Mateo 24
24
Is Egkeuma he Menge Pesipala
(Mateo 24:1-28; Marcos 13:1-23; Lucas 21:5-24)
1Ne migawas si Jesus puun dutun te Valey te Megbevayà. Ne te ked-awè din dutun, mid-uvayan sikandin te menge sumusundan din su ibpeehè dan kandin is Baley te Megbevayà wey is menge valey he ziyà te uvey zutun. 2Ne migkag̵i kandan si Jesus te, “Tengtengi niw heini is langun su egkeg̵iyen ku keniyu he heini is menge vatu he imbevaley zan kayi, wazà minsan sevaha keuzemà he ebpekeuntud diyà te sevaha su egkewag̵ey heeyan is langun.”
3Ne netegteg̵aad dutun mibpinuu si Jesus diyà te vuvungan he egngezanan te Ulivuwan. Ne mid-uvayan en maan sikandin te menge sumusundan din te wazè dan duma su iyan dan dà. Ne ke sikandan te, “Keg̵iyi key ke keenu egkehitavù heini is langun, wey ke hengkey is egkeulaula he tuus wey zey metueni he iyan en kedlikù nu wey kegketapus kayi te timpu?” 4Ne midtavak si Jesus te, “Andam kew wey kenè kew mekesundan te teruen he etew. 5Su mezakel is ebpenlepew he egamit te ngazan ku ne egkag̵i is kada sevaha zutun he iyan sikandin sikan is mibpilì te Megbevayà he ibpahadì! Ne mezakel is ebpeketuu te menge tarù dan. 6Egkezineg niw ziyà te uvey niw is meg̵urub tenged te g̵ira ne egkezineg niw zaan is tudtul te menge g̵ira ziyà te meziyù he tanà. Iyan, kenè kew mahandek su kinahanglan he egkeulaula is iring kayi te kenè pa edtepusen heini is timpu. 7Ebpekidtebek is sengeinged te zuma zin he inged; ne egira is sengeg̵inhedian te zuma zin he g̵inhedian. Egkehitavù is bitil wey menge linug diyà te minsan hendei. 8Iyan, heini he egkehitavù, ne iring te ed-anak he sikan pa ebpuunà is belilit din.
9Egkuntedahan kew te tivuuk he menusiyà tenged te menge sumusundan ku sikiyu. Ne edekepen kew te menge etew ne ibpalad kew zan diyà te edrasey keniyu ne is duma keniyu edhimetayan dan. 10Dutun he timpu, mezakel is egkepenulayan ne ibpalad te kada sevaha zutun is duma zin he tumutuu wey mehimetayi ne ebpekunkuntedehè dan. 11Ne zutun ebpemenlepew is mezakel he teruen he etew he egkag̵i is uman sevaha kandan he ebpeneuven sikandin te Megbevayà. Ne mezakel is egkelimbungan dan. 12Ne tenged te kebpekeeneb te kelelalung te menusiyà egkeawà diyà te g̵ehinawa te kezekelan dutun is kebmahala zan te zuma zan. 13Iyan, sikan is kemulu pa edtuu ke egkeuma haazà is ketepusan te menge kemeresayan, iyan ebeg̵ayan te untung he wazè din pidtemanan. 14Ne idsangyew ziyà te tivuuk he kelibutan heini is Meupiya he Tudtulanen te keag̵i te kedhadì te Megbevayà wey metueni heini te tivuuk he menusiyà. Ne emun egkepasad en haazà ne iyan en ketepusan.
