ಲೂಕೆ 22
22
ಯೇಸುನು ಕೆರಿಯೆರೆ ಉಪಾಯ ಮಲ್ಪುನವು
(ಮತ್ತಾಯೆ 26:1-5; ಮಾರ್ಕೆ 14:1,2; ಯೋಹಾನೆ 11:45-53)
1ಪುಳಿದಾಂತಿ ರೊಟ್ಟಿನ್ ತಿನ್ಪಿನ ಪಸ್ಕ ಪನ್ಪಿ ಪರ್ಬ ಕೈತಲಾನಗ 2ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಯೇಸುನು ಕೆರೊಡು ಅಂದ್‌ದ್ ಆಲೋಚನೆ ಮಲ್ತೊಂದು ಜನೊಕುಲೆಗ್ ಪೋಡಿದ್ ತಕ್ಕ ಸಾದಿನ್ ನಾಡೊಂದಿತ್ತೆರ್.
ಯೇಸುನು ಪತ್ತ್‌ದ್ ಕೊರಿಯೆರೆ ಯೂದನ ಒಪ್ಪಂದ
(ಮತ್ತಾಯೆ 26:14-16; ಮಾರ್ಕೆ 14:10,11)
3ಅಪಗ ಸೈತಾನೆ, ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದನ ಉಲಯಿ ಪೊಗ್ಗಿಯೆ. 4ಆಯೆ ಪ್ರಧಾನಯಾಜಕೆ ಬೊಕ್ಕ ಕಾವಲ್‌ದ ಮುಖ್ಯಸ್ಥನ ಕೈತಲ್‌ ಪೋದು ಯೇಸುನು ಪತ್ತ್‌ದ್ ಕೊರ್ಪಿನ ಉಪಾಯೊನು ಅಕ್ಲೆಡ ಪಾತೆರಿಯೆ. 5ಅಕುಲು ಸಂತೋಷೊಡು ನಿಕ್ಕ್ ಕಾಸ್ ಕೊರ್ಪ ಅಂದ್‌ದ್ ಒಪ್ಪಂದ ಮಲ್ತೆರ್. 6ಆಯೆ ಒಪ್ಪಿದ್ ಏರೆಗ್ಲಾ ತೆರಿಯಂದಿಲೆಕ್ಕ ಯೇಸುನು ಅಕ್ಲೆಗ್ ಪತ್ತ್‌ದ್ ಕೊರಿಯೆರೆ ಸಮಯೊನು ತೂವೊಂದಿತ್ತೆ.
ಶಿಷ್ಯೆರೆ ಒಟ್ಟುಡು ಕಡೆತ ವಣಸ್
(ಮತ್ತಾಯೆ 26:17-25; ಮಾರ್ಕೆ 14:12-21; ಯೋಹಾನೆ 13:21-30)
7ಪುಳಿದಾಂತಿ ರೊಟ್ಟಿನ್ ತಿನ್ಪಿನ ಪರ್ಬ ಸುರು ಆದ್‌ ಪಸ್ಕದ ಕುರಿ ಕಡ್ಪುನ ದಿನ ಬತ್ತಿನಪಗ, 8ಯೇಸು ಪೇತ್ರಗ್ಲಾ ಯೋಹಾನಗ್ಲಾ, “ನಿಕುಲು ಪೋದು ನಮ ಪಸ್ಕದ ವಣಸ್ ಉನ್ಪಿಲೆಕ್ಕ ತಯಾರ್ ಮಲ್ಪುಲೆ,” ಅಂದ್‌ದ್ ಅಕ್ಲೆನ್ ಕಡಪುಡಿಯೆ. 9ಅಕುಲು ಆಯಡ, “ಎಂಕುಲು ಓಲು ತಯಾರ್ ಮಲ್ಪೊಡು,” ಅಂದ್‌ದ್ ಕೇನ್ನಗ, 10ಆಯೆ ಅಕ್ಲೆಗ್, “ತೂಲೆ, ನಿಕುಲು ಪೇಂಟೆದ ಉಲಯಿ ಪೋಯಿ ಬೊಕ್ಕ ಒರಿ ನರಮಾನಿ ನೀರ್ ದಿಂಜಿದಿ ಕೊಡಪಾನೊನು ತುಂಬೊಂದು ಪೋಪಿನಾಯೆ ನಿಕ್ಲೆನ ಎದುರು ಬರ್ಪೆ. ಆಯೆ ಪೋಪಿನ ಇಲ್ಲಗ್ ನಿಕುಲು ಆಯನ ಬೆರಿಯೆ ಪೋಲೆ. 