यहून्ना 1
1
बचन देधारी होयो
1क्युबी रच्या जाबाऊँ पेली बचन हो। बचन परमेसर क सागै हो, अर बचनई परमेसर हो। 2क्युबी रच्या जाबाऊँ पेली बो परमेसर क सागै हो।
3बिकै जरिए परमेसर सगळी चिजा बणाई। सगळी सरस्टि म एक बी अंय्यां की चिज कोनी जखी इकै बिना रची गई हो। 4बिमै जीव हो। अर बो जीव सगळा मिनखा को च्यानणो हो। 5च्यानणो अँधेरा म चमकै ह, अर अँधेरो बिनै कोनी बुझा सक्यो।
6 #
मत्त 3:1; मर 1:4; लूक 3:1,2 यहून्ना नाम का एक मिनखनै परमेसर भेज्यो। 7यहून्ना मिनखा म बि च्यानणा की गुवाई देबानै गुवा बणर आयो। जिऊँ मिनख बिका हेलानै सुणी अर बिस्वास करीं। 8बो खुद च्यानणो कोनी हो। पण बो बि च्यानणा की गुवाई देबानै आयो हो।
9सगळा मिनखानै च्यानणो दिखाबाळो, सचो च्यानणो जगत की नजर्या म आर्यो हो। 10बचन जगत म हो, पण कोई बिनै कोनी जाण्यो, जदकी परमेसर बिकै जरिए इ सरस्टि की रचना करी। 11बो आपका मिनखा म आयो। पण बे बिनै कोनी अपणाया। 12इकै बावजुद जत्ता बी बिनै अपणाया अर बिका नाम प बिस्वास कर्या, बानै बो परमेसर का टाबरिया होबा को हक दिओ। 13एक टाबर, जंय्यां मिनखऊँ बिकी इंछ्या गेल जलमै ह, बि तरिकाऊँ जलम'र बे परमेसर का टाबर कोनी बण्या, पण परमेसर की इंछ्याऊँ आत्मिक रूपऊँ जलम लेर परमेसर का टाबर बण्या हीं।
14बचन देधारी होयो। बो दया अर सच क सागै म्हारै मांयनै रिह्यो। अर म्हें बिकी अंय्यां की मेमा देखी जंय्यां परम-पिता का इकलोता बेटा की मेमा।
15यहून्ना बिकै बारां म गुवाई दिनी। बो हेलो पाड़्यो, “ओ बोई ह जिकै बारां म, म बोल्यो हो, ‘बो जखो मेरै पाछै आवै ह बो मेरूँ बडो ह, क्युं क बो मेरै जलमऊँ पेली बी मौजूद हो।’”
16बिकी दया की भरपुरीऊँ आपानै एक क पाछै एक आसिरबाद मिल्यो ह। 17मूसा क जरिए परमेसर नेम-कायदा दिआ। पण दया अर सच ईसु मसी की बजेऊँ आयो। 18परमेसरनै कदैई कोई कोनी देख्यो। पण परमेसर को इकलोतो बेटो जखो परमेसर की छाती तळै ह, अर बो परमेसरई ह। बोई परमेसरनै परगट कर्यो।
बतिस्मो देबाळा यहून्ना को हेलो
(मत्ती 3:1–12; मरकुस 1:1–8; लूका 3:1–18)
19यरूसलेमऊँ यहूदि अधिकारी जद याजका अर लेवीयानै यहून्ना कनै आ बुजबा भेज्या क, “तू कूण ह?” 20जणा यहून्ना बाकै मुंडा प सच बोल्यो क, “म मसी कोनी।”
21बे बिऊँ बुज्या, “जणा तू कूण ह? के तू एलिआ ह?” बो बोल्यो, “म एलिआ कोनी।” जणा बे बुज्या, “के तू परमेसर की खेबाळो ह?” बो बोल्यो, “नइ, म बो बी कोनी।”
22बे बिऊँ बोल्या, “जणा पाछै तू कूण ह म्हानै बता? जिऊँ म्हें म्हानै भेजबाळानै जुबाब देवां। तू खुद तेरै बारां म काँई खेवै ह?”
23यसाया परमेसर की खेबाळा क खया गेल यहून्ना बानै जुबाब दिओ:
“म उजाड़ म, हेलो देबाळा को हेलो हूँ।
‘परबु क चालबा ताँई गेलो सिदो करो।’ ”
24फरिसी, जानै भेज्या गया हा 25बे बिऊँ बुज्या, “जद तू नइ तो मसी अर नइ एलिआ अर नइ परमेसर की खेबाळो, जणा पाछै तू पाणी को बतिस्मो क्याले देवै ह?”
