Rut 1
1
Elimelekh sola rapunna male lako tana Moab
1:1-5
1-2Ia tonna jolona tonna tangngiapa raja mangparenta jio Israel, nakannai karorian la'da'. Ia joo wattu den mesa' muane disanga Elimelekh rapunna to-Efrata, torro jio kota Betlehem jio tana Yehuda. Malei lako tana Moab ssalaii joo karorian la'da' nasolanni to bainena disanga Naomi na dua anakkana muane, disanga Mahlon na Kilyon, natorro jio mentoratu. Ia tonna jio unapa tana Moab sola ngasan, 3matemi Elimelekh, jaji Naomi mandamora sola anakkana dua muane. 4Ia joo dua anakkana Naomi sibalii ana'dara to-Moab disanga Orpa na Rut. Ia tonna agi-agi sangpulomo taunna torro jio Moab, 5mate omi joo dua anakkana Naomi, jaji te'damo muanena, te'da toomo anakkana.
Naomi pole lako Betlehem nasolan todai to Rut
1:6-22
6Ba'tu pira-pira wattu masainna mangkanna joo ssa'dingmi kareba Naomi kumua Nabarakka'imi PUANG Allataala to to-Israel, namelomo to assele' padangna. Iamo joo nasadiamo la ssalai tana Moab, nasolan tooi joo dua anak mamintunna. 7Polemi Naomi lako tana Yehuda nasolanni joo dua anak mamintunna. Ia tonna mangtangnga lalanmo, 8mangkadami Naomi lako joo dua anak mamintunna nakua, “Polemo kamu' lako bolana tomatuammi. Dennaa upa' Napakamoja' kamu' PUANG Allataala, susi pangpakamoja'mi lako tojolomo lako sola lako aku'. 9Dennaa upa' Napuelohhi PUANG Allataala ammikemuane pole' mimanyaman torro sola balimmi.” Mangkai joo too, naudungngi to anak mamintunna sola dua, nakua, “La mpatarruhmo' kalingkangku'.” Apa kannori napeandongngi kumillak sola dua, 10namangkada nakua, “Te'da indo'! La meundikan tamale sola lako bangsami.” 11Mebalii Naomi nakua, “Danggi' anakku', la'bih melo ke pole kamu'. Apara bua'na milampeundina'? Nate'damo kulakeanak pole' to la menjaji muanemi. 12Polemo kamu', nasaba' gaja tuamo' ke la kemuane pole'pa'. Na rapanganna ke la madoangpa', kuta'pa kemuane tee bongi kunjajian anak muane, 13na la madoang unara kamu'ka ntajanni, arannai matonggo? Danggi' napassalan ia joo, na te'damo milakemuane pole'. Danggi' mipugaukki susi joo. La Napumasse penawangku' ke turu' kamu' mperasai to pangcalla-Na PUANG Allataala lako kaleku'.” 14Kumillak pole'i Rut sola Orpa mpeandongngi gamaranna, naraka'i Orpa joo matuanna naudungngi, namane' pole lako kampongna. Apa ia to Rut cia'i messarak jio mai matuanna. 15Mangkadami Naomi lako Rut nakua, “Ee anakku', kitari! Polemi sanglalanmu lako bangsami na jio toomo to dewatammi to la nasompa. Pole todamoko, undimoko lako!” 16Apa mebalii Rut nakua, “Indo', danggi' taparukuna' ssalaiki'. Madoangna' tamale sola. La umbo-umbo tanii male, ia toomo kunii male. Moi umbo tanii torro ia toomo kunii torro. Ia to bangsata' iamo bangsaku'. Ia to Allataala tasompa ia toomo la kusompa. 17Ma'namo Nasessana' PUANG Allataala ke la kusalaiki'. Iami tanii mate, ia toomo kunii mate kudilamun jio. Kamatean mandara la mpasisarakki'!” 18Ia tonna kitai Naomi kumua mattongan-tonganni Rut meundi, te'damo apa napau.
19Jaji mpatarruhmi kalingkanna, arannai ratu lako kota Betlehem. Mane' ratui lako, marongka ngasanmi to tau jio, nasikutana to baine nakua, “Naomiraka ia joo?” 20Nakuamo Naomi, “Danggi'mo misangana' Naomi battuananna tomasannang, sanga bangmo' Mara battuananna tomaparri', nasaba' Puang Allataala to makuasa, mangka nneloranna' tuo liwa' parri'. 21Ia tongkumale ssalaii tee kampong, ganna' to apa kuampui, apa ia tee too Napapolemo' PUANG Allataala, na pole lo'bangna'. Iamo joo danggi'mo misangana' Naomi battuananna tomasannang, nasaba' butung te'da Napuelohhi PUANG Allataala to apa kupuapa, Naparatuanna' mangrupa-rupa kamaparrisan joo to makuasa.”
22Susimi joo tonna pole Naomi jio mai tana Moab sola Rut anak mamintunna to to-Moab. Ia tonna ratumo lako Betlehem wattunnami mangpamula mejelai#1:22 Den ba'tu pirang-pirang rupa tananan susi pare to dikabua' tarigu susinna gandum na jelai. Ia to jelai napukande tokaasi-asi sola patuoan. to tau jio.
Trenutno odabrano:
Rut 1: mvpAD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Wycliffe Bible Translators, Inc. All rights reserved.