Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so á ghʉ ntɔ́ŋ megaŋ nnɔ pí epuɔ ntsɔp pīa mé legēm, ŋ́gyá á wɔ́p mete á lelɔk njūŋ mesī ánɛ epuɔ, mbɔɔ á lelɔk ŋghʉ̄, tɛ mbɔɔ aziɛ́ agɔ lɛ́, pɔ́ aziɛ́ alɔʼ lɛ́, á te ánɛ epuɔ. Menzēŋ meziŋ‑ntō mɛ́t ntsɔp pīa mé legēm e emuɔ: ŋgaŋ mvhɔ a lɛ á Simɔŋ, Yɛɛ́so á zéŋ ntswhī á yí lɛ Piɛ, ŋ́ghʉ̄ á ntsiʼnzem yi Aŋdlɛya, ŋ́ghʉ̄ á Jáak méŋ Zebedé, pɔ́ Jáaŋ ntsiʼnzem yi. Ŋ́ghʉ̄ á Fílíio pɔ́ Baatelemi, ŋ́ghʉ̄ á Tomási pɔ́ Matío ntswi‑ncup alāʼ, ŋ́ghʉ̄ á Jáak méŋ Alfe pɔ́ Tadio. Ŋ́ghʉ̄ á Simɔŋ Nzɔŋɔ‑alāʼ pɔ́ Yúdas Iskaliɔt, á ŋiŋ yīi, yí mé le shʉ̄ʼ njhʉ́ mezoʼ Yɛɛ́so.


Yɛɛ́so á ge etó epuɔ ntsɔp pīa mé legēm mɛ́t, ńtswɛ̄te á wɔ́p ŋ́gɛ: «Pɛ epá á wɛ́ á legʉɔ á ntē elāʼ tsīi, epuɔ pīi é té epuɔ Yúda á, é naŋteé éwú. Ḿbá á wɛ́ á lekō á ntē tsɔ taʼ tésɔŋ epuɔ Samalía. Pɛ egʉ̄ɔ áa mé alāʼ epuɔ Islaɛl, pɔ́ é si ŋgɔ́ páʼ memvhō Ndém, mbɔ pɔ́ lē mbíte. Pɛ egʉ̄ɔ ŋkó á mɛnzhɛ, ésáʼ eshúŋ ŋ́gɛ afʉʼ zīi, Ndém a gɔ esáʼ lefɔ tsí, á tshóne tɛ mbáte. Pɛ eghʉ̄, megaŋ agɔ e etē. Ŋ́ghʉ̄, mepfhō e ezím ánɛ lewhʉ̄. Ŋ́ghʉ̄, megaŋ kaʼpáp e etē. Ńjūŋ mesī ánɛ epuɔ. Mɛ́ le yá á mbū pɛ ndémndēm, pɛ́ ezéŋ ndɔk ntswíte epuɔ ndémndēm. Pɛ nɔŋ ŋgʉ̄ɔ, ndɛ́ʼ ŋiŋ á pɛ́ á gɔ́ɔl, ndɛ́ʼ ŋiŋ á pɛ́ ŋkāp, ndɛ́ʼ ŋiŋ á néŋ atʉɛ́ ŋkāp á apa yí. Ndɛ́ʼ ŋiŋ á pɛ́ apa leziŋ, ndɛ́ʼ ŋiŋ á pɛ́ menzhó mɛ́mbīa, ndɛ́ʼ ŋiŋ á pɛ́ meláŋ, ndɛ́ʼ ŋiŋ á pɛ́ athʉ́ zīi, a gɔ etɛ́te. Á épúp melaʼ mīi, ŋgaŋ afaʼ a pɔŋteé á lewɛ ntsɔʼɔ́ afaʼ yí.
«Pɛ gʉɔ tɛ ŋkó ánɛ ewiɛ́ tésɔŋ kɛ́ aziɛ́ akap alāʼ lɛ́, pɛ ezɛ́tte tɛ nzhɛ́ á ŋiŋ yīi, a gɔ ekókne á wɛ́, ŋ́gʉɔ nnáŋ éwú. Ńnáŋ éwú tɛ ndáʼ efhó á ajʉʼ mɛ́t ŋgʉ̄ɔ. Pɛ nɔŋ ŋkúɔ́ tɛ mbɔɔ ánɛ eziɛ́ ŋgyā lɛ́, pɛ ezīi mvhɔ, ńtsāʼte epuɔ pīi pɔ́ é ŋgyā mɛ́t, ńdé ŋ́gɛ: “Ndém a elɛ nnéŋ apwɛne ánɛ pɛ pīi, é ŋgyā ega.” Ŋ́gɔ́ éyi epuɔ ŋgyā mɛ́t, é kókne á wɛ́, Ndém á ghʉ pɔ́ wɛ apwɛne. Ḿbiŋ te á wɛ́ kókne, apwɛne zɛ́ é piŋ, á mbū pɛ. Pɛ gʉɔ tɛ ŋkó á ajʉʼ, mɛ́ gɔ́ te á wɛ́ kókne, ŋ́gɔ́ te anu zɛ́ júʼ, pɛ ge efhó á ŋgyā mɛ́t ká á tésɔŋ mɛ́t egʉɔ, ńjɔ̄kte á avɔ́p á mekhu pɛ, ńtsyā éwú, ńdɔk ntswī á légɛ, pɛ a pɔ́p é té wɛ. Kwaʼ anuúnē, meŋ shúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, anu epuɔ tésɔŋ puɔ mɛ́t, a epék ntɔ́k azi epuɔ tésɔŋ Sodɔm pɔ́ epi Gomɔɔ, tɛ́ mbɔ pɔ́ le ké efʉʼ menu tepɔŋ ezi ntí.


