മത്തായി 7
7
അഡ്‌ത്തവാര്‌ന കുറ്റ സൊല്ലി ബിദിക്ക ബേ്ഡ
1<<സാമി നിമാന ബിദിക്കാദിര്‌ക്ക്യ ബേ്ണ്ടി നിമ്മ ആര്‌നാമ് കുറ്റ സൊല്ലി ബിദിക്കാദേന്. 2എന്ത്‌ക്കെന്റ് സൊന്ന നിമ്മ അഡ്‌ത്തവാര്‌ന എത്തെ കുറ്റ സൊല്ലി ബിദിക്ക്‌ന്റ്‌റൊ അദേപാസെ താനെ സാമി നിമാനാമ് ബിദിക്കുവാന്. അഡ്‌ത്തവാര്‌ക്ക് നിമ്മ എഞ്ച്‌ക്ക് അളാന്ത് കൊഡുക്കുന്റുറൊ അഞ്ച്‌ക്ക് താനെത്തെ സാമി നിമാക്ക് തിരിക്കിമ് തരുവാന്.
3ആന നിന്ന് കണ്ണ്‌ല് മുട്ടിതോര ഇര്‌ക്കുവ സണ്ട്‌ന ബെത്ത് കൊണ്ടു അഡ്‌ത്തവാന് കണ്ണ്‌ല സ്‌ന്ന സണ്ട്‌ന നോഡുവാദ് എന്ത്‌ക്ക്? 4നിന്ന് കണ്ണ്‌ല് മുട്ടിതോര ഇര്‌ക്കുവ സണ്ട് ഇര്‌ക്കാട്ടി <മാ, നില്ല് നിന്ന് കണ്ണ്‌ല സ്‌ന്ന സണ്ട്‌ന എ്ഡ്‌ത്ത് തള്ള്‌ന്റെ> എന്റ് എത്തെ നിനാക്ക് അഡ്‌ത്തവാന്‌ക്ക് സൊല്ല്യ മുഡിമ്? 5ബക്‌തിഗാറാനായി നഡിക്ക്‌ന്റവാനെ, നീ മുദാല് നിന്ന് കണ്ണ്‌ല് മുട്ടിതോര ഇര്‌ക്കുവ സണ്ട്‌ന എ്ഡ്‌ത്ത് തള്ള്. അന്നാപ്പ്‌ത്തെ അഡ്‌ത്തവാന് കണ്ണ്‌ല സ്‌ന്ന സണ്ട്‌ന എ്ഡ്‌ത്ത് തള്ള്യ നിനാക്ക് സൊക്കാന കാട്ട്‌മ്.
6ബെലെപെറ്റ കാര്യഗാള്‌ന നായിഗാള്‌ന പാസെ കെ്ട്ടവാരാന ആള്‌ഗാള്‌ക്ക് നിമ്മ കൊഡുക്ക ബേ്ഡ. അവാര് നിമാന നായിഗാള്‌ന പാസെ തിരിക്കി കപ്പികൊഡേന്റവാര്‌ത്തെ. ബെലെപെറ്റ മുത്തുഗാള്‌ന പന്റിഗാള്‌ന പാസെ കെ്ട്ടവാരാന ആള്‌ഗാള്‌ക്ക് കൊഡുക്ക ബേ്ഡ. അദ്‌ന അവാര് മെ്ട്ടിതൊഗേത്ത് തള്ളുവാര്.>>
കേ്ള്‌ന്, പരാന്, കൊട്ടുനു
7<<സാമിന ബേ്ഡി കൊണ്ടേ ഇര്‌ന്. എന്റ് നിമാക്ക് കെ്ഡേക്ക്‌മ്. നിമാക്ക് ബേ്ഡ്‌മാനാദ്‌ക്കെല്ല കേ്ട്ട്‌കണ്ട് നോഡുനു. അന്നാപ്പ് നിമ്മ കണ്ട്‌പ്‌ഡിക്കുവുറു. ബാസന കൊട്ടികൊണ്ടേ ഇര്‌ന്. എന്റ് നിമാക്ക് ബാസ ത്‌റാക്ക്‌മ്. 8ബേ്ഡ്‌ന്റവാര്‌ക്കെല്ല കെ്ഡേക്ക്‌മ്, കേ്ട്ട്‌കണ്ട് നോഡുന്റവാര് കണ്ട്‌പ്‌ഡിക്കുവാര്, കൊട്ടുന്റവാര്‌ക്ക് ത്‌റാക്ക്‌മ്.
