ಮತ್ತಾಯೆ 12
12
ಸಬ್ಬತ್‌ದಿನತ ಬಗೆಟ್
(ಮಾರ್ಕೆ 2:23-28; ಲೂಕೆ 6:1-5)
1ಆ ಸಮಯೊಡು ಯೇಸು ಸಬ್ಬತ್‌ದಿನೊಟು ಬುಲೆತ ಕಂಡೊಲೆನ್ ದಾಂಟ್‌ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಬಡವುಡು ಕುರಲ್‌ನ್‌ ರುಂಬುದು ತಿನೊಂದಿತ್ತೆರ್. 2ಪರಿಸಾಯೆರ್ ಉಂದೆನ್ ತೂದು, “ತೂಲ, ನಿನ ಶಿಷ್ಯೆರ್ ಸಬ್ಬತ್‌ದಿನೊಟು ಮಲ್ಪಂದಿ ಬೇಲೆನ್ ಮಲ್ಪುವೆರ್?” ಅಂದ್‌ದ್ ಆಯಗ್ ಪಂಡೆರ್.
3ಆಯೆ ಅಕ್ಲೆಡ, “ದಾವೀದೆ ತಾನ್‌ಲಾ ತನಡೊಪ್ಪ ಇತ್ತಿನಾಕುಲುಲಾ ಬಡವು ಆಯಿನಪಗ ದಾದ ಮಲ್ತೆರ್ ಪನ್ಪಿನೆನ್ ನಿಕುಲು ಓದುದಿಜರಾ. 4ಆಯೆ ದೇವೆರೆ ಆಲಯದ ಉಲಯಿ ಪೋದು ಯಾಜಕೆರ್ ಮಾತ್ರ ಅತ್ತಂದೆ ತಾನಾವಡ್, ತನಡೊಪ್ಪ ಇತ್ತಿನಾಕುಲಾವಡ್ ತಿನಿಯೆರೆ ಬಲ್ಲಿ ಅಂದ್‌ದ್ ಇತ್ತಿನ ನೈವೇದ್ಯದ ರೊಟ್ಟಿನ್ ತಿಂದೆ ಅತ್ತಾ? 5ಉಂದತ್ತಂದೆ ಸಬ್ಬತ್‌ದಿನೊಟು ಯಾಜಕೆರ್ ದೇವಾಲಯೊಡು ಸಬ್ಬತ್‌ದ ನಿಯಮೊನು ಮಿರಿಯೆರ್ಡಲಾ, ಅಕುಲು ತಪ್ಪುಗಾರೆರ್ ಆಪುಜೆರ್, ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಬರೆತಿನೆನ್ ಓದುದಿಜರಾ? 6ಯಾನ್ ನಿಕ್ಲೆಗ್ ಪನ್ಪೆ, ಆ ದೇವಾಲಯೊಡ್ದುಲಾ ಮಲ್ಲಾಯೆ ಮೂಲು ಉಲ್ಲೆ. 7ಎಂಕ್ ಬಲಿ ಬೊಡ್ಚಿ, ಕನಿಕರನೇ ಬೋಡು ಪನ್ಪಿನೆತ್ತ ಅರ್ಥೊನು ನಿಕುಲು ತೆರಿದಿತ್ತ್‌ಂಡ ನಿರಪರಾಧಿಲೆನ್ ಅಪರಾಧಿಲು ಅಂದ್‌ದ್ ತೀರ್ಪು ಮಲ್ತ್‌ದ್ವಯರ್. 8ನರಮಾನಿ ಮಗೆ ಸಬ್ಬತ್‌ದಿನತಲಾ ಕರ್ತವೆ ಆದುಲ್ಲೆ,” ಅಂದ್‌ದ್ ಪಂಡೆ.
ಕೈ ನುಂಗು ಪೋತಿನಾಯನ್ ಗುಣ ಮಲ್ತಿನವು
(ಮಾರ್ಕೆ 3:1-6; ಲೂಕೆ 6:6-11)
9ಆಯೆ ಅಲ್ತ್‌ಡ್ದ್ ಪಿದಾಡ್ದ್ ಸಭಾಮಂದಿರೊಗು ಪೋಯಿನಪಗ ಅವುಲು ಕೈ ನುಂಗುಪೋತಿನಾಯೆ ಒರಿ ಇತ್ತೆ. 10ಅಪಗ ಅಕುಲು ಆಯನ ಮಿತ್ತ್ ತಪ್ಪು ನಾಡೊಡು ಅಂದ್‌ದ್ ಯೇಸುಡ, “ಸಬ್ಬತ್‌ದಿನೊಟು ಗುಣ ಮಲ್ಪುನವು ಸರಿಯಾ?” ಅಂದ್‌ದ್ ಕೇಂಡೆರ್.
