Luka 22
22
Kiseto cha kumkoma Yesu
(Matayo 26:1-5; Maluko 14:1-2; Yohana 11:45-53)
1Kipindi cha Nyimwilinyimwili ya Magate hagageligwe Hamila, kikemigwe Pasaka kikala behi. 2Wakulu wa walava nhosa na wafundiza Malagizo ga Musa wakala ozahila nzila ya kumkoma Yesu, lakini wawadumba wanhu.
Yuda kotogola kumuhinduka Yesu
(Matayo 26:14-16; Maluko 14:10-11)
3Mwenembago kamkumba Yuda Isikaliote, imoja wa wanahina longo na wabili. 4Yuda kachola kwa wakulu wa walava nhosa na wakulu wa wakalizi wa Ng'anda ya Imulungu, kawalongela vija vonda yamuhinduke Yesu kumwao. 5Nao wadeng'helela na waitogolela kumgwaa sente. 6Yuda katogola, na kasonga kuzahila nzila ya kumgela Yesu mmakono gao kwa kinyelegezi.
Yesu koitanda kuja ndiya ya Pasaka
(Matayo 26:17-25; Maluko 14:12-21; Yohana 13:21-30)
7Siku ya Magate hagageligwe Hamila ivika. Siku ayo bofu da ng'hondolo da Pasaka dolavigwa nhosa. 8Avo Yesu kawatuma Petulo na Yohana, kawalongela, “Choleni mkatutandile ndiya ya Pasaka tuje.”
9Nao wamuuza, “Kolonda tukakutandile kwahi indiya ya Pasaka?”
10Yesu kawedika, “Mwahengila kudibuga, mnzila momting'hana mbigalo yapapile nongo ya mazi. Mkwelelezeni mbaka mng'anda yonda yengile, 11na mulongeleni mwenekae, ‘Mfundiza kokuuza, dakwahi gati dondanidile ndiya ya Pasaka niye na wanahina zangu?’ 12Nayo kowalagusila gati kulu da uchanha dihambigwe, mumo mtutandile kila kinhu.”
13Wasegela wavika kila kinhu kamba vija Yesu viyawalongele, nao watanda ndiya ya Pasaka.
Ndiya ya Mndewa
(Matayo 26:26-30; Maluko 14:22-26; 1 Wakolinto 11:23-25)
14Saa viivikile, Yesu kakala hana indiya na watumigwa zake. 15Kawalongela, “Nisulukila ng'hani kuja ndiya ino ya Pasaka hamoja na mweye ning'hali sinadununzika! 16Avo nowalongela, honda nije kabili mbaka vonda ilawilile Muundewa wa Imulungu.”
17Abaho Yesu kasola kikasi cha divai, kamgwaa nhogolwa Imulungu, kalonga, “Soleni kino mung'wile mose. 18Nowalongela kulawa sambi, honda ning'we divai ino mbaka vonda wize Undewa wa Imulungu.”
19Abaho kasola gate, kamgwaa nhogolwa Imulungu, kadibanzula, kawagwaa, kalonga, “Uno ulo lukuli lwangu, ulavigwe mbuli ya mweye. Tendeni vino kwa kung'humbuka niye.” 20Vivija, viwamambukize kuja indiya ya ichungulo, kawagwaa kikasi, kalonga, “Kino acho kikasi cha lagano da sambi dilagusigwa kwa damu yangu, ikwitika mbuli ya mweye.
21“Lakini, loleni! Munhu yonihinduka kabahano na niye hana indiya! 22Mwana wa Munhu kofa kamba Imulungu viyalondile, lakini kogaya munhu ija yomuhinduka!”
23Abaho wasonga kuiuza, nani viweli yonda yatende vivo.
