മത്തായി 5
5
ആര് ബാഗ്യഗാറാര്
1ആള്‌കൂട്ടാന കണ്ടാദ്‌നാലെ ഏസ്സ് മലെകുദ്ദാക്ക് ഏ്റി പോയി കുക്കാന്താന്. അദ്‌ക്ക് പ്‌റ തന്ന് സൊല്ലുപഡി നഡാക്ക്‌ന്റവാര് അയാള് പട്ട്‌ക്ക് ബന്താര്. 2പിന്നെ ഏസ്സ് അവാര്‌നൊട്ടുക്കു ഇത്തെ സൊല്ലികൊണ്ടു പഡിസ്യ പ്‌ഡിത്താന്:
3<<എല്ലാ കാര്യഗാള്‌ക്ക്‌മ് ബേ്ണ്ടി സാമിക്ക് അണ്ട്‌ന്റവാര് ബാഗ്യകേ്ട്ടവാര്,
എന്ത്‌ക്കെന്റ് സൊന്ന അവാര് സാമി ആളുവ കാലാക്ക് പട്ടവാര് ആവാര്.
4ഇന്നാല് ദുക്കപഡ്‌ന്റവാര് ബാഗ്യകേ്ട്ടവാര്,
എന്ത്‌ക്കെന്റ് സൊന്ന സാമി അവാര്‌ന ദയിരപഡുസുവാന്.
5തണിമോഡ നഡാന്ത്‌പ്‌ഡിത്ത് ഗേന്റവാര് ബാഗ്യകേ്ട്ടവാര്,
എന്ത്‌ക്കെന്റ് സൊന്ന അവാര് ബൂമിന തമ്മ് കയിക്ക് മാഡുവാര്.
6നീദിക്ക് ബേ്ണ്ടി മ്‌ഗ്‌ന്ത ആസെപഡ്‌ന്റവാര് ബാഗ്യകേ്ട്ടവാര്,
എന്ത്‌ക്കെന്റ് സൊന്ന സാമി അവാര്‌ക്ക് മദി ബരമാട്ട്‌ക്ക് നീദ്യുള്ള കാര്യഗാള് ഗേന്ത് കൊഡുക്കുവാന്.
7അഡ്‌ത്തവാര്‌ന ഗവപഡ്‌ന്റവാര് ബാഗ്യകേ്ട്ടവാര്,
എന്ത്‌ക്കെന്റ് സൊന്ന സാമിമ് അവാര്‌ന ഗവപഡുവാന്.
8തമാന ഒന്റേപെ്ട്ട് സാമിക്ക് ബേ്ണ്ടി ഒപ്പിസി കൊഡുത്തവാര് ബാഗ്യകേ്ട്ടവാര്,
എന്ത്‌ക്കെന്റ് സൊന്ന അവാര് സാമിന കാണുവാര്.
9അഡ്‌ത്തവാര്‌ന സമദന മാഡി പെ്ളേക്ക്യ ബെക്ക്‌ന്റവാര് ബാഗ്യകേ്ട്ടവാര്.
എന്ത്‌ക്കെന്റ് സൊന്ന അവാര്‌ക്ക് സാമിപ്‌ള്ളെഗാള് എന്നുവ പേര് കെ്ഡേക്ക്‌മ്.
10സാമി കണ്ണ്‌ക്ക് നേര്‌മുള്ള കാര്യഗാള് ഗേവാദ്‌നാലെ കൊഡിമെപഡ്‌ന്റവാര് ബാഗ്യകേ്ട്ടവാര്.
എന്ത്‌ക്കെന്റ് സൊന്ന അവാര് സാമി ആളുവ കാലാക്ക് പട്ടവാര് ആവാര്.
