KALAQAMA 7
7
BAOTE WAA
1Kaaliiqi Nohira, «Ati maatekki baala haadhe amo markaawete giddora ei; kalqete manni mereero ati callu keeraancho ikkoottota afoommo. 2Maala intanni saada baalate giddonni lamala lamala labbaahanna meyata, 3maala intannikki saada giddonni lame lame labbaahanna meyata, ceate giddonni qolte lamala lamala labbaahanna meyata baattote aaninni sirchinsa ba"annokki gede atewa haa'ratto. 4Lamalu barri gedensaanni, 40 barranna 40 hashsha baattote aana xeena dirrise, kalaqoommo kalaqama baalanka huneemmo» yiisi. 5Nohi Kaaliiqi hajajinosire baala assi.
6Baote wayi baattote aana lolahi yannara Nohi 600 diri manchooti. 7Isino, baote wayi lolahinni gatanno gede galtesi, oososinna oososi seenne haa're markaawete giddora ei. 8Maala intanni saada, maala intannikki saada, ceanna baattote aana milli yaannori baalu, 9Maganu Nohi hajajinosi garinni, lamu lamu labbaahunna meyati ledosi markaawete giddora ei. 10Lamalu barri gedensaanni, baote wayi baattote aanira lolahi.
11Nohira 600 diro ikkisihunni layinki aganira tonaa lamalki barra, hakko barranni lowo diimenni bu'a baala burqitu; gordu dukkani masikooteno fa'nantu; 12xeenano 40 barranna 40 hashsha baattote aana gani. 13Hakko barra Nohi markaawe ei; Nohi, galtesi, oososi Seemi, Kaami, Yaafeetinna sasunku adhitino seenni ledosi ei. 14Dubbu moyichi baalunku sirchu sirchunkunni, saada baalanti sirchu sirchunkunni, baattote aana milli yaannori baalunku sirchu sirchunkunni, buubbanno cea baalanti sirchu sirchunkunni, qoola afi'rino kalaqami baalunku ledonsa ei. 15Lubbo afi'rinori baalunku lame lame ikke Nohiwa markaawete giddora ei. 16Lubbo afi'rinori baalunku labbaahunna meyati Maganu Nohi hajajino garinni ei. Kaaliiqi Nohira waalcho gobbaanni cufi.
17Baote wayi baattote aana 40 barra gananni keeshshi; wayino bati'ranni ha'ri; markaaweno baattote aaninni iima qole kayisi. 18Wayi baattote aana lowo geeshsha bati'ranni ha'ri yannara, markaawe wayi aana ha'ra hanaffu. 19Wayi baattote aana lowo geeshsha bati'ri; gordoho woroonni noore lowiddaanna ilaalla baala egemmi. 20Wayi ilaalla egemme, 15 cigile iima hige lexxi. 21Baattote aana lubbo afi'rinori baalu, cea, saada, dubbu moyichi, baattote aana godowunni ha'rannorinna mannu baalunku goofi. 22Moola baatto aana noohu foolanno kalaqami baalu reyi. 23Baattote aana noohu lubbo afi'rinohu baalu mannunni kayise saadate geeshsha, godowunni ha'rannori baalu ceate geeshsha co'o yee goofi. Nohinna ledosi markaawete giddo noori callu gattu. 24Wayi baattote aaninni xeikkinni 150 barra keeshshi.
Trenutno odabrano:
KALAQAMA 7: QulMax
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© The Bible Society of Ethiopia; Sidama Holy Bible BSE-UBS 262 P 2014