लूका 24
24
ईसू को पाछो जीवतो वेणो
(मत्ती 28:1–10; मरकुस 16:1–8; यहुन्ना 20:1–10)
1हपता का पेलेई दन दितवार ने वेगी हवेर पेल्या वीं लुगायाँ हव बानावाली चिजाँ अन अंतर लेन कबर के नके अई, जिंने वणा खुद बणायो हो। 2वाँने कबर का मुण्डा पूँ मोटो भाटो छेटी हरकायो तको मल्यो। 3अन वीं मयने गी, पण वाँने परबू ईसू की लास ने लादी। 4तद्याँ वे ईं बातऊँ दरप अन संका में आगी ही अन देको अणाचेत का वाँका नके चमकता तका गाबा पेरियाँ तका दो मनक आन ऊबा वेग्या। 5जद्याँ वीं दरपगी अन रेटे मुण्डो करन ऊबी वेगी, तो वणा मनकाँ लुगायाऊँ क्यो, “थाँ जीवता ने मरिया तका में काँ होदो हो? 6#मत्ती 16:21; 17:22,23; 20:18,19; मर 8:31; 9:31; 10:33,34; लूका 9:22; 18:31–33वो अटे कोयने हे, पण वो पाछो जीवतो वेग्यो हे। आद करो के, वणी थाँने गलील में कई क्यो के, 7‘ओ जरूरी हो के, मूँ मनक का पूत पाप्याँ का हाताँ में पकड़वायो जाऊँ अन पसे मूँ हूळी पे चड़ा दिदो जाऊँ अन मूँ पाछो तीजे दन जीवतो वे जाऊँ।’ ” 8तद्याँ वणा लुगायाँ ने वींकी बाताँ आद अईगी।
9अन वीं कबरऊँ पाच्छी आन वणा ग्याराई चेला ने अन हाराई ने आ बात बतई। 10जणा लुगायाँ थरप्या तका चेला ने आ बात बतई ही वणामें मरियम मगदलीनी अन योना अन याकूब की बई मरियम अन वणा का हाते की दूजी लुगायाँ भी ही। 11पण, वाँकी ईं बाताँ चेला ने जूटी लागी अन वणा अणा बाताँ ने अणहूणी करन टाळ दिदी। 12तद्याँ पतरस उटन कबर का आड़ी दोड़्यो अन वणी कबर में छाकन देक्यो के, तो वटे धोळा चादरो पड़्या हा ओर कई ने हो। पसे वटे ज्यो भी वणी देक्यो वींमें अचम्बो करतो तको आपणाँ घरे परोग्यो।
इम्माऊस का गेला पे
(मरकुस 16:12–13)
13वणीस दन ईसू का चेला मेंऊँ दो जणा यरूसलेमऊँ च्यार कोस छेटी बस्या तका इम्माऊस नाम का गाम में जारिया हा। 14अन वीं अणा हारी बाताँ पे जी अबाणू वीं ही होच-बच्यार करता तका एक-दूजाऊँ बाताँ करता तका जारिया हा। 15वीं जद्याँ एक-दूजाऊँ बाताँ कररिया हा, तो खुद ईसू वाँका वटे परगट व्या अन वाँके हाते-हाते चालबा लागा। 16पण, वाँकी आक्याँ अस्यी बन्द कर दिदी गी ही के, वीं वींने देकता तका भी ओळक ने सक्या।
17तो ईसू वणाऊँ पूँछ्यो, “आ कई बात हे, ज्यो थाँ एक-दूजाऊँ कररिया हो?”
वीं दकी वेन ऊबा रेग्या। 18ओ हूँणन वाँका मेंऊँ क्लियुपास नाम के एक मनक क्यो, “कई थूँ यरूसलेम में एकलो ईं परदेसी हे? ज्यो थूँ जाणे कोयने हे के, अणा दनाँ में वटे कई वेरियो हे?”
19ईसू वणाऊँ पूँछ्यो, “कस्यी बाताँ?”
वणा ईसू ने क्यो, “हारी बाताँ नासरत का ईसू का बारा में हे, वो अस्यो मनक हो, जणी ज्यो भी क्यो हो अन ज्यो किदो हो अणीऊँ वणी परमेसर अन हाराई लोग-बागाँ का हामे यो बता दिदो के, वो एक मोटो परमेसर का आड़ीऊँ बोलबावाळो हो। 20वींने मुक्य याजकाँ अन माकाँ हाकमाँ पकड़वा दिदो के, वींने मोत की सजा को दण्ड दिदो जावे अन वींने हूळी पे चड़ायो। 21पण, माँने भरोसो हो के, वोईस इजराएल ने छुटकारो देई। ईं हारी बाताँ व्या ने आज तीन दन वेग्या हे। 22अन माँके अटा की नरी लुगायाँ माकाँ में एक अचम्बो पेदा कर दिदो हे, जीं हवेर पेल्याँ वेगी कबर में गी ही। 23पण जद्याँ वाँने वींकी लास वटे ने मली, तो वीं ओ केती तकी अई के, माँ हरग-दुत का दरसण किदा अन वणा दुताँ माँने क्यो के, ‘ईसू पाछो जीवतो वेग्यो हे।’ 24जद्याँ माकाँ हण्डाळ्याँ मूँ कुई कबर पे ग्या अन ज्यो वणा लुगायाँ क्यो हो, वस्यीईस बात वटे देकी, पण ईसू ने, ने देक्या।”
25तद्याँ ईसू वाँने क्यो, “ओ बना अकल का अन परमेसर का आड़ीऊँ बोलबावाळा की बाताँ पे भरोसो ने करबावाळा मनकाँ। 26कई ओ जरूरी ने हो के, मसी ओ दुक जेलन आपणी खुद की मेमा में जावे?” 27अन अणी तरिया मूसाऊँ सरू करन हाराई परमेसर का आड़ीऊँ बोलबावाळा का सास्तर में वींका बारा में क्यो ग्यो हो, वणा वींको बखाण करन वाँने हमजाया।
28अतराक में वीं वणी गाम में पूग ग्या, जटे वीं जारिया हा अन ईसू का ढंगऊँ ओ लागो के, वींके ओर आगे जाणो हे। 29पण, वणा वींने ओ केन रोक्यो के, “माँकी लारे रे अन हाँज पड़गी अन दन आत ग्यो हो।” तद्याँ वो वाँकी लारे रेवा का वाते मयने ग्यो।
30जद्याँ वो वाँकी लारे खाणो खाबा ने बेट्यो, तो वणी रोटी लेन परमेसर ने धन्नेवाद दिदो अन रोटी तोड़न वाँने दिदी। 31वणीस दाण वाँकी आक्याँ खलगी अन वणा वींने ओळक लिदो हो, पण वो वाँकी आक्याँ आगेई खुवाग्यो। 32पसे वीं एक-दूजाऊँ केबा लागा, “जद्याँ वो गेला में आपाऊँ बाताँ कररियो हो अन पुवितर सास्तर को अरत आपाँने हमजारियो हो, तो कई आपणाँ मन में धिज्यो ने बन्द रियो हो?”