11നിമ്മ എന്ന് സൊല്ലുപഡി നഡാക്കുവാദ്‌നാലെ നിമാന നാണഗെ്ഡ്‌സ്‌ഗാട്ടിമ് കൊഡിമെപഡ്‌സ്‌ഗാട്ടിമ് എല്ലാ ദിന്‌സ് കെ്ട്ട കാര്യഗാള് ഗേന്റവാരെന്റ് നിമാന പറ്റി ഉറുട്ടു സൊല്ലുഗാട്ടിമ് നിമ്മ ബാഗ്യകേ്ട്ടവാര്‌ത്തെ. 12മേലോഗാത്ത്‌ല് സാമി നിമാക്ക് മ്‌ഗ്‌ന്ത കൂലി ബെത്ത്‌റ്‌ക്കുവാദ്‌നാലെ നിമ്മ പിര്യപൊങ്കിമറ്‌ന്ത് നഡാന്. നിമാക്ക് മുദാല് പെ്ളേത്തിന്ത സാമിദാസ്‌ഗാള്‌നാമ് ആള്‌ഗാള് ഇദേപാസെ കൊഡിമെപഡിസിര്‌ക്ക്‌ന്റാര്.>>
ഉപ്പുമു ബെ്ള്‌സാമ്
13<<നിമ്മ ബൂമിലിര്‌ക്ക്‌ന്റവാര്‌ക്ക് ഉപ്പു ആയിര്‌ക്ക്‌ന്റ്‌റ്. ആന ഉപ്പുക്കിര്‌ക്കുവ ഗുണ ഇല്ലാദ്യാന പിന്നെ എത്തെ അദ്‌ക്കിര്‌ക്കുവ ഗുണ മാഡ്യ മുഡിമ്? അദ്‌ന ബെ്ളിഗെ തള്ളി മന്‌സാര് മെ്ട്ടി പെജേവാര്. അല്ലാദെ ബേ്റൊന്റുക്കുമു ഉവഗരപഡമാട്ട.
14നിമ്മ ഉലഗാത്ത്‌ലിര്‌ക്ക്‌ന്റവാര്‌ക്ക് ബെ്ള്‌സ ആയിര്‌ക്ക്‌ന്റ്‌റ്. മലെകുദ്ദാക്ക് ഇര്‌ക്കുവ പട്ടണാക്ക് മറേന്തിര്‌ക്ക്യ മുഡ്യാമാട്ട. 15ബ്‌ളാക്ക്‌ന കത്തിസി ആര്‌മ് തെക്ക്‌ന കവുസി ബെക്കുവാദില്ലെ. പഡികുദ്ദാക്ക്‌ത്തെ ബെക്കുവാദ്. അന്നാപ്പ്‌ത്തെ ബീ്ഡ്‌ല് ഇര്‌ക്ക്‌ന്റവാര്‌ക്ക് ഒട്ടുക്കു ബെ്ള്‌സഡിക്ക്‌മ്. 16അദേപാസെ നിമ്മ ഗേവ നല്ല കാര്യഗാള്‌ന കണ്ട് മേലോഗാത്ത്‌ല നിമ്മ് അപ്പാന് സാമിന അഡ്‌ത്തവാര് പെരിമെപഡ്യ നിമ്മ് ബെ്ള്‌സ അവാര് മുന്നുക്കു അഡിക്കുഡൊ.>>
സാമിസട്ടന പറ്റി പഡ്‌സ്‌ന്റാന്
17<<മോസെ ബെത്ത സട്ടനാഗൊ സാമിദാസ്‌ഗാള് സൊന്ന നായഗാള്‌നാഗൊ ഇല്ലാദെ മാഡ്യ നാന് ബന്തേനെന്റ് നിമ്മ നെനേക്കാദേന്. ഇല്ലാദെ മാഡ്യല്ല, അദ്‌ല് സൊല്ലിര്‌ക്കുവാദ്‌ന പാസെ ഗേന്ത് മുഡിക്ക്യ ബേ്ണ്ടിത്തെ നാന് ബന്ത്‌റ്‌ക്കുവാദ്. 