Borôro: Pao Kurireu Bataru Kurireu; O Novo Testamento (New Testament)

Pao Kurireu Bataru Kurireu; O Novo Testamento

Jesus merure boepa oiagi sábado meriji. Trigore nou boepa tada. Nou ure jorduwadowuge ekodure apo jamedu. Nono nou Jesus ure jorduwadowuge ere tugeragu trigo enariji. Ere tugera reko pui nou trigo enari tabo tuwo nou trigo tawuje čiwu piji tuwo trigo ko. Fariseu doge erdure erore aino duji dukeje emagore Jesusji. Egore: – Akaiwodo. Judeu doge nure pagi. Sábado meriji pamaragodumodukare pugeje. Dukodire pamodukare pageragu trigoji sábado meri keje. Mare tare tageragu trigoji sábado meri keje. Ukare turugadu!
Jesus akore: – Tarduwakare Pao Kurireu bataruji! Dukodire tarduwakare Pao Kurireu meardae remawuji. Tarduwamode Pao Kurireu meardae remawuji dukeje tamago pegamodukare čeroino duji. Mariguduwu Judeu doge eimijera kurireu Davi rore jiboe padure Pao Kurireu bataru keje. Dujire tarduwakare. Nou Davi uke boeire ji. Utugarege tugobaigarege eke boeire ei jamedu. Dukodire ure turemo Pao Kurireu uwaito. Okwagere boe ere maku Pao Kurireu aiwu amireuji. Pao Kurireu ure tuwadaru maku mariguduwuge pawobe Judeu doge etai. Dukodire makore ei ekawo nou amireu kowuje. Tu nou ure Judeu doge enomea maku Pao Kurireu aiwuge emode nou Pao Kurireu uwai tadawu amireu kowuje. Ainore Pao Kurireu akore. Mare Davi ure nou Pao Kurireu uwai tadawu amireu kowuje. Ure ia maku tudugarege etai ewo kowuje jamedu. Mare Pao Kurireu mako pegakare eroino duji. Dukodire imagore aino tai tamago pegakawo čere čegeragu trigo jituji. Ča iwo tawie. Imedu Onaregedu nure imi. Imire imode boe erduwado rugadu nuba boe eromode sábado meri keje.

Ia Sábado meri keje Jesus ure turemo ia Judeu doge ere bato puiwu baito pugeje. Ure nou boe erduwado Pao Kurireu bataruji. Ia imedu rakojere nono. Iera pegare. Nou iera bekurure pudo. Ia fariseu doge, ia jorduware Judeu doge eno bakaru jiwuge edu nono jamedu. Boe eimijerage nure emage. Nou boe eimijerage erdu pegare Jesusji. Dukodire etaiwore Jesus ia ro pegamode tiagai dubagai. Judeu doge eromodukare ia turoji sábado meri keje. Dukodire etaidukare boe eiogowo boei sábado meri keje. Mare Jesus umode nou imedu iera pemegago nou meriji dukeje nou boe eimijerage erdu pegamode nou Jesus rore aino duji. Mare Jesus jorduware erdu pegare pudui duji. Jorduware emeardaere jiboe jamedu boeji. Nono Jesus makore nou imedu iera pegareuji. Akore: – Aragojedo. Mato itae awu boe etoiado.
Nou imedu ure turagojedo. Nono uture Jesus ae nou boe etoiado. Nono Jesus unarare nou boei. Akore: – Nuba pago bakaru ure parduwado paroiago sábado meriji? Paro pegamode boei kana? Paro pemegamodukana boei? Sábado meri keje pamodukana boe ekinorudo boe pegareu piji? Pamodukana boe ewarigu boe pegareuto sábado meri keje?
Jesus aiwore ei. Mare emago bokware Jesus bataru jipagi. Nono Jesus makore nou imedu iera pegareuji. Akore: – Akera raido itae.
Nono nou imedu ure tugera raido ae. Čare iera pemegagodure tači je. Nou boe eimijerage erdure nou inoduji dukeje ekorigodure rugadu. Erdu pegare Jesus rore aino sábado meri keje duji. Du otobiji emagore pui tu tu je tuwo ia tumeardae tawuje turo pegawo Jesusji.