11ಐಕ್ ಆಯೆ, “ನಿಕ್ಲೆಡ್ ಏರೆಗಾಂಡಲಾ ಒಂಜೇ ಒಂಜಿ ಕುರಿ ಇತ್ತ್‌ದ್ ಅವು ಸಬ್ಬತ್‌ದಿನೊಟು ಕಣಿತ್ತುಲಯಿ ಬೂರುಂಡ ಆಯೆ ಅವೆನ್ ಪತ್ತ್‌ದ್ ಮಿತ್ತ್ ದೆಪ್ಪಂದೆ ಉಪ್ಪೆನಾ? 12ಆ ಕುರಿಡ್ದ್ ನರಮಾನಿ ಏತೋ ಬಿಲೆತ್ತಾಯೆ. ಅಂಚಾಯಿನೆಡ್ದ್ ಸಬ್ಬತ್‌ದಿನೊಟು ಎಡ್ಡೆ ಬೇಲೆ ಮಲ್ಪುನವು ಸರಿಯಾಯಿನವೆ,” ಪಂಡ್ದ್ ಉತ್ತರ ಕೊರಿಯೆ. 13ಬೊಕ್ಕ ಯೇಸು ಆ ನರಮಾನಿಗ್, “ನಿನ ಕೈ ನೀಡ್ಲ!” ಅಂದ್‌ದ್ ಪಂಡೆ. ಆಯೆ ನೀಡಿಯೆ; ಅವು ಪೂರ್ತಿ ಗುಣ ಆದ್ ಬೊಕ್ಕೊಂಜೆತ್ತ ಲೆಕ್ಕ ಆಂಡ್. 14ಆಂಡ ಪರಿಸಾಯೆರ್ ಪಿದಯಿ ಪೋದು ಇಂಬ್ಯನ್ ವಾ ಉಪಾಯೊಡು ಕೆರ್ಪಿನಿ ಪಂಡ್ದ್ ಆಯಗ್ ವಿರೋಧಾದ್ ಆಲೋಚನೆ ಮಲ್ತೊಂಡೆರ್.
ದೇವೆರ್ ಅಜತ್ ದೆತ್ತೊಂಡಿ ಸೇವಕೆ
15ಯೇಸು ಅವೆನ್ ತೆರಿದ್ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ. ಮಸ್ತ್ ಜನ ಆಯನ ಬೆರಿಯೆ ಪೋಯೆರ್. ಆಯೆ ಅಕ್ಲೆನ್ ಮಾತೆರೆನ್ ಗುಣ ಮಲ್ತ್‌ದ್ 16ತಾನ್ ಇಂಚಿತ್ತಿನಾಯೆ ಅಂದ್‌ದ್ ಏರೆಗ್ಲಾ ತೆರಿಪಾಯೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ಕಂಡಿತಾದ್ ಪಂಡೆ. 17ಇಂಚ ಯೆಶಾಯೆ ಇನ್ಪಿ ಪ್ರವಾದಿಡ್ದ್ ಪನ್ಪಾಯಿ ಪಾತೆರ ನಡತ್ಂಡ್; ಅವು ದಾನೆಂದ್ಂಡ,
18“ಇಂದಾ, ಎನ ಸೇವಕೆ; ಇಂಬ್ಯನ್ ಯಾನ್ ಅಜತೊಂದೆ.
ಇಂಬೆ ಎಂಕ್ ಇಷ್ಟೆ, ಇಂಬ್ಯನ್ ಯಾನ್ ಮೆಚ್ಚಿದೆ.
ಇಂಬ್ಯಡ್ ಎನ ಆತ್ಮೊನು ದೀಪೆ
ಇಂಬೆ ಪಿದಯಿದ ಜನೊಕುಲೆಗ್ ನ್ಯಾಯೊನು ಸಾರಿಯುವೆ.
