Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

तोउं पूरी टजोट खड़ी कइ यीशु रोमी राज्यपाल पिलातुस अगर घिन गई। से ईं बोल कइ तस पुठ दोष लाण लगे कि “असी ए मेह्‍णु जे गलत शिक्षा देण, कैसरे धे मामला ना देण त अपफ जे ‘मसीह’ मतलब ‘राजा’ बोते शुणो असा।” पिलातुसे तस केईआं पुछु, “कि तु यहूदी के राजा भो ना?” तेन तस जे बोलु, “एस सवाल तु अपफ पुछुण लगो असा ना कि होरी बझई जुए?” तस हउ बि होरे सवाल पुछुण केईआं पता, पिलातुसे मुख्य पुजारे त होरे मेह्‍णु जे बोलु, “मोउं इस मेह्‍णु अन्तर कोई दोष ना केते।” पर से हउ जोर जोई बोलुण लगे, “ए गलील राज्य केआं शुरु कर कइ पूरी यहूदिया राज्य त यरुशलेम तकर घूम घूम कइ मेह्‍णु रोमी राज्ये खिलाफ चुखि देण लगो असा।” ए शुण कइ पिलातुसे पुछु, “ए मेह्‍णु कि गलील राज्ये भो ना?” तेन्हि केआं पता लाई कइ कि से हेरोदेस राजे रिहासते भो, त से हेरोदेस राजा जे लंघाई छड़ा, किस कि तेन्हि रोजी से बि यरुशलेम अन्तर थिआ।

हेरोदेस राजा यीशु हेर कइ सुआ खुश भुआ, किस कि से सुआ रोजी केआं तस हेरण चहन्ताथ, किस कि तेन तसे बारे शुणो थी त तस केआं कुछ निशाण हेरणे चहन्ताथ। से तस केआं सुआ बोके पुछता रेहा, पर तेन तस जे कोई जवाब न दिता। मुख्य पुजारे त धर्मशास्त्री खड़ भोई कइ तस पुठ सुआ दोष लान्ते रिहे। तोउं हेरोदेसे अपु सपाही जुए तसे बेज्जती कर कइ मखोल बणा त यक चिल-चिलान्ते झिणे डबाई कइ पिलातुस केईं जे लंघाई छड़ा। तेस रोज केआं खड़ पिलातुस त हेरोदेस मितर बणि गे। इस केआं पेहले तेन्हि दुहिए बुच अणबण थी।


पिलातुसे मुख्य पुजारे, यहूदी नेते त होरे मेह्‍णु भिआई कइ तेन्हि जे बोलु, “तुसी ई मेह्‍णु चुखि देणे बाड़ा समझ कइ मोउं केआं अण्हतो असा। त हेरे, मेईं तुं सम्हाणि एसे जांच किओ असी पर जेन्हि बोकी के तुसी एस पुठ दोष लोओ असा, तेन्हि बोकी के बारे मेईं एस अन्तर कोई दोष ना का, होर ना हेरोदेसे। किस कि तेनि से हें धे वापस लंघो असा। त हेरे, एसे बेलि कोई ईं कम नेईं भो कि तस मरणे सज्जा मियेल। तोउं त अउं तेस चाबुके बइ मडाई कइ छड़ देन्ता।” पर से सोब मी कइ लियार देण लगे त बोलु, “एस मार छड़ त असी जे बरअब्बा छड़ दे।” से केसे शेहर अन्तर झगड़े, मेह्‍णु चुखि देणे त केसे मारणे बझई जुए जेहेल अन्तर छो थिआ। पर पिलातुसे यीशु छड़ देणे इच्छा रख कइ मेह्‍णु फिर समझाए। पर तेन्हि लियार दी कइ बोलु, “एस क्रूस पुठ ढनाए, क्रूस पुठ”। तेन टेके लिंगि तेन्हि जे बोलु, “किस, तेन की गुनाह किओ असा? मेईं तेस अन्तर मरणे सज्जा पाणे लेएक कोई बोक ना काई। तोउं त अउं तस मडाई कइ छड़ देन्ता।” पर से हउ बि लियार दी दी कइ तस क्रूस पुठ मारण जे बोलु लगे त जोर देण लगे। त अखिरकार पिलातुस हार मनी गा त तेन्के इच्छा पूरा करण जे ठीक किआ। त तेन यीशु जे मारणे सज्जा शुणाई छइ। पिलातुसे से मेह्‍णु, जे झगड़ीणे त मारणे बझई जुए जेहेल अन्तर थिआ, त जेस से मगतेथ, से छड़ दिता त यीशु तेन्के इच्छाई हिसाब जुए तेन्के धे दी छड़ा।