Ia meri keje Jesus ruture ia tori ao ka tumagowo baruto. Nono makore Pao Kurireuji jii je barogwakododu ka. Barogwakododure dukeje makore ture jorduwadowuge ewagai. Nou ture jorduwadowuge epiji ure tugeragu jiwuge enodo padure doze. Du emagere etumode Jesus bataru tabo boe eiamedu boe ewagai.
Ainore nou boe ekiere.
Simão, Jesus ure iedo Pedro.
Uwie André.
Tiago,
João,
Filipe,
Bartolomeu,
Mateus,
Tomé.
Tiago, Alfeu onaregedu.
Simão, Zelote ure ema.
Judas, Tiago onaregedu.
Judas Iscariotes. Emare umode Jesus maku boe eimijera pegareuge etai.

Nono Jesus ure turawuje nou tori ao piji nou ture tugeragu jiwu boebo. Boe emagare taregodu tabo ae tumearduwo bataruji. Boe etaregodure Judéia moto piji, Jerusalém ba kurireu piji, Tiro ba kurireu piji, Sidom ba kurireu piji tumearduwo Jesus bataruji, uwo tubemegago tugogodae boe piji. Bope ro pegare jiwu boe doge etaregodure ae jamedu. Jesus ure nou bope doge etawuje nou boe epiji. Nou boe emagare rugadu. Erduware Jesus ure boe epemegago duji rugadu. Etaidure tuwo tugera bu Jesus keje. Emeardaere tumoduie tugera bu Jesus keje dukeje umoduie tubemegago. Jesus makore ture jorduwadowugei. Akore: – Marenarue nure ia tagi mare taegaredo tai. Taragojemode Pao Kurireu apo rugadu. Tare tagimijerado ema dukodire taragojemode apo rugadu boe pemegareu keje. Dukodire boe pemegamode tai rugadu. Ia tagi tage boeire tai mare du inodu tabo taegaredo tai. Boe pemegamode tai. Mare paga karega. Tage kurimode rugadu. Ia tagi tagragudure tagiarigodu koia. Mare du inodu tabo boe pemegamode tai rugadu dukodire taegaredo tai. Tagogwarigodumode rugadu. Boe ekadakagirimode tai tameartorumode imagore tai jiboeji. Tagodumode iwadaru kodaji dukeje boe emodukare tuiordudo tai, erorerumode tai, egomode meridoge enuie tagi. Ainore etuwobe emago pegare nou jaoboei jamedu. Mariguduwu etuwobe ero pegare nou mariguduwuge makore Pao Kurireu bataru jiwugei jamedu. Mare tare tameartorudo i dukodire emago pegamode aino tai jamedu. Mare taegaredo tai. Boe pemegamode tai. Mare paga karega Pao Kurireu umode mori kurido tagai toro baru tada. Dukodire čare taegaregodumode tai rugadu.
Mare Jesus mako pegare iagei. Akore: – Ia tagi oe kurireuge nure tagi. Dukodire taegarere tai nou tagoeji. Mare tawiapagakare baru tadaboe bagai. Dukodire boe pemegamodukare tai. Nou tagoe akedumode rugadu. Nou tagoe umodukare taginorudo boe pegareu piji.
– Ia tagi tage kurire. Dukodire taegarere tai tageji. Mare tawiapagakare baru tadaboeji. Dukodire boe pemegamodukare tai. Tage akedumode rugadu. Tage umodukare taginorudo boe pegareu piji.
– Ia tagi taegarere tai dukodire tagogwarire aino jamedu. Mare tawiapagakare baru tadaboeji. Dukodire boe pemegamodukare tai rugadu. Tagragudumode, tamode maido tagabo jamedu.
– Boe ebogodure ia tai. Dukodire taegaregodure tai nou ewadaruji. Mare pagare egoino. Mariguduwuge ewobe ebogodure batrarodure Pao Kurireu bataru jiwugei. Aino čare boe ebogodure tai jamedu. Mare tawiapagakare Pao Kurireu mako pemegare tai jiboeji. Dukodire boe pemegamodukare tai.

