മത്തായി 27
27
ഏസുണ പീലത്തോസ് പട്ട്‌ക്ക് എ്ഡ്‌ത്ത് പോരാര്
1ബെ്ഡ്യാകാല ജാമാത്തിലി എഗുദ പൂസാരി തലെവലാമ് മൂപ്പലാമ് സേന്ത് ഏസുണ കൊല്ല്യ സട്ടകെ്ട്ടിനാര്. 2പ്‌റ ഏസുണ പ്‌ഡിത്ത് കെ്ട്ടി എ്ഡ്‌ത്ത് പോയി ണാഡ് അദിഗാരി ആന പീലത്തോസ് കയ്യിക്കെ ഒപ്പഡിത്താര്.
ജൂദാ് സാരാ്
3ഏസുണ കൊല്ല്യ ബിദിത്താര് എന്ത് അവാന കാട്ടി കൊഡുത്ത ജൂദാന്‌ക്ക് തെരിന്ത്‌ദ്. താന് കുറ്റ സെയ്‌ദെ എന്ത് ണെനേത്ത്, അയ്യി മുപ്പദ് ബെ്ള്ളി പണാണ എഗുദ പൂസാരി തലെവലാദ്‌മ് മൂപ്പലാദ്‌മ് പട്ട്‌ക്കെ തിലിപ്പി എ്ഡ്‌ത്ത്‌കൊണ്ട് ബന്ത്: 4<<ണാന് കുറ്റ സെയ്യാത്തവാന കാട്ടി കൊഡുത്താദ്‌ണാലെ ണാന് പാവ സെയ്‌ദെ>> എന്ത് സൊന്നാ്.
അക്കുളെ അവാര്: <<അദ്‌ക്ക് ഇപ്പ് എമാക്കെന്ത? അദ് ണീ പട്ടപാഡ്>> എന്ത് സൊന്നാര്.
5അവാ് അയ്യി ബെ്ള്ളി പണാണ സാമികൂരേക്കെ എ്റിന്തെക്കി തള്ളി, പോയി ണേന്റ് സത്താ്.
6ആന എഗുദ പൂസാരി തലെവല അയ്യി പണാണ എ്ഡ്‌ത്ത്: <<ഇദ് ഉജുറുക്ക് കൊഡുത്ത ബെലെ ആനാദ്‌ണാലെ സട്ടപഡി ഉണ്ട്യേക്കെ ബീ്ത്ത്‌റാദ് തപ്പ്>> എന്ത് സൊന്നാര്. 7പ്‌റ പര്‌ദേസിഗ സത്ത അവാര്‌ണ പൊദേക്ക്യ ബേ്ണ്ടി അയ്യി പണാക്ക് ഒരു കുജവാന്‌ദ് ബൂമിന ബാങ്ക്യ മുഡിവെ്ഡ്‌ത്ത് അദ്‌ണ ബാങ്കിനാര്. 8അദ്‌ണാലെ അയ്യി ബൂമിക്ക് ഇപ്പ്‌മ് സോരെ ബൂമി എന്ത് പേര് സൊല്ലുറാര്.
9-10<<ഇസ്‌റേല്‌ക്കാറാര് ബെലെ മുഡിത്തവാന്‌ക്ക് ബെലെ ആയി കെ്ഡേത്ത
മുപ്പദ് ബെ്ള്ളി പണാണ അവാര് എ്ഡ്‌ത്താര്.
ആണ്ടവാ് എനാക്ക് സൊന്ന പാസെ കുജവാന്‌ദ് ബൂമിക്ക് ബേ്ണ്ടി അവാര് കൊഡുത്താര്>>#സെക്കര്യാവു 11:12,13; ഇരെമ്യാ് 19:1–13; 32:6–9
എന്ത് ഇരെമ്യാ് സാമിദാസാലെ സൊന്നാദ് അദേപാസെ അയ്യി ണാള് ണഡാന്ത്‌ദ്.
