മത്തായി 7
7
ആര്‌ണാമ് കുറ്റ സൊല്ലി ബിദിക്കാക്കില്ലെ
1<<സാമി ണിമാണ ബിദിക്കാദെ ഇര്‌ക്ക്യ ബേ്ണ്ടി ണിമ്മ ആര്‌ണാമ് കുറ്റ സൊല്ലി ബിദിക്കാദി. 2എന്ത്‌ക്കെന്റ ണിമ്മ അഡ്‌ത്തവാര്‌ണ എച്ചെ കുറ്റ സൊല്ലി ബിദിക്കേരൊ അദേപാസെ സാമി ണിമാണാമ് ബിദിക്കുവാ്. അഡ്‌ത്തവാര്‌ക്ക് ണിമ്മ എത്തിനി അളാന്ത് കൊഡുക്കേരൊ അത്തിനി താനെ സാമി ണിമാക്ക് തിലിപ്പി തരുവാ്.
3ആന ണിന്ന് കണ്ണില്യ മുട്ടിത്തോര സണ്ട്‌ണ ബെത്ത് കൊണ്ട് അഡ്‌ത്തവാന്‌ദ് കണ്ണില്യ സിന്ന സണ്ട്‌ണ ണോഡുറാദ് എന്ത്‌ക്ക്? 4ണിന്ന് കണ്ണില്യെ മുട്ടിത്തോര സണ്ടിര്‌ക്കാട്ടി: <പൊന്ന, ണിന്ന് കണ്ണില്യ സിന്ന സണ്ട്‌ണ ണാന് എ്ഡ്‌ത്ത് തരെ> എന്ത് അഡ്‌ത്തവാന്‌ക്ക് ണിനാക്ക് എച്ചെ സൊല്ല്യ മുഡ്യു? 5ബക്‌ദിക്കാറാരായി ണഡിക്ക ണീ, മുദ ണിന്ന്‌ദ് കണ്ണില്യ മുട്ടിത്തോര സണ്ട്‌ണ എ്ഡ്‌ത്തെക്ക്. അപ്പ്‌ത്തെ അഡ്‌ത്തവാര്‌ദ് കണ്ണില്യ സിന്ന സണ്ട്‌ണ എ്ഡ്‌ത്തെക്ക്യ ണിനാക്ക് സൊക്കാന കാണ്യ മുഡ്യു.
6ബെലെപെറ്റ കാര്യഗണ ണായിഗണ പാസെ കെ്ട്ടവാരാന ആള്‌ഗാക്ക് ണിമ്മ കൊഡുക്ക ബേ്ഡ. അവാര് ണിമാണ തിലിമ്പി കപ്പി കൊഡേന്തെക്കുവാര്. ബെലെപെറ്റ മുത്തുഗണ പന്റിഗണ പാസെ കെ്ട്ടവാരാന ആള്‌ഗാക്ക് കൊഡുക്ക ബേ്ഡ. അദ്‌ണ അവാര് മെ്ട്ടി ണജ്‌ക്കി എക്കുവാര്.>>
കേ്ളിരി, പരായിരി, കൊട്ടിരി
7<<സാമിന ബേ്ഡികൊണ്ടെ ഇരിരി, അപ്പ് ണിമാക്ക് കെ്ഡേക്കു. ണിമാക്ക് ബേ്ഡുമാനാദ്‌ക്ക് കേ്ട്ട്‌കണ്ട് ണോഡിരി, അപ്പ് ണിമ്മ കണ്ട്‌പ്‌ഡിക്കുവേര്. ബാസണ കൊട്ടികൊണ്ടെ ഇരിരി, അപ്പ് ണിമാക്ക് ബാസ തുറാക്കുവാര്. 8ബേ്ഡ്‌റ ഏവാന്‌ക്ക്‌മ് കെ്ഡേക്കു, കേ്ട്ട്‌കണ്ട് ണോഡുറവാര് കണ്ട്‌പ്‌ഡിക്കുവാര്, ബാസണ കൊട്ട്‌റവാര്‌ക്ക് തുറാക്കു.
