Luka 22
22
Ba rop a̱ ni pyyem Yesu
(Matta 26:1-5; Markut 14:1-2; Yohana 11:45-53)
1Ka̱ram ya nkyangya sang yisti ka a̱ bu ba shishrek, ka̱ram a̱swa ka ban yei Swrap wwon nu ni. 2Ba̱cecet ba̱gado Ka̱za ba bu ba̱malam Truwang ba a̱ cat ryen na ba nin hywat Yesu ni, rot ba yin pfong ka̱wun ba̱nyet ka.
Yahuda a̱ shim a̱ ni wrak Ye
(Matta 26:14-16; Markut 14:10-11)
3Wwon Ka̱ta̱nyrang a̱ nwa Yahuda Iskariyoti, a̱ yin shyi ka̱yat ba̱pfong swak bu ba̱hwa ba. 4Na̱ nat di ba̱cecet ba̱gado Ka̱za ba bu ba̱cecet ba̱nyet cam bat Ka̱za ba, a̱ si ryat ba̱ mba ka̱sak ka na̱ nin ba̱ brang ba pyyem Yesu ni. 5Ba hok ansham ba̱gingang, a̱ shim a̱ ni ku tan krum. 6Yahuda a̱ shim a̱ nwa cat diwat ti na̱ nin ba̱ ryi Yesu ba̱nyet a̱ wi bvwo ni.
Yesu a̱ jyi ya Swrap wwon
(Matta 26:17-25; Markut 14:12-21; Yohana 13:21-30)
7Nom ya kyangya sang yisti a krang ba, ka̱tuk ka ba nin hwak ba̱truk ya Swrap wwon ba ni. 8Yesu a̱ tom Bitut bu Yohana, a̱ hywa da̱ mba, “Yi nat si jyi kyangya Swrap wwon njit a.”
9Ba ku zzim a̱ hywa, “Ke a̱mi an cat zi jyi kyangya na?”
10Na̱ hywa, “Ki, yi nat ka̱yat ka̱nkrang ka, yi ni mon ba̱ a̱yanyet na̱ cwok ka̱ssung ba̱shekwot. Yi ku tssup nat ka̱ryi ka na̱ sin nwa ni. 11Yi hywa da̱ a̱ntyok ka̱ryi nu, ‘Malam a̱ za tom zi bu na̱ zzim bat a na̱ nin swrang bu na̱won pfong nu na a̱ ya Swrap wwon nu ni.’ 12A̱ ni ya tyyei ka̱sham a̱gba̱dang bat tazwa ka ba jyi ni, ka̱ yemi yi nin jyi Swrap wwon nu.”
13Ba nat a̱ si shya kozan kyang ka̱sak ka Yesu na̱ bun ba̱ tyyei ni; ba ma̱n jyi Swrap wwon nu ka̱ yemi.
Ya jibi A̱gwam Yesu
(Matta 26:26-30; Markut 14:22-26; 1 Korinti 11:23-25)
14Ka̱ram ka ka bu yya, Yesu a̱ swrang an tebur ji bu ba̱pfong nu ba swak bu ba̱hwa. 15Yesu a̱ hywa da̱ mba, “N nin byyi rya n za Swrap wwon a̱ni ba̱ nyin, n si nwa sswa ka̱bvung ka. 16N ya tyyei, n bo ni kpo ya ba, se ka̱ram ka kun tyyi ba̱cicrak i Dityok Ka̱za ti ni.”
17Wwon Yesu a̱ sook ka̱bandyet ka a̱ dyep Ka̱za mi, a̱ hywa da̱ mba, “Yi nga ya ka; 18n ya tyyei, n bo n byyi sswa i ka̱ndyet kani ba, se Dityok Ka̱za ba.”