പീലത്തോസ് ഏസുണ കേ്ള്‌വി കേ്ക്കാ്
11ഏസുണ റോമ ണാഡ് അദിഗാരി പീലത്തോസ് മുന്തുക്ക് എ്ഡ്‌ത്ത് പോയി ണില്ലിസിനാര്. അക്കുളെ പീലത്തോസ് ഏസുണ: <<ണീ എഗുദാര്‌ദ് റാജാവ?>> എന്ത് കേ്ട്ടാ്.
അദ്‌ക്ക് ഏസു: <<സെരിത്തെ, ണീ സൊല്ലുറ പാസെത്തെ>> എന്ത് സൊന്നാ്.
12എഗുദ പൂസാരി തലെവലാമ് എഗുദ മൂപ്പലാമ് അവാന പറ്റി കുറ്റ സൊല്ലുഗാട്ടി ഏസു ഒരു ബദ്‌ള്‌മ് സൊല്ലാലെ. 13പീലത്തോസ് അവാന്‌ക്കെ: <<ഇവാര് ണിനാണ പറ്റി എത്തിന്യൊ കുറ്റഗ സൊല്ലുറാര്. അദ് ണീ കേ്ക്കാദില്ലേഗ?>> എന്ത് സൊന്നാ്. 14ആന ഏസു അവാര് സൊന്ന കുറ്റഗാക്കെല്ല ഒരു ബദ്‌ള്‌മ് സൊല്ലാലെ. അദ്‌ണ കണ്ട് അയ്യി ണാഡ് അദിഗാരി പീലത്തോസ് അദിസ്യപട്ടാ്.
ഏസുണ കൊല്ല്യ ബിദിക്കാര്
15ആന എല്ല പെസഗെ ണോമ്പി ണാള്‌മ് ജെയില്‌ക്ക് ഇക്കിര്‌ക്ക ആള്‌ഗാദിലിര്‌ന്ത് ആള്‌ഗ ബ്‌ഡ്യ സൊല്ലുറ ഒരുത്താന അയ്യി ണാഡ് അദിഗാരി ജെയിലിലിര്‌ന്ത് ഇ്റാക്കി ബ്‌ട്ടിര്‌ന്താ്. 16അയ്യി ഗള്യേലി കുറ്റ സെയ്‌ദ് പേര്‌കേ്ട്ട ബറവാസ് #27:16ബറവാസ് മുദ എ്ള്‌ദിനാദ്‌ണ ണോഡി എ്ള്‌ദിനാദ്‌ണ പഗ്‌ദി കായിദാത്തിലി ബറവാസ്‌ണ ഏസു ബറവാസ് എന്ത് എ്ള്‌ദിര്‌ക്ക്‌ദ്. എങ്ക ഒരുത്താ് ജെയിലിലിര്‌ന്താ്. 17ആള്‌ഗ ഒന്റായി കൂഡുഗാട്ടി പീലത്തോസ് അവാര്‌ണ: <<ബറവാസ്‌ണാഗൊ ഇല്ലെ ക്‌റ്‌സ്‌ത്ത് എങ്ക ഏസുണാഗൊ ആര്‌ണ ണാന് ണിമാക്ക് ബ്‌ട്ട് തര്യ ണിമ്മ ആസെപഡ്‌റാദ്?>> എന്ത് കേ്ട്ടാ്. 18എന്ത്‌ക്കെന്റ അവാര്‌ക്ക് ഏസോഡെ ഇര്‌ക്ക എര്‌സാക്ക്‌ത്തെ ഏസുണ തന്ന് കയ്യിക്കെ തന്താദ് എന്ത് പീലത്തോസ്‌ക്ക് തെരിന്ത്‌ദ്.
19പീലത്തോസ് ണായ സൊല്ലുറ കുറിഞ്ചിലി കുക്കാന്തിര്‌ക്കാട്ടി അയാള് പെ്ണ്ട് ആള് ബ്‌ട്ട്: <<അയ്യി കുറ്റ ഇല്ലാത്തവാന്‌ദ് കാര്യാക്ക് എജേഗാദെ. അയാള്‌ണ പറ്റി ജാമാത്തിലി ണാന് ഒരു കനേസി കണ്ടാദ്‌ണാലെ റമ്പ അര്‌ക്കപട്ടിര്‌ക്കെ>> എന്ത് സൊന്ന.