18നാന് സത്ത്യമായി നിമാക്ക് സൊന്റെ, ബാന്‌മ് ബൂമിമ് ഒയിന്ത് പോഗ മാട്ട്‌ക്ക് മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവ എല്ലാ കാര്യഗാള്‌മ് നഡാക്കുവ ബരിദി അദ്‌ലിര്‌ക്കുവ സ്‌ന്ന ഒന്റു എ്ള്‌ത്തൊ ഒന്റു കുത്തൊ ഒയിന്ത് പോഗമാട്ട. 19അദ്‌നാലെ ഈ സട്ടാത്ത്‌ല് സൊല്ലിര്‌ക്കുവ കല്‌പനെഗാള്‌ല് ദൊഡ്ഡാദല്ല എന്റ് നെനേക്കുവ ഒന്റു കല്‌പനെ പഡി നഡാക്കാദെ അഡ്‌ത്തവാര്‌മ് അയി കല്‌പനെ പഡി നഡാക്ക ബേ്ഡ എന്റ് പഡ്‌സ്‌ന്റവാന്‌ന സാമി ആളുവ കാലാത്ത്‌ല് എല്ലാര്‌ക്ക് ബ്‌ഡ സ്‌ന്നവാന് എന്റ് സൊല്ലുവാര്. ആന ഈ കല്‌പനെഗാള് പഡി നഡാന്ത് അഡ്‌ത്തവാര്‌മ് ഈ കല്‌പനെഗാള് പഡി നഡാക്കുഡൊ എന്റ് പഡ്‌സ്‌ന്റവാന്‌ന സാമി ആളുവ കാലാത്ത്‌ല് ദൊഡ്ഡവാന് എന്റ് സൊല്ലുവാര്. 20സാമി ഗേയ സൊല്ലിര്‌ക്കുവ കാര്യഗാള്‌ന ഗേവാദ്‌ല് പരിസാര്‌ഗാള്‌ക്ക്‌മ് ബേദബാത്ത്യനാമ്‌ഗാള്‌ക്ക്‌മ് ബ്‌ഡ നിമ്മ നമ്പ്യ മുഡിന്റവാരാഗാദെ പോന സാമി ആളുവ കാലാക്ക് എജ്ജാഗേ മാട്ട്‌റ് എന്റ് നാന് നിമാക്ക് സൊന്റെ.>>
മൊനേന പറ്റി പഡ്‌സ്‌ന്റാന്
21<< <ആര്‌നാമ് കൊലെഗേഗ ബേ്ഡ എന്റ്‌മ് കൊലെ ഗേന്റവാന് നായാക്ക് സിക്കുവാന്>#പയണ 20:13 എന്റ്‌മ് മുന്തെല പാട്ടനാമ്‌ക്ക് സൊല്ലിര്‌ക്കുവാദ്‌ന നിമ്മ കേ്ട്ട്‌റ്‌ക്ക്‌ന്റ്‌റല്ല? 22ആന നാന് നിമാക്ക് സൊല്ലുവാദ് എന്തെന്റ് സൊന്ന, ആരാറ്റോഡ മൊനേക്ക് തെ്ട്ട്‌ന്റവാനെല്ല നായാക്ക് സിക്കുവാന്. ആരാറ്റ്‌ന മൂളെ ഇല്ലത്തവാന് എന്റ് സൊല്ലി ബ്‌ളിക്ക്‌ന്റവാന് എഗുദാര് കോഡിദിക്ക് ബദ്‌ല് സൊല്ല്യ ബേ്ണ്ടി ബര്‌മ്. ആരാറ്റ്‌ന തൊലേന്തവാന് എന്റ് സൊല്ലുന്റവാനൊ അഗ്ഗിനി നരഗാക്ക് എരെ അവാന്.
23അദ്‌നാലെ നീ നേര്‌സെ കൊഡുക്ക്യ ബേ്ണ്ടി പലി കൊഡുക്കുവ മദ്‌ല് പട്ട്‌ക്ക് പോഗാട്ടി നിന്നോഡ ആരാറ്റ്‌ക്ക് മൊനെ ഇര്‌ക്ക്‌ന്റ് എന്റ് അദ്‌ല് ബെത്ത് നിനാക്ക് നെനേവു ബന്തദാന, 24നിന്ന് നേര്‌സെന പലി കൊഡുക്കുവ മദ്‌ല് പട്ട്‌ക്ക് ബെത്ത്‌തള്ളി മുദാല് പോയി അയാളോഡ രാജി കൂഡു. അദ്‌ക്ക് പ്‌റ ബന്ത് നിന്ന് നേര്‌സെന കൊഡു.