19A̱ bo sook burodi na a̱ bo dyep Ka̱za mi, a̱ sam a̱ ba̱ jyet a̱ hywa, “Rwam nzuk naani [n wrak a̱zi hywak nyin; yi yya gi na ni n yring.” 20A̱mi meyang, ka̱ram ka ba bun tyak kyangya na ni, na̱ sook ka̱bandyet ka a̱ hywa, “Ka̱ndyet kani nka a̱ yet a̱hwai ba̱ryat u Ka̱za ka ryat a̱ sak bu ka̱sa i ba̱sok nzuk ba ni. Mba ba ni ba̱ weyang a̱zi hywak nyin.]
21“Ma a̱yin nu a̱ ni n dyap ni a̱nu ni ba̱ nzuk an tebur ji. 22Ka̱won A̱neywu a̱ ni kwu da̱ni di Ka̱za ka ka̱n dyat ni. Ma kaito a̱yin nu a̱ yet ryen ku wrak a ni a̱ ni sswa ka̱bvung!”
23Wwon ba nwa ya zzim mba-mba, a̱yin nu ka̱yat mba a̱ ni yya hywak iya ni.
Ba ya a̱cecet a̱za̱ a̱yin nu a̱ ni yet a̱gba̱dang mba nu ni
24Ba̱pfong ba a̱ nwa a̱cecet mba-mba tazwa a̱yin nu a̱ ni yet a̱gba̱dang ka̱yat mba ka ni. 25Yesu a̱ hywa da̱ mba “Ba̱gwam ka̱sa bani a̱ yya cet tazwa ba̱nyet mba ba, ba bo ba̱ yei ‘Ba̱rywai Ba̱nyet.’ 26Ma nyiin na ryi a̱mi ba. A̱tuba nu a̱ yet a̱gba̱dang u ka̱yat nyin ka ni, nu a̱ ni yya anye nu a̱ yet ka̱bawon ka; a̱kwak ka̱son nu a̱ brak a̱ tyyi da̱ a̱kwwa ni. 27A̱nyan a̱ ra̱u a̱yaan? A̱tuba nu a̱ swrang a̱ ni ya ni e? Ka̱ a̱tuba nu a̱ shyi i yya kyangya na ni? A̱yin nu a̱ swrang ba ku yya mi ni. Ma nzuk n shyi ba̱ nyin n ya yya dikwwa.
28“Yi shyi ba̱ nzuk sa̱rei ka̱yat ka̱bvung ka n sswa ni; 29da̱ni da̱ A̱tyyi nzuk na̱ ka̱n dop a̱ sak a̱ ni n dyi dityok ni, a̱mi meyang n ma̱ n zzop ba̱ nyin. 30Yi ni ya i sswa an tebur nzuk ji i Dityok nzuk ti, i bu sswak tazwa ba̱kprok dityok n yya sot Isreila swak bu swa shirya.”
Yesu a̱ tyyei ka̱sak ka Bitut na̱ nin ton ku bvwo ni
(Matta 26:31-35; Markut 14:27-31; Yohana 13:36-38)
31“Siman, Siman, ba ka̱n wwon Ka̱ta̱nyrang ka ya me, a̱ ya shang di yak ni. 32Ma n ka̱ na̱ yya a̱duwa Siman, a gi sseng i tyyi rya nwan na an nzuk. Ki a bu brak, a ta̱gbak kpikpit ba̱wumbeyang nwan na.”
33Bitut a̱ hywa, “A̱gwam nzuk, ko a nat a a̱jaru ko dikwu, n ni na̱ tssup.”
34Yesu a̱ hywa da̱ nu, “Ka̱pfun kani a ni ton da a n bvwo ba bvwa ka̱tat, a̱ngbak na̱ ka̱n tyyak ba.”
Dibvwo nkrum ba̱ a̱doma bu ka̱krong A̱kpat
35Yesu a̱ si bo ba̱ zzim, “Ka̱ram yaan ni n yin ya tom ni, yi nat n sang dibvwo nkrum, ba a̱doma, da̱ nyin ba sook a̱kpatak ba, yi si ryin kyang o?”
Ba hywa, “Zi yin dyin kyang ba.”
