Mata 3
3
Zaŋ Baatis
(Mar 1.2-6; Luk 3.1-6; Zaŋ 1.19-23)
1Dapa manah hay ana ŋgesey, ndana ɓa mezel Zaŋ Baatis, e ŋguzdek vaw, a bəzad ma dapa yaŋ ta səɓak dapa vavara te Zudey. 2E gweɗ, gege: «Maŋgwada rav takwar, afa Meŋgə bay ta Zlav da baymaləvaŋ hay sə, ka husakata cay.» 3Zaŋ ana sə, aŋga nda masa Izay nda mehwedek ma zleezle ke gweɗ da yaŋ ana, gege: «Uway e cənek dapa yaŋ ta səɓak, e gweɗ, gege: “Maləmadana cəv kad Bay Mazlakava, maləmadan cəv hay wuje mambəla ana nduwak nduwak”.» 4Zaŋ aŋga ava rəkwat te ŋgwec ta zlagumay fa vaw, ŋgwah tata majawa ava kanda ta mbal, a ndə sə, yakw va ŋgbam de ley. 5Ara nesey, ndah de Zeruzelem, dapa vavara te Zudey fakwanay va dapa vavara masa zef ava wayam te Zurdeŋ ana fakwanay, ec ke dey kad vara vaw. 6Ec ke ŋguzdek mebər tec hay, Zaŋ may, ke ŋgec beetem da wayam te Zurdeŋ ana.
Matal ma ta Zaŋ kad pa maŋgwad rav
(Luk 3.7-9)
7Masa Zaŋ e welec Farisa hay va Saaduki hay#3.7 Farisa hay va Saaduki hay Ac cuweeney gəva ta ndah makəsparav te Zuwef hay makəsa ma da yaŋ mepərekek ta ndana dapa maməcay. Farisa hay sə, teceŋ aca kəsiya, daha ndana ka məcata sə, a ta pərakata dapa maməcay. Amaa ta Saaduki hay sə, teceŋ aca kəsiya masa ndana a ta pərakata dapa maməcay sə, aabay. mabay ece dey kad vara vaw ke te ŋgə beetem sə, gege: «Hay! Akwar tərsam ta bay ta wudam hay! Maŋguzdakwar wewer ta mambəlaɓa fe mezem ta rav ta Zlav masa e te dekey sə, wa? 8Meŋguzdek mezlər hay mambəla ana masa aca tə yaw da yaŋ maŋgwad rav takwar, 9akwar ta wulakiya te megweɗ dapa leŋgesl takwar: “Papaŋ ta papaŋ taciya sə, Abəraham” bay. Aŋga, eve metehwe ana ya gwaɗakwar, dapa kekeŋ hay nesey, Zlav aŋga ava gədaŋ ɓa ta mavana wudeh kad Abəraham. 10Jan maləmada daha ka ta ŋgal wudez hay dəga dapa slaslalay ana. Wudez wula wula fakwan masa e hey wudiya ana mambəla ana aabay sə, aca ŋgəla avəda, aca kazlaɗ pa kwakwaw.»
Beetem ta yam va ta kwakwaw
(Mar 1.7-8; Luk 3.15-18; Zaŋ 1.24-28)
11«Yey sə, ya ŋgakwar beetem dapa yam masa e ŋguzdek akwar ka ŋgwada rav takwar. Amaa nda masa e te dek ava dəɓa taaɗaw sə, e fəniyey ava gədaŋ, kwa ka ta cəkwan tahkar dapa sek tata sə, ya husa bay. Aŋga sə, a ta ŋgakwar beetem dapa Mesfen Mavəna va dapa kwakwaw. 12Aŋga ava daram ta mapav jene dapa ha, a ta faɗ gədak tata a da hal bəley tata kad pa wuda, amaa sləɗa sə, a kuyaɗ pa kwakwaw masa a ta məc aabay katar ka midakw.»
Beetem te Yesu
(Mar 1.9-11; Luk 3.21-22; Zaŋ 1.29-34)
13Dapa ŋgesey ana, Yesu ke zleftek dapa vavara te Gelile ke də kad wayam te Zurdeŋ vara Zaŋ Baatis, a da ŋgana beetem. 14Amaa Zaŋ Baatis a wal maŋgana beetem ana bay, ka gwaɗa, gege: «Away! Me te ŋgiyey beetem sə, sesəker kaa, naa kaa, ke dek kad vereyey sə, memey?» 15Amaa Yesu ka vahan, gege: «Kəsaw təlam nesey, ara nesey masa a da ladandaw te meŋgə jə masa aŋga eve cəvey ana fakwanay.» Ara nesey, Zaŋ ka kəs maŋgana beetem. 16Dapa masa Yesu ka ŋgata beetem cay, a daɓa dapa yam kad a vəda. Faŋga faŋga ana, slam da wudam ke wuney, ka wala Mesfen ta Zlavay e bəreŋgek da wudam ara mahwɗagwam, a njah fətiya. 17Uway ke cənek da baymaləvaŋ, ke gweɗ, gege: «Nda nesey sə, aŋga Wat aɗaw masa ya waya elehey. Aŋga masa ke wefiyey ta mayahiya.»
Trenutno odabrano:
Mata 3: CUVnt
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022 CABTAL