LUKA 9
9
Ko Uga atu ne Iesu Ona Soko e Tinoagafulu mo te Tokolua ke Olo
(Mata 10.5-15; Male 6.7-13)
1Ne 'luku fakatasi ne Iesu ona soko e tinoagafulu mo te tokolua, kae ne tuku atu ki a latou te mana mo te malosi o afuli keatea agaga ma'sei, pela foki mo te faiga ke 'lei a masaki. 2Oti, uga ei latou ne ia ke olo o takutaku atu a te tala i te Malo o te Atua, mo te fai ke 'lei masaki. 3Ana muna ki a latou: “Mo a ma ave ne koutou se mea i te malaga, se tokotoko, se taga, ne meakai, me se tupe. Mo a foki ma takilua ne tilima. 4So se koga e talia i ei koutou, 'nofo eiloa i te fale tena, ke oko ki te taimi e tiakina ei ne koutou a te fa'kai tena. 5#Galu 13.51So se koga e se talia i ei koutou ne tino, tiakina te fa'kai tena, kae tuetue keatea a pefu mai i otou vae, pela me se akoakoga ki a latou.” 6Ne olo a soko, kae ne afe i fa'kai katoa o talai te Tala 'Lei kae fai ke 'lei a masaki i koga katoa.
Ko Fi'fi a Mafaufauga o Helota
(Mata 14.1-12; Male 6.14-29)
7 #
Mata 16.14; Male 8.28; Luka 9.19 A Helota te pule o Kalilaia, ne logo i mea katoa kola ne 'tupu. Ko oko eiloa i te fi'fi ona mafaufauga, me e isi ne tino ne fai mai penei, “A Ioane te Papatiso ko toe ola mai!” 8Ka ko nisi tino ne taofi pela i a Elia ko toe ola mai, ka ko nisi tino ne fai mai me e isi se tino o te kau pelofeta taumua ko toe ola mai. 9Muna a Helota, “Ko oti ne kati ne au te ua o Ioane; ka ko oi te tino tenei ko lagona atu ne au a pati a tino e fai ki ei?” Kae ne taumafai eiloa a ia ke lavea ne ia a Iesu.
Ko Fagai ne Iesu te Lima Afe
(Mata 14.13-21; Male 6.30-44; Ioa 6.1-14)
10Ne 'foki mai apositolo, kae ne taku mai ki a Iesu a mea katoa ko oti ne fai ne latou. Ne olo fakatasi mo ona soko, oti, tuku atu ei latou ke olo ki te fa'kai e igoa ki a Petesaita. 11I te lagonaga ne tino a tala e uiga ki a Iesu, ne tau'tali latou i a ia. Ne talia ne ia latou, kae ne faipati ki a latou e uiga ki te Malo o te Atua, kae ne fai foki ne ia ke 'lei a masaki o tino kola ne ma'nako ki ei.
12Ko pili o to te la, kae o'mai te tinogafulu mo te tokolua soko ki a ia, kae fai mai: “Uga atu a tino ke olo ki fa'kai 'lasi mo fa'kai fo'liki kola e pili mai ki konei, ko te mea ke maua ne meakai mo koga mo 'nofo; me i te koga nei se koga lavaki.” 13Ka ko Iesu ne fai atu penei ki a latou, “Avatu ne koutou ne meakai mo olotou 'kai.” Ne tali mai latou, “A motou mea konei, e lima fua falaoa mo ika e luagamata. E manako koe ke olo matou o 'togi ne meakai ma te vaitino katoa konei?” 14Kāti e tusa mo te lima afe tagata i kona. Muna a Iesu ki ona soko, “Fai atu ki tino ke 'nofo ki lalo i potukau e taki tinolima.” 15Ne fai pena ne soko, kae ne 'nofo katoa ki lalo a tino. 16Ne puke ne Iesu a falaoa e lima mo ika e luagamata, ne kilo ake ki te lagi, kae ne fakafetai ki te Atua mo mea kona. Ne tofitofi ne ia a falaoa mo ika, kae tuku atu ki ona soko ke tufatufa atu ki tino. 17Ne 'kai katoa latou, kae ne ma'kona; kae ne 'fao ne soko a tapola e sefulu lua ki toega meakai.
Ko te Mau a Petelu e Uiga ki a Iesu
(Mata 16.13-19; Male 8.27-29)
18I te sua taimi ne 'talo tokotasi a Iesu; kae ne o'mai ki a ia ona soko. Ne fesili atu a ia ki a latou penei: “Ni a pati a te vaitino me ko oi au?” 19Ne tali mai latou penei, “Muna a nisi tino i a koe ko Ioane te Papatiso. Nisi tino e taofi i a koe ko Elia, ka ko nisi tino e taofi i a koe se pelofeta ko toe ola mai, mai i pelofeta i aso taumua loa.” 20#Ioa 6.68,69 Ne fesili atu a ia ki a latou, “Ka ko koutou, se a te otou mau me ko oi au?” Ne tali mai Petelu penei, “A koe ko te Keliso a te Atua!”