11‘ಆ ಇಲ್ಲದ ಯಜಮಾನಗ್ ಎಂಕ್ಲೆನ ಬೋಧಕೆ ತನ ಶಿಷ್ಯೆರೆಡೊಪ್ಪ ಪಸ್ಕದ ವಣಸ್‌ನ್ ಮಲ್ಪರೆ ಕೋಣೆ ಓಲು ಉಂಡು? ಅಂದ್‌ದ್ ನಿನಡ ಕೇನ್ವೆ,’ ಅಂದ್‌ದ್ ಪನ್ಲೆ. 12ಅಪಗ ಆಯೆ ತಕ್ಕ ಸಾಮಾನ್ ದೀದಿತ್ತಿ ಮೇಲುಪ್ಪರಿಗೆದ ಮಲ್ಲ ಕೋಣೆನ್ ನಿಕ್ಲೆಗ್ ತೋಜಾವೆ. ಅಲ್ಪ ವಣಸ್‌ಗ್ ತಯಾರ್ ಮಲ್ಪುಲೆ,” ಪಂಡ್ದ್ ಕಡಪುಡಿಯೆ. 13ಅಕುಲು ಪಿದಾಡ್ದ್ ಆಯೆ ತನ್ಕುಲೆಗ್ ಯೇಸು ಪಂಡಿಲೆಕ್ಕನೇ ಮಾತೆನ್ಲಾ ತೂದು, ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.
ಕರ್ತವನ ಭೋಜನ
(ಮತ್ತಾಯೆ 26:26-30; ಮಾರ್ಕೆ 14:22-26; 1 ಕೊರಿಂಥ್ಯೆರೆಗ್ 11:23-25)
14ಪಸ್ಕ ವಣಸ್ ಮಲ್ಪುನ ಸಮಯ ಬತ್ತಿನಪಗ ಯೇಸು ತನ ಪದ್ರಾಡ್ ಅಪೊಸ್ತಲೆರೆ ಒಟ್ಟುಗು ವಣಸ್‌ಗ್ ಕುಲ್ಲಿಯೆ. 15ಅಪಗ ಆಯೆ ಅಕ್ಲೆಗ್, “ಯಾನ್ ಕಷ್ಟ ಅನುಭವ ಮಲ್ಪುನೆಡ್ದ್ ದುಂಬು ನಿಕ್ಲೆನ ಒಟ್ಟುಗು ಈ ಪಸ್ಕದ ವಣಸ್‌ನ್ ಮಲ್ಪೆರೆ ಆಸೆ ಮಲ್ತೊಂದುಲ್ಲೆ. 16ಉಂದು ದೇವೆರೆ ರಾಜ್ಯೊಡು ಪೂರ್ತಿ ಆವ ಮುಟ್ಟ ಯಾನ್ ನನ ಮಿತ್ತ್ ಈ ವಣಸ್‌ನ್ ಮಲ್ಪುನೇ ಇಜ್ಜಿ,” ಅಂದ್‌ದ್ ಪಂಡೆ. 17ಯೇಸು ದ್ರಾಕ್ಷಾರಸತ್ತ ಪಾತ್ರೆನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್, “ಉಂದೆನ್ ದೆತ್ತೊಂದು ನಿಕ್ಲೆಡ ಪಟ್ಟೊನ್ಲೆ. 18ಇನಿಡ್ದ್ ದೇವೆರೆ ರಾಜ್ಯ ಬರ್ಪಿನೆಟ್ಟ ಯಾನ್ ದ್ರಾಕ್ಷಾರಸೊನು ಪರ್ಪಿನೇ ಇಜ್ಜಿ,” ಅಂದ್‌ದ್ ನಿಕ್ಲೆಗ್ ಪನ್ಪೆ ಪಂಡೆ. 