«Awuɔ yīi meŋ túɔ́ á wɛ́ á nnɔ epuɔ menɔŋ, páʼ memvhō mīi é kúɔ́ á nnɔ metsho lāa. Pɛ eké ŋgʉ̄ɔ azɛ́, ŋ́gīkte páʼ menū lā, ŋ́gɔ́ ndendem páʼ ekepēŋ lā. Pɛ epá epuɔ menɔŋ. Pɔ́ e shʉʼ eswiŋ á wɛ́, mɛ́ elɔ̄k á wɛ́ ŋgʉ̄ɔ mé mvhɔ asāʼ. Pɔ́ e shʉʼ elɔk ntɛ̄, étswá á wɛ́ á meŋgyā aswiŋte pɔ́p. Mɛ́ e shʉʼ eshuŋne á wɛ́ melaʼ mīi, pɛ é epuɔ pá, élɔk egʉɔ mé mvhɔ wɔ sáʼ‑ŋgɔŋ pɔ́ a mefɔ, pɔ́ eŋāk á wɛ́. A egɔ́ épúp, pɛ elɔk eshúŋ á wɔ́p, mbɔɔ á mbū epuɔ pīi é té epuɔ Yúda á, á ajū mīi pɛ́ é si nzhɛ́ɛ ánɛ meŋ. Pɔ́ shʉʼɛ ŋgɔ́ tɛ eswīŋ á wɛ́, tɛ mɛ́ nɔ̄ŋ ndɔ̄kɔ á wɛ́ ŋgʉ̄ɔ, ndɛ́ʼ pɛ ezāap nnɛ̄t ánɛ ntií zīi, pɛ e kó elɔk eshúŋne, ndɛ́ʼ pɛ ezāap nnɛ̄t ŋ́gɛ, pɛ e kó elé egɛ akɔ̄ lɛ́. A láʼ ekuʼ ánɛ njhʉ̄ mɛ́t, Ndém a eshúŋ á wɛ́ anu zīi pɛ e lé, melaʼ mīi, pɛ mé té ndáʼa ŋgɔ̄ á eshúŋnɛ ɛ́. Azwakne Mɔʼɔ́ wɛ Ndém, mé láʼa ŋgɔ̄ elɔk nchu wɛ́ eshúŋne. A láʼ ekuʼ afʉʼ mɛ́t, méŋ mɔ́ a eswīŋ mmɔʼ, ŋ́gɛ mɛ́ ezwhí. Mɔʼɔ́ mɔ́, a ezéŋ ŋghʉ̄ azí épúp, ánɛ méŋ yi. Ewɔŋkhʉ̄ e esɛnne ndʉɔ́ʼ memɔʼɔ́ pɔ́ a memía pɔ́p, ŋ́ghʉ̄ mɛ́ ezwhíte á wɔ́p. Epuɔ metsem e shʉʼ epú epa á wɛ́ melaʼ mīi, pɛ é epuɔ pá. Táʼ, ŋiŋ yīi, a á ŋíŋ ánɛ meŋ tɛ ndáʼ nzōko, Ndém a eghʉ̄, a etswɛ́t. Pɛ shʉʼɛ ŋgʉ̄ɔ tɛ ŋkó mmɔʼ tésɔŋ, mɛ́ jūŋ á wɛ́, pɛ efhó éwú ŋkʉ̄ ŋgʉ̄ɔ mé mmɔʼ eyi ndɛʼɛ. Kwaʼ anuúnē meŋ shúŋɔ á wɛ́, pɛ te shʉʼ ekɛ́t metésɔŋ epuɔ Islaɛl tɛ e emī, té gɔ́ yīi, Méŋ‑Ŋiŋnɔŋ wuɔ a á piŋ nzem ɛ́.
«Nziʼnɛ afaʼ, a te zhɛ́ afaʼ ntsyā á mɔʼɔ́ afaʼ yi í. Ŋkwa, e te mɔʼɔ́ yi tsyāa. A gɔ́ éyi akɔ̄ á le ghʉ̄ á mɔʼɔ́ afaʼ lɛ́, mbɔ aziɛ́ azō a shʉʼ ezéŋ eghʉ á nziʼnɛ afaʼ. Ŋ́gɔ́ éyi akɔ̄ á le ghʉ̄ á mɔʼɔ́ ŋkwa lɛ́, mbɔ aziɛ́ azō a shʉʼ ezéŋ eghʉ ŋkwa. Páʼ pɔ́ ke zɔtē á ŋgaŋ ŋgyā, ńtɔ́ŋ á yí lɛ Bɛlzebul efɔ mesī lā, pɔ́ e shʉʼ ekó ánɛ wɔ náŋ á ŋgyā ega mɛ́t, ézɔ á wɔ́p etɔ́k épúp.