Jesus mako kimore. Akore: – Tawiapagado awu iwadaruji. Tameardu kurido jordu pegare taiwugei. Taro pemegado kadakagirire taiwugei jamedu. Tawadaru pemegado nou bataru pegare taiwugei. Tamagodo baruto Pao Kurireu bagai nou ro pegare taiwuge eparu tabo jamedu. Ia ro pegareu umode tugera to aeji, ae abowu metia maku ai uwo tugera to ji jamedu. Ia boe umode akudau areia okwatorureu biaku epa tawuje apiji dukeje maku ai rugadu. Mare ia akudau areia meture aiwu maku ai jamedu. Iaboe maku okwamagudure aiwu boe etai. Nouia boe ure tugeragu akoe jitu keje akaba udo maku akai tuibagi pugeje. Taro pemegado boei boetoji nono tagaidu mogadure boe ero pemegawo tai du mogadure jamedu. Tameardu kurimode tu ro pemegare taiwugei dukeje taro pemegamodukare ro pegareuge ero kori. Ro pegareuge emeardu kurire ro pemegare puduiwugei jamedu. Taro pemegamode nou ro pemegare taiwugei mare taro pegamode nou ro pegare taiwugei dukeje tarore nono nou ro pegareuge ero mogadure jamedu. Ro pegareuge emeardu kurire ro pemegare puduiwugei jamedu. Mare tameardu kurimode ro pegare taiwugei dukeje Pao Kurireu ro pemegamode tai. Tamode diero maku boe etai mare tagaidure ewo maku tuibagi tagai pugeje. Taromode aino dukeje tarore nono ro pegareuge ero mogadure. Pao Kurireu mako pemegamodukare tai pugeje. Ro pegareuge emode diero maku iage etai mare ewo nou diero rugadu maku pudai tuibagi pugeje. Aino čare imode tarduwado. Pao Kurireu ro pemegare ro pegareugei. Pao Kurireu okudure boebo rugadu. Ča taro pemegado nono Pao Kurireu ro mogadure jamedu. Tameardu kurido aidukare taiwugei nono Pao Kurireu ro mogadure. Ia tagoe maku etai jamedu. Taipagakaba ewo maku tuibagi tagai pugeje nono Pao Kurireu ro mogadure. Tagogududo boebo nono Pao Kurireu okudu mogadure boebo dumogadure jamedu. Taromode aino dukeje Pao Kurireu oremode tagi. Umode boe pemegareu maku tagai.