19ಐಡ್ದ್ ಬೊಕ್ಕ ಆಯೆ ರೊಟ್ಟಿನ್ ದೆತ್ತೊಂದು ಸುಗಿತ್‌ದ್ ಪೊಲ್ತುದು ಅಕ್ಲೆಗ್ ಕೊರ್ದು, “ಉಂದು ನಿಕ್ಲೆಗಾದ್ ಕೊರ್ತಿನ ಎನ ಶರೀರ. ಎನನ್ ನೆನೆಪು ಮಲ್ಪೆರೆಗಾದ್ ಇಂಚ ಮಲ್ಪುಲೆ,” ಪಂಡೆ. 20ಅಂಚೆನೆ ವಣಸ್ ಆಯಿ ಬೊಕ್ಕ ಆಯೆ ಅವ್ವೇ ರೀತಿಡ್ ಪಾತ್ರೆನ್ ದೆತ್ತೊಂದು, “ಈ ಪಾತ್ರೆ ನಿಕ್ಲೆಗ್ ಬೋಡಾದ್ ಗುತ್ತುದಿನ ಎನ ನೆತ್ತೆರ್‌ಡ್ದ್ ಉಂಡಾತಿನ ಪೊಸ ಒಡಂಬಡಿಕೆನ್ ತೋಜಾವುಂಡು.” 21“ಆಂಡ ತೂಲೆ ಎನನ್ ಪತ್ತ್‌ದ್ ಕೊರ್ಪಿನಾಯೆ ಎನಡೊಪ್ಪ ಮೇಜಿದ ಮಿತ್ತ್ ಕೈ ದೀದ್ ವಣಸ್ ಮಲ್ತೊಂದುಲ್ಲೆ. 22ನರಮಾನಿ ಮಗೆ ದೇವೆರೆನ ಯೋಜನೆದ ಲೆಕ್ಕ ಪಿದಾಡ್ದ್ ಪೋಪೆ ಸರಿ; ಆಂಡ ಆಯನ್ ಪತ್ತ್‌ದ್ ಕೊರ್ಪಿನ ನರಮಾನಿನ ಗತಿನ್ ದಾನೆಂದ್ ಪನೊಲಿ!” ಪಂಡೆ. 23ಉಂದೆನ್ ಕೇಂಡ್ದ್ ಶಿಷ್ಯೆರ್ ಇಂಚಿತ್ತಿ ನೀಚ ಕೆಲಸೊನು ಮಲ್ಪುನಾಯೆ ಏರಾದುಲ್ಲೆ ಅಂದ್‌ದ್ ಒರಿಯನ್ ಒರಿ ಕೇನಿಯೆರೆ ಸುರು ಮಲ್ತೆರ್.
ಏರ್ ಮಲ್ಲಾಯೆ ಪನ್ಪಿ ಚರ್ಚೆ
24ಉಂದತ್ತಂದೆ ತನ್ಕುಲೆ ನಡುಟು ಏರ್ ಮಲ್ಲಾಯೆ ಪನ್ಪಿ ಬಗೆಟ್ ಅಕ್ಲೆನ ಉಲಯಿ ಚರ್ಚೆ ಪುಟ್ಟುಂಡು. 25ಅಪಗ ಯೇಸು ಅಕ್ಲೆಗ್, “ಪಿದಯಿದ ಜನೊಕುಲೆ ಅರಸುಲು ಅಕ್ಲೆ ಮಿತ್ತ್ ದೊರೆತನ ನಡಪಾವೆರ್ ಬೊಕ್ಕ ಅಕ್ಲೆನ ಮಿತ್ತ್ ಅಧಿಕಾರ ನಡಪಾವೆರ್, ‘ಅಧಿಕಾರ ನಡಪಾವುನಾಕುಲು ಉಪಕಾರಿಲು,’ ಅಂದ್‌ದ್ ಪನ್ಪೆರ್. 26ನಿಕುಲು ಅಂಚ ಉಪ್ಪೆರೆ ಬಲ್ಲಿ; ನಿಕ್ಲೆಡ್ ಮಲ್ಲಾಯೆ ಎಲ್ಯಾಯೆಲೆಕ್ಕ ಆದುಪ್ಪೊಡು, ಮುಖ್ಯಸ್ಥೆ ಚಾಕ್ರಿದಾಯಲೆಕ್ಕ ಆದುಪ್ಪೊಡು. 27ಮಲ್ಲಾಯೆ ಏರ್? ಪಂತೆಡ್ ಕುಲ್ಲುದಿನಾಯೆನಾ ಇಜ್ಜಿಂಡ ಚಾಕ್ರಿ ಮಲ್ಪುನಾಯೆನಾ? ಪಂತೆಡ್ ಕುಲ್ಲುದಿನಾಯೆ ಅತ್ತಾ. ಆಂಡ ಯಾನ್ ನಿಕ್ಲೆ ನಡುಟು ಚಾಕ್ರಿ ಮಲ್ಪುನಾಯಲೆಕ್ಕ ಉಲ್ಲೆ.