«Púp, ndɛ́ʼ pɛ epɔ́k epuɔ menɔŋ. Ajū mīi, mɛ́ lē ndʉɔ, Ndém a gɔ le láʼ nnéŋ té ghʉ mɛ́ zhɛ́ ɛ̄. Ajū mīi, mɛ́ le féŋ á ntsem, a á le láʼ nnéŋ té ghʉ mɛ́ jʉ́ɔ ɔ̄. Anu zīi, meŋ shúŋɔ á wɛ́ á ntsem, pɛ e shʉʼ eshúŋ á ntentā. Anu zīi, mɛ́ lemtɛ á wɛ́, á letuúŋ pɛ, pɛ ekɔ́ʼ ntshí á ndo esaá tɛ́ esáʼ eshúŋ. Ndɛ́ʼ pɛ epɔ́k epuɔ menɔŋ, pɔ́ zhɛɛ́ áa lezwhī á ŋiŋnɔŋ, ḿbiŋ ŋgɔ́ yīi, pɔ́ gɔ le kūʼ á lezwhī agega ŋiŋ ɛ́. Pɛ epɔ́k áa Ndém, a kuūʼ á lezwhī á ŋiŋ, ḿbiŋ nzéŋ ŋ́kūʼ á leghʉ, agega zí á gʉɔ mé alāʼ mmók. Pɛ é si nzhɛ́ɛ á mbɔŋɔ́ á légɛ, ŋiŋ a swiŋɛ epɔ̄ meséŋ mémpīa, é pú le azō kó. Táʼ, Mɔʼɔ́ wɛ Ndém a gɔ le cʉ́ʼ tɛ, tsɔ eyi wɔ́mɔʼɔ́ á kwhʉ́, té gɔ́ yīi, yí mé kɔŋ ɔ́. Ḿbiŋ eshʉ̄ʼ ánɛ pɛ, mbɔ Ndém a zhɛɛ́ á wɛ́, tɛ mbú nzhɛ́ nzwiŋ menɔŋ ntsɔʼ mɛ́ ntsem. Púp, ndɛ́ʼ pɛ ezéŋ mbɔ́k. Nzwiŋ wɛ́ é teē á mbū Ndém, ńtɔ́k eyi meséŋ ntsem.
«Ŋiŋ a tshíɛ á mvhɔ alāʼ, ḿvéŋ ŋ́gɛ, yí é ŋiŋ ga, mbɔ a láʼ aleʼé zīi, Ndém a záʼa ntsaŋ, meŋ ezéŋ mvéŋ azá, á mvhɔ Mɔʼɔ́ ga yīi, a á lephū, á légɛ ŋgaŋ a á ŋiŋ ga. Ŋiŋ a piŋɛ ntshí á mvhɔ alāʼ, ḿbūŋne á gá, mbɔ a láʼ aleʼé zīi, Ndém a záʼa ntsaŋ, meŋ ezéŋ mbūŋne á yí azá, á mvhɔ Mɔʼɔ́ ga yīi, a á lephū.