20ആന എഗുദ പൂസാരി തലെവലാമ് മൂപ്പലാമ് ബറവാസ്‌ണ ബ്‌ഡ്യാമ് ഏസുണ കൊല്ല്യാമ് ബേ്ണ്ടി പീലത്തോസ്‌ണ കേ്ക്ക്യ ആള്‌ഗണ സൊല്ലി ബെത്താര്.
21അയ്യി ണാഡ് അദിഗാരി അവാര്‌ക്കെ: <<ഇവാര് റണ്ട് ആളിലി ണാന് ആര്‌ണ ണിമാക്ക് ബേ്ണ്ടി ഇ്റാക്കി ബ്‌ട്ട് തര്യ ണിമ്മ ആസെപഡ്‌റേര്?>> എന്ത് കേ്ക്കാട്ടി,
<<ബറവാസ്>> എന്ത് അവാര് ആലാത്ത് സൊന്നാര്.
22അക്കുളെ പീലത്തോസ്: <<ആന ക്‌റ്‌സ്‌ത്ത് എങ്ക ഏസുണ ണാന് എന്ത സെയ്യ>> എന്ത് കേ്ക്കാട്ടി, <<അവാന കുരുസ്‌ക്കെ സേത്തി ആണി അഡിത്ത് കൊല്ലുഡൊ>> എന്ത് എല്ലാര്‌മ് ആലാത്ത് സൊന്നാര്.
23അക്കുളെ പീലത്തോസ്: <<എന്ത്‌ക്ക്? ഇയാള് എന്ത കുറ്റ സെയ്‌ദാ്?>> എന്ത് കേ്ട്ടാ്.
എന്ത്‌ട്ട്‌മ് ആള്‌ഗ: <<അയാള്‌ണ കുരുസ്‌ക്കെ സേത്തി ആണി അഡിത്ത് കൊല്ലുഡൊ!>> എന്ത് ആലാത്ത് ആലാത്ത് സൊന്നാര്.
ഏസുണ കൊല്ല്യ ബ്‌ഡ്‌റാ്
24ആള്‌ഗ ആലാത്ത് ക്‌ളാമ്പ്‌റാദ് ഉള്ളാസ് ആരാദ് അല്ലാദെ തനാക്ക് ഒന്റുമ് സെയ്യ മുഡിരാദില്ലെ എന്ത് പീലത്തോസ് കണ്ട്, തണ്ണി എ്ഡ്‌ത്ത് ആള്‌ഗ മുന്തുക്ക് ബന്ത് കയ്യിന കച്ചിര്‌ന്ത്: <<ഇവാന കൊല്ലുറാദിലി ണാന് കുറ്റക്കാറാനല്ല. അദ് ണിമ്മ പട്ടപാഡ്>> എന്ത് സൊന്നാ്.
25അക്കുളെ ആള്‌ഗ ഒട്ടുക്ക്: <<അവാന കൊന്റ പാവ എമ്മ് തലേക്ക്‌മ് എമ്മ്‌ദ് മക്കഗ തലേക്ക്‌മ് അട്ടി എ്റേസുഡൊ>> എന്ത് സൊന്നാര്.
26അച്ചെ അയാള് ബറവാസ്‌ണ അവാര്‌ക്ക് ഇ്റാക്കി ബ്‌ട്ട് കൊഡുത്താ്. ഏസുണ സാട്ടെബാറ്‌ക്കെ അഡിസിന പ്‌റ കുരുസ്‌ക്കെ സേത്തി ആണി അഡിത്ത് കൊല്ല്യാമ് ബ്‌ട്ടാ്.