25നിന്ന് പോട്ടിഗാറാന് നിനാന കോഡിദിക്ക് എ്ഡ്‌ത്ത് പോഗാട്ടി ബട്ടേല് ബെത്ത് താനെ അയാളോഡ രാജ്യാഗ്. രാജ്യാഗാദെ പോന പോട്ടിഗാറാന് നിനാന നായഗാറാന് കയിക്ക്‌മ് നായഗാറാനിന്ത് നിനാന ജെയിലദിഗാരി കയിക്ക്‌മ് കൊഡുക്കുവാന്. അത്തെ ജെയിലദിഗാരി നിനാന ജെയില്‌ക്ക് അഡേക്കുവാന്. 26തപ്പ് കെ്ട്ട്യ സൊന്ന പണനൊട്ടുക്കു കൊഡുത്തു മുഡിക്ക മാട്ട്‌ക്ക് നിനാന ജെയില്‌ലിന്ത് ഇ്റാക്കമാട്ടാര് എന്റ് നാന് സത്ത്യമായി നിമാക്ക് സൊന്റെ.>>
ബേസ്യാഡുവാദ്‌ന പറ്റി പഡ്‌സ്‌ന്റാന്
27<< <ബേസ്യാഡ ബേ്ഡ>#പയണ 20:14 എന്റ് സൊല്ലിര്‌ക്കുവാദ്‌ന നിമ്മ കേ്ട്ട്‌റ്‌ക്ക്‌ന്റ്‌റല്ല? 28ആന നാന് നിമാക്ക് സൊല്ലുവാദ് എന്തെന്റ് സൊന്ന, പെ്ണ്ണ്‌ക്ക് ആസെപട്ട് ഒന്റൊരുത്തിന നോഡുന്റവാനെല്ല മനേസ്സ്‌കുളാക്ക് താനെ അവാളോഡ ബേസ്യാഡ്‌നാന്. 29ആന നിന്ന് ബല കണ്ണ് നിനാന പാവ ഗേയ ബെത്തദാന അദ്‌ന സൊളോണ്ടി എ്ഡ്‌ത്ത് എ്റിന്ത് തള്ള്. നിന്ന് സരിഗലൊട്ടുക്കു നരഗാക്ക് പോയി അലേവാദ്‌ന ബ്‌ഡ നിന്ന് സരിഗലാത്ത്‌ല് ഇര്‌ക്കുവാദ്‌ഗാള്‌ല് ഒന്റു ഇല്ലാദ്യാവാദ് നിനാക്ക് നല്ലാദ്. 30നിന്ന് ബല കയി നിനാന പാവ ഗേയ ബെത്തദാന അയി കയിന ബെ്ട്ടി എ്റിന്ത് തള്ള്. നിന്ന് സരിഗലൊട്ടുക്കു നരഗാക്ക് പോയി അലേവാദ്‌ന ബ്‌ഡ നിന്ന് സരിഗലാത്ത്‌ല് ഇര്‌ക്കുവാദ്‌ഗാള്‌ല് ഒന്റു ഇല്ലാദ്യാവാദ് നിനാക്ക് നല്ലാദ്.>>
ആളാന്‌പെ്ണ്ട് പ്‌റ്‌വാദ്‌ന പറ്റി പഡ്‌സ്‌ന്റാന്
31<< <ആരാറ്റ പെ്ണ്ട്‌ന ബ്‌ട്ടദാന പെ്ണ്ട്‌ന ബ്‌ട്ട്‌റ്‌ക്ക്‌ന്റെ എന്റ് എ്ള്‌ദിര്‌ക്കുവ എ്ള്‌ത്ത് എ്ള്‌ദി അവാള്‌ക്ക് കൊഡുക്കുഡൊ>#മറിസി സൊല്ലുവ സട്ട 24:1 എന്റ് സൊല്ലിര്‌ക്ക്‌ന്റല്ല? 32ആന നാന് നിമാക്ക് സൊല്ലുവാദ് എന്തെന്റ് സൊന്ന, ബേസ്യാഡി നഡാക്ക്‌ന്റവാളാനത്തെ പെ്ണ്ട്‌ന ബ്‌ഡ്‌ഡൊ. അല്ലാദെ പെ്ണ്ട്‌ന ബ്‌ഡ്‌ന്റവാനെല്ല അവാള്‌ന ബേസ്യാഡ്യ ബെക്ക്‌ന്റാന്. ബ്‌ട്ട് തള്ള്‌നവാള്‌ന എ്ഡ്‌ക്ക്‌ന്റവാന്‌മ് ബേസ്യാഡ്‌ന്റാന്.>>