«Ndɛ́ʼ pɛ ekwāaŋ ŋ́gɛ, meŋ kɛɛ́ eshʉʼɛ á ndo esī atsetsáʼ, éghʉ epuɔ menɔŋ e enáŋ mé apwɛne. Meŋ kɛɛ́ te shʉ̄ʼɛ, éghʉ epuɔ menɔŋ e enáŋ mé apwɛne ɛ́. Meŋ kɛɛ́ eshʉʼɛ, á mbhií mekɔŋ asɔpne. Meŋ kɛɛ́ eshʉʼɛ, éghʉ ŋiŋ pɔ́ mɔʼɔ́ yi, e efākne. Éghʉ, mɔ́ menzwí pɔ́ mɛ́ wɔp e efākne. Éghʉ, menzwí pɔ́ mɛ́ ndō yi, e efākne. Megaŋ mbo pɛ́, é shʉʼ etó áa á kwaʼ ntē ŋgyā pɛ.


«Ŋiŋ a kɔŋɔ á mɔʼɔ́ yi kɛ́ mɛ́ wɔp, tɛ ntɔ́k á gá, mbɔ ŋgaŋ, a gɔ le kūʼ á yí, á legɔ̄ á ŋiŋ nnɔ ga á. Ŋiŋ a kɔŋɔ á méŋ yi, éyi mbaŋa kɛ́ eyi menzwí, tɛ ntɔ́k á gá, mbɔ ŋgaŋ a gɔ le kūʼ á yí, á legɔ̄ á ŋiŋ nnɔ ga á. Ŋiŋ a gɔ te tswíʼ á mbaŋne paŋné yi, ńdɔk ntsé á nzem meŋ ɛ́, mbɔ ŋgaŋ a gɔ le kūʼ á yí, á legɔ̄ ŋiŋ nnɔ ga á. Ŋiŋ a nɔŋ ndhʉ̄ɛ athū zí ŋ́gɛ, yí láʼa ŋgɔ́ éwú lɛ́, mbɔ a a láʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí melaʼ má, mbɔ a a láʼ egɔ́ éwú.


«Ŋiŋ a kóknɛ á wɛ́, mbɔ a lɔkɔ ŋkóknɛ áa gá. Ŋiŋ a piŋɛ ŋkókne á gá, mbɔ a lɔkɔ ŋkóknɛ á ŋiŋ yīi, a le tó á gá. Ŋiŋ a kóknɛ taʼ ntswi‑ŋke Ndém, melaʼ mīi, a á ntswi‑ŋke Ndém, mbɔ Ndém a a láʼ eyá ntaŋá yí, páʼ eyi ntswi‑ŋke Ndém. Ŋiŋ a kóknɛ taʼ njuʼ‑nchu Ndém melaʼ mīi, a á njuʼ‑nchu Ndém, mbɔ Ndém a a láʼ eyá ntaŋá yí, páʼ eyi njuʼ‑nchu Ndém. Ŋiŋ a yáa atá ntshi ŋŋwɛne ŋwɛne, á mbū taʼ ŋiŋ á nnɔ pɛ, melaʼ mīi, ŋgaŋ a á ŋiŋ nnɔ ga, kwaʼ anuúnē meŋ shúŋɔ á wɛ́ ŋ́gɛ, mbɔ ŋgaŋ a te e láʼ enéŋ té wɛ ntaŋá yí í. »

Slušajte Matío 10