മത്തായി 9
9
ഏസു സപ്പെ ണോയിക്കാറാന തെ്ള്‌സ്‌റാ്
1ഏസു തോണിക്കേ്റി ഈയ്യേ്ട്ടി ബന്ത് തന്ന് സൊന്ത പട്ടണാക്കെ താനെ എജ്ജിനാ്. 2അക്കുളെ ലേസ ആള്‌ഗ സപ്പെ ണോയായി കെ്ഡെമേലിര്‌ന്ത ഒരുത്താന ക്‌ഡാക്ക പായോഡെ ഏസു പട്ട്‌ക്കെ എ്ഡ്‌ത്ത് ബന്താര്. അവാര്‌ദ് ണമ്പിക്കേന കണ്ട് ഏസു അയ്യി സപ്പെ ണോയിക്കാറാന്‌ക്കെ: <<മഗാനെ, ണീ അഞ്ചാദെ. ണിന്ന്‌ദ് പാവഗണെല്ല പൊറുത്തിര്‌ക്കെ>> എന്ത് സൊന്നാ്.
3ആന ബേദ ബാത്ത്യലാദി ലേസ ആള്‌ഗ: <<ഇവാ് സാമിന കുറ്റ സൊല്ലുറാ്>> എന്ത് മനേസ്സിലിതാനെ ണെനേത്ത് കൊണ്ടിര്‌ന്താര്.
4അവാര് ഇച്ചെ മനേസ്സിലി ണെനേക്കാദ്‌ണ ഏസുക്ക് തെരിന്ത് ഏസു അവാര്‌ക്ക്: <<ണിമ്മ മനേസ്സിലി ഇച്ച്‌ള കെ്ട്ട കാര്യഗ ണെനേക്കാദ് എന്ത്‌ക്ക്? 5<ണിന്ന്‌ദ് പാവഗണ പൊറുത്തെ> എന്ത് സൊല്ലുറാദൊ ഇല്ലെ <ണീ എ്ന്ത് ണഡ> എന്ത് സൊല്ലുറാദൊ ഏദ് എ്ള്‌പ്പ? 6എന്താല്‌മ് മന്‌സാനായി പ്‌റാന്ത എനാക്ക് ബൂമിലി പാവഗണ പൊറുക്ക്യ അദിഗാര ഇര്‌ക്ക്‌ദ് എന്ത് ണാന് ണിമാക്ക് കാട്ടി തരെ>> എന്ത് സൊന്ന പ്‌റ ഏസു സപ്പെ ണോയിക്കാറാന്‌ക്കെ: <<ണീ എ്ന്ത് ണിന്റ് ണിന്ന്‌ദ് ക്‌ഡാക്ക പായിന എ്ഡ്‌ത്ത് കൂരേക്കെ പോ>> എന്ത് സൊന്നാ്. 7അക്കുളെ അവാ് എ്ന്ത് കൂരേക്കെ പോനാ്. 8ഇദ്‌ണ കണ്ട് ആള്‌ഗ അദിസ്യപട്ട്: <<മന്‌സാര്‌ക്ക് ഇച്ചെ സെയ്യ അദിഗാര കൊഡുത്ത സാമിക്ക് ഒഗെ>> എന്ത് സൊന്നാര്.
ഏസു മത്തായിന ഒളേക്കാ്
9ഏസു അദിലിര്‌ന്ത് പോഗാട്ടി മത്തായി എങ്ക ഒരുത്താ് ണ്‌ഗ്‌ദി പിരിക്ക പട്ടിലി കുക്കാന്തിര്‌ക്കാദ്‌ണ കണ്ട്: <<എന്ന് പിന്ന്‌ക്ക് ബാ>> എന്ത് അവാന്‌ക്കെ ഏസു സൊന്നാ്. അയാള് എ്ന്ത് ഏസു പിന്ന്‌മേലെ പോനാ്.
10അയ്യി അന്തി ണാള് മത്തായി കൂരേലി ഏസുമ് ഏസുദ് സൊല്ലുപഡി ണഡാക്കവാര്‌മ് തീനി തിന്ന്യ കുക്കാന്തിര്‌ക്കാട്ടി, ണ്‌ഗ്‌ദി പിരിക്കവാര്‌മ് പാവ സെയ്‌രവാര്‌മാന എത്തിന്യൊ ആള്‌ഗ ബന്ത് അവാര്‌ദ് ഒപ്പ പന്തിക്ക് കുക്കാന്താര്. 11ഏസു അവാര്‌ദ് ഒപ്പ ഇര്‌ന്ത് തിങ്കാദ്‌ണ പരിസല കണ്ട് ഏസുദ് സൊല്ലുപഡി ണഡാക്കവാര്‌ക്കെ: <<ണിമ്മ് ഗുരു പാവ സെയ്‌രവാരോഡേമ് ണ്‌ഗ്‌ദി പിരിക്കവാരോഡേമ് കുക്കാന്ത് തീനി തിങ്കാദ് എന്ത്‌ക്ക്?>> എന്ത് കേ്ട്ടാര്.