28“ನಿಕುಲು ಎನ ಶೋಧನೆಡ್ ಎನಡೊಪ್ಪ ಏಪೊಗ್ಲಾ ಇತ್ತಿನಾಕುಲು. 29ಐಡ್ದಾವರ ಎನ ಅಮ್ಮೆ ಎಂಕ್ ರಾಜ್ಯೊನು ಆಳಿಯೆರೆ ಅಧಿಕಾರ ನೇಮಕ ಮಲ್ತಿ ಲೆಕ್ಕನೇ ಯಾನ್ಲಾ ನಿಕ್ಲೆಗ್ ನೇಮಕ ಮಲ್ಪುವೆ; 30ಎನ ರಾಜ್ಯೊಡು ನಿಕುಲು ಎನ ಮೇಜಿಡ್ ವಣಸ್ ಮಲ್ಪುವರ್, ಪರ್ಪರ್; ಬೊಕ್ಕ ಗದ್ದಿಗೆಡ್ ಕುಲ್ಲೊಂದು ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ನ್ಯಾಯತೀರ್ಪು ಮಲ್ಪುವರ್.
ಪೇತ್ರೆ ಅರೆಂಜುನ ಸಂಗತಿನ್ ತೆರಿಪಾಯಿನವು
(ಮತ್ತಾಯೆ 26:31-35; ಮಾರ್ಕೆ 14:27-31; ಯೋಹಾನೆ 13:36-38)
31“ಸೀಮೋನಾ, ಸೀಮೋನಾ ಕೇನ್ಲ, ಸೈತಾನೆ ನಿನನ್ ಗೋದಿದಲೆಕ್ಕ ಪೊಡೆಪೊಡು ಅಂದ್‌ದ್ ಅಪ್ಪಣೆ ಕೇನೊಂಡೆ. 32ಆಂಡ ನಿನ ನಂಬಿಕೆ ಕುಂದುದು ಪೋವೆರೆ ಬಲ್ಲಿ ಅಂದ್‌ದ್ ಯಾನ್ ನಿನ ಬಗೆಟ್ ದೇವೆರೆಡ ನಟ್ಟೊಂಡೆ; ಈ ಪರಿವರ್ತನೆ ಆಯಿ ಬೊಕ್ಕ ನಿನ ಸಹೋದ್ರೆರೆನ್ ದೃಢ ಮಲ್ಪುಲ,” ಅಂದ್‌ದ್ ಪಂಡೆ.
33ಆಂಡ ಆಯೆ, “ಕರ್ತವಾ, ನಿನಡೊಪ್ಪ ಸೆರೆಮನೆಗ್ ಪೋವೆರೆಗ್ಲಾ ಸೈಯೆರೆಗ್ಲಾ ತಯಾರ್ ಆದುಲ್ಲೆ,” ಅಂದ್‌ದ್ ಪನ್ನಗ 34ಯೇಸು ಆಯಡ, “ಪೇತ್ರ, ಯಾನ್ ನಿಕ್ಕ್ ಪನ್ಪೆ, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಅರೆಂಜುನೆಟ್ಟ ಕೋರಿ ಕೆಲೆಪಂದ್,” ಪಂಡೆ.
ಬುತ್ತಿ, ಜೋಳಿಗೆ ಬೊಕ್ಕ ಕತ್ತಿ
35ಬೊಕ್ಕ ಯೇಸು ಶಿಷ್ಯೆರೆಗ್, “ಯಾನ್ ನಿಕ್ಲೆನ್ ಕಾಸ್‌ದ ಚೀರವು, ಜೋಳಿಗೆ, ಜೋಡುದಾಂತೆ ಕಡಪುಡಿನಪಗ ನಿಕ್ಲೆಗ್ ದಾದಾಂಡಲಾ ಕಡಿಮೆ ಆತ್ಂಡಾ?” ಅಂದ್‌ದ್ ಕೇನ್ನಗ, “ಅಕುಲು ದಾಲಾ ಇಜ್ಜಿ,” ಅಂದ್‌ದ್ ಉತ್ತರ ಕೊರಿಯೆರ್.