9മഗാ് അഡേന കേ്ട്ടാക്കി അവാന്‌ക്ക് കല്ല്‌ണ കൊഡുക്കവാ് ആരാറ്റ് ണിമ്മ് കൂട്ടാത്തിലി ഇര്‌ക്കാര? 10അല്ലാദെ പോന മീന് കേ്ട്ടാക്കി അവാന്‌ക്ക് പാമ്പ്‌ണ കൊഡുക്കുവാന? 11അച്ചെ കെ്ട്ടാദ് സെയ്‌ദ് ണഡാക്ക ണിമ്മ ണിമ്മ്‌ദ് മക്കഗാക്ക് ണല്ലാദ്‌ണ കൊഡുക്ക്യ തെരിരദാനാക്കി മേലോഗാത്തില്യ അപ്പാനായിര്‌ക്ക സാമിന കേ്ക്കവാര്‌ക്ക് ണല്ലാദ്‌ണ കൊഡുക്ക്യ സാമി എത്തറാഗൊ മനേസ്സുള്ളവാ്ത്തെ. 12ബേ്റെ ആള്‌ഗ ണിമാക്ക് എന്ത സെയ്‌ദ് തരുഡൊ എന്ത് ണിമ്മ ആസെപഡ്‌റേരൊ അദ് ഒട്ടുക്ക് ണിമ്മാമ് അവാര്‌ക്ക് സെയ്യിരി. മോസെ ബെത്ത സാമി സട്ടാത്തിലി സൊല്ലിര്‌ക്ക കാര്യഗാദ്‌മ്, സാമിദാസ്‌ഗ സൊല്ലിര്‌ക്ക കാര്യഗാദ്‌മ് പൊറുള് ഇദ്‌ത്തെ.>>
ഇ്ണ്‌ക്ക് ബാസ
13<<ഇ്ണ്‌ക്ക് ബാസമേലെ കഡായിരി. എന്ത്‌ക്കെന്റ ണരഗാക്കെ പോര ബാസ ബെല്ല്യാദ്‌മ് അയ്യി ബയ്യിമേലെ പോയ എ്ള്‌പ്പാമ്‌ത്തെ. എത്തിന്യൊ ആള്‌ഗ അദ്‌മേലെ പോരാര്. 14ആന ഉജുറു പട്ട്‌ക്കെ പോര ബാസ ഇ്ണ്‌ക്ക്‌മ് അയ്യി ബയ്യിമേലെ പോയ ബുദ്ദിമുട്ടുമ്‌ത്തെ. അദ്‌ണ കണ്ട്‌പ്‌ഡിക്കവാര് ലേസാത്തെ.>>
മരാമ് അദ്‌ദ് പഗാമ്
15<<സാമിണിഗാല് സൊല്ലുദ് എന്ത് ഉറുട്ടു സൊല്ലുറ ആള്‌ഗണ സൂസാരിത്ത്‌കൊള്ളിരി. അവാര് കറ്‌മ്മകറ്‌മ്മ ഇര്‌ക്ക കൊറ്യാഡ്‌ഗണ പാസെ ബക്‌ദിക്കാറാര് എന്ത് ണഡിത്ത് കൊണ്ട് ണിമ്മ് പട്ട്‌ക്കെ ബരാര്. ആന അവാര് കപ്പി കൊഡേര സെന്നായിഗണ പാസെത്തെ. 16അവാര് സെയ്‌ര കാര്യാത്തിലിര്‌ന്ത് അവാര് എച്ച്‌ളവാര് എന്ത് ണിമാക്ക് ണെപ്പ്‌കെ്ഡേസില. മുര്‌ക്ക് മരാത്തിലിര്‌ന്ത് മുന്തിരി പഗാമ് മുള്ളു സെ്ഡിലിര്‌ന്ത് അത്തി പഗാമ് കെ്ഡേക്കുമ? 17അദേപാസെ ണല്ല മരാഗ മുച്ചുഡ ണല്ല കായിമ്, സായി പ്‌ഡിത്ത മരാഗ കുറുഡു കായിമ് ബ്‌ഡ്‌ദ്. 18ണല്ല മര കുറുഡു കായിമ് സായി പ്‌ഡിത്ത മര ണല്ല കായിമ് ബ്‌ഡമാട്ട. 19ണല്ല കായിഗ കായിക്കാത്ത മരാണ മുച്ചുഡ ബെ്ട്ടി തീക്കെ ഇക്കുവാ്. 20അദ്‌ണാലെ അവാര് സെയ്‌ര കാര്യാത്തിലിര്‌ന്ത് അവാര് എച്ച്‌ളവാര് എന്ത് ണിമാക്ക് ണെപ്പ്‌കെ്ഡേസില.