പഡെയാളിഗ ഏസുണ ണാണഗെ്ഡ്‌സ്‌റാര്
27അദ്‌ക്ക് പ്‌റ ണാഡ് അദിഗാരിദ് പഡെയാളിഗ ഏസുണ ണാഡ് അദിഗാരിദ് കോട്ടെക്കുള്ളുക്കെ എ്ഡ്‌ത്ത് പോനാര്. അവാര് അദിലിര്‌ക്ക പഡെയാളിഗണ ഒട്ടുക്ക് അയാള്‌ദ് സുറ്റുമ് ഗുമ്പ്‌കൂഡിസിനാര്. 28അവാര് ഏസുദ് സീലെന ഉരിന്തെക്കി സോരെ ജൊഗേന ഏസുക്കെ ഇക്കിസിനാര്. 29പ്‌റ അവാര് മുള്ളു കൊഡിലി ഒരു ഗിര്യാഡ പെ്ണേന്ത് ഏസുദ് തലേക്കെ സൂഡ്‌സിനാര്. അയാള്‌ദ് ബല കയ്യിക്കെ ഒരു കുവാല് പുല്ലു തട്ടെനാമ് പ്‌ഡിസി ഏസു മുന്തുക്ക് സന്ത് ഊന്റിര്‌ന്ത്: <<എഗുദാര്‌ദ് റാജാവെ, ണീ സോക്ക്യൂരി പെ്ളെ>> എന്ത് സൊല്ലി ണാണഗെ്ഡ്‌സിനാര്. 30പ്‌റ അവാര് ഏസുക്കെ തുപ്പി, അവാ് കയ്യിലിര്‌ന്ത് കുവാല് പുല്ലു തട്ടെന എ്ഡ്‌ത്ത് അവാന്‌ദ് തലേന അഡിത്താര്. 31ഇച്ചെ അയാള്‌ണ ണാണഗെ്ഡ്‌സിന പ്‌റ അവാര് അയാള്‌ക്ക് ഇക്കിസിര്‌ന്ത ജൊഗേന കളാത്തി അയാള്‌ദ് ഉഡുപ്പുണ താനെ ഇക്കിസിനാര്. പ്‌റ അയാള്‌ണ കുരുസ്‌ക്കെ സേത്തി ആണി അഡിത്ത് കൊല്ല്യ ബേ്ണ്ടി എ്ഡ്‌ത്ത് പോനാര്.
ഏസുണ കുരുസ്‌ക്കെ സേത്തി ആണി അഡിക്കാര്
32അവാര് പോഗാട്ടി കുറേനെക്കാറാ് സീമോന്‌ണ കണ്ട്, പഡെയാളിഗ ഏസുദ് കുരുസ്‌ണ സുമാക്ക്യ അയാള്‌ണ ണത്തിനാര്. 33തലെ ഓഡ്‌ദ് എ്ഡെ എന്ത് അര്‌ത്ത ഇര്‌ക്ക ഗൊല്‌ഗോത്ത എങ്ക എ്ഡേക്ക് എജ്ജ്‌ഗാട്ടി 34കജാപ്പെ സേത്തിന ഊറിന മുന്തിരി സാരണ ഏസുക്ക് പഡെയാളിഗ കുഡിക്ക്യ കൊഡുത്താര്. ഏസു അദ്‌ണ ലേസ കുഡിത്ത് ണോഡിനാദ്‌മ് ബേ്ഡ എന്ത് തള്ളിനാ്. 35ഏസുണ കുരുസ്‌ക്കെ സേത്തി ആണി അഡിത്ത പ്‌റ അവാര് ണറ്‌ക്ക് ബീ്ത്തി അയാള്‌ദ് ഉഡുപ്പുണ പങ്കി എ്ഡ്‌ത്താര്. 36അദ് കളിന്ത് അവാര് അദിലിതാനെ കുക്കാന്ത് കാവ കാത്തിര്‌ന്താര്. 37<<ഇദ് എഗുദാര്‌ദ് റാജാവു ഏസു>> എന്ത് അവാന്‌ക്ക് ണേരെ സൊന്ന കുറ്റണ എ്ള്‌ദി അവാന്‌ദ് തലേക്ക് മേല് ബെത്താര്. 38ഏസുദൊപ്പ റണ്ട് ത്‌റ്‌ട്ടാര്‌ണ, ഒരുത്താന ഏസുദ് ബല സാരിമ് ഒരുത്താന ഇ്ഡ സാരിമ് ബെത്ത് കുരുസ്‌ക്കെ സേത്തി ആണി അഡിത്താര്. 39-40അയ്യി ബയ്യെ ബന്ത് പോനവാര് തമ്മ് തലേന ആട്ടി കൊണ്ട് ഏസുണ: <<എഹേ, ണീ സാമികൂരേന പിദാരിന്ത് മൂണ് ണാള്‌ക്കുള്ളുക്ക് അദ്‌ണ കെ്ട്ടി മുഡിക്കുവെ എന്ത് സൊന്നവാനല്ല. ണീ ണിനാണ താനെ കാപാറ്റ്. ണീ സാമിമഗാ് ആനക്കന ണീ കുരുസിലിര്‌ന്ത് ഇ്റാങ്കി ബാ>> എന്ത് സൊല്ലി ണാണഗെ്ഡ്‌സിനാര്.