12ഏസു ഇദ്‌ണ കേ്ട്ട്: <<ണോയിക്കാറാര്‌ക്ക്‌ത്തെ ബയ്യിദ്യന ബേ്ഡു. അല്ലാദെ ണലമായിര്‌ക്കവാര്‌ക്കല്ല. 13<ണിമ്മ ബേ്ണ്ട്‌ഗണ പലി കൊഡുക്കാദിലി അല്ല, അഡ്‌ത്തവാര്‌ണ ഗവപഡ്‌റാദിലിത്തെ ണാന് പിര്യപഡ്‌റാദ്>#ജോസയ്യാ് 6:6 എന്ത് സൊല്ലിര്‌ക്ക സാമി സൊല്ലുസുലാക്കാക്ക് ഇര്‌ക്ക അര്‌ത്ത എന്തായെന്റ് പോയി പഡിരി. എന്ത്‌ക്കെന്റ ണാന് ബന്താദ് പാവ സെയ്‌രവാര്‌ഗണ ഒളേക്ക്യാത്തെ, അല്ലാദെ ണേര്‌മെക്കാറാര്‌ണല്ല>> എന്ത് സൊന്നാ്.
ഏസു തീനി തിന്നാദെ പരേസ്‌റാദ്‌ണ പറ്റി സൊല്ലുറാ്
14അക്കുളെ ഓഗന്നാന്‌ദ് സൊല്ലുപഡി ണഡാക്കവാര് ഏസു പട്ട്‌ക്കെ ബന്ത്: <<എമ്മാമ് പരിസലാമ് തീനി തിന്നാത്ത പരേസ പരേസ്‌റേര്. ആന ണിന്ന് സൊല്ലുപഡി ണഡാക്കവാര് എന്ത്‌ക്ക് തീനി തിന്നാത്ത പരേസ പരേസ്‌റാദില്ലെ?>> എന്ത് ഏസുണ കേ്ട്ടാര്.
15അക്കുളെ ഏസു അവാര്‌ക്കെ ഇച്ചെ സൊന്നാ്: <<കല്ല്യാണ കൂരേലി കല്ല്യാണ മാപ്പ്‌ളെ ഒപ്പ ഇര്‌ക്കാട്ടി മാപ്പ്‌ളേദ് ഒപ്പ ഇര്‌ക്കവാര് ദുക്കപട്ടിര്‌ക്ക്യ മുഡ്യമാട്ട. ആന കല്ല്യാണ മാപ്പ്‌ളെ ഇവാര്‌ണ തള്ളി പോര ഗള്യെ ബരു. അക്കുളെ അവാര് തീനി തിന്നാത്ത പരേസ പരേസുവാര്.
16ആര്‌മ് പള്യ കീ്റ സീലേക്ക് പുദ്യ സീലെ കൊത്തുണ കുത്തി മൂട്ടമാട്ടാര്. അച്ചെ കുത്തി മൂട്ടിന സീലെ കീ്റി, കീ്റ ബെല്ല്യാദാവു. 17അദേപാസെത്തെ പുദ്യ മുന്തിരി സാരണ പള്യ തോല് പയ്യിക്കെ ആര്‌മ് ഊറ്റി ബെക്കമാട്ടാര്. അച്ചെ ഊറ്റി ബെത്താക്കി തോല് പയ്യി പ്‌ക്കി മുന്തിരി സാര ഒഗുദെക്കു. അച്ചെ ഇദ് റണ്ട്‌മ് ഇല്ലാദായെക്കു. അദ്‌ണാലെ പുദ്യ മുന്തിരി സാരണ പുദ്യ തോല് പയ്യിക്കെ ഊറ്റി ബെക്കാദ്‌ത്തെ ണല്ലാദ്. അച്ചെ സെയ്‌ദാക്കി മുന്തിരി സാരാമ് തോല് പയ്യിമ് ബദ്ദ്‌റമായിര്‌ക്കു.>>
സത്ത പ്‌ള്ളേമ് ണോയിക്കാറ്‌സിമ്
18ഏസു അവാരോഡെ ഇച്ചെ പേസികൊണ്ടിര്‌ക്കാട്ടി എഗുദാര്‌ദ് അദിഗാരി ആന ഒരുത്താ് ഏസു പട്ട്‌ക്ക് ബന്ത് സന്ത് ഊന്റി കുമ്മുഡികൊണ്ട്: <<ഇപ്പ്‌ത്തെ എന്ന് മഗാദ് ഉജുറു പോറ്റു. ആനാല്‌മ് ണീ സെറ്റെ ബന്ത് അവാള്‌ക്കെ കയ്യി ബെത്ത മദി അപ്പ് അവ ഉജുറെ്ന്തുവ>> എന്ത് ഏസുക്കെ സൊന്നാ്. 19അക്കുളെ ഏസു എ്ന്ത് തന്ന് സൊല്ലുപഡി ണഡാക്കവാര്‌ണാമ് കൂട്ടി അവാന്‌ദ് ഒപ്പ പോനാ്.