– Tawiapagakaba boei boe pegareu tabo. Nono Pao Kurireu ro pegamodukare tai. Tagaba boe ewarigu boe pegareuto Pao Kurireu ukawo tawarigu boe pegareuto jamedu. Boe ero pegare tai dukeje tawiago nou erore tai dupiji. Dukeje Pao Kurireu biagodumode taro pegareu boe piji jamedu. Ia tagoe maku ia boe enoe bokwareuge etai. Nono Pao Kurireu umode ia boe pemegareu maku tagai jamedu. Umode maku tagaiboe kurimode rugadu. Umode maku tagai nono tamode maku boe etai du mogadure.
Nono Jesus ure nou tuwadaru jebato toro ia Pao Kurireu meardae ka tuwo nou boe erduwado ji. Akore: – Joku bokwareuge ekera bararemode pui dukeje ewudumode boeiakoto. Jorduwakare Pao Kurireu jiwuge ere nono nou joku bokwareuge emogadure. Mare joku bokwareuge ei karega inagoino. Jorduwakare Pao Kurireu jiwuge eroiwakare tuwo boe erduwado Pao Kurireuji. Dujire inagoino. Etaidumode tuwo erduwado mare emode ewarigu Pao Kurireu piji. Dujire inagoino. Erduwakare Pao Kurireuji. Emeartorukare ji jamedu. Dukodire eroiwakare tuwo boe erduwado Pao Kurireuji rugadu. Boe emeartorumodukare ia mugure bapera kejewuji jorduwamodukare nono tugimijera mogadure. Boe emeartorumode tu nou mugure bapera kejewu ukimijeraji. Mare nou ukimijera umode nou mugure bapera kejewu jorduwado tuiorduware jiboe jamedu boeji dukeje nou mugure bapera kejewu jorduware jiboe umode nono nou tugimijera jorduware jiboe mogadure. Du ure turugadu. Tagi tardure tamedia joku tadawu boe giguduji. Mare tardukare taeku tadawu iraji. Mare boe gigudu ji karega inagoino. Boe ero pegareu rogu jire inagoino. Biagare tu je mare tardure ji. Dujire inagoino. Dukodire tamago pegare nou tamediaji. Tagagore: “Aro pega” aino ji. Tagagore tarduwaie tamedia ro pegareuji mare tardukare ia taro pegareuji. Dukodire tameartorukare tawadaruji. Tardukare taeku tadawu ira kurireuji. Mare ira ji karega inagoino. Taro pegareu kurireu jire inagoino. Taro pega kurire rugadu mare tagare tardudo ji. Dujire inagoino. Kočare. Tagera ra taro pegareu piji. Tamode tagera ra taro pegareu piji dukeje tarduwamode rugadu tamago pemegawo nou tamediaji nou tamedia uwo tugera ra turo pegareu biagareu piji jamedu.

– I pegareure tudu pegare. I pemegareure tudu pemegare. Boe erduwamode tuduji dukeje erduwamode nou tudu iji jamedu. Boe emodukare tugeragu figo tuduji botoguru i piji. Figo i pijire boe emode tugeragu figo tuduji. Boe emodukare tugeragu uva tuduji botoguru i piji. Uva iku pijire boe emode tugeragu uva tuduji. Boe ere nono nou iguru mogadure. Mare iguru ji karega inagoino. Boe emeardae koiare umode boe ero pemegado umode boe ero pegado. Dujire inagoino. Boe ewiagoromode tumeardae pegareuji dukeje ero pegamode emago pegamode nono nou tumeardae mogadure. Mare boe ewiagoromode tumeardae pemegareuji dukeje ero pemegamode emago pemegamode nono nou tumeardae mogadure. Dujire inagoino. Tumeardaere jiboe jire boe emagomode, eromode tu tu je.

Jesus mako kimore nou boei. Akore: – Ia tagi tamagore tagimijera nuie imi. Ma kočare tameartorukare iwadaruji. Ia imedu ure tuwai towuje. Ure ia iguru pemegareu tugu mototo. Ure tugera pemegado ji tuwo tuwai pemegado bakuru ukawo tuwai butudo. Nono bubuture. Pobo aregodure rugadu. Nou poborereu jeture nou imedu uwaiji. Mare nou uwai rakare rugadu. Butukare. Ča meartorure iwadaru jiwu akedumodukare nono nou bai mogadure. Mare bai ji karega inagoino. Boe ewiapaga pemegamode iwadaruji dukeje emeartorumode rugadu imagore jiboe jamedu boeji. Dukodire nou boe erduwamode rugadu dukodire boe pemegamode ei rugadu. Dujire inagoino. Ia imedu ure tuwai pemegado jamedu mare ure tugeragu ia iguru pegareuji. Ure tugu mototo mare ukare bure tugu pemegado. Iera kiogwakare nou tuwaiji. Nono pobo aregodure. Dukodire pobo jeture nou imedu ure towu baiji. Nono nou uwai buture. Pobo ure nou uwai butudo rugadu. Ure rugadu pegado tači je. Ča nou meartorukare iwadaru jiwu jorduwa bokwamode dukodire boe pegamode ji nono boe pegare nou bai jitu mogadure. Mare bai ji karega inagoino. Boe emeartorumodukare tumeardure jiwu iwadaruji dukeje boe pegamode ei rugadu. Dujire inagoino.

Slušajte Lucas 6