9മഗാന് അഡെ കേ്ട്ടദാന അവാന്‌ക്ക് കല്ല്‌ന കൊഡുക്കുവ ആരാറ്റ നിമ്മ് കൂട്ടാത്ത്‌ല് ഇര്‌ക്ക്‌ന്റാര? 10അല്ല പോന മീന് കേ്ട്ടദാന അവാന്‌ക്ക് പാമ്പ്‌ന കൊഡുക്കുവാന? 11അത്തെ കെ്ട്ടവാര് ആയിര്‌ക്കുവ നിമ്മ നിമ്മ് മക്കാള്‌ഗാള്‌ക്ക് നല്ലാദ് കൊഡുക്ക്യ തെരിന്തിന്ത മേലോഗാത്ത്‌ല അപ്പാന് സാമിന കേ്ള്‌ക്ക്‌ന്റവാര്‌ക്ക് നല്ലാദ്‌ന കൊഡുക്ക്യ സാമി എത്ത്‌റാഗോ മനേസ്സുള്ളവാന്‌ത്തെ. 12ബേ്റെ ആള്‌ഗാള് നിമാക്ക് ബേ്ണ്ടി എന്ത് ഗേന്ത് തരുഡൊ എന്റ് നിമ്മ ആസെപഡ്‌ന്റ്‌റൊ അദ് ഒട്ടുക്കു നിമ്മ അവാര്‌ക്ക്‌മ് ഗേന്ത് കൊഡുക്കുഡൊ. മോസെ ബെത്ത സാമി സട്ടഗാള്‌ത്ത്‌മ്, സാമിദാസ്‌ഗാള് സൊന്ന നായഗാള്‌ത്ത്‌മ് പൊറുളു ഇദ്‌ത്തെ.>>
ഇ്ണ്‌ക്ക് ബാസ
13<<ഇ്ണ്‌ക്ക് ബാസമേലെ കഡാന്. എന്ത്‌ക്കെന്റ് സൊന്ന നരഗാക്ക് പോവ ബട്ടെ ദൊഡ്ഡാദ്‌മ് അയി ബട്ടെമേലെ പോയ എ്ള്‌പ്പാമ്‌ത്തെ. എഞ്ചോ ആള്‌ഗാള് അയി ബട്ടെമേലെ പോന്റാര്. 14ആന ഉജുരു പട്ട്‌ക്ക് പോവ ബാസ ഇ്ണ്‌ക്കാമ് അയി ബട്ടെമേലെ പോയ ബുദ്ദിമുട്ടുമുത്തെ. അദ്‌ന കണ്ട്‌പ്‌ഡിക്ക്‌ന്റവാര് ലേസാത്തെ.>>
മരാമ് അയി മരാത്ത്‌ല പഗാമ്
15<<സാമിനിഗാല് സൊന്റെന്റ് ഉറുട്ടു സൊല്ലുവ സാമിദാസ്‌ഗാള്‌ന സൂസാരിത്ത് ഇര്‌ന്. അവാര് കറ്‌മ്മകറ്‌മ്മ ഇര്‌ക്കുവ കൊറ്യാഡ്‌ഗാള്‌ന പാസെ ബക്‌തിഗാറാരായി നഡിത്ത് കൊണ്ടു നിമ്മ് പട്ട്‌ക്ക് ബന്റാര്. ആന അവാര് കപ്പികൊഡേവ സെന്നായിഗാള്‌ന പാസെത്തെ. 16അവാര് ഗേവ കാര്യാത്ത്‌ലിന്ത് അവാര് എത്തവ ആള്‌ഗാളെന്റ് നിമാക്ക് നെപ്പ്‌കെ്ഡേക്ക്‌മ്. മുരുക്കു മരാത്ത്‌ലിന്ത് മുന്തിരി പഗാമ് മുള്ളു സെ്ഡിലിന്ത് അത്തി പഗാമ് കെ്ഡേക്ക്‌മ? 17അദേപാസെ നല്ല മര ഒട്ടുക്കു നല്ല കായിമ് സായി പ്‌ഡിത്ത മര കുറുഡു കായിമ് ബ്‌ഡ്‌ന്റ്. 18നല്ല മര കുറുഡു കായിമ് സായി പ്‌ഡിത്ത മര നല്ല കായിമ് കായിക്കമാട്ട. 19നല്ല കായി കായിക്കാത്ത മരഗാള്‌ന ഒട്ടുക്കു ബെ്ട്ടി തീയിക്ക് ഇക്കുവാര്. 20അദ്‌നാലെ അവാര് ഗേവ കാര്യാത്ത്‌ലിന്ത് അവാര് എത്തവ ആള്‌ഗാളെന്റ് നിമാക്ക് നെപ്പ്‌കെ്ഡേക്ക്‌മ്.