15Si Daniel, sikan is ebpeneuven te Megbevayà dengan, netagnè din is egngezanan te melimezang he ebpekekaid. (Is ebpekevasa kayi te netagnè din, kinahanglan he sevuta zutun te nekevasa haazà is nevasa zin.) Ne emun egkeehè niw he ziyè en heini ebpekehitindeg te Valey te Megbevayà, 16mebpelag̵uy zan is diyà te prubinsya he Hudiya pehendiyà te menge vuvungan. 17Sikan is etew he egkeserengà diyà te g̵awas te valey zin, kenè en med-usik-usik pa te timpu te kedseled diyà te valey he egkuwa te minsan hengkey te azen din. 18Sikan is etew he ziyà egkeserengà te pemuleey zin, kenè en med-ulì te kegkuwa te malung din. 19Ne zutun he andew, kehizu utew te menge vahi he memeg̵ingey wey ebpemenleg̵imu su utew zan egkengereg̵enan he ebpelag̵uy! 20Hamen kew he ed-ampù diyà te Megbevayà he kenà heini meserengà is kebpelag̵uy niw zutun te timpu te meg̵enew wey zutun te Andew te Kedhimeley. 21Su utew mepait is kemeresayan dutun he timpu. Wazè pa meulaula is iring kayi puun pa te kedlimbag̵a te kelibutan. Ne emun egkehitavù heini kenè en maan egkehitavù is iring din te minsan keenu. 22Iyan, midterinan en te Megbevayà is timpu zutun te kemeresayan su emun wazà, egkelimas dutun is tivuuk he menusiyà. Iyan, tenged te egkehizuwan din is menge pinilì din he etew, midterinan din is timpu zutun te kemeresayan.
23Ne ke zuen egkag̵i ziyà te keniyu te, ‘Ahaa niw; heini en is hadì he mibpilì te Megbevayà,’ wey ke zuen be egkag̵i te, ‘Heeyan en sikandin,’ kenè kew mebpemineg dutun te egkag̵i. 24Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà. 25Kenè niw heini lipati su mibpetizeenan ku sikiyu he zaan.
26Ne emun duen egkag̵i te, ‘Ahaa niw, su is hadì he mibpilì te Megbevayà, diyè en sikandin te tanà he wazà duen ed-ubpà he etew,’ ne haazà is etew he egkag̵i, kenè niw pemineg̵a. Ne emun duen daan egkag̵i te, ‘Kayi sikandin med-eles,’ haazà is egkag̵i, kenè niw zaan tuuwi. 27Su siak is Kakey te Menusiyà, iring is kedlikù ku te kilat he idtik-ew ibmerayag te tivuuk he langit puun te edsilaan pehendiyà te edsenlepan. Egkeahà heini te langun.
28Iyan, ke hendei is egkemahù, kenà egkehimu he kenà dutun daan is menge uwak he edhurun, he ke và dà egkeg̵iya, kenà egkehimu he kenà egkehitavù heini is langun.
Is Kedlikù ni Jesus
(Mateo 24:29-44; Marcos 13:24-37; Lucas 21:25-33)
29Ne emun egkeiwas haazà is timpu te kemeresayan, kenè en edsilà is andew ne kenè en daan ed-anlag is bulan. Egkengeulug is menge vituen diyà te langit, ne egkengewaleng is menge kedesenan diyà te hewhewanan. 30Ne zutun, siak is Kakey te Menusiyà, egkeahà diyà te langit is tuus te kebpekeuma ku. Ne zutun utew egkengeseeng is langun he menge etew zini te kelibutan. Ne egkeehè e zan is Kakey te Menusiyà diyà te menge g̵apun su ebpekeuma a. Ne utew zekelà is gehem ku wey utew merayag is ked-anlag ku. 31Ne zutun edsug̵uen ku is menge velinsug̵uen ku ziyà te heepat he pesag̵i kayi te kelibutan ne ibpezag̵ing is budyung ne edtig̵umen dan is menge pinilì ku he etew he ebpemuun diyà te minsan hendei kayi te tivuuk he kelibutan.
32Isipa niw is ibpenurù ku keniyu pinaag̵i te sempità he kayu he igira. Dini te kenita, emun ebpeneringsing en is subpang dutun he kayu ne ebpenlumbey en, egketuenan ta he meg̵aan en is gulavung. 33Iring din ded daan, emun egkeehè niw he egkengetuman en is langun kayi te migkag̵i ku, egketuenan niw he meg̵aan a ebpekelikù. 34Tenuzi niw is egkeg̵iyen ku keniyu: emun egkeehè niw he egkengetuman en heini kenè kew pa egkeamin ebpatey taman te kenè pa egkengetuman heini is langun. 35Egkehanew is langit wey tanà, iyan, heini is migkag̵i ku, kenà mulà egkehanew te minsan keenu.