26यहून्ना बानै जुबाब दिओ, “म तो पाणी को बतिस्मो देऊँ हूँ। पण थारै बिचमै एक मिनख खड़्यो ह, जिनै थे कोनी जाणो। 27बो मेरै पाछै आर्यो ह। पण म तो बिकाळा जूता का सळू खोलबा जोगोई कोनी।”
28अ सगळी बाता यरदन नदि क परली पार बेतनिया म होई। जठै यहून्ना पाणी को बतिस्मो दिआ कर्तो हो।
यहून्ना ईसु की गुवाई दिनी
29आगलै दिन ईसुनै आप कानि आतो देखर यहून्ना बोल्यो, “देखो, ओ परमेसर को उन्यो ह, जखो जगत का मिनखा का पाप ताँई बलिदान होसी। 30ओ बोई ह जिकै बारां म, म बोल्यो हो, ‘बो जखो मेरै पाछै आवै ह बो मेरूँ बडो ह, क्युं क बो मेरै जलमऊँ पेली बी मौजूद हो। 31पेली म बी बिनै कोनी जाण्तो हो क बो कूण ह? पण म इ ताँई पाणी को बतिस्मो देतो आयो क, बो इजरायल प परगट होवै।’”
32जणा पाछै यहून्ना आ गुवाई दिनी, “म आसमानऊँ पबितर आत्मानै कबूतर की जंय्यां बिपै उतरता देखी। 33म तो बिनै कोनी पिछाण्तो हो। पण परमेसर जखो मनै पाणी को बतिस्मो देबा भेज्यो, बोई मेरूँ बोल्यो, ‘जिपै तू पबितर आत्मानै उतरता अर रूकता देखै, जणा जाण जाजै क पबितर आत्मा को बतिस्मो देबाळो ओई ह।’ 34म आ बातानै होता देखी, जणाई गुवाई देऊँ हूँ क ओई परमेसर को बेटो ह।”
ईसु क पिछै चालबाळा पेलीपोत का चेला
35आगलै दिन यहून्ना अर बिका दो चेला ओज्यु बठैई हा। 36अर बो ईसुनै बठिकी जातो देखर बोल्यो, “देखो, परमेसर को उन्यो जार्यो ह।”
37बिकी आ बात सुणर, बे दोन्यु चेला ईसु क गेल होलिआ। 38ईसु गेलनै मुड़र बानै आपकै गेल आतो देखर बाऊँ बुज्यो, “काँई बात ह?”
बे बोल्या, “ओ गरूजी, थे कठै रेह्वो हो?”
39बो बोल्यो, “आओ अर देखल्यो।”
आ बात संज्या च्यारेक बजे की ह जणा बे बिकै सागै जार देख्या क बो कठै रेह्वै ह अर बे बि दिन बिकै सागैई रिह्या।
40यहून्ना की बात सुणर ईसु क गेल चालबाळा दोन्या मऊँ, एक जणो अंदरिआस हो जखो समोन पतरस को भाई हो। 41बो सऊँ पेली आपका भाई समोननै ढुंढर बोल्यो, “म्हानै मसी मिलगो ह।” मसी को मतबल टाळेड़ो होवै। 42जणा बो बिनै ईसु कनै ल्यायो।
ईसु बिनै देखर बोल्या, “तू यहून्ना को बेटो समोन ह, तू केफा खुवासी।” केफा जिनै पतरस बी बोलै ह जिको मतबल ढाड होवै ह।
ईसु फलिपूस अर नतनएलनै बुलायो
43आगलै दिन ईसु गलिल जाबा की मन म करी। फलिपूसनै देखर बो बिऊँ बोल्यो, “मेरै गेल होले।”
44फलिपूस, अंदरिआस अर पतरस की नगरी बेतसदा को रेह्बाळो हो। 45फलिपूस नतनएलऊँ मिलर बिऊँ बोल्यो, “म्हानै बो मिलगो ह, जिकै बारां म मूसा नेम-कायदा म मांड्यो अर जिकै बारां म परमेसर की खेबाळा बताया हीं। बो युसूफ को बेटो नासरत को रेह्बाळो ईसु ह।”
46नतनएल बुज्यो, “नासरत! नासरतऊँ कोई चोखी चिज निकळ सकै ह के?”
फलिपूस बोल्यो, “आर खुदई देखले।”
47ईसु नतनएलनै आपकै कनै आतो देखर बोल्यो, “देखो, ओ सचमई इजरायली ह, जिमै क्युंई कपट कोनी।”
48नतनएल ईसुऊँ बुज्यो, “थे मनै कंय्यां जाणो हो?”
ईसु बिऊँ बोल्यो, “फलिपूसनै बुलाबाऊँ पेली, म तनै अंजीर का दरखत क तळै देख्यो हो।”
49नतनएल बिऊँ बोल्यो, “गरूजी थे परमेसर का बेटा हो, थे इजरायल का राजा हो।”
50ईसु बोल्यो, “म तनै बोल्यो क म तनै अंजीर का दरखत तळै देख्यो, के तू जणाई मेर प बिस्वास करै ह? तू इऊँ बी बडा-बडा काम देखसी।” 51अर बो बाऊँ बोल्यो, “म थारूँ सच बोलर्यो हूँ, थे ईस्बर नगरीनै खुली अर परमेसर का ईस्बर नगरी दुतानै मिनख का बेटा क सामै आता-जाता देखस्यो।”
Trenutno odabrano:
यहून्ना 1: एस डब्लु वी
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
(c) 2010-2017, New Life Computer Institute. All rights reserved