19ಇಂಬೆ ಲಡಯಿ ಮಲ್ಪುಜೆ, ಬೊಬ್ಬೆ ದೀಪುಜೆ,
ಸಾದಿಲೆಡ್ ಇಂಬೆನ ಸ್ವರ ಏರೆಗ್ಲಾ ಕೇನಂದ್.
20ಗುದ್ದುದಿ ದಂಟ್‌ನ್ ಪೊಲ್ತು ಪಾಡಂದೆಲಾ,
ತೆಕ್ಕ್‌ದ್ ಪೋಪಿನ ತುಡರ್‌ನ್ ತೆಕ್ಕಾವಂದೆಲಾ ಉಪ್ಪುವೆ.
ನ್ಯಾಯೊನು ಜಯೊಕು ನಡಪುಡುವೆ.
21ಪಿದಯಿದ ಜನೊಕುಲು ಇಂಬೆನ ಪುದರ್‌ನ್ ಕೇಂಡ್ದ್ ಕಾತೊಂದುಪ್ಪುವೆರ್.”
ಯೇಸು ಬೊಕ್ಕ ಬೆಲ್ಜೆಬೂಲೆ
(ಮಾರ್ಕೆ 3:20-30; ಲೂಕೆ 11:14-23)
22ದೆವ್ವ ಪತ್ತ್‌ದಿ ಕುರುಡೆಲಾ ಪೊಟ್ಟೆಲಾ ಆದಿತ್ತಿ ಒರಿಯನ್ ಯೇಸು ಕೈತಲ್‌ ಕನತೆರ್, ಯೇಸು ಆಯನ್ ಗುಣ ಮಲ್ತಿನಪಗ ಆ ಪೊಟ್ಟಗ್ ಬಾಯಿಲಾ, ಕಣ್ಣ್‌ಲಾ ರಡ್ಡ್‌ಲಾ ಬತ್ತ್ಂಡ್. 23ಐಕ್ ಜನೊಕುಲು ಮಾತ ಅಚ್ಚಿರ ಆದ್, “ಇಂಬೆ ದಾವೀದನ ಮಗೆ ಆದುಪ್ಪೆನಾ,” ಅಂದ್‌ದ್ ಪಾತೆರೊಂದಿತ್ತೆರ್.
24ಆಂಡ ಪರಿಸಾಯೆರ್ ಉಂದೆನ್ ಕೇಂಡ್ದ್, “ಇಂಬೆ ದೆವ್ವೊಲೆ ಮುಖ್ಯಸ್ಥೆ ಆಯಿ ಬೆಲ್ಜೆಬೂಲಡ್ದ್ ದೆವ್ವೊಲೆನ್ ಬುಡುಪಾವೆ ಅತ್ತಂದೆ ಬೇತೆ ರೀತಿಡ್ದ್ ಬುಡ್ಪಾವುಜೆ,” ಪಂಡೆರ್.
25ಆಯೆ ಅಕ್ಲೆನ ಆಲೋಚನೆಲೆನ್ ತೆರಿದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ವಾ ರಾಜ್ಯ ಆಂಡಲಾ ತನಡ್ ಭೇದ ಪುಟ್ಟಾಂಡ ನಾಶ ಆಪುಂಡು, ತನಡ್ ಭೇದ ಪುಟ್ಟಿನ ವಾ ಪಟ್ಟಣ ಆವಡ್ ಇಲ್ಲಾವಡ್ ಒರಿಯಂದ್. 26ಅಂಚೆನೇ ಸೈತಾನೆ ಸೈತಾನನ್ ಪಿದಾಡ್ಪಾಯೆಡಾ ತನಡನೇ ಭೇದ ಪುಟ್ಟಾಯಿಲೆಕ್ಕ ಆಂಡ್. ಅಂಚಾಂಡ ಆಯನ ರಾಜ್ಯ ಎಂಚ ಒರಿಯು? 27ಯಾನ್ ಬೆಲ್ಜೆಬೂಲನ ಬಲೊಡ್ದು ದೆವ್ವೊಲೆನ್ ಬುಡ್ಪಾವುನಾಂಡ ನಿಕ್ಲೆನಾಕುಲು ಏರೆನ ಬಲೊಟು ಬುಡ್ಪಾವೆರ್? ಅಂಚಾಯಿನೆಡ್ದ್ ಅಕುಲೇ ನಿಕ್ಲೆಗ್ ನ್ಯಾಯತೀರ್ಪು ಮಲ್ಪುನಾಕುಲು ಆಪೆರ್. 28ಯಾನ್ ದೇವೆರೆ ಆತ್ಮನ ಬಲೊಡ್ದೇ ದೆವ್ವೊಲೆನ್ ಬುಡ್ಪಾವುನಾಂಡ ದೇವೆರೆ ರಾಜ್ಯ ನಿಕ್ಲೆ ಕೈತಲೇ ಬತ್ತ್‌ಂಡತ್ತಾ.
