Mata 7
7
Kəzeŋ va gada
(Luk 6.37-38, 41-42)
1«Akwar ta paɗ yaŋ takwar ka ndah matəɗa ma a yaŋ ndana hay bay, afa Zlav a ta təɗakwar ma yaŋ. 2Eve cəv masa akwa təɗec ma a yaŋ ndana hay nesey sə, ac ta təɗakwar ma a yaŋ ara aŋga ana may. Agwada masa akwa ŋgə mezlər ava aŋga sə, a ta njah ka agwada ta maləvakwar. 3Ke pə ndey fe kəzeŋ dapa ndey ta malamakw, anjəkar gada mazlakava ana dapa ndey takaa ɓa, amaa ka ɗaliya aabay sə, mafay te mey? 4Naa ka gwaɗa malamakw, “Ɗagay, ya kəsakaɗ kəzeŋ dapa ndey takaa avəda”, anjəkar gada mazlakava ana dapa ndey takaa ɓa sə, a ŋgana gwagumaw? 5Kaa, nda masa neneŋ ecew dapa ma! Kəsa gada dapa ndey takaa avəda ɗagay, afa ka ra wala ndey ceɗ ceɗ ka ta kəs kəzeŋ dapa ndey ta malamakw.»
Gavda hay fəma te vetem hay
(Luk 11.9-13)
6«Akwar te vecen jə te mevə kad Zlavay sə, kad gəda hay bay, akwar te kezlecen gavda takwar hay kad fəma te vetem hay bay, afa ac ta mbərasla avəda, ac te vehekey, ac da hacakwar bay.»
Macana mbahw Zlav Papaŋ
(Luk 11.9-13)
7Manəkaw, ac ta vakwar, mayahaw, akwar ta ŋgata avəda, makaɗ ma ta way, ac ta wunakwaɗay, 8afa kwa waawa manəka jene sə, aca vana, nda masa a yahiya sə, a ŋgatiya, kad nda masa makəɗa ma ta way sə, ac ta wunanay. 9Daha aabay saya, ndana wa deveŋ akwar, daha wudiya a nəkafa peŋ, a ta vana kekeŋ? 10Daha aabay, wat ana a nəkafa kəlef, a ta vana zezekw? 11Daha akwar ndah suwe hay, akwa sən mav jene mambəla ana kad wudeh takwar, naa Papaŋ takwar da baymaləvaŋ e te vec jə mambəla ana kad ndah manəkafa jene hay sə, dəɓa ecuwey?
Meŋgə jene kad ndana
(Luk 6.31)
12Ara nesey, jene hay fakwan masa akwa wal ndana hay ac da ŋgakwaɗay sə, akwar ava yaŋ takwar ana meŋgec jeŋ ana hay kad ec may, nesey masa ma majawa ta Muyiz va ɗelewer hay ta ndah mehwedek ma hay ta sasərakiya.
Cəv hay ecew
(Luk 13.23-24)
13Mesehw jaka pa ma ta way melez ana, afa ma ta way mabaŋ ana va cəv mefetete ana aca hwad nda kad pa mazay. Ndana hay gaa masa ece sehw jaka pa. 14Amaa ma ta way masa a hwad nda kad pe mesfeney sə, aŋga lezke, cəv te medə kad pe mesfeney ana sə, njezləke.
Wudez va wudiya ana hay
(Mat 12.33; Luk 6.43-44)
15«Mep leŋgesl fa ndah mapana yaŋ tec ka ndah mehwedek ma masa ece dek kad varakwar ara təmak hay, anjəkar dapa eceŋ sə, ac gəda hay te ley mapəɗa jene. 16Akwar te sənec sə, dapa mezlər tec hay. Ndana a zlafa maŋgal wut te rezeŋ fe ndərem ɓa geyey? Daha aabay, ndana a zlafa maŋgal maftay fe tetev ɓa geyey? 17Ara nesey, wudez mambəla ana fakwanay sə, e heyek wudiya ana hay mambəla ana may. Amaa wudez masa mambəla ana aabay sə, e heyek wudiya ana hay mambəla ana aabay may. 18Wudez mambəla ana sə, a zlafa meheyek wudiya ana hay mambəla ana aabay sə, aabay, kwa daha aabay wudez masa mambəla ana aabay sə, e heyek wudiya ana hay mambəla ana sə, aabay. 19Wudez fakwan masa e heyə wudiya ana mambəla ana aabay sə, aca ŋgəla avəda, aca kazlaɗ pa kwakwaw. 20Ara nesey, akwar te sənec sə, dapa mezlər tec hay.»
Ndah masasəraka jene metehwe ana
(Luk 6.46; 13.27)
21«Ndah masa ece zeliyey: “Bay Mazlakava, Bay Mazlakava” sə, aca husa te mesehw pa Wunam ta bay da baymaləvaŋ hay bay, a lada aca ŋgə jə masa Papa da baymaləvaŋ a waya. 22Ndana hay gaa ec te gweɗiyey dapa pas ana ŋgesey: “Bay Mazlakava, Bay Mazlakava, andə ka hwad ma eve mezel takaa aabay geyey? Andə ke mbesec damkwaw hay eve mezel takaa aabay geyey? Andə ke ŋgə cah hay mabay eve mezel takaa aabay geyey?” 23Ara nesey, ye te gweɗeceŋ, “Kwa ya ka sənakwar aabay! Meŋgəliyey vaw, akwar ndah maŋga jə masa e teh bay.”»
Malam way da yaŋ pəra
(Luk 6.47-49)
24«Ara nesey, kwa nda wula wula masa a cəna ma hay masa ye gweɗek nesey, e ŋgə mezlər ava aŋga sə, aŋga ara nda eve leŋgesl masa ka lama way tata da yaŋ pəra. 25Yam ka slay, ke vevə wayam wayam, bərgadaŋ ke ŋgey kad yaŋ way ana, amaa way ana ke mbeɗ aabay, afa dar ta way ana matatəha da yaŋ pəra. 26Asaya, kwa nda wula wula masa a cəna ma hay masa ye gweɗek nesey, e ŋgə mezlər ava aŋga aabay sə, aŋga ara nda masa leŋgesl pahata, malama way dapa wurɓaɓay. 27Yam ka slay, ke vevə wayam wayam, bərgadaŋ ke ŋgey kad yaŋ way ana, way ana ka mbəɗata, ka pəlahata pəlah pəlah.»
Gədaŋ te Yesu
(Mar 1.22; Luk 4.32)
28Masa Yesu ka ndəvda mesesərekec ndana hay cay sə, miya hay ec ke rəzlec macəkuma bay da yaŋ mesesərek tata ana, 29afa e sesərekec ndana hay sə, ara nda masa aŋga ava gədaŋ, bəna ara ndah mesesərekecen ma majawa kad ndana hay bay.
Trenutno odabrano:
Mata 7: CUVnt
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022 CABTAL