സത്ത്യ ഗേവാദ്‌ന പറ്റി പഡ്‌സ്‌ന്റാന്
33<< <നിമ്മ ഒന്റാള്‌ക്ക് സത്ത്യഗേന്ത് കൊഡുത്ത കാര്യന ഗേഗാദിര്‌ക്കാദേന് എന്റ്‌മ് ആണ്ടവാന്‌ക്ക് ഗേന്ത് കൊഡുത്ത സത്ത്യന ഗേന്ത് കൊഡുക്കുഡൊ> എന്റ്‌മ് മുന്തെല പാട്ടനാമ്‌ക്ക് സൊന്നാദ്‌നാമ് നിമ്മ കേ്ട്ട്‌റ്‌ക്ക്‌ന്റ്‌റല്ല? 34ആന നാന് നിമാക്ക് സൊല്ലുവാദ് എന്തെന്റ് സൊന്ന, നിമ്മ സത്ത്യ ഗേഗാഗേ ബേ്ഡ, മേലോഗ പേര്‌ന സൊല്ലി സത്ത്യ ഗേഗാദേന്, എന്ത്‌ക്കെന്റ് സൊന്ന അദ് സാമി ആള്യ കുക്കാന്ത്‌റ്‌ക്കുവ കുറിഞ്ചി. 35ബൂമിന അഡിത്ത് സത്ത്യ ഗേഗാദേന്, എന്ത്‌ക്കെന്റ് സൊന്ന അദ് സാമി ആളുവ പട്ട്, എര്‌സലേമ് പേര്‌ന സൊല്ലി സത്ത്യ ഗേഗാദേന്, എന്ത്‌ക്കെന്റ് സൊന്ന അദ് മഗരാജാവാന സാമി പട്ടണ. 36നിന്ന് തലേന അഡിത്ത് സത്ത്യ ഗേഗാദെ, എന്ത്‌ക്കെന്റ് സൊന്ന തലെമൂര് ഒന്റുനാമ് ബെ്ള്‌ക്ക്യാഗൊ കറ്‌ത്ത കറ്‌ത്ത മാഡ്യഗൊ നിനാക്ക് മുഡ്യാമാട്ട. 37അദ്‌നാലെ ഇര്‌ക്ക്‌ന്റ് എന്റ് സൊന്ന ഇര്‌ക്ക്‌ന്റ് എന്റ്‌മ് ഇല്ലെ എന്റ് സൊന്ന ഇല്ലാദേമ് ഇര്‌ക്കുഡൊ. ഇദ്‌ക്ക് മീ്റി സൊല്ലുവ നായഗാളെല്ല കെ്ട്ടവാന്‌ലിന്ത് ബരുവാദ്‌ത്തെ.>>
പള്യെ്ഡ്‌ക്കുവാദ്‌ന പറ്റി പഡ്‌സ്‌ന്റാന്
38<< <കണ്ണ്‌ക്ക് ബദ്‌ല കണ്ണ്‌മ് പല്ല്‌ക്ക് ബദ്‌ല പല്ല്‌മ്>#പയണ 21:24; ലേവ്യാര് 24:20; മറിസി സൊല്ലുവ സട്ട 19:21 എന്റ് സൊല്ലിര്‌ക്കുവാദ്‌ന നിമ്മ കേ്ട്ട്‌റ്‌ക്ക്‌ന്റ്‌റല്ല? 39ആന നാന് നിമാക്ക് സൊല്ലുവാദ് എന്തെന്റ് സൊന്ന, നിനാക്ക് കെ്ട്ടാദ് ഗേന്തവാര്‌ക്ക് കെ്ട്ടാദ് ഗേഗാദെ. ആരാറ്റ നിന്ന് ബല പഗ്‌ഡ്‌ന അഡിത്തദാന ഇ്ഡ പഗ്‌ഡ്‌നാമ് കാട്ടി കൊഡു. 40നിന്നോഡ പോട്ടിക്ക് നിന്റ് കോഡിദിക്ക് പോയി നിന്ന് കമ്‌സ്‌ന എ്ഡ്‌ക്ക്യ ആസെപഡ്‌ന്റവാന്‌ക്ക് നിന്ന് പൊദേപ്പ്‌നാമ് കൊഡു. 