Kuibamilila mbuli ya ukulu
24Wanahina wakala oibamilila wao kwa wao nani yokoneka munhu mkulu kubanza wose. 25Yesu kawalongela, “Wandewa wa wanhu haweli Wayahudi wana udahi kwa wanhu, vilongozi oikema, ‘Mbwiga wa wanhu.’ 26Lakini kumwenu mweye haili vivo bule, munhu mkulu kumwenu yawe kamba munhu mdodo, na kilongozi yawe kamba msang'hanaji. 27Vino, nani yeli munhu mkulu, ija yakalile mmeza koja, hebu ija yotanda indiya? Ona, ayo ija yakalile mmeza koja. Lakini niye na hagati yenu kamba munhu yosang'hana.”
28“Mweye mukala na niye kipindi chose cha kugezigwa kwangu, 29kamba Tatangu viyanigwelele Undewa na niye nowagwaa Undewa awo. 30Moja na kung'wa mmeza yangu mna Undewa wangu, na mokala mna ivigoda va Undewa kugatawala makabila longo na mabili ga Izilaeli.”
Yesu kolagula kamba Petulo kombela
(Matayo 26:31-35; Maluko 14:27-31; Yohana 13:36-38)
31Yesu kalonga, “Simoni, Simoni! Tegeleza! Mwenembago kampula Imulungu kuwageza mweye, kuwabagula wanogile na wehile, kamba vija mfolaji viyobagula fuya na hemba. 32Lakini nikupulila kwa Imulungu gweye Simoni, ili kumtamanila kwako Imulungu sikukupotele. Na vondaunibwelele, uwagangamize ndugu zako.”
33Petulo kamwidika, “Mndewa, notogola kugodekigwa na gweye mkifungo na kufa!”
34Yesu kalonga, “Petulo, nokulongela ukweli, kilo cha lelo nzogolo yang'hali hanakwika, konibela miyanza midatu.”
Kipindi cha kugaya
35Abaho Yesu kawauza wanahina zake, “Vino, kipindi kija viniwatumile kuno mduhu kibindo hebu mkoba hebu vilatu, muhungukiligwa na kinhu chochose?”
Wamwidika, “Aka, hatuhungukiligwe na kinhu.”
36Yesu kawalongela, “Lakini sambi, munhu yoyose yeli na kibindo, hebu mkoba yausole, na munhu yoyose yelibule panga yakachuuze koti jake yakagule. 37Kwavija nowalongela Maandiko Gang'alile galongile, ‘Kekigwa mdibumbila dimoja na wabananzi,’ golondigwa gavikizwe. Nowalongela, gaja gandikigwe mbuli ya niye golawilila.”
38Wanahina walonga, “Mndewa, lola, hano hana mapanga mabili!”
Nayo kawedika, “Yotosha!”
Yesu kompula Imulungu kuna Ulugongo lwa Mizeituni
(Matayo 26:36-46; Maluko 14:32-42)
39Yesu kasegela kudibuga dija kachola kuna Ulugongo lwa Mizeituni, kamba viyazowele, na wanahina zake wamkweleleza. 40Viyavikile kuko, kawalongela, “Mpuleni Imulungu, sikumwingile mna ukugezigwa.”
41Abaho kawaleka, kachola utali wa kwasa dibwe, kafugama, kampula Imulungu. 42Kalonga, “Tata, wahalonda, unisegesele kikasi kino cha madununzo. Siyo kamba vinilonda niye, lakini kamba viulonda gweye.” 43Msenga wa kuulanga kamulawilila, kamgangamiza. 44Kwa usungu mkulu uyakalile nao kampula ng'hani, mbaka fuguti dimulawa, fuguti jake dikala kamba madwendwe ga damu golagala hasi.
45Viyamambukize kumpula Imulungu, kabwela kwa wanahina zake, kawavika okuluza kwavija wakala wadonhile mbuli ya kunyunyuwala. 46Kawalongela, “Habali mowasa? Lamukeni mumpule Imulungu, sikumwingile mna ukugezigwa.”
Yesu kogogigwa
(Matayo 26:47-56; Maluko 14:43-50; Yohana 18:3-11)
47Yesu viyakalile yang'hali kolonga, lunhu lwa wanhu luvika lulongozigwe na Yuda, imoja wa wanahina zake longo na wabili. Yuda kamcholela Yesu kamulamusa kwa kumnonela. 48Lakini Yesu kamulongela, “Yuda, komuhinduka Mwana wa Munhu kwa kumnonela?”
