তৌরাত ১: পয়দা নামা 7
7
দুনিয়াইত গজবি বান
1আর মাবুদে নুহরে কইলা, “তুমি আর তুমার পরিবারর হকল আইয়া জাজো উঠবায়। আমি দেখিয়ার ই জমানার মানষর মাজে তুমিউ খালি দীনদার। 2তুমি হালাল জানুয়ার অকল থাকি নর-মেদি মিলাইয়া সাত জুড়া করি আর হারাম জানুয়ার থাকি এক জুড়া করি তুমার লগে লইও। 3আছমানো উড়রা পাখির মাজ থাকি নর-মেদি মিলাইয়া সাত জুড়া করি লইও। দুনিয়ার মাজে এরার বংশ বাচানির লাগি ইখান করিও। 4আমি সাত দিন বাদে দুনিয়াইর উপরে চাল্লিশ দিন চাল্লিশ রাইত একলাগারে মেঘ দিমু, আর হকল জানদাররে দুনিয়া থাকি খতম করমু।” 5মাবুদর হুকুম মাফিক নুহে হকল কাম করলা।
6বইন্যা শুরুর সময় নুহর বয়স আছিল ছয়শো বরছ। 7বইন্যা থাকি বাচার লাগি নুহ, তান বিবি, তান পুয়াইন আর পুয়াইন্তর বউরে লইয়া জাজো গিয়া উঠলা। 8-9আল্লার হুকুম মাফিক হালাল-হারাম জানুয়ার, পাখি, বুকে চলরা জানদারর নর-মেদি মিলিয়া জুড়া জুড়া অইয়া নুহর গেছে আইয়া জাজো হামাইলা। 10অউ সাত দিন বাদে দুনিয়াইত বইন্যা অইলো।
11নুহর ছয়শো বছরর সময় দুছরা মাসর সতরো তারিখ পাতালর হকল পানি বার অইতো লাগলো, আর আছমান যেনু ফাটি গেল। 12চাল্লিশ দিন চাল্লিশ রাইত দুনিয়াইর উপরে মেঘ অইলো। 13যেদিন মেঘ শুরু অইলো, ইদিন নুহ, তান বিবি, তান পুয়াইন সাম, হাম, ইয়াফেত আর তারার বউ অকলও জাজো আইয়া উঠলা। 14তারার লগে জুড়া জুড়া করি হকল জাতর জংলি জানুয়ার, পালা হেমান, মাটির মাজে বুকে চলরা জানদার, পাখি আর ডাখনা আলা হকলতাও উঠলা। 15দম ফালাইয়া বাচে ইলা হকল জাতর জানদার নুহর গেছে আইয়া জাজো উঠছিল। 16আল্লার হুকুম মাফিকউ নর-মেদির জুড়া মিলিয়া তারা উঠছিল। এরবাদে মাবুদে জাজর দুয়ার বন্দ করি দিলা।
17চাল্লিশ দিন ধরি দুনিয়াইত পানি বাড়তেউ থাকলো। পানি বাড়ি যাওয়ায় জাজখান মাটি থাকি উপরে ভাইয়া উঠলো। 18বাদে পানি খুব বাড়লো আর জাজখান পানির উপরে চলাচল করলো। 19আর পানি বাড়তেউ থাকলো। এরলাগি যেনো যতো বড় বড় পাহাড় আছিল, হক্কলতা বুড়ি গেল। 20হকল পাহাড়-পর্বত বুড়িয়া পানি আরো পনরো আত উপরে উঠলো। 21আর দুনিয়াইত চলরা হকল জানদার, মানি পাখি, পালা হেমান, জংলি জানুয়ার আর পাল বান্দিয়া ঘুররা হকলতা, মানষর লগে বিনাশ অইগেল। 22মাটির উপরে যতো রকমর যতো জানদার দম ফালাইয়া বাচে ইতা হকলতাউ মরিগেল। 23আল্লায় অউ নমুনায় জমিনর হকল জানদার দুনিয়াইর উপর থাকি ফুছিলাইলা। এতে মানুষ, জানুয়ার, বুকে চলরা জানদার আর আছমানর পাখি দুনিয়াই থাকি ছাফ অইগেল। খালি নুহ আর তান লগে যারা আছিল, তারাউ বাচিয়া রইলা। 24দুনিয়া দেড়শ দিন পানিত বুড়াইল রইলো।
Trenutno odabrano:
তৌরাত ১: পয়দা নামা 7: sylB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Ahle Kitab Society. All rights reserved.