Yohana 5
5
Yesu a̱ creng a̱yanyet a̱mbeyang dudung ba̱shekwot
1Ka̱ram ka bu seyak, Yesu a̱ nat Urushalima rot a̱swa a̱yaan a̱nying ba̱nyet Yahuda. 2Ka̱rek ka̱yaan a̱n shyi ka̱ yemi ba yei Ka̱nu Nwai Bvon-tsaap. Dudung ba̱shekwot yaan n shyi, ba kpo yei zi ba̱nyet Yahuda na Baitasda. Ba kpo krang di gra tsson. 3Ba̱nyet nhywu ba̱gingang a̱ yin shyi ka̱ yemi a̱ myyi -- ba̱nyet a̱tutwan bu ba̱nyet ta̱ruk nkap. [Ba ri tot nrung ba̱shekwot ba, 4rot ka̱ram a̱ yin shyi a̱pfong Ka̱za nu a̱ ri ba a̱ bu nrung ba̱shekwot ba; a̱yin nu a̱ yet ka̱son a̱n nwa ni, kozan nhywu a̱ ku yya a̱ ni creng.] 5A̱yanyet a̱ yin shyi ka̱ yemi a̱ ka̱n yya a̱rya nswak ntat ba̱ninai na̱ shyi an hywu na. 6Yesu a̱ ku ryi a̱ bvwo a̱ ka̱n da̱de na̱ shyi an hywu na, a̱ hywa da̱ nu, “A cat creng o?”
7A̱ntyok nhywu nu a̱ hywa, “A̱nyan a̱n nyet na̱ byyi a̱ ni n sook a̱ nat i dudung a? Kozan ka̱ram ki ba nrung ba̱shekwot ba kyi, to ki n ta̱za naat se n si shya a̱yanyet na̱ yet ka̱son nzuk a̱ si nwa.”
8Yesu a̱ hywa da̱ nu, “Ta̱za i sook kikyak nwan ji i cong.” 9Bu i ka̱baram na̱ creng, a̱ sook kikyak nu ji a̱ brak a̱ rot.
Ba yin yi-yya na ni ka̱tuk A̱sa̱ba̱t. 10Rot a̱mi ba̱cecet ba̱nyet Yahuda ba a̱ hywa da̱ a̱yin nu Yesu na̱ creng ni, “A bvwo di ka̱tuk A̱sa̱ba̱t a̱nkaa ni baa? Truwang njit ji n bvwo a cot kikyak nwan ji.”
11Na̱ hywa da̱ mba, “A̱yin nu a̱ n creng ni, nu a̱ hywa di n sook kikyak ji n cong.”
12Ba bo ku zzim a̱ hywa, “A̱nyan a̱mi a̱ na̱ tyyi sook kikyak ji cong?”
13Ma a̱yin nu ba creng ni a̱ bvwo a̱yin nu a̱ ku creng ni ba, rot ba̱nyet a̱ yin shyi ba̱gingang Yesu a̱ brak a̱ nwa ka̱yat mba a̱ brik.
14Ka̱baram ba̱cincong Yesu a̱ ku shya i bat Ka̱za na a̱ hywa da̱ nu, “A ryi a creng. Da̱ ryok a̱ka̱tukyya nwan nu; ka rak, kyang a ni na̱ shya ni ni ra̱u nna ni.”
15A̱ntyen a̱ywu a̱ drok a̱ si tyyei ba̱cecet ba̱nyet Yahuda ba di Yesu nu a̱ ku creng. 16Rot a̱mi ba̱nyet Yahuda na n nwa yya di Yesu, di ho a̱ creng a̱yin ka̱tuk A̱sa̱ba̱t ka. 17Yesu a̱ hywa da̱ mba, “A̱tyyi nzuk a̱ yya pfong kozan ka̱ram; rot a̱mi nzuk n ma̱n yya.”
18Ba̱ryat bani a̱ si tyyi ndya ba̱cecet ba̱nyet Yahuda na si byyan nta̱mak. Ba nwa hwa ryen ku hywat. Ba bu ka̱tuk A̱sa̱ba̱t na̱ byyan ba, har a̱ bo ya yei Ka̱won Ka̱za, wato a̱ breng diccu nu ba̱cicrak bu Ka̱za.
Cet na Ka̱won Ka̱za ka byyi ni
19Yesu a̱ hywa da̱ mba, “Ka̱ryong a̱mi n ya tyyei: Ka̱won ka a̱ yya kyang a yet nying diccu nka ni ba, se kyang a ka ryi A̱tyyi nka nu na̱ yya ni. Kyang a A̱tyyi nu na̱ yya ni, nkpa Ka̱won ka ka ma̱n yya. 20Ka̱sak ka A̱tyyi nu na̱n gwai Ka̱won ka ni, nkpa n byyi na̱n ka̱ tyyei sa̱rei nkyang a na̱ yya ni. A̱ ni ka̱ tyyei nkyang a ra̱u a̱mi ni ma ka yya, yi gi yya ka̱hat ji ansham. 21Da̱ni da̱ A̱tyyi na̱n ssep ba̱nyet ka̱n kwi a̱ ba̱ jyet sucet ni, a̱mi Ka̱won ka ka ma̱n jyet ba̱nyet ba ka hok ansham mba ni sucet. 22Da̱ A̱tyyi nka nu a̱mi a̱ yya shirya ji ba. A̱ wwon shirya ji sa̱rei an bvak Ka̱won na, 23ba ga ka̱ tyong ka̱sak ka ban tyong A̱tyyi nu ni. A̱yin nu a̱ tyong Ka̱won ka ni ba a̱ tyong A̱tyyi nu a̱ tom Ka̱won ka ni ba.