जिखेईं रोमी सेना यीशु नेण लगो थिए, तिखेईं तेन्हि शमौन नओएं यक कुरेन शेहरे मेह्‍णु भेएड़ ग्रां केआं शेहर एन्ता का। त तेन्हि से टाइ कइ से थम डिलुण जे तेस पुठ छइ छड़ी जेस पुठ यीशु ढनाण थिआ। सुआ हुसुड़ा तसे पतोती हंटण लगो थिए। तस अन्तर सुआ जिल्हाणु बि थी जे यीशु हाल हेर कइ तस जे लियार दी दी कइ रोलुण लगो थी। त यीशु तेन्के कना खिरक कइ बोलु, “ए यरुशलेमे जिल्हाणुओ, मोउं जे ना रोले; पर अपफ जे त अपु गभुर जे रोले। किस कि हेरे! से रोज एन्ते, जपल मेह्‍णु बोते, ‘तेस शन्हि जिल्हाणु सुआ सुख असा, जेन कदी गभुर नेईं जमाणो। सुख तस असा जेसे पेट ना कदी गभुर बड़ो असु, होर ना जेसे चिचि गभुर पिओ असी।’ तपल सुआ कष्टी बझई जुए सोब मेह्‍णु फाटी जे बोते ‘असी पुठ झड़े’ त पलण जे बोते ‘असी पथि छड़।’ किस कि से जपल में ईं हरे बुटे जुए ईं कते त शुके बुटी जोई की की ना कते?”
से दुई होरे मेह्‍णु जे डाकु थिए से बि तस जुए साते मरण जे नीओ थिए। जिखेईं से तेस जगाई पुजे जेस जे खोपड़ी बोतेथ, तठि तेन्हि से डाकु बि यीशु देहणा त बउंआ कना क्रूस पुठ ढनाई छड़े। तिखेईं यीशु बोलु, “बोउआ, अन्हि माफ कर। किस कि एन्हि नेईं पता कि ए यक मासूम मरण लगो असे।” त तेन्हि सपाही लखिर छइ कइ तसे झिणे बांट छड़े।
मेह्‍णु खड़ खड़ हेरण लगो थिए। तेन्हि बुच यहूदी नेते मखोल बणाई कइ बोलुण लगे, “एन होरे मेह्‍णु बचाए। अगर ए परमेश्वरे लंघो मसीह भो होर तेन चुणो असा त अपु अपफ बि बचाल।” सपाही बि भेएड़ एई कइ से फूल बणाण जे तसे धे पितकाड़ु मिआओ दछि रस दिते, त हस कइ बोते, “अगर तु यहूदी के राजा भो त अपु अपफ बचा!” फि तसे मगिरि पुठे यक फटा बि ला जेस पुठ लिखो थी, “ई यहूदी के राजा भो।”

जे डाकु तठि क्रूस पुठ ढनओ थिए, तेन्हि बुच यकी तसे बुराई कर कइ बोलु, “तु मसीह ना भो ना? त अपफ त असी बि बचाण दिए।” ई शुण कइ होरे तेन तस जे लेहरी कइ बोलु, “कि तु परमेश्वर हेरी बि ना डरता ना कि से तें पापी के फल कीं देन्ता? तोउ बि त सेईंए सज्जा मेओ असी। असी त हिसाब जुए सज्जा मेण लगो असी। असी हें कमे ईं बुरे फल मेण लगो असे। पर एन कोई गलत कम नेईं किओ।” तोउं तेन बोलु, “ए यीशु, जपल तु अपु शान त राज्य अन्तर घेईयेल, त मोउं धिक याद कर।” तेन तस जे बोलु, “अउं तोउ जे बोता कि आजे तु मोउं जोई स्वर्ग अन्तर भुन्ता।”


तोउं लगभग दिसाई बाराह बज केआं टाई बज तकर पूरे देश अन्तर अन्हारु भोई गोउ। दिसे टगड़ियार घट भुन्ति गई त देहेर अन्तर जे चादुर असा से बुच केआं चीर कइ दुई टुकुड़ भोई गा। त यीशु लियार दी कइ बोलु, “ए बोउआ, अउं अपु प्राण तें हवाले कता।” त ईं बोल कइ मरी गा। सुबेदारे, जे कुछ भु से सोब हेर कइ परमेश्वरे महिमा की त बोलु, “जरूर ए मेह्‍णु धर्मी थिआ।” त जे हसुड़ा एस हेरण जे किठिए थिआ, एस हेर कइ रोलते रोलते वापिस घेई गा। पर जे मेह्‍णु यीशु जान पेहचान थिए त गलील केआं जे जिल्हाणु अओ थी से दूर खड़ी कइ ई सोब हेरी बिशो थी।


तठि यहूदी समिति अन्तर यूसुफ नओएं यक मेह्‍णु थिआ। से यहूदिया राज्ये अरिमतिया नओएं यक शेहर केआं थिआ। त से बधिया त धर्मी थिआ। त से बोडा पुजारा त तसे टजोटी साथी यीशु मारणे योजना त कम पुठ राजि ना थिआ। पर, से परमेश्वरे राज्य भाड़ण लगो थिआ। तेन घेई कइ पिलातुस केआं यीशु लाश मगी। त पिलातुसे इजाजत मेण केईआं पता यीशु लाश भीं किढ़ कइ यक हच्छे कपड़े अन्तर लपेटी, त यक कब्र अन्तर छइ छइ, जे पलण अन्तर कोरो थिआ। त तेस अन्तर कदी कोई नेओथ छओ। ए भक्ति करणे रोज केआं पेहलकण रोज थिआ त भक्ति करणे रोज शुरु भुणे बाड़ा थिआ। तेन्हि जिल्हाणु, जे यीशु जुओई गलील इलाके केआं अओ थी, तेन्के पता पता घेई कइ से कब्र हेरी कइ लाश बि हेरी कि से कीं रखो असी। तोउं तेन्हि शेहर वापिस एई कइ अब्बल मुश्कदार चीजे त तेल बणा; त नियमे हिसाब जुए भक्ति करणे रोज तेन्हि अराम किआ।

Slušaj लूका 23