33वीं वणीस दाण पाच्छा यरूसलेम पराग्या अन वणा ग्याराई चेला ने अन वाँका हण्डाळ्याँ ने एक हाते देक्याँ। 34जीं वटे बेटा हा, वीं केरिया हा के, “परबू हाँचई में जीवतो वेग्यो हे अन समोन ने दिक्यो हे।” 35तद्याँ वणा दुयाई भी वाँने गेला की हारी बाताँ बता दिदी अन ओ भी क्यो के, माँ रोटी देती दाण ईसू ने ओळक्या हा।
ईसू को आपणाँ चेला का बसमें परगट वेणो
(मत्ती 28:16–20; मरकुस 16:14–18; यहुन्ना 20:19–23; थरप्या तका का काम 1:6–8)
36चेला आ बात कररिया हा के, वो खुद वाँका हामे परगट व्यो अन वाँने क्यो के, “थाँने सान्ती मले।”
37पण, वीं घबराग्या अन दरपग्या के, “आपाँ तो कस्याई भूत ने देकरिया हा।”
38तो ईसू वाँकाऊँ क्यो, “थाँ काँ घबरारिया हो? थाँ मन में भेंम काँ करो हो? 39मारा हात-पगाँ ने देको के, मूँ वोईस हूँ। मारे अड़न देको, काँके भूत के हाड़क्या अन माँस ने वेवे, जस्यान थाँ मारा में देकरिया हो।”
40ओ केन ईसू आपणाँ हात-पगाँ ने बताया। 41पण वीं हाराई आणन्द अन अचम्बा का मस अबाणू तईं ने हमज सक्या हा के, आपाँ हाँची में ईंने देकरिया हा। तो ईसू वाँने पूँछ्यो, “कई, थाँका नके खाबा का वाते कई हे?” 42तो वणा वींने हेकी तकी माछळी का टुका दिदा। 43वणी वाँने लेन वाँके हामेईस खादा।
44पसे ईसू वाँकाऊँ क्यो, “ईं मारी वीं बाताँ हे, जद्याँ मूँ थाँके हाते रेते तके थाँकाऊँ क्यो हो। जतरी बाताँ मूसा के नेमा में अन परमेसर का आड़ीऊँ बोलबावाळा अन भजनाँ की किताब में मारा बारा में लिकी तकी हे, वीं हारी पुरी वेणीईस हे।”
45तद्याँ वणी वाँने सास्तर ने हमजबा के वाते वाँने अकल दिदी। 46अन वाँने क्यो, “ओ लिक्यो तको हे के, मसी दुक उटाई अन तीजे दन मरियो तका मेंऊँ जीवतो वे जाई। 47अन यरूसलेमऊँ लगान हाराई धरती का लोगाँ में मन फेरबा को अन पापऊँ मापी को परच्यार वींका नामऊँईस किदो जाई। 48थाँ अणी हारी बाताँ का गुवा हो। 49#थर 1:4अन देको, जणी पुवितर आत्मा ने देबा को वादो परमपिता किदो हो, वींने मूँ थाँका ऊपरे उतारू, पण जद्याँ तईं हरगऊँ तागत ने पावो तो थाँ ईं नगर मेंईस रेज्यो।”
ईसू को हरग में जाणो
(मरकुस 16:19–20; थरप्या तका का काम 1:9–11)
50 #
थर 1:9–11
तद्याँ ईसू वाँने बेतनियाँ गाम तईं लेग्यो अन आपणाँ हाताँ ने लाम्बा करन वाँने आसिरवाद दिदो। 51अन पसे आसिरवाद देतो तको ईसू वाँकाऊँ न्यारो वेन हरग में उठा लिदो ग्यो। 52अन वणा हाराई वींके गोडा टेकन धोक देन राजी वेता तका यरूसलेम में पराग्या। 53वीं रोज मन्दर में भेळा वेन परमेसर का भजन करिया करता हा।
Trenutno odabrano:
लूका 24: एम टी आर
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
(c) 2010-2017, New Life Computer Institute. All rights reserved