29“ಉಂದತ್ತಂದೆ ಒರಿ ಸುರುಟ್ಟು ಬಲವಂತನ್ ಕಟ್ಟ್‌ದ್ ಪಾಡಂದೆ ಆ ಬಲವಂತನ ಇಲ್ಲನ್ ಪೊಗ್ಗುದು ಸೊತ್ತುಲೆನ್ ಲೂಟಿ ಎಂಚ ಮಲ್ಪೊಲಿ? ಕಟ್ಟಿ ಬೊಕ್ಕನೇ ಆಯನ ಇಲ್ಲನ್ ಲೂಟಿ ಮಲ್ಪೊಲಿ.
30“ಎನ ಪಕ್ಷ ಪತ್ತಂದಿನಾಯೆ ಎಂಕ್ ವಿರೋಧಿ. ಎನ ಜತೆಟ್ ಸೇರಂದಿನಾಯೆ ಚಲ್ಲಾಪಿಲ್ಲಿ ಮಲ್ಪುನಾಯೆ ಆದುಲ್ಲೆ.” 31ಅಂಚಾಯಿನೆಡ್ದ್ ನಿಕ್ಲೆಗ್ ಪನ್ಪೆ, ನರಮಾನಿ ಮಲ್ಪುನ ಪ್ರತಿ ಒಂಜಿ ಪಾಪೊಗ್ಲಾ ದೂಷಣೆಗ್ಲಾ ಮಾಪು ಉಂಡು; ಆಂಡ ಪವಿತ್ರಾತ್ಮ ದೂಷಣೆಗ್ ಮಾಪು ಇಜ್ಜಿ. 32ಏರಾಂಡಲಾ ನರಮಾನಿ ಮಗಕ್ಕ್ ವಿರೋಧಾದ್ ಪಾತೆರಿಯೆಡ ಅವು ಆಯಗ್ ಮಾಪು ಮಲ್ಪುಂಡು; ಪರಿಶುದ್ಧಾತ್ಮೊಗು ವಿರೋಧಾದ್ ಪಾತೆರಿಯೆಡ ಆಯಗ್ ಈ ಲೋಕೊಡಾವಡ್, ಬರ್ಪಿ ಪರಲೋಕೊಡಾವಡ್ ಮಾಪು ಆವಂದ್.
ಮರ ಬೊಕ್ಕ ಐತ ಫಲ
(ಲೂಕೆ 6:43-45)
33“ಎಡ್ಡೆ ಮರತ ಫಲ ಎಡ್ಡೆ ಉಪ್ಪುಂಡು; ಹಾಳ್ ಮರತ ಫಲ ಹಾಳೇ ಆದುಪ್ಪುಂಡು, ಫಲೊಡ್ದು ಮರತ ಗುಣ ಗೊತ್ತಾಪುಂಡು. 34ಸರ್ಪ ಜಾತಿದಾಕುಲೇ, ನಿಕುಲು ಪಡಿಕೆಂತಿನಾಕುಲು ಆಯಿನೆಡ್ದ್ ಎಡ್ಡೆ ಪಾತೆರೊಲೆನ್ ಪಾತೆರಿಯೆರೆ ನಿಕ್ಲೆಡ್ದ್ ಎಂಚ ಆವು? ಉಡಲ್‌ಡ್ ದಿಂಜಿದಿತ್ತಿನವೇ ಬಾಯಿಡ್ದ್ ಪಿದಾಡುಂಡು. 35ಎಡ್ಡೆಂತಿನಾಯೆ ತನ ಎಡ್ಡೆಂತಿ ಕಜನೆದುಲಯಿಡ್ದ್ ಎಡ್ಡೆ ವಸ್ತುಲೆನ್ ದೆಪ್ಪುವೆ; ಪಡಿಕೆಂತಿನಾಯೆ ಪಡಿಕೆಂತಿ ಕಜನೆದುಲಯಿಡ್ದ್ ಹಾಳ್ ವಸ್ತುಲೆನ್ ದೆಪ್ಪುವೆ.
