Luka 15

Lusimo lwa ng'hondolo yapotele

(Matayo 18:12-14)

1Siku dimoja wabokela kodi wengi na wanhu wayagwe otenda nzambi wachola kumtegeleza Yesu. 2Mafalisayo na wafundiza Malagizo ga Musa wasonga kunung'unika, “Munhu ino kowabokela wanhu otenda nzambi na kuja nao!” 3Avo Yesu kawalongela lusimo luno.

4“Vino kamba imoja wenu kana ng'hondolo gana, abaho ng'hondolo imoja kapotela, vino kotenda choni? Kowaleka waja malongo tisa na tisa kuluwala, na kuchola kumzahila ija yapotele mbaka yampate. 5Yahampata, kodeng'helela na kumwika mmaega gake, 6na kumgala ukae. Abaho kowakema hamoja mbwiga zake na wanhu weli behi nayo na kowalongela, ‘Miyenu nodeng'helela kwavija nimpata ng'hondolo wangu yapotele. Avo tudeng'helele hamoja!’ 7Nowalongela, avo vonda iwe, hokuwa na ndeng'helelo ng'hulu kuulanga mbuli ya munhu imoja mwene nzambi yahaleka nzambi zake, kubanza waja malongo tisa na tisa ogesa wanoga na hawalonda kuzileka nzambi zao.”

Lusimo lwa sente ipotele

8“Hebu mtwanzi yeli na sente longo yahagiza imoja, kotendaze? Kobwinha taa, kofagila ng'anda yake, na kulola goya kila hanhu mbaka yaipate. 9Yahaipata, kowakema hamoja mbwiga zake na wanhu weli behi yake, kowalongela, ‘Nodeng'helela ng'hani kwavija niipata sente yangu ipotele. Avo tudeng'helele hamoja!’ 10Vivija nowalongela, wasenga wa Imulungu odeng'helela mbuli ya munhu imoja mwene nzambi yahaleka nzambi zake.”

Lusimo lwa mwana yapotele

11Yesu kagendelela kulonga, “Kukala na munhu imoja yakalile na wana wabili. 12Ija imdodo kamulongela tatake, ‘Tata, nigwelele uhazi wangu sambi.’ Avo munhu ija kawagolela uhazi wao wanage awo wabili. 13Hazibitile siku nyingi, ija imdodo kachuuza uhazi wake. Abaho kafunga mwanza na sente ziyapatile, kachola isi ya kutali, ako kazinanga sente zose ziyapatile. 14Kamambukiza kila kinhu kiyakalile nacho. Abaho lufilili lwa nzala lulawilila mwiisi ija, nayo kakala kabule kinhu chochose kisigale. 15Avo kachola kusang'hana kibaluwa kwa munhu imoja wa isi ija, munhu ayo kamtuma mumgunda wake yasusile nguluwe. 16Kakala kosulukila kuja maganda gawadile nguluwe, lakini kuduhu munhu yamgwelele kinhu chochose chakuja. 17Abaho kagelegeza na kulonga, ‘Tatangu kana wasang'hanaji wengi, oja mbaka osigaza na niye hano nofa na nzala! 18Nosegela na kuchola kwa tatangu na kumulongela, Tata, nimtenda Imulungu nzambi, na vivija nikutendela gweye nzambi. 19Sifaya kukemigwa mwanago. Nhende kamba imoja wa wasang'hanaji zako.’ 20Avo kafunga mwanza wa kubwela kwa tatake.

“Viyakalile yang'hali kutali, tatake kamona. Kamonela bazi mwanage, avo kamkimbilila, kamuhagatila na kamnonela. 21Mwanage kamulongela, ‘Tata, nimtenda Imulungu nzambi, na vivija nikutendela gweye. Sifaya kukemigwa mwanago.’ 22Lakini tatake kawakema wasang'hanaji zake. Kawalongela, ‘Lopoleni! Galeni kiwalo kinogile mumvaze. Mvazeni pete mkidole chake na vilatu mmagulu gake. 23Abaho choleni mdigale bofu da ng'ombe dinonile mudichinje, wose tuje na kudeng'helela! 24Kwavija mwanangu ino kakala yafile lakini sambi mgima. Kakala yapotele lakini sambi koneka.’ Avo wasonga kudeng'helela.

25“Kipindi acho mwanage imkulu kakala kumgunda. Viyakalile behi na ing'anda, kahulika nyila na wanhu ocheza. 26Avo kamkema msang'hanaji imoja, kamuuza, ‘Ako kuna choni?’ 27Msang'hanaji ayo kamwidika, ‘Mdodo wako kabwela ukae, na tatako kamchinjila bofu da ng'ombe dinonile, kwavija kabwela mgima!’

28“Ija imwana mkulu kagevuzika ng'hani, avo kalema kwingila mng'anda. Tatake kalawa kunze na kumpula yengile mng'anda. 29Lakini kamwidika tatake, ‘Lola, miyaka yose ino niye nokusang'hanila kamba msang'hanaji, na silemile lagizo jako jojose. Kungwaa choni? Hunigwelele hata mbuzi nideng'helele na mbwiga zangu! 30Lakini mwanago ino kananga vinhu vako mbuli ya ugoni, na viyabwelile ukae kumchinjila bofu da ng'ombe dinonile!’ 31Tatake kamwidika, ‘Mwanangu, kipindi chose kukala na niye, na vinhu vose vinilinavo vako. 32Lakini tolondigwa tudeng'helele na kusekelela, kwavija mdodo wako kakala yafile lakini sambi mgima, kakala yapotele lakini sambi koneka!’ ”

Trenutno odabrano:

Luka 15: King'hutu

Istaknuto

Podijeli

Kopiraj