36Yesu a̱ hywa, “To, naani, a̱yin nu a̱ byyi dibvwo nkrum ko a̱doma ni na̱ sook a̱ breng. A̱yin nu a̱ ma̱n byyi ka̱krong A̱kpat ni ba, na̱ ryap a̱tro nu a̱ ga n san. 37Rot n cat yi bvwo: ba̱ryat Ka̱za ba a̱ hywa, ‘Ba ku mon bu ba̱ka̱tuk ba̱nyet,’ a̱ ni cong a̱ bu ba ba̱cicrak a nzuk. Kyang a ba̱ryat Ka̱za ba hywa ni ni cong ba̱cicrak.”
38Ba̱pfong ba a̱ hywa, “Na̱krong A̱kpat na̱hwa a̱naa ni, A̱gwam.”
Na̱ hywa, “To, na maai.”
Yesu a̱ yya a̱duwa i dihwan Zeitun
(Matta 26:36-46; Markut 14:32-42)
39Yesu a̱ wruk i ka̱nkrang ka, a̱ nat i dihwan Zeitun da̱ni di na̱ nan yya ni, ba̱pfong ba a̱ nat ba̱ nu. 40Na̱ bu si tat ka̱rek ka a̱ hywa da̱ mba, “Yi yya a̱duwa ho yi bu kpa i ka̱me.”
41A̱ ba̱ wwon ka̱ yemi a̱ shek di ka̱neyak ta kpang ni a̱ ta̱gbok a̱ yya a̱duwa, 42a̱ hywa, “A̱tyyi nzuk, ki a ryi ku myim, a n tun a ka̱bandyet ka̱bvung a̱ni. Ma ba kyang a n cat i a ni n yya mi ba, seko kyang a a ryi ku na̱ myim ni.” [ 43A̱pfong Ka̱za a̱ nyyai Tazwa a̱ bu ku tyyi cet rya. 44Na̱ shyi i ka̱bvung na̱ ya ka̱son ba̱ a̱duwa nu, ka̱ra̱hywu ka kyrep a̱ kwei ka̱byen anye ba̱sok.]
45Na̱ bu drok ka̱bvwa a̱duwa nu ka a̱ si shya ba̱pfong ba, ba shyi nda rot ndya mba na byyan. 46Na̱ hywa da̱ mba, “A̱nzan a̱ ya ba yin shyi nda? Yi ta̱za i yya a̱duwa ho yi bu kpa i ka̱me.”
Ba ba pyyem Yesu
(Matta 26:47-56; Markut 14:43-50; Yohana 18:3-11)
47Yesu a̱ ka̱n tyak ba̱ryat ba ba, a̱tswa ba̱nyet a̱ nyyai a̱ ba. Yahuda, nu a̱mi a̱ yin kwak ka̱son ka, a̱ ma̱ yin shyi i ba̱pfong swak bu ba̱hwa ba. A̱ seyak a̱ bu krum Yesu. 48Yesu a̱ hywa da̱ nu, “Ha̱ba̱, Yahuda, di krum a̱mi a nin wrak Ka̱won A̱neywu kaa?”
49Ka̱ram ka ba̱pfong ba ban dyi kyang a ba cat yya bu Yesu ni, ba zzim Yesu a̱ hywa, “A̱gwam, zi bvwa na̱krong njit aa?” 50A̱tuba a̱yring ka̱yat mba a̱ tyyak a̱kwwa A̱gba̱dang Gado Ka̱za nu, a̱ tyet pfwo bvuk yak a.
51Yesu a̱ hywa, “To, ba maai a̱mi.” A̱ tyyi bvak a a̱n da pfwo na ku creng.
52Yesu a̱ hywa di ba̱cecet ba̱gado Ka̱za ba, bu ba̱cecet ba̱dogari bat Ka̱za ba, bu ba̱nekwo ba a̱ ba ku pyyem a ni, “A̱nzan a̱ bo yet a̱nying ba n pyyem bu na̱krong bu shan anye n brak n tyyi a̱kaat o? 53N shyi ba̱ nyin i bat Ka̱za na kozan ka̱tuk; a̱nzan a̱n ya bvwo n pyyem a? Ma ka̱ram nyin ka a̱nka ni; ka̱ram cet ndyin a̱nka ni.”