36“ಉಂದತ್ತಂದೆ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ನರಮಾನಿ ಪೊಕ್ಕಡೆ ಪಾತೆರುನ ಪ್ರತಿ ಒಂಜಿ ಪಾತೆರದ ಸಂಗತಿಡ್ ನ್ಯಾಯತೀರ್ಪುದ ದಿನೊಟು ಲೆಖ್ಖ ಕೊರೊಡು. 37ನಿನ ಪಾತೆರೊಲೆಡ್ದೇ ನೀತಿವಂತೆ ಅಂದ್‌ದ್ ನಿಕ್ಕ್ ತೀರ್ಪು ಆವು. ನಿನ ಪಾತೆರೊಲೆಡ್ದೇ ಈ ಅಪರಾಧಿ ಪಂಡ್ದ್‌ಲಾ ನಿಕ್ಕ್ ತೀರ್ಪು ಆವು.”
ಗುರ್ತೊನು ಬಯಕಿನ ಯೆಹೂದ್ಯೆರ್
(ಮಾರ್ಕೆ 8:11,12; ಲೂಕೆ 11:29-32)
38ಅಪಗ ಶಾಸ್ತ್ರಿಲೆಡ್ಲಾ ಪರಿಸಾಯೆರೆಡ್ಲಾ ಕೆಲೆವೆರ್, “ಬೋಧಕಾ, ನಿನಡ್ದ್ ಆಪಿನ ಒಂಜಿ ಮಹತ್ಕಾರ್ಯೊನು ತೂವೊಡು,” ಅಂದ್‌ದ್ ಯೇಸುಡ ಕೇನ್ನಗ 39ಆಯೆ ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ ದಾನೆಂದ್ಂಡ, “ಹಾದ್ರದಂಚಿತ್ತಿ ಹಾಳ್ ಸಂತಾನ ಮಹತ್ಕಾರ್ಯೊನು ತೂವೊಡು ಅಂದ್‌ದ್ ಬಯಕುಂಡು. ಆಂಡ ಯೋನೆ ಪನ್ಪಿ ಪ್ರವಾದಿಡ್ ಆಯಿನ ಗುರ್ತನೇ ಅತ್ತಂದೆ ಬೇತೆ ಒವುಲಾ ಗುರ್ತ ನೆಕ್ಕ್ ತಿಕ್ಕಂದ್,” 40ಪಂಡ ಯೋನೆ ಎಂಚ ಮೂಜಿ ದಿನ ರಾತ್ರೆ ಪಗೆಲ್ ಮಲ್ಲ ಮೀನ್‌ದ ಬಂಜಿದುಲಯಿ ಇತ್ತೆನಾ ಅಂಚೆನೇ ನರಮಾನಿ ಮಗೆಲಾ ಮೂಜಿ ದಿನ ರಾತ್ರೆ ಪಗೆಲ್ ಭೂಗರ್ಭದುಲಯಿ ಉಪ್ಪುವೆ. 41ನ್ಯಾಯತೀರ್ಪುಡು ನಿನವೆ ಪಟ್ಟಣದಾಕುಲು ಈ ಸಂತಾನಡೊಪ್ಪ ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನುವೆರ್; ಅಕುಲು ಯೋನೆ ಸಾರಿನ ಪಾತೆರೊಲೆನ್ ಕೇಂಡ್ದ್ ಪಶ್ಚಾತಾಪ ಪಡೆಯೆರ್; ಆಂಡ ಮುಲ್ಪ ಯೋನಡ್ದ್‌ಲಾ ಮಲ್ಲಾಯೆ ಉಲ್ಲೆ. 42ತೆನ್‌ಕಯಿ ದೇಶದ ರಾಣಿ ನ್ಯಾಯತೀರ್ಪುನಪಗ ಈ ಸಂತಾನದೊಟ್ಟುಗು ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನ್ಪಲ್; ಆಲ್ ಸೊಲೊಮೋನನ ಗೇನೊನು ತೆರಿಯೊನ್ರೆ ಭೂಮಿದ ಕಟ್ಟಕಡೆಡ್ದ್ ಬತ್ತಲ್; ಆಂಡ ಮುಲ್ಪ ಸೊಲೊಮೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.