36ಐಕ್ ಆಯೆ, “ಇತ್ತೆ ಗಂಟ್ ಇತ್ತಿನಾಯೆ ಅವೆನ್ ದೆತ್ತೊನಡ್, ಜೋಳಿಗೆನ್ಲಾ ದೆತ್ತೊನಡ್, ಬೊಕ್ಕ ಕತ್ತಿ ಇಜ್ಜಾಂದಿನಾಯೆ, ತನ ಮಿತ್ತ್‌ದ ಕುಂಟು ಮಾರ್ದ್ ಒಂಜಿ ಕತ್ತಿ ದೆತ್ತೊನಡ್, 37ದಾಯೆಗ್ ಪಂಡ ಆಯೆ, ‘ಅನ್ಯಾಯಗಾರೆರೆಡೊಪ್ಪ ಒರಿ ಪಂಡ್ದ್ ಗೆನ್ತ್‌ದ್ಂಡ್,’ ಅಂದ್‌ದ್ ಬರೆದುಪ್ಪುನ ಪಾತೆರ ನಡಪುಡೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ; ಇತ್ತೆ ಎನ ವಿಷಯ ಅಂಚೆನೇ ಆವೊಂದುಂಡು,” ಪಂಡೆ 38ಅಕುಲು ಆಯಡ, “ಕರ್ತವಾ, ಇಂದಾ ಮೂಲು ರಡ್ಡ್ ಕತ್ತಿಲು ಉಂಡು,” ಪನ್ನಗ ಆಯೆ ಅಕ್ಲೆಡ, “ಆತೆ ಯಾವು!” ಪಂಡೆ.
ಗೆಥ್ಸೇಮನೆಟ್ ಯೇಸು ಮಲ್ತಿ ಪ್ರಾರ್ಥನೆ
(ಮತ್ತಾಯೆ 26:36-46; ಮಾರ್ಕೆ 14:32-42)
39ಬೊಕ್ಕ ಯೇಸು ಏಪಲಾ ಪೋಪಿಲೆಕ್ಕ ಇಪ್ಪೆಗುಡ್ಡೆಗ್ ಪೋಯೆ. ಶಿಷ್ಯೆರ್‌ಲಾ ಆಯನ ಬೆರಿಯೆ ಪೋಯೆರ್. 40ಆಯೆ ಏಪಲಾ ಪೋಪಿನ ಜಾಗ್‌ಗ್ ಬತ್ತಿನಪಗ ಅಕ್ಲೆಡ, “ನಿಕುಲು ಶೋಧನೆಗ್ ಬೂರಂದಿಲೆಕ್ಕ ದೇವೆರೆಡ ಪ್ರಾರ್ಥನೆ ಮಲ್ಪುಲೆ,” ಅಂದ್‌ದ್ ಪಂಡೆ.
41ಬೊಕ್ಕ ಆಯೆ ಅಕ್ಲೆನ್ ಬುಡ್ದು ಕಲ್ಲ್ ದಕ್ಕುನಾತ್ ದೂರ ಪೋದು ಮೊರಂಪೂರ್ದು ಪ್ರಾರ್ಥನೆ ಮಲ್ತ್‌ದ್ 42“ಅಮ್ಮೆರೇ, ನಿಕ್ಕ್ ಮನಸಿತ್ತ್‌ಂಡ ಈ ಕಷ್ಟ ಅನುಭವಿಪುನ ದುನ್ನೊನು ಎನಡ್ದ್ ದೆಪ್ಪುಲ, ಎಂಚಲಾ ಎನ ಚಿತ್ತ ಅತ್ತ್, ನಿನ ಚಿತ್ತನೇ ನಡಪಡ್,” ಅಂದ್‌ದ್ ಪ್ರಾರ್ಥನೆ ಮಲ್ತೆ.