21എനാന <ആണ്ടവാനെ, ആണ്ടവാനെ> എന്റ് ബ്‌ളിക്കുവ എല്ലാവാര്‌നാമല്ല സാമി ആള്യ പോവാദ്. ആന മേലോഗാത്ത്‌ല എന്നപ്പാനാന സാമിക്ക് പ്‌ഡിത്ത കാര്യഗാള്‌ന ഗേന്റവാര്‌നത്തെ സാമി ആള്യ പോവാദ്. 22<ആണ്ടവാനെ, ആണ്ടവാനെ> എമ്മ നിന്ന് പേര്‌ല് സാമിക്ക് സൊല്ല്യ ഇര്‌ക്കുവാദ്‌ന ആള്‌ഗാള്‌ക്ക് സൊല്ലിര്‌ന്റേമ്, നിന്ന് പേര്‌ല് എമ്മ ആള്‌ഗാള്‌ക്ക് തട്ടിന്ത കെ്ട്ടജാദിഗാള്‌ന തട്ടിസി തള്ളിമ് എഞ്ചോ ദൊഡ്ഡുദൊഡ്ഡ അദിസ്യഗാള് ഗേന്ത്‌മ് ഇര്‌ന്റേമ് എന്റ് ബിദി സൊല്ലുവ നാള്‌ല് എനാക്ക് എഞ്ചോ ആള്‌ഗാള് സൊല്ലുവാര്. 23അയി നാള് നാന് അവാര്‌ക്ക്: <എനാക്ക് നിമാന തെര്യാഗേ തെര്യ. കെ്ട്ടാദ് ഗേന്റവാരെ, എന്ന് പട്ട്‌ലിന്ത് കഡാന്ത് പോനു> എന്റ് കണ്ടിപ്പായി സൊല്ലുവെ.>>
റാഡ് ദിന്‌സ് ബീ്ഡ് എ്ഡ്‌ക്ക്‌ന്റവാര്
24<<അദ്‌നാലെ നാന് സൊല്ലുവ ഈ നായഗാള്‌ന കേ്ട്ട് അദേപാസെ നഡാക്ക്‌ന്റവാന് അറെകുദ്ദാക്ക് ബീ്ഡ് എ്ഡ്‌ക്കുവ ബുദ്ദിഗാറാന്‌ക്ക് സമാത്തെ. 25ദൊഡ്ഡ മഗെ അഡിത്ത് ബാനിഗാള്‌ല് നീര്‌മ് തുമ്പുറ്റു. ദൊഡ്ഡ കാറ്റ് ബന്ത് ബീ്ഡ്‌ക്ക് അഡിത്ത്‌ദ്. ആന അയി ബീ്ഡ് അറെ കുദ്ദാക്ക് ബേസ്‌മട്ട കെ്ട്ടി എ്ഡ്‌ത്തിന്താദ്‌നാലെ പ്‌ഡാങ്കി ബീ്ഗാലെ. 26ആന നാന് സൊല്ലുവ ഈ നായഗാള്‌ന കേ്ട്ട് അദേപാസെ നഡാക്കാത്തവാന് മണാല് കുദ്ദാക്ക് ബീ്ഡ് എ്ഡ്‌ത്ത ബുദ്ദില്ലത്തവാന്‌ക്ക് സമാത്തെ. 27ദൊഡ്ഡ മഗെ അഡിത്ത് ബാനിഗാള്‌ല് നീര്‌മ് തുമ്പുറ്റു. ദൊഡ്ഡ കാറ്റ് ബന്ത് ബീ്ഡ്‌ക്ക് അഡിത്ത്‌ദ്. അയി ബീ്ഡ് ഒന്റു സ്‌ന്നാദ് ഗുഡി ഇല്ലാദെ പിരിങ്കി തള്ള്‌ട്ട്.>>
28ഈ നായഗാള്‌നെല്ല ഏസ്സ് സൊല്ലി തീന്താദ്‌മ് ആള്‌ഗാളൊട്ടുക്കു അയാള് സൊന്ന ബുദ്ദിനായന കേ്ട്ട് അദിസ്യപട്ടാര്. 29എന്ത്‌ക്കെന്റ് സൊന്ന അവാര്‌ത്ത് ബേദബാത്ത്യനാമ്‌ഗാള്‌ന പാസെ അല്ല, അദിഗരത്തോഡ ആയിന്ത്‌ദ് ഏസ്സ് അവാര്‌ക്ക് ബുദ്ദിനായ സൊന്നാദ്.
Trenutno odabrano:
മത്തായി 7: സാമി സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Computer Institute