24“N ya tyyei ka̱ryong: a̱yin nu a̱ hok ba̱ryat nzuk ba a̱ san a̱yin nu a̱ n tom ni a̱ tyyi ka̱yat rya nu ka a̱ byyi sucet wityak. Ba bo byyi ku yya shirya ba, rot a̱ ka̱n shot dikwu a̱ nwa sucet. 25N ya tyyei ka̱ryong: ka̱ram a̱n shyi a̱ ri bai, ka wa ka̱n ba ma, ka̱ram ka ba̱nyet ba a̱ ka̱n kwi ni ba nin hok diwan Ka̱won Ka̱za. Ba̱nyet ba a̱ hok ni a̱ ni shya sucet. 26Da̱ni di A̱tyyi nu na̱n byyi sucet mbvak nu ni, a̱mi na̱n wwon Ka̱won ka ka ma̱n byyi sucet mbvak nka. 27A̱ bo wrak Ka̱won ka cet ka yya shirya, rot nka a̱ yet Ka̱won A̱neywu. 28Yi ryok yya ka̱hat ba. Ka̱ram a̱n shyi a̱ ri bai ba̱nyet ba a̱ shyi ka̱yat a̱byyi ni a̱ ni hok diwan nka ti 29a̱ wwut nyyai ka̱yat a̱byyi ka. Ba̱nyet ba a̱ ka̱n yya ansham ni a̱ ni ta̱za a̱ kaat, ba̱nyet ba a̱ ka̱n yya a̱ka̱tuk ni a̱ ni ta̱za ba ba̱ yya shirya.”
Ba̱nyet ba a̱ yet shaida Yesu ni
30“Nzuk diccu nzuk n maai n yya kyang ba. Shirya ji n yya ni n za̱ yya ka̱sak ka Ka̱za kan hywa di n yya ni; rot a̱mi shirya nzuk ji yet a̱tsatsak nji, rot n yya kyang a n myim ni ba se kyang a a̱tuba nu a̱ n tom ni na̱ cat i.
31“Ki n yya shaida diccu nzuk, shaida nzuk ji byyi cet ba. 32Ma a̱yanyet a̱n shyi a̱ yya shaida nzuk, brak n bvwo kyang a na̱ ryat tazwa nzuk ka ni yet ka̱ryong. 33Yi tssop ba̱pfong nyin di Yohana, na̱ si wrak shaida tazwa ka̱ryong. 34Nzuk n cat ba̱nyet a̱ yet shaida nzuk ba. Ma n ya tyyei nkyang ani yi gi shya sucet. 35Yohana a̱ yin dyi di fitila ni, a̱ ya tyyi ka̱bvwa sai yi hok ansham nka i ka̱baram ba̱cincong. 36Ma nzuk n byyi shaida ji n sseng i ni, i ra̱u shaida ji Yohana na̱ yin wwat i ma. Mpfong a n yya ni nna yet mpfong a A̱tyyi nu na̱ n dyi n ni yya n tyak ni. Na tyyei ka̱sak ka A̱tyyi nu a̱mi a̱n n tom ni. 37A̱tyyi nu a̱ n tom ni a̱ ma̱n yet shaida nzuk. Yi ka̱n hok diwan nu ba, da̱ nyin ba ka̱n dyi a̱ssi nu ba. 38Ba̱ryat nu ba ba bo ya kaat sak an dya nyin na, rot yi shim a̱yin nu a̱ ku tom ni ba. 39Yi twang ba̱ryat Ka̱za ba, rot yi hwa di ba ni ya ryi sucet wityak. Nzuk a̱mi brak ba bo ryat. 40Ma nyin ba shim i ba da̱ nzuk i gi shya sucet ba.
41“N cat ba̱nyet a̱ n dyep ba. 42N ya bvwo sa̱rei. N bvwo yi cat Ka̱za di ndya nyin na ba. 43N ba ka̱yat cet A̱tyyi nzuk, nyin ba bu n dak. Ma ka̱ a̱yanyet a̱ nyyai a̱ ba ba diccu nu, a ryi yi bu ku san. 44Yi cat ba̱nyet a̱ ya dyep, ma yi cat Ka̱za a̱ ya dyep ba; yi bu yya ni i ni n dyi ndya nyin na? 45Yi ryok hwa di n naat si ya tyyak da̱ A̱tyyi nzuk u ba. Musa a̱mi a̱ ni ya tyyak, Musa nu yin tyyi ndya nyin na ni. 46Yi da nshim ba̱ryat Musa ba di ka̱ryong, se nyin ba shim kyang a n ya tyyei ni, rot Musa a̱ yin jem nkyang tazwa nzuk. 47Ma rot yi rak shim kyang a Musa na̱ yin jem ni, yi ni yya ni n shim ba̱ryat nzuk ba?”
Trenutno odabrano:
Yohana 5: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
