LUKA 24
24
Ko te Toetu o Iesu
(Mata 28.1-10; Male 16.1-8; Ioa 20.1-10)
1I te mafaga o te ata i te aso muamua o te vaiaso tela ko te Aso Tapu, ne olo fafine ki te tanuga mo olotou mea manogi kola ne fakatoka. 2Ne maua atu ne latou te fatu ko oti ne fakatakapili keatea mai te gutu o te tanuga, 3tela ulu atu ei latou, kae ne se maua ne latou te foitino o te Aliki ko Iesu. 4Ka koi 'tu latou mo olotou mafaufau se toka 'lei, kae 'poi eiloa me ko 'tu mai i olotou tafa tagata e tokolua mo la gatu malapu'lapu. 5Ma'taku ei latou, kae pu'nou olotou mata ki lalo i te laukele, kae fai mai tagata kona ki a latou: “Ai a e salasala ei ne koutou a ia tela ko ola mai i tino 'mate? 6#Mata 16.21; 17.22-23; 20.18-19; Male 8.31; 9.31; 10.33-34; Luka 9.22; 18.31-33E galo a ia i konei, ka ko toetu. Masaua ana muna ne fai atu ki a koutou, i tena nofoga i Kalilaia, 7me e 'tau o tuku atu au te Tama a te Tagata ki lima o tino agasala, kae ka fakasataulo au, kae i te tolu o aso, ka toetu mai ei au.” 8Masaua ei ne fafine ana muna kona, 9'foki mai ei latou mai te tanuga, kae ne fakamatala mai ne latou a mea katoa ki te tinoagafulu mo te tokotasi, mo latou katoa ne i kona. 10Ko Malia te Makatala, ko Ioana, ko Malia te matua o Iakopo, mo nisi fafine ne fakatasi latou, ko latou kona ne fakamatala mai a mea kona ki apositolo. 11Ka ko muna kona a fafine, e pela fua mo se tala vale; kae se talitonu foki latou ki ei. 12Kae ne tu ki luga Petelu, kae tele ki te tanuga, ne punou ifo, matea ei ne ia sulukafu lino e tuku mai. Ne foki a ia ki tena fale, kae ne ofo i te mea ne tupu.#24.12: I nisi lomiga e seai iei se foaitau e 12.
Ko te Sasalega ki Emau
(Male 16.12,13)
13I te aso eiloa tena, ne olo te tokolua ki te fa'kai e igoa ki a Emau, tela e fitu maila mai Ielusalema. 14Ne sau'tala laua ki mea katoa kola ne 'tupu. 15Ka koi sau'tala laua kae mafaufau ki ei, ne fakapilipili atu Iesu ki o la tafa, olo tasi ei latou. 16Ka ko faka'segi o la mata, ke se matea ne laua Iesu. 17Kae ne fai atu Iesu ki a laua, “Ne a lua tala kona e fai, kae sasale?” Kae ne 'tu faka'logo laua mo te mata fanoanoa. 18Ne tali mai te tokotasi o laua e igoa ki a Kaleopa, “Ko koe fua nei te tino e nofo i Ielusalema, e se ke iloagina a mea ne 'tupu i lua aso ko teka atu nei?” 19Ne fai atu a ia ki a laua, “Ne a mea?” Kae ne fai mai laua. “Ko mea e uiga ki a Iesu te Nasaleta, ko te pelofeta e malosi i ana muna mo ana faiga i mua o te Atua mo te fenua katoa. 20Ne tuku atu foki a ia ne faitaulaga sili mo pule o latou ke fakasala ki te mate, kae ke fakasataulo foki. 21Me ko ia eiloa te tino e tokotasi ne faka'na matou ki ei ka fakaola ne ia a Isalaelu, kae se gata i mea katoa kona, kae tenei te tolu o aso i te 'tupuga o mea kona. 22Ne ofo matou i omotou fafine ne i te tanuga i te mafaga o te ata. 23Kae ne seki maua ne latou tena foitino. Ne 'foki mai latou, kae tala mai me ne matea ne latou se fakaasiga, i agelu kola ne taku mai ki a latou, me i a ia ko ola. 24A nisi o matou ne olo ki te tanuga, lavea ake ei ne latou me tonu eiloa te mea tela ne fai mai ei fafine; i te mea e seki lavea ne latou a ia.”
25Ne fai atu a Iesu ki a laua, “Tino va'lea mo te fui talitonu ki mea katoa ne fai mai ei pelofeta. 26E se 'tau la o logo'mae a te Keliso i mea pena, e ulu atu ei a ia ki tena 'malu?” 27Ne fakamatala ne Iesu ki a laua a mea katoa ne tusi ki a ia i Tusi, mai i a Mose mo pelofeta katoa.