49Wanahina wakalile hamoja na Yesu viwonile gaja gonda galawilile, wauza, “Mndewa, tuwakanhe na mapanga getu?” 50Imoja wao kambiga kwa panga msang'hanaji wa Mkulu wa walava nhosa na kamkanha digwiti da mkono wa kudila.
51Lakini Yesu kalonga, “Bule sikumutende avo!” Kadikwasa digwiti da munhu ija, kamuhonya.
52Abaho Yesu kawalongela wakulu wa walava nhosa na wakulu wa wakalizi wa Ng'anda ya Imulungu na wavele wezile kumgoga, “Habali, mwiza kungoga kwa mapanga na malungu, kamba nambavi? 53Siku zose ng'hala na mweye Mng'anda ya Imulungu hamngogile bule. Lakini kino acho kipindi chenu cha kusang'hana, muundewa wa ziza.”
Petulo kombela Yesu
(Matayo 26:57-58; Maluko 14:53-54, 66-72; Yohana 18:12-18, 25-27)
54Baho wamgoga Yesu, wengila nayo mng'anda ya mkulu wa walava nhosa. Petulo kamkweleleza kwa kutali. 55Wabwinha moto hagati hana uluwa, wakala hamoja na Petulo kakala hamoja nao. 56Msang'hanaji imoja wa kitwanzi viyamone Petulo kakala aho haumoto, kamulola bunhuu, kalonga, “Vivija munhu ino kakala hamoja na Yesu!”
57Lakini Petulo kabela, kalonga, “Gwee, mtwanzi gwe, simjuwile bule!”
58Hamwande kidogo munhu iyagwe kamona Petulo, kalonga, “Vivija na gweye kwa imoja wao!”
Lakini Petulo kamwidika, “Gwee munhu gwe, siyo niye!”
59Vidibitile saa dimoja, munhu iyagwe kagangamiza ng'hani, “Kweli munhu ino kakala hamoja na Yesu, kwavija nayo mwenekae wa Galilaya!”
60Lakini Petulo kamwidika, “Munhu gweye, sikijuwile kiulonga!”
Bahaja, viyakalile yang'hali kolonga, nzogolo keka. 61Mndewa kahinduka, kamulola Petulo, nayo Petulo kakumbuka Mndewa viyamulongele, “Kilo cha lelo nzogolo yang'hali hanakwika, konibela miyanza midatu.” 62Petulo kalawa kunze kalila kwa usungu.
Yesu kozehigwa na kutowigwa
(Matayo 26:67-68; Maluko 14:65)
63Wanhu wakalile omkaliza Yesu, wakala omzeha na kumtowa, 64viwamgubike gameso wamuuza, “Lagula! Nani yakutowile?” 65Vivija walonga mbuli ziyagwe nyingi za kumuliga.
Yesu kogaligwa mkitala
(Matayo 26:59-66; Maluko 14:55-64; Yohana 18:19-24)
66Imitondo yake, wavele, wakulu wa walava nhosa na wafundiza Malagizo ga Musa waiting'hana hamoja na Yesu kagaligwa mkitala acho. 67Walonga, “Tulongele! Vino, gweye ayo Kilisito Mkombola?”
Yesu kawedika, “Nahawalongela, honda munitogole bule, 68na nahawauza mbuli, honda mwidike bule. 69Lakini kusongela sambi, Mwana wa Munhu kokala muukulu mwambu wa mkono wa kudila wa Imulungu yeli na Udahi.”
70Wose walonga, “Vino gweye kwa Mwana wa Imulungu?”
Yesu kawedika, “Vivo vimulonga.”
71Walonga, “Hatulonda usindila uyagwe! Siye wenyego tumuhulika viyalongile!”
Trenutno odabrano:
Luka 22: King'hutu
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
NT: © 2014 Pioneer Bible Translators and The Word for the World
OT: © 2019 Pioneer Bible Translators
