a̱nak, da̱ nyin ba kun ba.’ 18Yohana a̱ ba a̱ yya a̱zumi, di na̱ sswa nkwwa ba; yi hywa da̱ a̱ byyi a̱ka̱tuk tswa. 19Nzuk Ka̱won A̱neywu am ba, n za n bo n sswa, nyin ba bu yya, ‘Yi cyang a̱ntyok ka̱hwa a̱dyying, a̱sswa nkwwa, a̱rywai ba̱nyet ssang diga̱ndu bu ba̱kpam ba̱nyet.’ Ma a̱za̱ncyi Ka̱za na a̱ tyyei diccu nna a nkyang a na yya ni.”
Na̱nkrang a a̱ rak wrak ndya ni
(Luka 10:13-15)
20Yesu a̱ nwa ssing na̱nkrang na̱yaan na na̱n yya a̱kpok nkyang ka̱hat nu ni, rot ba wwon a̱ka̱tukyya mba nu ba. 21A̱ hywa, “Kaito nyin ba̱nyet Kurazinu! Kaito nyin ba̱nyet Baitsaida! N si bu hywa di ba̱nyet Sur bu Saida a̱mi ba ba̱ yya nkyang ka̱hat nani da̱ nyin ni, se ba wwon a̱ka̱tukyya mba nu a̱ tssup ba̱kikyak ba̱tro a̱ bvei dibvuk a̱ ya wop i. 22Se yi bvwo, ka̱tuk nshirya ka ba ni hok dizot Sur bu Saida a̱ ya ra̱u. 23Nwan meyang Ka̱fa̱rna̱hum, a hwa di a ni ya sook nat i nTazwa a? Kaai, ba ni na̱ brek a̱ ba mi ka̱byen har a̱yabyen. N da nhywa di Saduma a̱mi ban yya nkyang ka̱hat na ba na̱ yya mi ni, se na̱ ri swat a̱ bu tat nom ka̱pfun. 24Se yi bvwo ka̱tuk nom shirya ba ni hok dizot Saduma a̱ ya ra̱u!”
Yi ba i pfwi da̱ nzuk
(Luka 10:21-22)
25Bu ka̱ yemi Yesu a̱ hywa, “A̱tyyi, A̱gwam Tazwa bu ka̱byen, n na̱ dyep rot a tyyei ba̱gbyik ba̱nyet kyang a a nyat ba̱nyet hyong a̱za̱ncyi bu ba̱nyet bvwo ni. 26A̱tyyi, a yya a̱mi i hok ansham nwan.”
27Yesu a̱ bo hywa, “A̱tyyi a̱ ka̱ n dyi kozan kyang. Bam bu A̱tyyi nu a̱yin a̱ bvwo Ka̱won ka ba; a̱mi meyang bam bu Ka̱won ka a̱yin a̱ bvwo A̱tyyi nu ba, se bu ba̱nyet ba Ka̱won ka ka tssa a̱ ni ba̱ tyyei A̱tyyi nu ni.
28“Sa̱rei nyin ba̱nyet ba hwrang bu ncot i, yi ba da̱ nzuk n ni ya ryi pfwi. 29Yi sook ncot nzuk a i myyam da̱ nzuk, rot n yet a̱shushwon a̱yin da n ya cin ba, i gi shya pfwi ka̱yat ndya nyin ka. 30Rot cot a n ni ya ryi ni yet a̱hyom, nna ni n ni ya sak i ni ku swat gba̱ryet ba.”
Trenutno odabrano:
Matta 11: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