21എനാണ: <ആണ്ടവാനെ, ആണ്ടവാനെ> എന്ത് ഒളേക്ക എല്ലാര്‌ണാമല്ല സാമി ആള്യ പോരാദ്. ആന മേലോഗാത്തില്യ എന്ന് അപ്പാന്‌ക്ക് പ്‌ഡിത്ത കാര്യഗണ സെയ്‌രവാര്‌ണാത്തെ സാമി ആള്യ പോരാദ്. 22<ആണ്ടവാനെ, ആണ്ടവാനെ ണിന്ന് പേരിലി എമ്മ സാമിക്ക് സൊല്ല്യ ഇര്‌ക്ക കാര്യഗണ ആള്‌ഗാക്കെ സൊല്ലിര്‌ക്കേര്. ണിന്ന് പേരിലി എമ്മ ആള്‌ഗാക്കെ തട്ടിര്‌ന്ത കെ്ട്ടജാദിഗണ ഒയിപ്പിസിമ് എത്തിന്യൊ ബെല്ല്യ ബെല്ല്യ അദിസ്യഗ സെയ്‌ദ്‌മ് ഇര്‌ക്കേര്> എന്ത് ബിദി സൊല്ലുറ ണാളിലി എനാക്കെ എത്തിന്യൊ ആള്‌ഗ സൊല്ലുവാര്. 23അയ്യി ണാള് ണാന് അവാര്‌ക്കെ: <എനാക്ക് ണിമാണ തെര്യാഗെ തെര്യ. കേ്ഡ്‌ഗെ്ട്ട് ണഡാക്കവാരെ, എന്ന് പട്ടിലിര്‌ന്ത് കഡാന്ത് പോയി> എന്ത് കണ്ടിപ്പായി സൊല്ലുവെ.>>
റണ്ട് ദിന്‌സ് കൂരെ
24<<അദ്‌ണാലെ ണാന് സൊല്ലുറ ഈ ണായഗണ കേ്ട്ട് അദേപാസെ ണഡാക്കവാ് അറെക്കുദ്ദാക്ക് കൂരെ എ്ഡ്‌ക്ക ബുദ്ദിക്കാറാന്‌ക്ക് സമ. 25ബെല്ല്യ മഗേമ് അഡിത്ത് ബാനിക്ക്‌റാഗ തണ്ണി തുമ്പിറ്റ്. ബെല്ല്യ കാറ്റ് ബന്ത് കൂരേക്കെ അഡിത്ത്‌ദ്. ആന അറെക്കുദ്ദാക്ക് ബേസ്‌മട്ട കെ്ട്ടി കൂരെ എ്ഡ്‌ത്തിര്‌ന്താദ്‌ണാലെ അയ്യി കൂരെ പ്‌ഡാങ്കി ബീ്ഗാലെ. 26ആന ണാന് സൊല്ലുറ ഈ ണായഗണ കേ്ട്ട് അദേപാസെ സെയ്യാത്തവാ് മണാല്‌ക്കുദ്ദാക്ക് കൂരെ എ്ഡ്‌ത്ത ബുദ്ദില്ലാത്ത മന്‌സാന്‌ക്ക് സമ. 27ബെല്ല്യ മഗേമ് അഡിത്ത് ബാനിക്ക്‌റാഗ തണ്ണി തുമ്പിറ്റ്. ബെല്ല്യ കാറ്റ് ബന്ത് കൂരേക്കെ അഡിത്ത്‌ദ്. അയ്യി കൂരെ ഒരു സിന്നാദ് ബീസാക്ക് ഇല്ലാദെ പിദാരിന്തെക്കിറ്റ്.>>
28ഈ ണായഗണെല്ല ഏസു സൊല്ലി തീന്താദ്‌മ് ആള്‌ഗ ഒട്ടുക്ക് താന് സൊന്ന ബുദ്ദിണായണ കേ്ട്ട് ബായി പൊളിത്തെക്കിനാര്. 29എന്ത്‌ക്കെന്റ എഗുദാര് ബേദ ബാത്ത്യലണ പാസെ അല്ല അദിഗാരത്തോഡാക്കു ഏസു അവാര്‌ണ പഡിസിനാദ്.
Trenutno odabrano:
മത്തായി 7: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
