Luka 6
6
Ifyapakasuba ke Sabata
(Mat. 12.1-8; Mk. 2.23-28)
1Pakasuba ke Sabata, Yesu akalangenye mumabala aku tiligu. Abakusambila bakwe batatikile ukuputaula imisonte yaku tiligu, bakofikisa muminwe yabo nokulyako inseke. 2Nomba Abafalisi bambi basosele ati, “Boneni! Abakusambila benu bakochita ichitasuminishiwa Mumafunde pakasuba ke Sabata!”#Ukuf. 20.10
3Elo Yesu abasukile ati, “Napo tamwapendapo ifyo Davide achitile ulo ali nensala pamo nabo ali nabo?#1 Sam. 21.1-6 4Ayinjile munanda yaku Lesa, nokulya imifuba iyatulilwe kuli Lesa, apelako nabo ali nabo. Icho batalingile ukuchita ukulingana nefunde kuntu bachipupila benka.”#Ab.Lef. 24.9
5Na Yesu alekelesheko nokubeba ati, “Pakuti Umwana wa Muntu Eshikulu nape Sabata.”
Yesu aposha uwakuboko ukwauminina
(Mat. 12.9-14; Mk. 3.1-6)
6Nakambi pe Sabata limbi Yesu ayinjile munanda yakulombelamo Lesa ya Bayuda nokusambisha abantu. Mwenka mulya mwali umwalalume umo uwali nokuboko kwamulyo ukwauminina. 7Bambi abasambishi ba Mafunde na Bafalisi balimulolekeshe Yesu ukuti babone nangula kuti aposha umuntu pe Sabata pakuti basange umulandu wakumutendekelapo. 8Yesu alishibile fyonse ifyo balikulanguluka. Asosele kumuntu wakuboko kwauminina ati, “Ima, isa nkuno kuntanshi.” Naye alimakene apo Yesu amwebele. 9Yesu afumbile abalimo ati, “Napo chililingile pe Sabata. Napo chalilinga pe Sabata ukuchita ichiweme nangula ukuchita ichibipile? Ukupulusha ubumi bwamuntu nangula ukwipaya?” 10Elo Yesu atandenye amenso pali bonse, elo asosele kuli ye ati, “Tambulula ukuboko kobe.” Naye alitambulwile, elo alipolele.
11Nomba bo balikalipile ukwinekantu nokutatika ukusoshanya ifyakuchita Yesu.
Yesu asala abatumwa ikumi nababili
(Mat. 10.1-4; Mk. 3.13-19)
12Pali njilya nshita Yesu ayile kulupili mukulomba kuli Lesa ubushiku bonse. 13Ulo bwachele, ayitile abakusambila bakwe nokusalapo ikumi nababili. Abenika neshina lya batumwa bakwe! 14Simoni (uwo Yesu ayinikile Petulo) na Andileya wabo, Yemusi na Yohane, Filipo na Batolomeyo,#Yoh. 1.42 15Mateyo na Tomasi, Yemusi mwana Alifeyo, Simoni (uwakuipakisha mufyachalo,) 16Yuda mwana Yemusi, na Yuda Isikaliyoti uwayembwile Yesu.#Luk. 22.47-48
Yesu asambisha nokuposha
(Mat. 4.23-25)
17Ulo Yesu atentemukile ulupili nabatumwa bakwe, ayimakene pachifulo apaselebele, nebumba ilikulu ilyabakusambila bakwe. Abantu bambi bafumine muchalo chonse cha Yudeya namumusumba wa Yelusalemu. Bambi nabo bafumine mumishi ya Tule na Sidoni iyaba mumbali yaku bemba. 18Bayishile mukumfwa kuli Yesu nokuposhewa kumalwele abo. Nambalya abalikuchula kumipashi iibi baliposhiwe. 19Abantu bonse balikufwaya ukumukumya, pakuti ifiso ifyalikufuma kuli Ye, fyalibaposeshe bonse.
Ishuko neshamo
(Mat. 5.1-12)
20Ulo Yesu aloleshe pabakusambila bakwe alibebele ati,
“Mwalishuka mwebo mwe bachula,
pakuti ubufumu bwaku Lesa bwenu!
21“Mwalishuka mwebo mwe bakoumfwa insala nomba,
pakuti mwakwisa kwikuta!
“Mwalishuka mwebo mwe bakolosha nduno,
pakuti mwakwisa kuseka!
22“Mwalishuka mwebo ulo abantu bakomupata nokumusula, bakomutuka nokumweba ati muli babi pamulandu wa Mwana wa Muntu! 23Sekeleleni ulo mfi fyakuchitika, ina yangeni pakuti ichilambu chenu chikulu mumulu. Pakuti banshibo nabo efyo bachitile kubasoseshi bakale.
24“Yangwee kuli mwebo mwe basambashi banomba,
pakuti mulikele mubwanalale.
25“Yangwee kuli mwebo mwe bakoyikuta nomba,
pakuti mukoyisa kumfwa insala.