Ko Faipati a Iesu e Uiga ki Tona Puapuaga mo Tona Mate
(Mata 16.20-28; Male 8.30—9.1)
21I te taimi tena, ne fai atu te fakatonuga 'mafa a Iesu ki a latou, ke se fakaasi a te mea tenei ki se tino. 22Kae ne toe fai atu a ia penei: “Ka ko au te Tama a te Tagata, e 'tau o logo'mae i mea e uke, kae se talia foki ne toeaina, faitaulaga sili mo faiakoga o te Tulafono. Ka tamate au, kae ka toe ola mai i te tolu o aso.”
23 #
Mata 10.38; Luka 14.27 Ne muna atu a ia ki tino katoa: “Kafai se tino e manako o vau ki a au, e 'tau mo ia o fakapuli tena foitino, amo tena sataulo i aso katoa, kae tautali mai i a au. 24#Mata 10.39; Luka 17.33; Ioa 12.25 A te tino e fia fakasao ne ia tena ola mo ia ake eiloa, e se maua ne ia; ka ko te tino e fakamaumau ne ia a tena ola ona ko au, e ola a ia. 25E a, e isi se mea a se tino e maua, manafai e maua ne ia te lalolagi katoa, kae maumau ei a tena ola? E seai lele eiloa! 26Kafai se tino e taema i a au mo aku muna, ka taema foki au te Tama a te Tagata i a ia, manafai ko vau au i toku 'malu mo te 'malu o toku Tamana mo te 'malu o te kau agelu tapu. 27Au e fai tonu atu ki a koutou, e isi ne tino i konei ka se 'mate, ke oko eiloa ki te taimi ka lavea ei ne latou a te Malo o te Atua.”
Ko te Fuliga o te Foitino o Iesu
(Mata 17.1-8; Male 9.2-8)
28 #
2Pete 1.17-18
Kāti ko tusa mo se vaiaso e tasi mai tua i te faipatiga ne ia a muna konei, kae ave ne Iesu a Petelu, Ioane mo Iakopo ki luga i se mauga o 'talo. 29I te itula ne 'talo ei a ia, ne mafuli ona foliga e pela foki mo ona gatu, ko kena pakipaki eiloa. 30I te taimi foki eiloa tena, e tokolua tagata ko fai'pati mo ia. A te tokolua kona, ko Mose mo Elia, 31kola ne fakaasi mai i te malapulapu mai te lagi, kae ne fai'pati mo Iesu e uiga mo te fakataunuga ne ia a te loto o te Atua, ke mate a ia i Ielusalema. 32A Petelu mo ona taugasoa ko 'moe pala'pala, i te alaakega, lavea ei ne latou te 'malu o Iesu mo te tokolua tagata e 'tu mo ia. 33I te taimi ne olo ei keatea a te tokolua kona mai i a Iesu, kae fai atu a Petelu ki a ia: “Te Takitaki, se mea 'lei ke 'nofo tatou i konei. Ka faite ne matou ne fakamalumalu e tolu. E tasi mo koe, e tasi mo Mose kae tasi mo Elia.” A muna kona ne faipati fua ne Petelu, kae ne seki iloa ne ia me ne a ana pati ne fai. 34Ka koi faipati a ia, ne fanake te kaumana, fakapulougina ei latou, kae ne ma'taku a soko i te okoga o te kaumana ki luga o latou. 35#Isa 42.1; Mata 3.17; 12.18; Male 1.11; Luka 3.22 E isi se leo ne vau mai i te kaumana penei: “Ko taku Tama tenei, tela ko oti ne filifili ne au, faka'logo la ki a ia.” 36I te motuga o te leo, ko Iesu fua tokotasi koi 'toe mai. Ne seki faipatigina ne soko a mea katoa konei, kae ne seki fai'pati atu eiloa ki se tino e tokotasi i aso kona, e uiga mo mea ko oti ne lavea ne latou.
Ko Afuli ne Iesu a te Agaga Masei mai te Tamaliki Tagata
(Mata 17.14-18; Male 9.14-27)
37I te taeaoakega ne olo ifo latou ki lalo mai i te mauga, kae ne fakafetaui atu ki a Iesu a te vaitino e tokouke. 38E isi se tagata ne kalaga mai i te vaitino tena penei: “Te Faiakoga! Au e fakamolemole atu ki a koe, ke onoono ake koe ki taku tama tagata; ko taku tama tagata eiloa e tokotasi. 39E isi se agaga masei e puke sale ne ia a ia ke pakalaga kae fakavalevale, kae 'sofi ifo foki mo te takapiaga i ona gutu. E fakafita eiloa a ia pena ne te agaga masei, kae mumea eiloa ko se fano keatea. 40Ne fakamolemole au ki ou soko ke afuli keatea te agaga masei, kae ne seki mafai ne latou.” 41Ne tali atu a Iesu penei: “Ko seai la se kautama se talitonu kae fai mea piko'piko e pela mo koutou! Ka nofo au i a koutou ke afea? Ka kufaki au ki a koutou ke afea?” Tela, muna atu ei a ia ki te tagata, “Aumai tau tama tagata ki konei.” 42I te vauga o te tamaliki, ne fakasiga a ia ne te temoni ki lalo i te laukele, kae ne fai ne ia ke fakavalevale. Ne fai atu te fakatonuga a Iesu ki te agaga masei, 'lei ei mo te tamaliki, fakafoki atu ei ki tena tamana. 43A tino katoa ne ofo i te malosi o te mana o te Atua.