43ಅಪಗ ಪರಲೋಕೊಡ್ದು ಬತ್ತಿ ಒರಿ ದೂತೆ ಆಯಗ್ ತೋಜಿದ್ ಆಯನ್ ಬಲ ಪಡೆಪಾಯೆ. 44ಆಯ ಮನಸ್‌ಡ್ ದುಃಖ ಇತ್ತ್‌ದ್ ಮಸ್ತ್ ಆಸಕ್ತಿಡ್ ಪ್ರಾರ್ಥನೆ ಮಲ್ತೊಂದುಪ್ಪುನಗ ಆಯನ ಬೆಗರ್ ನೆತ್ತೆರ್‌ದ ಮಲ್ಲ ಪನಿತ್ತ ಲೆಕ್ಕ ಭೂಮಿದ ಮಿತ್ತ್ ಬೂರ್‌ಂಡ್. 45ಆಯೆ ಪ್ರಾರ್ಥನೆ ಮುಗಿತ್‌ದ್ ಶಿಷ್ಯೆರೆ ಕೈತಲ್‌ ಬನ್ನಗ ಅಕುಲು ದುಃಖೊಡು ಬಚ್ಚಿದ್ ನಿದ್ರೆ ಮಲ್ತೊಂದಿತ್ತಿನೆನ್ ತೂದು 46ಅಕ್ಲೆಡ, “ನಿಕುಲು ನಿದ್ರೆ ಮಲ್ತೊಂದುಲ್ಲರಾ? ಲಕ್ಕ್‌ಲೆ, ಶೋಧನೆಗ್ ಬೂರಂದಿಲೆಕ್ಕ ಪ್ರಾರ್ಥನೆ ಮಲ್ಪುಲೆ,” ಅಂದ್‌ದ್ ಪಂಡೆ.
ಯೇಸುನು ಪತ್ತುನವು
(ಮತ್ತಾಯೆ 26:47-56; ಮಾರ್ಕೆ 14:43-50; ಯೋಹಾನೆ 18:3-11)
47ಯೇಸು ನನಲಾ ಪಾತೆರೊಂದುಪ್ಪುನಗನೇ, ಜನೊಕುಲೆ ಗುಂಪು ಅಡೆಗ್ ಬತ್ತ್ಂಡ್. ಶಿಷ್ಯೆರೆಡ್ ಯೂದೆ ಪನ್ಪಿನಾಯೆ ಆ ಜನೊಕುಲೆ ಎದುರುಡಿತ್ತೆ. ಆಯೆ ಯೇಸುಗು ಮುತ್ತು ಕೊರಿಯೆರೆಗಾದ್ ಆಯನ ಕೈತಲ್‌ ಬನ್ನಗ 48ಯೇಸು ಆಯಡ, “ಯೂದಾ, ನರಮಾನಿ ಮಗನ್ ಮುತ್ತು ಕೊರ್ದು ಪತ್ತ್‌ದ್ ಕೊರ್ಪನಾ?” ಅಂದ್‌ದ್ ಕೇಂಡೆ. 49ಆಯನ ಶಿಷ್ಯೆರ್ ದುಂಬಗ್ ನಡಪುನೆನ್ ತೆರಿದ್, “ಕರ್ತವಾ, ಎಂಕುಲು ಕತ್ತಿಡ್ ಕಡ್ಪೊಡಾ?” ಅಂದ್‌ದ್ ಕೇಂಡೆರ್. 50ಶಿಷ್ಯೆರೆಡ್ ಒರಿ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತ್‌ದ್ ಬುಡಿಯೆ. 51ಆಂಡ ಯೇಸು, “ಈತೆಕೆ ಬುಡ್ಲೆ!” ಅಂದ್‌ದ್ ಆ ಕೆಬಿನ್ ಮುಟ್ಟುದು ಆಯನ್ ಗುಣ ಮಲ್ತೆ. 52ಐಡ್ದ್ ಬೊಕ್ಕ ಯೇಸುನು ಪತ್ತಿಯೆರೆ ಬತ್ತಿ ಪ್ರಧಾನಯಾಜಕಗ್ಲಾ ದೇವಾಲಯದ ಕಾವಲ್‌ದ ಮುಖ್ಯಸ್ಥಗ್ಲಾ ಹಿರಿಯಾಕುಲೆಗ್ಲಾ, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ? 53ಯಾನ್ ದಿನಾಲ ದೇವಾಲಯೊಡು ನಿಕ್ಲೆಡೊಪ್ಪ ಉಪ್ಪುನಗ ನಿಕುಲು ಎನ ಮಿತ್ತ್ ಕೈ ಪಾಡ್ದ್‌ಜರ್; ಆಂಡ ಉಂದು ನಿಕ್ಲೆನ ಗಳಿಗೆಲಾ ಕತ್ತಲೆದ ಅಧಿಕಾರಲಾ ಆದುಂಡು.” ಪಂಡೆ.