“Yangwee kuli mwebo mwe bakoseka nomba,
pakuti mwakumfwa ichikonko nokulila.
26“Yangwee kuli mwebo mwe bantu bakososela ifiweme pakuti efyo banshinwe basosele nakubasoseshi ababufi.
Ukutemwa abalwani besu
(Mat. 5.38-48; 7.12)
27“Nomba nkomweba ati, mwebo mwe bakoumfwa nati temweni abalwani benu, nokubachitila ubune abo abakomupata. 28Bashukisheni abakomuchitila inkasa. Nakambi balombeleni bo abakomuchusha. 29Kati muntu akupama palutobo lumo, umwalwile nokulunakwe. Nangulya uwapoka ilaya lyobe, umupelele kumo nomwinjila obe. 30Umuntu onse uukokulomba akantu umupele, nowakupoka ubusambashi bobe, wimupindapo ukuti akubweseshe. 31Ifyo mukofwaya abantu ukumuchitila, efyo namwebo mubachitile.
32“Nomba kati mukotemwa bwaka abantu abamutemwa, lishuko ndo mwingabwenamo? Pakuba ababi nabo balatemwa ababatemwa! 33Nomba kati mukochitila ubune mbalya abakomuchitila ubune, lishuko ndo mungabwenamo? Pakuti ababi nabo efyo bachita! 34Nakambi nga mwakongwesha abo muchetekele ukuti bakubwesha, lishuko ndo mungabwenamo? Pakuti nababi nabo balakongwesha ababi banabo ukuti bababweseshe. 35Ala! Mulokutemwa abalwani benu nokubachitila ubune, bakongwesheni nokusulako. Mwakwisakupokelela ichilambu chenu ichikulu. Mwakwisa kuba abana baku Lesa uwapulamo pakuti Ye ali uuweme kuli abo abatatotapo nakubabi. 36Beni nechisa kubati ifyo Bawishinwe baba abachisa.
Ukupingula abantu bambi
(Mat. 7.1-5)
37“Mulokupingula bambi pakuti namwe Lesa ekamupingulapo. Mwipelapo bambi mulandu, pakuti Lesa naye ekamupapo umulandu. Banakilileni amabifyo, namwe Lesa akwisa kumunakilila. 38Peleni kubanenu ifyo babulilwa, namwe Lesa akwisa kumupela ifinji. Nachine namwe mwakwisa kupokelela umulingo uwayiwula, uwashindayikwa nokusempauka. Pakuti umulingo uwo mukolingilako bambi, ewo namwe Lesa akumulingilako.”
39Nakambi Yesu abebele ichelusho ichakuti, “Napo impofu imo kuti itanjilila impofu inakwe? Napo shonse shibili tekuti shiwilepo muchilindi? 40Uwakusambila tachila musambishi wakwe. Nomba nga apwisha ukusambilila, alalingana nomusambishi wakwe.
41“Mba nindo ukololesesha akapande akali mulinso lyakuwenu elo we wasula ichipande ichili mulinso lyobe? 42Elo kuti wasosa shani kuli wenu ati, ‘Leka mfumye akapande akali mulinso lyobe,’ ulo mulinso lyobe muli ichipande? We wakutumpayika we! Bala uyishibule ichipande ichili mulinso lyobe, elo wakulolesha bwino nokufumya akapande akali mulinso lyakwa wenu.
Ichiti chishibilwa kufitwalo fyachiko
(Mat. 7.16-20; 12.33-35)
43“Takupo ichiti ichiweme ichitwala ifitwalo ifibipile, nangu ichiti ichabipa ichitwala ifitwalo ifiweme. 44Ichiti chonse chishibilwa kufitwalo fyachiko. Napo balaswa amakunyu kuminga, nangu impesha kumikolobolo. 45Umuntu uuweme afumya mfilya ifyabuboni ifiweme ifili mumutima wakwe. Nomba umubi ye afumya mfilya ifibi ifyayiula mumutima wakwe. Pakuti umuntu asosa ifintu ifili mukati mumutima wakwe.
Abemashi bamananda babili
(Mat. 7.24-27)
46“Nindo mukonjitila mwati, ‘Bashikulu, Bashikulu,’ ukwambula ukuchita ifyo nkososa? 47Umuntu onse uukoyisa kuli nebo nokumfwa amashiwi anji nokuachita, kamulange mwebo uwo apalene naye. 48Ali kubati muntu uwaimeke inanda yakwe, kayimbisha umufula nokufisha pachipalabwe. Imfula yalilokele nokupuma pali njilya nanda, kuntu tayasunkenepo neli panini pakuba yalimekwe bwino. 49Nomba onse uumfwa amashiwi anji nokutaachita, ali kubati muntu uwayimeke inanda yakwe pamusenga apatali umufula. Ulo imfula yalokele, ichama munika chalishile nokupuma pali njilya nanda, nayo kayikunta panshi na tuyuu!”
Trenutno odabrano:
Luka 6: LalaNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Chilala New Testament © Bible Society of Zambia, 1998.