Bitut a̱ ton bvwo Yesu
(Matta 26:57-58, 69-75; Markut 14:53-54, 66-72; Yohana 18:12-18, 25-27)
54Ba pyyem Yesu a̱ nat ba̱ nu a̱ si nwa a̱gbang A̱gba̱dang Gado Ka̱za ka. Bitut a̱n tssup gba̱gbang. 55Ba kai rong ka̱yat a̱katyyi ka̱ryi ka. Bitut a̱ si swrang bu ba̱nyet wei rong ba. 56A̱kwwa ka̱neyang a̱yaan a̱ ku ryi na̱ swat ka̱rek ndong ka, ka ku sak a̱ssi, a̱ hywa, “A̱tuba a̱ni ma a̱ bu shyi bu Yesu.”
57Bitut a̱ ton a̱ hywa, “Kaai! Ka̱neyang, n ku bvwo ba ma.”
58Ka̱baram ba̱cincong a̱ntyok a̱yaan a̱ bo ku ryi a̱ hywa, “Nwan ma a shyi ba̱ mba.”
Bitut a̱ hywa, “Kai! Nzuk ba”
59Ka̱baram ba̱cincong brak a̱ntyok a̱yaan a̱ bo ku sseng di cet a̱ hywa, “Ko ba hok a̱ yya ni, a̱ntyok a̱ni a̱ bu shyi ba̱ nu, rot a̱ wa ma̱n yet a̱ntyok Galili.”
60Ma Bitut a̱ hywa, “N bvwo kyang a a ryat i ba ma.”
Na̱ bu hywa a̱mi, a̱ngbak a̱ tyyak. 61A̱gwam Yesu a̱ brak a̱ cyang Bitut. Bitut a̱ yring ka̱sak ka Yesu na̱ ka̱n ku tyyei da̱ a̱ ni ton a̱ta̱tuk ka na̱n ku bvwo a̱ bvwa ka̱tat a̱ngbak na̱ ka̱n tyyak ba. 62Bitut a̱ wruk a̱ si kun ba̱gingang.
Ba yya Yesu ryihywat a̱ ku tsot
(Matta 26:67-68; Markut 14:65)
63Ba̱nyet ba a̱ yin cam Yesu ni a̱ ku zzang a̱ ku tsot. 64A̱ ku rop a̱ssi na a̱ hywa da̱ nu, “Tyyei a̱yin nu a̱ na̱ zzu ni.” 65A̱ ku ryat a̱ka̱tuk a̱nyyi ba̱ryat a̱yaan.
Ba nat bu Yesu ka̱rek shirya
(Matta 26:59-66; Markut 14:55-64; Yohana 18:19-24)
66Ka̱ntson ka bu tat, ba̱nekwo ba̱nyet Yahuda ba ba tung bu ba̱cecet ba̱gado Ka̱za ba bu ba̱malam Truwang ba, ba nat bu Yesu a̱katyyi mba. 67Ba hywa da̱ nu, “Zi cat i bvwo, nwan a̱mi yet Kristi nu o?”
Na̱ hywa da̱ mba, “Ko n ya tyyei, yi ni shim ba. 68Ki n bo ya zzim kyang, yi ni n tyyei ba. 69Ma naani ba̱nyying yi ni ryi Ka̱won A̱neywu ka ni wrak a̱ swrang an bvak yak A̱gba̱dang A̱gwam Ka̱za.”
70Ba hywa da̱ nu, “Ashe, nwan i yet Ka̱won Ka̱za kaa?”
Na̱ hywa da̱ mba. “Yi hywa ansham! Nzuk a̱mi!”
71Ba hywa, “Zi bu cat shaida zaan ba, zi hok ma da̱ a̱pfo njit kyang a na̱ ryat i.”
Trenutno odabrano:
Luka 22: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