ಪೇತ್ರೆ ಯೇಸುನು ಅರೆಂಜುನವು
(ಮತ್ತಾಯೆ 26:57,58; 26:69-75; ಮಾರ್ಕೆ 14:53,54; 14:66-72; ಯೋಹಾನೆ 18:12-18,25-27)
54ಬೊಕ್ಕ ಅಕುಲು ಆಯನ್ ಪತ್ತ್‌ದ್ ಪ್ರಧಾನಯಾಜಕನ ಇಲ್ಲದುಲಯಿ ಲೆತ್ತೊಂದು ಪೋಯೆರ್; ಪೇತ್ರೆ ದೂರೊಡ್ದು ಬೆರಿಯೆ ಪೋಯೆ. 55ಜಾಲ್‌ದ ನಡುಟು ಅಕುಲು ತೂ ಪೊತ್ತಾದ್ ಕುಲ್ಲೊಂದುಪ್ಪುನಗ ಅಕ್ಲೆನ ಒಟ್ಟುಗು ಪೇತ್ರೆಲಾ ಕುಲ್ಲಿಯೆ. 56ಆಯೆ ಬೊಲ್ಪುಗು ಮೋನೆ ಪಾಡ್ದ್ ಕುಲ್ಲೊಂದುಪ್ಪುನಗ ಒರ್ತಿ ಚಾಕ್ರಿದಾಲ್ ಆಯನ್ ಸರಿಯಾದ್ ತೂದು, “ಉಂಬೆಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ.” ಅಂದಲ್. 57ಆಂಡ ಪೇತ್ರೆ, “ಯಾನ್ ಆಯನ್ ತೆರಿಯಯೆ ಅಮ್ಮ,” ಅಂದ್‌ದ್ ಆರೆಂಜಿಯೆ. 58ಒಂತೆ ಪೊರ್ತುಡ್ದು ಬೊಕ್ಕ ಬೊಕ್ಕೊರಿ ಆಯನ್ ತೂದು, “ಈಲಾ ಅಕ್ಲೆಡ್ ಒರಿ!” ಅಂದ್‌ದ್ ಪನ್ನಗ ಪೇತ್ರೆ, “ಅತ್ತಪ್ಪಾ,” ಪಂಡೆ. 59ಹೆಚ್ಚಿಕಡಿಮೆ ಒಂಜಿ ಗಂಟೆ ಆಯಿ ಬೊಕ್ಕ ಬೊಕ್ಕೊರಿ, “ನಿಜಾದ್ ಉಂಬೆಲಾ ಆಯಡೊಪ್ಪ ಇತ್ತಿನಾಯೆ, ಉಂಬೆ ಗಲಿಲಾಯದಾಯೆನೇ,” ಅಂದ್‌ದ್ ನಿಗಂಟಾದ್ ಪಂಡೆ. 60ಆಂಡ ಪೇತ್ರೆ, “ಈ ಎಂಚಿನ ಪನ್ಪನಾ ಎಂಕ್ ಗೊತ್ತಾಯಿಜಿ ಅಂದ್‌ದ್ ಪಂಡೆ.”
ಆಯೆ ಈ ಪಾತೆರೊನು ಪನೊಂದುಪ್ಪುನಗನೇ ಕೋರಿ ಕಿಲೆತ್ತ್ಂಡ್. 61ಕರ್ತವೆ ಪಿರ ತಿರ್ಗ್‌ದ್ ಪೇತ್ರನ್ ದೃಷ್ಟಿ ದೀದ್ ತೂಯೆ. ಅಪಗ ಪೇತ್ರೆ, “ಕೋರಿ ಕಿಲೆಪುನೆಡ್ದ್ ದುಂಬು ಮೂಜಿ ಸರ್ತಿ ಕರ್ತವನ್ ತೆರಿಯಯೆ ಪನ್ಪ,” ಪಂಡಿನ ಪಾತೆರೊನು ಎನ್ನ್‌ದ್ 62ಪೇತ್ರೆ ಪಿದಯಿ ಪೋದು ಬಿಕ್ಕ್‌ಬಿಕ್ಕ್‌ದ್ ಬುಲ್ತೆ.