41ആരാറ്റ ഒന്റാള് തന്ന് മൂട്ടെന ഒന്റു മയില് ദൂര എ്ഡ്‌ത്ത് പോയ നിനാന നത്ത്‌നദാന നീ റാഡ് മയില് ദൂര എ്ഡ്‌ത്ത് പോയി കൊഡു. 42നിനാന ഉദാവി കേ്ള്‌ക്ക്‌ന്റവാന്‌ക്ക് നീ ഉദാവി ഗേന്ത് കൊഡു. നിനാന കഡാന് കേ്ള്‌ക്ക്‌ന്റവാന്‌ന നീ ബെ്റ് കയ്യോഡ ബ്‌ഡാദെ.>>
പോട്ടിഗാറാര്‌ന സീവാന്‌ബെത്ത് നഡാക്കുഡൊ
43<< <എ്ണേവുഗാറാര്‌ന സീവാന്‌ബെത്ത് നഡാക്കുഡൊ എന്റ്‌മ് പോട്ടിഗാറാന്‌ന സീവാന്‌ബെത്ത് നഡാക്ക ബേ്ഡ>#ലേവ്യാര് 19:18 എന്റ്‌മ് സൊല്ലിര്‌ക്കുവാദ്‌ന നിമ്മ കേ്ട്ട്‌റ്‌ക്ക്‌ന്റ്‌റല്ല? 44ആന നാന് നിമാക്ക് സൊല്ലുവാദ് എന്തെന്റ് സൊന്ന, നിമ്മ് പോട്ടിഗാറാര്‌ന സീവാന്‌ബെത്ത് നഡാന്. നിമാന കൊഡിമെപഡ്‌സ്‌ന്റവാര്‌ക്ക് ബേ്ണ്ടി പരേസ്‌ന്. 45ഇത്തെ ഗേവാദ്‌നാലെ നിമ്മ മേലോഗാത്ത്‌ല നിമ്മ് അപ്പാനാന സാമിക്ക് പ്‌ള്ളെഗാളാവുറു. എന്ത്‌ക്കെന്റ് സൊന്ന, സാമി കെ്ട്ടവാര്‌ക്ക്‌മ് നല്ലവാര്‌ക്ക്‌മ് ബേ്ണ്ടി തന്ന് നേരന കഡാത്ത്‌ന്റാന്. നേര്‌മെഗാറാര്‌ക്ക്‌മ് നേര്‌മല്ലത്തവാര്‌ക്ക്‌മ് മഗെ അഡ്‌സ്‌ന്റാന്. 46നിമാന സീവാന്‌ബെത്ത് നഡാക്ക്‌ന്റവാര്‌ന താനെ നിമ്മ സീവാന്‌ബെത്ത് നഡാന്തദാന നിമാക്ക് കൂലി ഒന്റുമു കെ്ഡേക്കമാട്ട. കന്ത്യ കെ്ട്ടുവ കാസ് പിരിക്കുവ കെ്ട്ടവാര്‌മ് അത്തേത്തെ ഗേന്റാരല്ല? 47എ്ണേവുഗാറാര്‌ന താനെ നിമ്മ ബിനാത്തി നായനൊഡിന്ത് നഡാന്തദാന അഡ്‌ത്തവാര് ഗേവാദ്‌ക്ക് അദിഗ നിമ്മ എന്ത് ഗേന്റ്‌റ്? സാമിന തെര്യാത്ത ആള്‌ഗാള്‌മ് അത്തേത്തെ ഗേന്റാരല്ല? 48അദ്‌നാലെ മേലോഗാത്ത്‌ല നിമ്മ് അപ്പാന് എല്ലാ നല്ല ഗുണഗാള്‌മ് തുമ്പിര്‌ക്ക്‌ന്റവാനായി ഇര്‌ക്കുവ പാസെ നിമ്മാമ് എല്ലാ നല്ല ഗുണഗാള്‌മ് തുമ്പിര്‌ക്ക്‌ന്റവാരായി ഇര്‌ന്.>>
Trenutno odabrano:
മത്തായി 5: സാമി സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Computer Institute
