Lia Uluk Fohon 9
9
Maromak namate menon no Noh
1Hotu, Maromak natuun matak-malirin baa Noh no oan sia nodi katak naꞌak, “Emi hahoris bea hakonu hikar raiklaran neꞌe. 2Osa no lotuk no manu ai leten no naꞌan tasi wee laran, hotu-hotu atu nataꞌuk emi. Emi mak babilan sia. 3Emi bele haa siakaan naꞌan. Emi moos bele haa ai fuan nosi ai horis sia. Neꞌe sia hotu-hotu, Haꞌu klatan baa emi.
4Mais, emi la bele haa siakaan naꞌan kalo sei noo raan, tan sia moris nosi raan nia. 5-6Haꞌu kaseꞌi ema tuir Haꞌukaan ilas. Tan lia nia, la bele hoꞌo ema. Kalo ema ida noꞌo ema, musti ukun mate nia. Kalo osa no lotuk sia noꞌo ema, musti hoꞌo. Ukun neꞌe, nosi Haꞌu. 7Emi musti hahoris bea hakonu hikar raiklaran neꞌe.”
8Hotu, Maromak katak tenik naꞌak, 9“Oras neꞌe, Haꞌu atu kamate menon ko emi no emikaan husar-binan! 10Mamenon neꞌe moos kona baa hotu-hotu mak moris. Neꞌe mak, osa no lotuk mak hakiak, mak fuik no manu ai leten sia. Mamenon neꞌe kona baa sa-saa hotu-hotu mak sai namutuk no emi nosi roo nia. 11Mamenon nia nuneꞌe: Haꞌu la katuun tenik motasaꞌe boot ona atu kabeꞌo dodok raiklaran neꞌe no sa-saa mak moris.
12-13Haꞌu ktau Haꞌukaan baur iha laleꞌan dadi baa tadak, nebee emi bele hatene Haꞌukaan mamenon la nakotu baa emi no baa sa-saa mak moris iha raiklaran neꞌe. 14-17Kalo kaloꞌan saꞌe iha laleꞌan, hotu baur tubu, baur nia foo natene baa Haꞌu naꞌak, Haꞌu kameno tiꞌan, motasaꞌe boot la bele nabeꞌo dodok tenik sa-saa mak moris. Baur nia moos dadi tadak naꞌak, Haꞌu kamate menon tiꞌan ko emi no sa-saa hotu-hotu mak moris.”
Noh lanu
18Noh oan sia mak sai mai nosi roo, sia mak Sem, Yafet no Ham (Ham nia, Kanaꞌan aman). 19Ema hotu-hotu iha raiklaran neꞌe husar-binan mai nosi Noh oan naꞌin tolu nia.
20Noh nia, ema mafaho rai. Nia mahalo toꞌos anggor uluk fohon. 21Baa dala ida, Noh nemu anggor toꞌo lanu todan. Nia kolu tais, toba nakwalan iha batane laran. 22Ham naree nola aman nakwalan nunia, nia moos nalai sai baa katak maun Sem no Yafet. 23Sem no Yafet nola tais ida, hotu felar nodi sakat baa siakaan baas. Hotu, sia laꞌo nakiduk, tama baa batane laran, nafuꞌut siakaan aman. Sia nalo nunia, nebee sia duꞌuk la naree aman nakwalan. Hotu, sia sai.
24Noh oin moo tiꞌan, foin natene nola oan ikun hahalok. 25Hotu nia katak naꞌak, “Hoi Ham, Kanaꞌan aman! Haꞌu kastikar o! O atu dadi baa okaan maun sia atan.
26Nebee MAROMAK atu natuun matak-malirin baa Sem!
Mais o oan Kanaꞌan atu dadi baa Sem atan.
27Nebee Maromak naluan Yafet rain.
Niakaan husar-binan moris dame no Sem husar-binan.
Mais, o oan Kanaꞌan atu dadi baa Yafet atan.”
28Motasaꞌe hotu tiꞌan, Noh sei moris tinan atus tolu lima nulu tenik. 29Otas tinan atus siwi lima nulu, foin Noh mate.
Trenutno odabrano:
Lia Uluk Fohon 9: tetNTPO
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2013, Wycliffe Bible Translators, Inc. All rights reserved.