ಪೆಟ್ಟ್ ಪಾಡ್ದ್ ಮಸ್ಕಿರಿ ಮಲ್ಪುನವು
(ಮತ್ತಾಯೆ 26:67,68; ಮಾರ್ಕೆ 14:65)
63ಐಡ್ದ್ ಬೊಕ್ಕ ಯೇಸುನು ಪತ್ತಿನಾಕುಲು ಆಯಗ್ ಮಸ್ಕಿರಿ ಮಲ್ತ್‌ದ್ ಹಾಕಿಯೆರ್. 64ಬೊಕ್ಕ ಆಯಗ್ ಮುಸ್ಕು ಪಾಡ್ದ್, “ನಿಕ್ಕ್ ಹಾಕಿನಾಕುಲು ಏರ್? ಅಂದ್‌ದ್ ಪ್ರವಾದನೆ ಪನ್ಲ,” ಅಂದ್‌ದ್ ಆಯಡ ಕೇಂಡೆರ್. 65ಆಯಗ್ ನನಲಾ ದೂಷಣೆದ ಪಾತೆರೊನು ಪಂಡ್ದ್ ಸಸಾರ ಮಲ್ತೆರ್.
ಯೇಸು ನ್ಯಾಯಸಭೆತ ಎದುರು
(ಮತ್ತಾಯೆ 26:59-66; ಮಾರ್ಕೆ 14:55-64; ಯೋಹಾನೆ 18:19-24)
66ಬೊಲ್ಪಾನಗ ಯೆಹೂದ್ಯೆರೆ ಹಿರಿಸಭೆತಾಕುಲುಲಾ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಸೇರ್ದ್ ಆಯನ್ ನ್ಯಾಯತೀರ್ಪುದ ಸಭೆಕ್ ಲೆತ್ತೊಂದು ಬತ್ತ್‌ದ್, 67“ಈ ಕ್ರಿಸ್ತೆ ಆದುಲ್ಲನಾ? ಎಂಕ್ಲೆಗ್ ಪನ್ಲ,” ಪಂಡೆರ್. ಆಯೆ ಅಕ್ಲೆಡ, “ಯಾನ್ ನಿಕ್ಲೆಗ್ ಪಂಡ್ಂಡ ನಿಕುಲು ನಂಬುಜರ್. 68ಯಾನ್ ನಿಕ್ಲೆಗ್ ಪ್ರಶ್ನೆ ಕೇಂಡ್‌ಂಡ ನಿಕುಲು ಉತ್ತರ ಕೊರ್ಪುಜರ್. 69ಆಂಡ ಇನಿಡ್ದಿಂಚಿ ನರಮಾನಿ ಮಗೆ ಸರ್ವಶಕ್ತೆ ಆದುಪ್ಪು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುವೆ,” ಅಂದ್‌ದ್ ಪಂಡೆ. 70ಅಪಗ ಮಾತೆರ್ಲಾ, “ಅಂಚಾಂಡ ಈ ದೇವೆರೆ ಮಗೆನಾ,” ಅಂದ್‌ದ್ ಕೇನ್ನಗ, ಆಯೆ ಅಕ್ಲೆಗ್, “ಯಾನ್ ಆಯೆನೇ ಅಂದ್‌ದ್ ನಿಕುಲೇ ಪನ್ಪರ್.” ಪಂಡೆ. 71ಐಕ್ ಅಕುಲು, “ನಂಕ್ ಸಾಕ್ಷಿ ನನ ದಾಯೆಗ್ ಬೋಡು? ನಮನೇ ಆಯನ ಬಾಯಿಡ್ದ್ ಕೇಂಡತ್ತಾ,” ಅಂದ್‌ದ್ ಪಂಡೆರ್.
Trenutno odabrano:
ಲೂಕೆ 22: ತುಳು
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