36Is Amey tew he Megbevayà, iyan dà nesayud ke keenu egketuman heini is langun. Ne g̵awas kandin wazè en nesayud te andew wey uras ke keenu heini egkehitavù. Is menge velinsug̵uen te Megbevayà diyà te langit, wazè dan mesayud, wey minsan siak is Anak te Megbevayà, wazà a zaan mesayud. 37Ne siak is Kakey te Menusiyà, keuzemà te timpu te kedlikù ku zini te kelibutan, ebpekeiring is menge ulaula te menge etew zutun duen te menge ulaula zengan te menge etew zuen te timpu ni Noe. 38Su te wazè pa medlapey is dag̵at, wazà diyà te isip dan ke hengkey is egkehitavù. Iyan dà neisip te menge etew is kegkebibu ne migkaan dan ne mid-inum dan ne mibpees-eseweey zan taman te midseled en si Noe te zekelà he avang he egngezanan te arka. 39Ne wazà diyà te isip te menge etew sikan is egkehitavù kandan taman te midlapey is dag̵at ne nengelened sikandan. Ne iring ded dutun keg̵aan is kegketik-ew te kedlikù ku te Kakey te Menusiyà keuzemà. 40Dutun he timpu zuen dezuwa he maama he ziyà te pemuleey su edterebahu; egkuwaan te menge velinsug̵uen ku is sevaha zutun ne egketag̵ak is sevaha. 41Ne zutun duen daan dezuwa he vahi he ebpeug̵upà te kebpenggaling; ne egkuwaan te velinsug̵uen ku is sevaha ne egketag̵ak is sevaha. 42Purungpurung kew su kenè niw egketuenan ke keenu he andew is kedlikù ku te Nengazen niw. 43Kenè niw heini lipati he emun egketuenan te teg̵ig̵aked te valey ke keenu ebpekeuma is tekawen dutun te valey zin, ne kenà sikandin edlipezeng. Ne zutun, kenà egkeselezan te tekawen haazà is baley. 44Iring din ded daan, layun kew andam su ebpekeuma a is Kakey te Menusiyà te uras he kenà a keniyu ebperetengen.
Is Menge Sulug̵uen
(Mateo 24:45-51; Lucas 12:41-48)
45Sikan is sulug̵uen he uluwanen wey metinumanen, iyan ibpevayàbayà te egalen din te menge zuma zin he sulug̵uen. Ne iyan ebpekaan te menge zuma zin he sulug̵uen dutun te uras te kegkaan. 46Emun ed-ulì haazà is egalen din, utew zekelà is kelipey zutun te sulug̵uen ke egkeahà te egalen din he midtuman din en is langun he ebpeveelan kandin. 47Egkeg̵iyen ku keniyu he is sulug̵uen he metinumanen, idsarig kandin is langun he menge azen te egalen din. 48Iyan, kehizu zin ke iyan diyà te isip din is egkeug̵et pa ed-ulì haazà is egalen din, 49ne ebpemug̵elen din is menge zuma zin he sulug̵uen; ne egkaan wey ed-inum duma te menge lelenguten. 50Su zutun he andew te wazè din peebuta wey zutun te uras he wazè din metueni, ebpekeulì haazà is egalen din. 51Ne haazà he sulug̵uen, edsilutan sikandin dutun te egalen din ne ebeelan diyà te kandin is iring te ebeelan daan diyà te menge etew he tarù is kedtuu zan. Ne zutun ebpekekulahì sikandin ne ebpekengingitel tuus te utew zin kebpekedsendit.”
Trenutno odabrano:
Mateo 24: mbbNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2001, Wycliffe Bible Translators, Inc., All rights reserved.
