Luka 18
18
Lusimo lwa mgane na msemi
1Abaho Yesu kawafundiza wanahina zake kwa lusimo kamba siku zose olondigwa kumpula Imulungu na sikuwadonhe. 2Kalonga, “Kudibuga dimoja kukala na msemi yakalile hamdumba Imulungu hebu kuwatonga wanhu. 3Vivija kudibuga dijo, kukala na mgane imoja yakalile komgendela msemi ayo baho kwa baho, kampula, ‘Ngwelele haki yangu kulawa kwa munhu yanitendele gehile.’ 4Siku nyingi msemi ayo hamtegeleze mgane ayo, lakini kumwande kailongela, ‘Hata kamba simdumba Imulungu hebu kuwatonga wanhu, 5lakini kwavija mgane ino konigaza, nomgwaa haki yake, kwavija nahaleka, kogendelela kwiza hano na kunigaza!’ ”
6Abaho Mndewa kagendelela kulonga, “Tegelezeni kiyalongile msemi ija yehile. 7Vino, Imulungu honda yawagwee haki wanhu zake yawasagule, omulilila imisi na ikilo? Vino kokawa kuwategeleza? 8Nowalongela, kowagwaa haki yao himahima. Lakini Mwana wa Munhu vonda yeze, vino kodivika tamanilo mwiisi?”
Lusimo lwa Mfalisayo na mbokela kodi
9Abaho Yesu kawalongela lusimo luno wanhu waja wakalile oitapa wanoga na kuwabeza wayagwe. 10“Kukala na wanhu wabili wacholile kumpula Imulungu kuna Ing'anda ya Imulungu. Imoja kakala Mfalisayo na iyagwe kakala mbokela kodi.
11“Mfalisayo ayo kainega kumgwazo na kumpula Imulungu, ‘Go Imulungu, nokugwaa nhogolwa kwavija niye sili kamba wanhu wayagwe, wabokaji, otenda gehile, hebu wagoni. Wala sili kamba ino mbokela kodi. 12Niye nofunga kuja miyanza mibili mzisiku saba, na nolava fungu da longo da vinhu vangu vose vinipata!’
13“Lakini ija mbokela kodi kema kutali, hadahile hata kwinula meso gake kuulanga, lakini kaitowa mhambaga yake kwa usungu, kalonga, ‘Go Imulungu, nyonele bazi, niye na mwene nzambi!’ 14Nowalongela, mbokela kodi ija kachola ukae kumwake kuno katendigwa kanoga mgameso ga Imulungu kubanza ija Mfalisayo. Kwavija wose oitenda wanhu wakulu ohumulusigwa, na waja oihumulusa otendigwa wanhu wakulu.”
Yesu kowatambikila wana wadodo
(Matayo 19:13-15; Maluko 10:13-16)
15Wanhu wayagwe wamgalila Yesu wana wadodo yawekile makono. Wanahina viwone avo, wawakomhokela. 16Lakini Yesu kawakema iwana, kalonga, “Walekeni wana wadodo weze kumwangu, sikumuwagomese, kwavija Undewa wa Imulungu wa wanhu kamba wano. 17Nowalongeleni ukweli! Munhu yoyose yolema kuubokela Undewa wa Imulungu kamba mwana mdodo, honda yengile ng'o!”
Munhu tajili
(Matayo 19:16-30; Maluko 10:17-31)
18Mkulu imoja kamuuza Yesu, “Mfundiza Unogile, nhende choni niupate ugima wa milele?”
19Yesu kamuuza, “Habali kong'hema, ‘unogile’? Kuduhu yanogile, ila Imulungu yaiyeka. 20Kugajuwa Malagizo, ‘Sikuutende ugoni, sikuukome, sikuwibe, sikuulonge uvizi, wategeleze tatako na mamako.’ ”
21Munhu ija kedika, “Gago gose nigagoga toka haudodo.”
22Yesu viyahulike avo, kamulongela, “Kuhungukiligwa na kinhu kimoja. Chuuza vose viulinavo, uwagwee sente wanhu wakiwa, na gweye kokuwa na ngama yako kuulanga. Abaho wize unikweleleze.” 23Lakini munhu ayo viyahulike avo, kanyunyuwala kwavija kakala tajili ng'hani.
24Yesu viyamone kanyunyuwala, kalonga, “Vino avo vonda iwe vidala kwa wanhu matajili kwingila Muundewa wa Imulungu! 25Kwavija vibuha kwa ngamiya kubita mna ikizonzo cha sanzia, kubanza tajili kwingila muundewa wa Imulungu.”
26Wanhu wamuhulike, wamuuza, “Avo lelo nani yonda yadahe kukomboligwa?”
27Yesu kawedika, “Vinhu havidahika kwa wanhu, kwa Imulungu vodahika.”
28Abaho Petulo kalonga, “Lola! Siye tuvileka vinhu vetu vose, tukukweleleza gweye.”
29Yesu kawalongela, “Nowalongela kweli, munhu yoyose yoleka kae yake hebu mwehe wake hebu ndugu zake hebu tatake na mamake hebu wanage mbuli ya Undewa wa Imulungu, 30kobokela vinhu vingi ng'hani mna ikipindi kino na kobokela ugima wa milele mna ikipindi chonda kize.”
Yesu kolonga lwa kadatu mbuli ya ifa yake
(Matayo 20:17-19; Maluko 10:32-34)
31Yesu kawagala hamgwazo wanahina zake longo na wabili, kawalongela, “Tegelezeni! Tochola Yelusalemu. Kuko kila kinhu chandikigwe na watula ndagu wa Imulungu mbuli ya Mwana wa Munhu cholawilila. 32Kwavija kogeligwa mmakono ga wanhu haweli Wayahudi, nao omzeha, omuliga, na omtemela mate. 33Omtowa mbalati na kumkoma, lakini siku da kadatu kozilibuka.”
34Lakini wanahina hawazijuwile bule mbuli azo, kwavija wakala wafisigwe na hawakijuwile kija kiyakalile yokilonga Yesu.
Yesu komuhonya msuwameso
(Matayo 20:29-34; Maluko 10:46-52)
35Yesu viyakalile behi na kuvika Yeliko, munhu imoja yakalile msuwameso kakala hamgwazo mnzila, kopula. 36Munhu ayo viyahulike lunhu lwa wanhu lobita, kauza, “Kuna choni?”
37Wanhu wamulongela, “Yesu wa Nazaleti kobita.”
38Nayo kakemelela, “Yesu! Mwana wa Daudi! Nyonele bazi!”
39Wanhu walongole wamkomhokela, wamulongela yanyamale. Lakini heyo kagendelela kukemelela ng'hani, “Mwana wa Daudi! Nyonele bazi!”
40Avo Yesu kema, kalagiza munhu ija yagaligwe kumwake. Viyavikile behi, Yesu kamuuza, 41“Kolonda nikutendele choni?”
Nayo kamwidika, “Go mkulu, nolonda kulola.”
42Yesu kamulongela, “Lola! Kutamanila kwako kukuhonya.”
43Bahaja munhu ija kadaha kulola, kamkweleleza Yesu kuno komgwaa nhogolwa Imulungu. Wanhu wose viwone avo, wamgwaa nhogolwa Imulungu.
Trenutno odabrano:
Luka 18: King'hutu
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
NT: © 2014 Pioneer Bible Translators and The Word for the World
OT: © 2019 Pioneer Bible Translators
