Yosua 3
3
To-Israel llambanni Sa'dan Yordan
1Masawanna joo too, napelambikkii Yosua sola to-Israel mi'cok, nake'deh jio mai Sitim male lako Sa'dan Yordan, namangbongi jio ntajan wattu to la nanii lamban. 2Ia tonna tallung allomo, malemi to tomatua-tua to-Israel llingkai sininna tenda, 3napangparentanni kumua, “Iammikitami to imang suku Lewi#3:3 Ia to suku Lewi dipattantu menjaji imang. Ia mandara wa'ding mbulle patti basse-Na Puang Allataala. Kitai Ulangan 10:8; 1Tawarikh 15:2. mbulle Patti Basse-Na PUANG Allataala to tasompa ssalaii tee ngenan, undimo kamu' nturu'i joo patti, 4dikua mikitai to lalan la miola, nasaba' te'dapa naden miolai joo lalan. Apa danggi' mimandoppi' gaja lako joo patti, paralla'i agi-agi mesa' kilo#3:4 Llan basa Ibrani dikua 2000 hasta. Ia to mesa' hasta pada sukaqna sangsiku..”
5Nakuamo Yosua lako to-Israel, “La mpaccingngi kamu' kalemi#3:5 mpaccingngi kamu' kalemi battuananna menjio', ssullei pakean, danggi' mangpanggaukan gaja' na mpasadia kale la ssompa Puang Allataala. Kitai llan Kamessunan 19:10, 15 , nasaba' masawa la takita to mejangngaran Napugauk PUANG Allataala lako kita'.” 6Mangkai joo too, nasuami Yosua to imang mbullei to Patti Basse, nalumingka njoloan to-Israel. Napugaukmi susi to disuanni.
7Mangkada-Mi PUANG Allataala lako Yosua Nakua, “Mangpamula too allo, Kupamala'bihko, dikua nataratte'ko sininna to-Israel, naissenni kumua Aku' ntulungko, susi Nabi Musa Kutulung. 8Kuanni to imang to mbullei joo Patti Basse, ianna ratumo lako sa'dan, napelleseanmo ajena do' wai, la da'tanni torro ke'deh jiong sa'dan.”
9Nakuamo Yosua lako to-Israel, “Ntee ngasan kamu'! Den tee kadan-Na PUANG Allataala to tasompa la kupauan kamu'. 10-11Ianna mendo'mo Sa'dan Yordan njoloan kamu' to tombulle Patti Basse-Na Puang Allataala to ngkuasai langi' sola lino, la mikitami kumua Ia to Allataala to tuo, llanni alla'ta'. Iamo la minii nnissenni dau kumua, nang la Naula'i Puang Allataala to to-Kanaan, to-Het, to-Hewi, to-Feris, to-Girgasi, to-Amori, na to-Yebus. 12Pilei tooi sangpulo dua tau simesa'-mesa' jio mai suku to-Israel. 13Ia dau ke mpelleseanmi ajena do' sa'dan to imang mbulle Patti Basse-Na PUANG Allataala to ngkuasai langi' sola lino, ta'pa pajai lolong to wai sa'dan, ia to wai jaja mai ulu sa'dan tiempang jio mesa' ngenan.”
14-15Ia joo wattu megandummi to tau#3:14-15 Ia joo wattu peganduman biasanna bulan tallu ba'tu bulan appa'. na biasanna ke wattu susi joo endek to wai sa'dan ratu de' randanna.
Ia tonna salaimi to-Israel to nanii mangtenda la male llambanni Sa'dan Yordan, jolomi lumingka to imang mbulle Patti Basse. Ia tonna pelleseanmo ajena to imang do' wai sa'dan, 16-17ta'pa tipoli' to wai re' ulu sa'dan, na tirempun jaja kampong to disanga Adam siandah kota Sartan. Cappu' toomi to wai llo' pollo' sa'dan lolong tama Tasik Araba to disanga too Tasik Mate. Iamo joo na ia to to-Israel wa'ding llambanni Sa'dan Yordan to makase, jio sioloan kota Yerikho. Ia to imang to mbulle Patti Basse-Na PUANG Allataala, tatta'i ke'deh llan tangnga Sa'dan Yordan, arannai lamban ngasan to to-Israel.
Trenutno odabrano:
Yosua 3: mvpAD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Wycliffe Bible Translators, Inc. All rights reserved.