Mwanduso 13
13
Abulamu na Lutu oigola
1Abulamu kabwela kulawa Misili, kachola mwambu wa Negebu, kakala hamoja na mwehe wake na vinhu vake vose hamoja na Lutu. 2Abulamu kakala munhu tajili ng'hani. Kakala na fugo nyingi na shaba na zahabu. 3Kagendelela na mwanza wake kulawa Negebu mbaka Beseli. Kavika hanhu kuyekile ng'hambi yake aho haichanduso hagati ya Beseli na Ai, 4aho kuyazengile upango wa kulavila nhosa. Aho kaditambikila twaga da Mndewa Imulungu.
5Lutu yakalile kokwanga hamoja na Abulamu, heyo vivija kakala na fugo na vibanda. 6Wakala na fugo nyingi mbaka isi ija ikala ndodo kwa Abulamu na Lutu kukala hamoja. 7Avo wasusilaji wa Abulamu na wasusilaji wa Lutu wasonga kugomba. Kipindi acho Wakanaani na Wapelizi awo wakalile wenekae wa isi ayo.
8Abaho Abulamu kamulongela Lutu, “Niye na gweye sikutugombe hebu wasusilaji zako na wasusilaji zangu sikuwagombe kwavija niye na gweye twa ndugu. 9Avo tuigole. Sagula mwambu wowose wa isi kuulonda, wahachola mwambu wa mkono wa kumoso niye nochola mwambu wa mkono wa ukudila, wahachola mwambu wa mkono wa ukudila niye nochola mwambu wa mkono wa ukumoso.”
10Lutu kalola, kajona bonde da lwanda lwa Yolidani dikala dimemile mazi kila hanhu, kamba mgunda wa Mndewa Imulungu hebu kamba isi ya Misili mwambu wa Soali. Kino kikala kipindi Mndewa Imulungu yang'hali hanagabananga mabuga ga Sodoma na Gomola. 11Avo Lutu kaisagulila bonde jose da lwanda lwa Yolidani, kachola mwambu wa kudilawila zuwa. Wanhu awo wabili vivo viwaigolile. 12Abulamu kasigala mwiisi ya Kanaani na Lutu kakala mna gamabuga gakalile kubonde, keka ng'hambi yake behi na Sodoma. 13Wanhu wa kuko Sodoma wakala wehile na wakala omtendela Mndewa Imulungu nzambi nyingi.
Abulamu kochola Hebuloni
14Lutu viyaigolile na Abulamu, Mndewa Imulungu kamulongela Abulamu, “Aho hawili lola goya mhande zose. 15Isi yose ino yuulola, nokugwaa gweye na ulelo wako, iwe yenu milele. 16Nowatenda wanhu wa ulelo wako wawe wengi mbaka munhu sikuyadahe kuwapeta, kamba vija msanga, avo kamba hana munhu kodaha kuupeta msanga baho kodaha kuwapeta wanhu wa ulelo wako. 17Sambi, chola ukaikagule isi ayo yose, kwavija isi ayo yose nokugwaa gweye.” 18Avo Abulamu kahama kuing'hambi yake, kachola kukala behi na mibiki mikulu ya Mamule#13:18 Mamule twaga da munhu yahandile mibiki ayo, vivija ditambuligwa sula ya 14:13. ako Hebuloni, na ako kamzengela Mndewa Imulungu upango wa kulavila nhosa.
Trenutno odabrano:
Mwanduso 13: King'hutu
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
NT: © 2014 Pioneer Bible Translators and The Word for the World
OT: © 2019 Pioneer Bible Translators