28Ko pili atu latou ki te fa'kai tela e olo ki ei, ka ko Iesu e pela eiloa me fano. 29Ne taumafai atu laua ke 'nofo latou, a la muna, “Ke 'nofo tatou; me ko pili mai te po.” Fanatu ei a ia ke 'nofo mo laua. 30I te 'kaiga a latou, ne puke a Iesu ki te falaoa, ko fakafetai, ko tofitofi, kae avatu ki a laua. 31'Pula ake ei o la mata, matea ei ne laua me ko Iesu, fakagalo ei a ia mai o la mata. 32Ne fepeiaki a la muna penei, “E seki lagona eiloa i o ta loto ana muna ne fai mai ki a taua i te alatu, kae fakamatala mai te Tusi ki a taua?”
33Ne 'tu fakavave ki luga kae foki ki Ielusalema, maua atu ei ne laua a te tinoagafulu mo te tokotasi, e maopoopo fakatasi mo nisi tino i kona. 34Olotou muna, “Ko toetu eiloa te Aliki, me ne fakaasi foki a ia ki a Simona.” 35Kae ne fakamatala foki ne laua a mea kola ne 'tupu i te alatu, i te la mateaga a Iesu ne tofitofi ne ia a te falaoa.
Ko Fakaasi a Iesu ki Apositolo
(Mata 28.16-20; Male 16.14-18; Ioa 20.19-23; Galu 1.6-8)
36Ka koi tala atu ne laua a mea konei, e 'poi eiloa i a Iesu ko tu i loto i a latou, ana muna, “Ke i a koutou te filemu.”#24.36: I nisi lomiga e se sae iei ana muna kia latou, “Ke ia koutou te filemu.”
37Ko oko eiloa i te lotou polepole mo te mataku, me ne leake eiloa me se aitu ne olotou mateagina. 38Kae ne fai atu a ia ki a latou: “Ai a e manavase ei koutou? Ai a e masalosalo ei koutou? 39Kilo mai ki oku lima mo oku vae, me ko au eiloa tenei! Puke mai ki a au, ka matea ei ne koutou i te aitu e seai ne ona 'kano mo ona ivi, ka ko au e isi.” 40Ne faipati a ia kae fakaasi atu foki ona lima mo ona vae.#24.40: I nisi lomiga e seai iei se foaitau e 40. 41Ne seki talitonu eiloa latou, me ko oko eiloa i te lotou fiafia mo te ofo; fesili atu ei ki a latou penei: “E isi ne otou mo meakai?” 42Tuku mai ei ne latou a mo ika tunupaku, 43tela, puke ei ne ia kae kai i olotou mua.
44Ne fai atu foki a ia, “Ko aku muna eiloa konei ne fai atu ki a koutou, ka koi 'nofo tasi tatou; ko te mea ke taunu katoa ki a au a mea kola ne tusi i te Tulafono a Mose, mo tusi a pelofeta pela foki mo te tusi o Salamo.” 45'Tala ei ne ia olotou mafaufau ke maina i Tusi. 46Muna atu ei a ia ki a latou: “Tenei te mea ne tusi: me e 'tau o logo'mae te Keliso, kae ka toetu mai tino 'mate i te tolu o aso. 47Ko te mea ke folafola atu te salamo mo te fakamagaloga o agasala, ki fenua katoa i tena igoa, e kamata i Ielusalema. 48A koutou ko molimau i mea konei. 49#Galu 1.9-11 Kae ka tuku atu ne au ki a koutou a te mea tela ne fai feagaiga mai ei toku Tamana. Kae e 'tau mo koutou o fakatalitali i te fa'kai, ki te oko atu o te mana mai luga ki a koutou.”
Ko Fanake a Iesu ki te Lagi
(Male 16.19-20; Galu 1.9-11)
50Ne takitaki ne ia latou ki tua o te fa'kai ke oko ki Petania, ne sisi ake ona lima, kae fakamanuia atu ki a latou. 51Ka koi fakamanuia atu a Iesu ki a latou, kamata ei o masagi ake mai i a latou o fanake ki te lagi.#24.51: I nisi lomiga e seai iei kae ne avake a i a ki te lagi. 52Ne tapuaki latou ki a ia, kae ne 'foki ki Ielusalema mo te fiafia lasi, 53kae ne 'nofo faeloa latou i te Fale Tapu o 'viki ki te Atua.
Trenutno odabrano:
LUKA 24: Tusi Tapu
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tuvalu Revised Bible © Bible Society in the South Pacific