41അദേപാസെ എഗുദ പൂസാരി തലെവലാമ് ബേദ ബാത്ത്യലാമ് മൂപ്പലാമ് ഏസുണ ഇച്ചെ സൊല്ലി ണാണഗെ്ഡ്‌സിനാര്: 42<<അയാള് ബേ്റെ ആള്‌ഗണെല്ല കാപാറ്റിനാ്, ആന തനാണ കാപാറ്റ്യ മുഡിരാദില്ലെ. അയാള് ഇസ്‌റേല്‌ക്കാറാര്‌ദ് റാജാവു ആനാക്കി ഇപ്പ് താനെ കുരുസിലിര്‌ന്ത് ഇ്റാങ്കി ബരുഡൊ. അപ്പ് എമ്മ അയാള്‌ണ ണമ്പ്‌റേര്. 43അവാ് സാമിന ണമ്പ്‌റാ്. സാമിക്ക് അവാന പ്‌ഡിത്തിര്‌ന്ത സാമി അവാന കാപാറ്റുഡൊ. എന്ത്‌ക്കെന്റ, <ണാന് സാമിമഗാ്> എന്ത് അയാള് സൊന്നാനല്ല?>> 44അദേപാസെ ഏസുദൊപ്പ കുരുസ്‌ക്കെ സേത്തി ആണി അഡിത്ത ത്‌റ്‌ട്ടാര്‌മ് അയാള്‌ണ ണാണഗെ്ഡ്‌സിനാര്.
ഏസു സാരാ്
45ഉച്ചി ണേരാത്തിലിര്‌ന്ത് മൂണ് മണിമാട്ട് ണാഡൊട്ടുക്ക് ഇ്റ്‌ട്ട്‌കെ്ട്ടിര്‌ന്ത്‌ദ്. 46മൂണ് മണി ആഗാട്ടി ഏസു: <<എന്ന് സാമി, എന്ന് സാമി എനാണ കയ്യി ബ്‌ട്ടാദ് എന്ത്‌ക്ക്?>>#സാമി പാട്ട് ബുക്ക് 22:1 എന്ത് അര്‌ത്ത ഇര്‌ക്ക <<ഏലി, ഏലി, ലമ്മ സബത്താനി>> എന്ത് ബെല്ല്യാദ്‌ക്ക് അഗാറിനാ്.
47അദിലി ണിന്റ് ഇര്‌ന്തവാരിലി പഗ്‌ദി ആള്‌ഗ ഇദ്‌ണ കേ്ട്ട്: <<അവാ് ഏല്യാവുണ ഒളേക്കാ്>> എന്ത് സൊന്നാര്.