ದುಷ್ಟ ಜನೊಕುಲೆನ ಪರಿಸ್ಥಿತಿ
(ಲೂಕೆ 11:24-26)
43“ದೆವ್ವ ನರಮಾನಿನ್ ಬುಡ್ದು ಪೋಯಿ ಬೊಕ್ಕ ನಿಲೆ ನಾಡೊಂದು ನೀರ್ ಇಜ್ಜಾಂದಿ ಜಾಗ್‌ಡ್ ತಿರ್ಗುವ. 44ನಿಲೆ ತಿಕ್ಕಂದಿನೆಡ್ದ್ ಅವು ‘ಯಾನ್ ಬುಡ್ದು ಬೈದಿನ ಎನ ಇಲ್ಲಗ್ ಪಿರ ಪೋಪೆ ಅಂದ್‌ದ್ ಪನೊಂದು ಬರ್ಪ.’ ಆ ಇಲ್ಲ್ ಒಕ್ಕೆಲ್‌ದಾಂತಿನವುಲಾ ಅಡ್ತ್‌ದ್ ಸಿಂಗಾರ ಮಲ್ತಿನೆನ್ ತೂದು ಕುಡ ಪೋದು, 45ತನಡ್ದ್ ಪಡಿಕೆಂತಿನ ಬೇತೆ ಏಳ್ ದೆವ್ವೊಲೆನ್ ತನೊಡೊಪ್ಪ ಲೆತ್ತೊಂದು ಬರ್ಪುಂಡು. ಐಕುಲು ಉಲಯಿ ಪೊಗ್ಗುದು ಅಲ್ಪ ವಾಸ ಮಲ್ಪುವ. ಅಪಗ ಆ ನರಮಾನಿನ ಕಡೆತ ಸ್ಥಿತಿ ದುಂಬುಡ್ದು ಕಡೆ ಆದುಪ್ಪುಂಡು, ಐತ ಲೆಕ್ಕನೇ ಈ ಹಾಳ್ ಸಂತಾನೊಗು ಆಪುಂಡು,” ಪಂಡೆ.
ಯೇಸುನ ಅಪ್ಪೆ ಬೊಕ್ಕ ಮೆಗ್ಯಾಡ್ಲು
(ಮಾರ್ಕೆ 3:31-35; ಲೂಕೆ 8:19-21)
46ಆಯೆ ಜನೊಕುಲೆ ಗುಂಪುದೊಟ್ಟಿಗೆ ನನಲಾ ಪಾತೆರೊಂದುಪ್ಪುನಗ ಆಯನ ಅಪ್ಪೆಲಾ ಮೆಗ್ಯಾಡ್ಲುಲಾ ಆಯನ್ ಪಾತೆರ್ಪಾವೊಡು ಅಂದ್‌ದ್ ಪಿದಯಿ ಉಂತುದಿತ್ತೆರ್. 47ಅಪಗ ಒರಿ, “ಇಂದಾ, ನಿನ ಅಪ್ಪೆಲಾ, ನಿನ ಮೆಗ್ಯಾಡ್ಲುಲಾ ನಿನಡ ಪಾತೆರೊಡುಂದು ಪಿದಯಿ ಉಂತುದೆರ್,” ಪಂಡೆ.
48ಐಕ್ ಆಯೆ ಆ ಪಾತೆರ ಪಂಡಿನಾಯಡ, “ಎನ ಅಪ್ಪೆ ಏರ್? ಎನ ಮೆಗ್ಯೆ ಏರ್?” ಪಂಡ್ದ್ 49ಬೊಕ್ಕ ತನ ಶಿಷ್ಯೆರೆನಂಚಿ ಕೈ ತೋಜಾದ್, “ಇಂದಾ, ಮೊಕುಲೇ ಎನ ಅಪ್ಪೆಲಾ ಎನ ಮೆಗ್ಯಾಡ್ಲುಲಾ. 50ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತದ ಲೆಕ್ಕ ನಡಪುನಾಯೆನೇ ಎನ ಮೆಗ್ಯೆಲಾ ಮೆಗ್ದಿಲಾ ಅಪ್ಪೆಲಾ ಆದುಲ್ಲೆರ್.”
Trenutno odabrano:
ಮತ್ತಾಯೆ 12: ತುಳು
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
