یارادیلیش 8
8
سلئن آخیری
1و تاری نوحو و اونونلا بئر گمئده اولان بوتون وحشی حیوانلار و مال-حیوانلاری یادا سالدی. تاری یِر اوزونه بئر یِل گؤندَ‌ردی و سو آزالماغا باشلادی. 2درئنلئکده اولان سو قایناقلاری و گؤیون پنجره‌لری باغلاندی، یاغیش دایاندی. 3سو، یر اوزوندن یاواش-یاواش چکئلدی. یوز اَلّی گون کچدئکدن سونرا سو آزالدی. 4یدّئنجی آیین اون یدّئنجی گونو گمی آرارات داغلارینا اوتوردو. 5اونونجو آیا قدر سو یاواش-یاواش چکئلدی، اونونجو آیین بئرئنجی گونو داغلارین باشلاری گؤروندو.
6قیرخ گون سونرا نوح دوزَلتدئیی گمئنئن پنجره‌سئنی آچیب، 7بئر قارغا بوراخدی؛ قارغا اوچوب گتدی و یِر اوزونده سو قورویانا قدر هر طرفی گَزدی. 8نوح بو دفه بئر گؤیرچئن بوراخدی کی، سویون یر اوزوندن چکئلئب-چکئلمه‌دئیئنی بئلسئن. 9آمّا گؤیرچئن قونماق اوچون راحات بئر یِر تاپمادیغینا گؤره، اونون یانینا-گمئیه قاییتدی، چونکی حله بوتون یِر اوزونده سو وار ائدی. نوح اَلئنی اوزادیب، گؤیرچئنی توتدو و گمئیه-اؤز یانینا آپاردی. 10او داها یدّی گون گؤزله‌دی و گؤیرچئنی گئنه گمئدن بوراخدی. 11آخشام اوستو گؤیرچئن اونون یانینا قاییتدی. گؤیرچئنئن دئمدئیئنده تزه قوپموش زیتون یارپاغی وار ائدی. نوح سویون یر اوزوندن چکئلدئیئنی بئلدی. 12او داها یدّی گون گؤزله‌دی و گؤیرچئنی گئنه بوراخدی، آرتیق گؤیرچئن اونون یانینا قاییتمادی.
13نوحون عؤمرونون آلتی یوز بئرئنجی ائلئنده، بئرئنجی آیین بئرئنجی گونو یِر اوزونده سو قورودو. نوح گمئنئن قاپاغینی قالدیردی و یِرئن اوستونده‌کی سویون قورودوغونو گؤردو. 14ائکئنجی آیین ائیئرمی یدّئنجی گونو یِر اوزونده‌کی سو قوروموشدو.
15تاری نوحا ددی: 16«سن، اؤز آروادین، اوغوللارین و گلئنلرئن ائله بئرلئکده گمئدن چیخ. 17سنئنله بئرلئکده اولان بوتون جانلی‌لاری؛ قوشلاری، حیوانلاری و یرده سوروننلری اِشئیه چیخارت. قوی یِر اوزونه یاییلسینلار و یِر اوزونده تؤره‌یئب چوخالسینلار.» 18نوح، اوغوللاری، آروادی، و گلئنلری ائله بئرلئکده گمئدن چیخدی. 19بوتون حیوانلار، سوروننلر، قوشلار و یرده سورونن بوتون جانلی‌لار دسته-دسته گمئنی ترک اتدئلر.
20نوح ربّه بئر قوربانگاه دوزَلتدی. او هر جور پاک حیواندان و پاک قوشدان گؤتوروب، اورادا یاندیرما قوربانی تقدئم اتدی. 21بوندان ربّه خوش عطئر قالخدی و رب اوره‌یئنده ددی: «ائنسان اوزوندن تورپاغی بئر داها لعنت اتمیه‌جیم، گرچی جاوانلیغیندان بری اونون اوره‌یئنئن نئیّتلری همئشه پئسدئر، ائندی اتدئیئم کئمی، بوتون جانلی‌لاری بئر داها محو اتمیه‌جیم.
22دونیا دوردوقجا
اَکئن-بئچئن، سویوق-ائستی،
یای-قیش و گجه-گوندوز
آرادان گتمیه‌جک.»
Trenutno odabrano:
یارادیلیش 8: موقدس کتاب
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Elam Ministries 2013. All rights reserved.