48അപ്പ്‌താനെ അവാര്‌ദിലി ഒരുത്താ് ഓഡി പോയി ഒരു പഞ്ചി എ്ഡ്‌ത്ത് പുളിര്‌ക്ക മുന്തിരി സാരാക്കെ മുക്കിനാ്. പ്‌റ ഒരു ഓഡെ ജല്ലേക്കെ കെ്ട്ടി അദ്‌ണ ഉജാത്തി ഏസുക്ക് കുഡിക്ക്യ കൊഡുത്താ്. 49അക്കുളെ ബാക്കി ആള്‌ഗ: <<പൊറിരി, ഏല്യാവു അയാള്‌ണ കാപാറ്റ്യ ബരാനൊ എന്ത് ണോഡുഗായി>> എന്ത് സൊന്നാര്.
50പിന്നേമ് ഏസു ബെല്ല്യാദ്‌ക്ക് അഗാറി ഉജുറുണ ബ്‌ട്ടാ്.
51അപ്പ്‌താനെ സാമികൂരേദ് അരാങ്ക കുച്ചുണ അലാക്ക പ്‌റ്‌ത്ത് ബെത്തിര്‌ക്ക തെരെസീലെ മേലിര്‌ന്ത് അഡിമാട്ട് റണ്ടായി കീ്റി എക്കിറ്റ്.. അക്കുളെ ബൂമി അദ്‌റിറ്റ്. അറെഗെല്ല ബ്‌ണ്ട്‌ദ്. 52പൊദേവഗ തുറാന്ത് സാമിക്ക് ബേ്ണ്ടി പെ്ളേത്ത എത്തിന്യൊ ആള്‌ഗ ഉജുറെ്ന്താര്. 53ഏസു ഉജുറെ്ന്ത പ്‌റ അവാര് പൊദേവഗാത്തിലിര്‌ന്ത് ബെ്ള്യെ ബന്ത് സാമിദ് പട്ടണ ആന എര്‌സലേമ്‌ക്കെ#27:53സാമിദ് പട്ടണ ആന എര്‌സലേമ്‌ക്കെ ഗ്‌റീക്ക് ണായാത്തിലി ഇദ്‌ണ സുത്താപ്പുള്ള പട്ടണ എന്ത്‌ത്തെ എ്ള്‌ദിര്‌ക്കാദ്. പോയി എത്തിന്യൊ ആള്‌ഗാദ് കണ്ണ്‌ക്ക് കാട്ടിനാര്.
54ണൂറ് പഡെയാളിഗാദ് തലെവാന്‌മ്, അയാള്‌ദൊപ്പ ഏസുക്ക് കാവ കാത്തിര്‌ന്തവാര്‌മ് ബൂമി അദ്‌റ്‌റാദ്‌ണാമ് അദിലി ണഡാന്താദ്‌ണാമ് കണ്ട് റമ്പ കോവെ പ്‌ഡിത്ത്: <<ണേര്‌മായിമ് ഇയാള് സാമിദ് മഗാ് ആയിര്‌ന്താ്>> എന്ത് സൊന്നാര്.
55ഏസുക്ക് ബേ്ഡുമാന കാര്യഗെല്ല സെയ്‌ദ് കൊണ്ട് ഗെലീലേലിര്‌ന്ത് അയാള് പിന്ന്‌ക്ക് ണഡാന്തിര്‌ന്ത എത്തിന്യൊ പെ്ണ്ണ്‌മക്കഗാമ് ദൂരാത്തിലിര്‌ന്ത് ണോഡികൊണ്ട് അദിലിര്‌ന്താര്. 56ഇവാര്‌ദ് കൂട്ടാത്തിലി മദ്ദള പട്ടണക്കാറിസി മറിയാമ്, ആക്കോവുദ്‌മ് ഓസേപ്‌ദ്‌മ് അവ്വാസിമ് സെവെദിദ് പെ്ണ്ടച്ചിമ് ആന മറിയാമ് ഇര്‌ന്തിര്‌ന്താര്.