Ko Toe Faipati a Iesu e Uiga ki Tona Mate
(Mata 17.22-23; Male 9.30-32)
A tino koi ofo eiloa i mea katoa ne fai ne Iesu, i tena faipatiatuga ki ona soko penei: 44“Sa puli a pati konei ka fai atu ne au ki a koutou! Ka ko au te Tama a te Tagata ka tuku atu ki te pulega a tagata.” 45Kae ne seki iloa ne latou me se a te uiga o te muna tenei. Ko oti ne 'funa mai i a latou, ko te mea ke se lotou iloagina; kae ne ma'taku latou o fesili ki a ia e uiga mo te mea tena.
Ko Oi te Tino e Sili?
(Mata 18.1-5; Male 9.33-37)
46 #
Luka 22.24
Ko tupu se kinauga i soko me ko oi te tino i a latou e sili. 47Ne iloa ne Iesu olotou mafaufauga, tela ne puke ei ne ia te tamaliki, kae ne fakatu ne ia i ona tafa, 48#Mata 10.40; Luka 10.16; Ioa 13.20 kae ne fai atu ki a latou penei: “Ko te tino tela e talia ne ia a te tamaliki tenei i toku igoa, e talia foki ne ia au; ka ko te tino tela e talia ne ia au, e talia foki ne ia a te tino tela ne uga mai ne ia au. Me ko te tino tela e se taulia i a koutou katoa, ko te tino tena e sili i te maluga.”
Ko te Tino e se 'Teke ki a Koutou e Kau mo Koutou
(Male 9.38-40)
49Ko faipati mai a Ioane penei: “Te Takitaki, ne lavea ne matou se tagata e afuli ne ia keatea a temoni i tou igoa, kae ne muna atu matou ki ei ke fakagata, me i a ia e se kau i a tatou.” 50Muna a Iesu ki a ia mo isi soko, “Sa taumafai o taofi a ia, so se tino e se 'teke mai ki a koutou, e kau koutou.”
Ko se Talia a Iesu i te Fa'kai o Samalia
51Ko pili mai aso ka ave ei a Iesu ki te lagi, ne fatuaki tena loto kae ne kamata tena malaga o fano ki Ielusalema. 52Ne uga ne ia avefekau ke 'mua i a ia, kola ne olo ki loto i se fa'kai o Samalia o fakatoka a mea katoa mo ia. 53Ka ko tino i te fa'kai tena, ne se talia ne latou a ia; i te mea ne iloa tonu ne latou i a ia e fano ki Ielusalema. 54#2Tupu 1.9-16 I te iloaga ne ona soko ko Iakopo mo Ioane a te mea tenei, a la muna, “Te Aliki, e manako koe ke ka'laga maua ki te afi mai te lagi, ke 'sunu latou ke palele?”#9.54: I nisi lomiga e fakaopoopo e pela mo te mea ne fai ne Elia. 55Ne mafuli atu a Iesu kae ne 'liko atu ki a laua;#9.55: I nisi lomiga e fakaopoopo ana muna “E se iloa ne koe me se vaega o Agaga pefea e 'kau koe i ei; me i te Tama a te Tagata ne seki vau o fakamasei a olaga o tino, kae o fakaola a latou.” 56kae ne olo atu eiloa latou ki te sua fa'kai.
Ko Tino e Fia Tau'tali i a Iesu
(Mata 8.19-22)
57I te lotou ologa i te auala, e isi se tagata ne muna mai ki a Iesu penei: “Au ka tautali atu ki a koe ki so se koga e fano koe ki ei.” 58Muna a Iesu ki a ia, “E isi ne lua o alope, mo manueva e isi foki ne olotou ofaga, ka ko au te Tama a te Tagata, e seai se koga mo oku fakatapū.” 59Ne fai atu ki te isi tagata, “Tautali mai i a au.” Kae ne tali mai a ia, “Te Aliki, tuku mua mai au ke fano o tanu toku tamana.” 60Ne tali atu penei a Iesu, “Tuku i ei a tino 'mate ke tanu olotou tino 'mate. Fano koe o takutaku atu te tala i te Malo o te Atua.” 61#1Tupu 19.20 Muna a te sua tagata, “Te Aliki, ka tautali au i a koe, kae tuku mua mai au ke fano o fakamavae ki toku kaiga.” 62Muna a Iesu ki a ia, “So se tino e kamata o fakamalu te laukele, kae kilokilo 'soko ki ona tua e se aoga mo te Malo o te Atua.”
Trenutno odabrano:
LUKA 9: Tusi Tapu
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tuvalu Revised Bible © Bible Society in the South Pacific
