約翰 7
7
耶穌㧯厥老弟
1事後，耶穌在加利利省來來去去，無愛去猶太地區，因為猶太人个領袖想愛殺害佢。 2猶太人个搭寮仔節會到了， 3所以耶穌个老弟㧯佢講：「你愛離開這位，去猶太，好俾若學生看你所行个奇事。 4人愛出名，就毋好在暗中做事。你既然能行這兜奇事，就應該在世人面前表現出來！」 5(原來連厥老弟也無信佢。)
6耶穌對佢等講：「你等隨時盡方便；總係𠊎个時機還吂成熟。 7世人毋會怨恨你等，總係會怨恨𠊎，因為𠊎常常指證佢等个作為係邪惡个。 8你等自家去過節，𠊎這下毋去 #7:8 「𠊎這下毋去」有兜古卷係「𠊎毋去」。，因為𠊎个時機還吂成熟。」 9耶穌㧯佢等講這兜話以後，還係留在加利利。
耶穌過搭寮仔節
10耶穌个老弟去過節以後，耶穌也跈等去。佢毋係公開去，係暗中去个。 11節期中，猶太人个領袖逐所在尋耶穌，緊問：「佢在㖠位？」
12眾人為到佢議論紛紛；有兜講：「佢係一個好人！」有兜講：「毋係！佢在煽動眾人。」 13總係大家毋敢公開談論佢，因為佢等驚猶太人个領袖。
14節期過掉一半，耶穌就上去聖殿教訓人。 15猶太人个領袖感覺盡奇怪，講：「這個人無受麼介教育，樣會恁有學問啊？」
16耶穌講：「𠊎个教示毋係𠊎自家个，係對該差𠊎个上帝來个。 17人若係決心愛行上帝个旨意，就會知𠊎个教示係對上帝來个，抑係照𠊎自家个意思講个。 18照自家个意思講話个，係想愛榮光自家；唯有想愛榮光該差佢來个，正係真實無虛假个人。 19摩西毋係將法律交給你等嗎？總係你等無一儕遵守法律。你等做麼介想愛㓾𠊎呢？」
20眾人回答講：「你被鬼附身了！麼人想愛㓾你哪？」
21耶穌講：「𠊎在安息日行一個神蹟，你等全部看做怪事。 22摩西吩咐你等行割禮 (其實割禮毋係對摩西，係對先祖開始个)，你等就在安息日為人行割禮。 23若係人在安息日行割禮，目的係維護摩西个法律，恁樣，𠊎在安息日使一個人完全恢復健康，你等做麼介責備𠊎呢？ 24毋好照外表斷是非，愛照公當个標準來判斷正著。」
耶穌係毋係基督
25有兜耶路撒冷人講：「這個人敢毋係佢等想愛㓾个嗎？ 26你看，佢公開講話，卻無人出來反駁佢！敢講𠊎等个領袖確認佢就係基督嗎？ 27事實上，基督出現个時，無人會知佢係對㖠位來个，總係這個人个來歷𠊎等非常清楚。」
28當時，耶穌在聖殿底背教訓人，佢大聲宣告講：「你等正經認識𠊎，知𠊎對㖠位來嗎？𠊎來，並毋係照自家个意思。該『差𠊎來个』係真實个。你等毋認識佢， 29總係𠊎認識佢；因為𠊎對佢該位來，係佢差派𠊎。」
30佢等就想愛捉佢，總係無人下手，因為佢个時機還吂到。 31眾人當中也有好多人信佢；佢等講：「基督來个時，會比這個人行還較多个神蹟嗎？」
派警衛去捉耶穌
32法利賽人聽到眾人恁樣紛紛議論耶穌个事，佢等㧯祭司長就派警衛去捉耶穌。 33耶穌講：「𠊎還有多少仔時間同你等共下，然後愛倒轉『差𠊎來个』該位去。 34你等會尋𠊎，總係尋毋到；因為𠊎愛去个所在，你等做毋得去。」
35該兜猶太人个領袖彼此問講：「這個人想愛去㖠位，使𠊎等尋佢毋到呢？敢講佢愛到分散在希臘人中个猶太僑民該位去，教希臘人係麼？ 36佢講『你等會尋𠊎，總係尋毋到』又講『𠊎愛去个所在，你等做毋得去』，這個話係麼介意思呢？」
生命水个江河
37節期个最尾一日，就係最莊嚴个一日，耶穌企起來，大聲宣告講：「人若係嘴燥，就應該到𠊎這位來啉。 38信𠊎个人，照聖經所講 #7:37-38 「人若係嘴燥…所講」抑係譯做「人若係嘴燥，就應該到𠊎這位來；信𠊎个人，就應該來啉。照聖經所講」。：『對厥內肚會有江河流出生命个水。』」 39耶穌這個話係指信佢个人所愛接受个聖靈講个。該時聖靈吂有降臨，因為耶穌還吂得到榮光。
眾人為到耶穌紛爭
40眾人當中有盡多人聽到這個話，就講：「這個人確實係該先知！」
41也有人講：「佢係基督！」
總係有人講：「基督樣會對加利利來？ 42聖經敢毋係記載，基督係大衛个後代，愛降生在大衛个本鄉伯利恆嗎？」 43眾人就為到耶穌紛爭。 44有兜人想愛捉佢，總係無人下手。
猶太人个領袖毋信耶穌
45該兜警衛倒轉去見祭司長㧯法利賽人；佢等問：「做麼介無將佢帶轉來呢？」
46該兜警衛應講：「從來吂識有人像佢恁樣講話个！」
47法利賽人講：「你等也被佢騙走係麼？ 48𠊎等个領袖抑係法利賽人敢有信佢个嗎？ 49這兜無明白摩西法律个百姓係受咒詛个！」
50佢等當中有尼哥德慕，佢以前識去見耶穌。佢提醒佢等，講： 51「照𠊎等个法律，吂審問抑係查明人所做个事，敢做得定佢个罪嗎？」
52佢等講：「敢講你也係加利利人嗎？你去查聖經看，就知加利利毋會出先知。」
Trenutno odabrano:
約翰 7: THV12Hdb
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© The Bible Society in Taiwan, 2012
All rights reserved
© 台灣聖經公會版權所有 2012