20-21അക്കുളെ പന്നന്റ് ബര്‌സ കാല പൊലെ ബെ്ട്ട്‌റ ണോയി ആയിര്‌ന്ത ഒരുത്തി: <<അയാള്‌ദ് ഉഡുപ്പുനെന്താല് അണ്ണിന മദി ണാന് ണോയി തെ്ളിവെ>> എന്ത് മനേസ്സിലി ണെനേത്ത് കൊണ്ട് ഏസുദ് പിന്ന് സാരി പോയി അയാള്‌ദ് ജൊഗേദ് താനെന അണ്ണിന.
22അക്കുളെ ഏസു തിലിമ്പി ണോഡി അവാണ കണ്ട്: <<മഗാളെ, അഞ്ച ബേ്ഡ. ണിന്ന് ണമ്പിക്കെ ണിന്ന് ണോയിന തെ്ള്‌സിറ്റ്>> എന്ത് സൊന്നാ്. അപ്പ്‌താനെ അവ ണോയി തെ്ളിന്ത.
23അദെല്ല കളിന്ത പ്‌റ ഏസു എഗുദാര് തലെവാന്‌ദ് കൂരേക്കെ പുക്കി അദിലി കുവാല് പ്‌ഡിത്ത് കൊണ്ടിര്‌ന്തവാര്‌ണാമ് അഗ്‌ദ് ഗിജ്‌റ് ബെ്ട്ടിര്‌ന്തവാര്‌ണാമ് കണ്ട്: 24<<ണിമ്മ ബെ്ള്യെ കഡാന്ത് പോയി. പ്‌ള്ളെ സാഗാലെ, ഉറാങ്ക്‌റ>> എന്ത് സൊന്നാ്. ആന അവാര് അവാന ണാണഗെ്ഡ്‌സികൊണ്ട് ണീ്ത്താര്. 25ഏസു ആള്‌ഗണ ഒട്ടുക്ക് ബെ്ള്യെ കഡാത്തിന പ്‌റ ഉള്ളുക്ക് പോയി അയ്യി പ്‌ള്ളേദ് കയ്യിന പ്‌ഡിത്താ്. അക്കുളെ പ്‌ള്ളെ എ്ന്ത്‌ദ്. 26ഈ സേദി അയ്യി ണാഡ് മുച്ചുഡ പാസിറ്റ്.
ഏസു കുറുഡാര്‌ക്ക് പാര്‌വെ കൊഡുക്കാ്
27ഏസു അദിലിര്‌ന്ത് പോഗാട്ടി, റണ്ട് കുറുഡാര്: <<ദാവീദ് കാല്‌ക്ക് പട്ടവാനെ, എമ്മോഡെ ബേ്റ്‌വായി ബേഡോമെ>> എന്ത് ബെല്ല്യാദ്‌ക്ക് ആലാത്ത് കൊണ്ട് പിന്ന്‌ക്കെ പോനാര്.
28ഏസു കൂരേക്കെ പുക്കുഗാട്ടി അയ്യി കുറുഡലാമ് അവാ് പട്ട്‌ക്കെ ബന്താര്. <<ണിമാക്ക് പാര്‌വെ തര്യ എനാക്ക് മുഡ്യു എന്ത് ണിമ്മ ണമ്പ്‌റേര?>> എന്ത് ഏസു അവാര്‌ണ കേ്ക്കാട്ടി: <<ആണ്ടവാനെ, ണിനാക്ക് പാര്‌വെ തര്യ മുഡ്യു>> എന്ത് അവാര് സൊന്നാര്.