ഏസു സാവുണ പൊദേക്കാര്
57അയ്യി ണാള് അന്ത്യോഡെ ആഗാട്ട്യെല്ല അരിമദ്ദ്യെക്കാറന്‌മ് ഏസുദ് സൊല്ലുപഡി ണഡാക്കവാന്‌മാന ഓസേപ് എങ്ക പണക്കാറാ് ബന്ത്, 58പീലത്തോസ്‌ക്കെ പോയി: <<ഏസുദ് സാവുണ എ്ഡ്‌ത്ത് പോയ ബ്‌ഡുഡോമെ>> എന്ത് കേ്ട്ടാ്. അക്കുളെ പീലത്തോസ് സാവുണ കൊഡുത്ത് ബ്‌ഡ്യ സൊന്നാ്. 59അച്ചെ ഓസേപ് സാവുണ ഇ്റാക്കി ണല്ല ബെ്ഡിപ്പുള്ള സീലേക്കെ സുറുട്ടി ബെത്താ്. 60പ്‌റ താന് കല്ലിലി താനെ കൊദേന്ത് ഉണ്ടാക്കിസി ബെത്തിര്‌ന്ത തന്ന് പുദ്യ കല്ലളേക്കെ സാവുണ എ്ഡ്‌ത്ത് പോയി ഇക്കിനാ്. പ്‌റ അയാള് ബെല്ല്യൊരു കല്ല്‌ണ ഉറുട്ടി എ്ഡ്‌ത്ത് ബന്ത് കല്ലളെ ബാസണ അഡേത്ത് ബെത്ത് പോനാ്. 61കല്ലളേക്ക് ണേരെ മദ്ദള പട്ടണക്കാറിസി മറിയാമ്, ആക്കോവുദ്‌മ് ഓസേപ്‌ദ്‌മ് അവ്വെ മറിയാമ് കുക്കാന്തിര്‌ന്താര്.
കല്ലളേക്ക് കാവക്കാറാര്‌ണ ബെക്കാര്
62ഒയിവു ണാളാന മറ് ണാള് എഗുദ പൂസാരി തലെവലാമ് പരിസലാമ് പീലത്തോസ് പട്ട്‌ക്ക് പോയി: 63<<പണ്ണാഡ്യെ, അയ്യി ബഞ്ചണെക്കാറാ് ഉജുറോഡെ ഇര്‌ക്കാട്ടി, <മൂണാവദ് ണാള് എങ്കാട്ടി ണാന് ഉജുറേ്വെ> എന്ത് സൊന്നാദ് എമാക്ക് ണെനേവു ബന്ത്‌ദ്. 64അദ്‌ണാലെ അവാന്‌ദ് സൊല്ലുപഡി ണഡാക്കവാര് പോയി സാവുണ ത്‌റ്‌ഡി എ്ഡ്‌ത്ത പ്‌റ അവാ് സത്തവാര്‌ദ് പട്ടിലിര്‌ന്ത് ഉജുറെ്ന്താ് എന്ത് ആള്‌ഗാക്കെ സൊല്ലുവാര്. അച്ചാനാക്കി കഡേസിലിര്‌ന്ത സദി മുദ ഇര്‌ന്ത സദിന ബ്‌ഡ റമ്പ ബുദ്ദിമുട്ടായിര്‌ക്കു. അദ്‌ണാലെ മൂണ് ണാള്‌മാട്ട് കല്ലളേന കാക്ക്യ ആള്‌ഗണ ബെക്കുഡൊ>> എന്ത് സൊന്നാര്.
65പീലത്തോസ് അവാര്‌ക്കെ: <<എന്ന് കാവക്കാറാര്‌ണ ണിമ്മ കൂട്ടി പോയി ണിമാക്ക് മുഡിര അളാവുക്ക് കല്ലളേന ണിമ്മ പാദ്‌ഗാപ്പോഡെ ബെയ്യിരി>> എന്ത് സൊന്നാ്. 66അച്ചെ അവാര് പോയി കല്ലളേക്ക് അഡേത്ത് ബെത്തിര്‌ന്ത കല്ല്‌ക്ക് മുദ്ദുറെ കുത്തിമ് കാവക്കാറാര്‌ണാമ് ബെത്ത് കല്ലളേന പാദ്‌ഗാപ്പാക്കിനാര്.
Trenutno odabrano:
മത്തായി 27: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