29അക്കുളെ ഏസു അവാര്‌ദ് കണ്ണ്‌ണ അണ്ണി കൊണ്ട്: <<ണിമ്മ ണമ്പിന പാസെതാനെ ണഡാക്കുഡൊ>> എന്ത് സൊന്നാ്. 30അപ്പ്‌താനെ അവാര്‌ക്ക് കണ്ണ് പാര്‌വെ കെ്ഡേത്ത്‌ദ്. പ്‌റ ഏസു അവാര്‌ക്കെ: <<ണോഡി, കണ്ടിപ്പായിമ് ഇദ്‌ണ ആര്‌ക്ക്‌മ് സൊല്ല ബേ്ഡ>> എന്ത് സൊന്നാ്. 31ആന അവാര് പ്‌റപ്പട്ട് പോയി അയ്യി ണാഡ് മുച്ചുഡ ഏസുണ പറ്റ്യുള്ള സേദിന സൊല്ലി പരാത്തിനാര്.
ഏസു ഒരു ഊമെന തെ്ള്‌സ്‌റാ്
32ഏസുമ് തന്ന് സൊല്ലുപഡി ണഡാക്കവാര്‌മ് പോഗാട്ടി കെ്ട്ടജാദി തട്ടി ഊമെ ബീ്ത്തി ബെത്തിര്‌ന്ത ഒരുത്താന ആള്‌ഗ ഏസു പട്ട്‌ക്കെ എ്ഡ്‌ത്ത് ബന്താര്. 33ഏസു അവാനോഡെ ഇര്‌ന്ത കെ്ട്ടജാദിന ഒയിപ്പിസിന പ്‌റ, അയ്യി ഊമെ ബ്‌ന്തിര്‌ന്തവാ് ണായ പേസിനാ്. <<ഇസ്‌റേലിലി ഇച്ച്‌ള കാര്യഗണ ഒരു ണാള് ഗൂഡി കാണാഗെ ഇല്ലെ>> എന്ത് സൊല്ലി ആള്‌ഗ അദിസ്യപട്ടാര്.
34ആന പരിസല: <<കെ്ട്ടജാദിഗാദ് തലെവന ബെത്ത്‌ത്തെ ഇയാള് കെ്ട്ടജാദിഗണ ഒയിപ്പിസ്‌റാദ്>> എന്ത് സൊന്നാര്.
ഏസുക്ക് ആള്‌ഗണ കറ്‌മ്മ പ്‌ഡിക്ക്‌ദ്
35ഏസു എല്ല പട്ടണാക്ക്‌റാഗാമ് ഊര്‌ക്ക്‌റാഗാമ് പോയി എഗുദാര് പരേസ്‌റ കൂരെക്ക്‌റാഗ പഡിസികൊണ്ട്‌മ് സാമി ആള്‌റാദ്‌ണ പറ്റി സൊല്ലുറ ണല്ല സേദിന ആള്‌ഗാക്ക് സൊല്ലികൊണ്ട്‌മിര്‌ന്താ്. അയ്യി ഗള്യേലി എല്ല ദിന്‌സ് ണോയിഗണാമ് ഗെര്‌ഗ ബ്‌ന്തിര്‌ക്കവാര്‌ണാമ് അയാള് തെ്ള്‌സിനാ്. 36അയ്യി ആള്‌ഗണ മാട്ട്യാ് ഇല്ലാത്ത കൊറ്യാഡ്‌ഗണ പാസെ അര്‌ക്കപഡ്‌റവാര്‌മ്, ഉദാവി സെയ്യ ആര്‌മ് ഇല്ലാത്തവാര്‌മ് ആയി കാണ്‌ഗാട്ടി ഏസുക്ക് ബേ്റ്‌വെന്ത്‌ദ്. 37അക്കുളെ ഏസു തന്ന് സൊല്ലുപഡി ണഡാക്കവാര്‌ക്കെ: <<അന്ന അറ്‌ക്ക്യ എത്തിന്യൊ ഇര്‌ക്ക്‌ദ്. ആന അറ്‌വെക്കാറാര് ലേസാത്തെ. 38അദ്‌ണാലെ അറ്‌ക്ക്യ ബേ്ണ്ടി ബേലെക്കാറാര്‌ണ സൊല്ലിബ്‌ഡുഡോമെ എന്ത് കാഡ്‌ക്കാറനാന പണ്ണാഡിന ബേ്ണ്ടികൊള്ളിരി>> എന്ത് സൊന്നാ്.
Trenutno odabrano:
മത്തായി 9: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
