Bassar Ntcham - 2008 Edition (Drama NT)

BIBLE EN N'TCHAM (Bassar) © Alliance Biblique du Togo, 2013. 

Ní Yeesu, úǹ nín jɔ́ḿ Ɔliifi sufii jool pu. Ku wúntì kutaafaau pɔ̀lpɔlee, ní u fātìi nín gítiń kunimbɔtidiin, ní binib tikpil tí dɔ́miń u-cee. Niinee ní u kāl̀ ki bíi dàkà-bi Unimbɔti bɔti. Ní bimaradakaliibi nì Fariisab cáań-u unimpu ubɔ, bi nìn cúú-u u bíi ŋáań tilaakpaal. Ní bi cáá-u ki yóoǹ kunipaau kansikin, ní ki bí Yeesu yii: «Ukpil, unimpu nee bíi ŋáań tilaakpaal ní ti cúú-u. Mooyiisi marab poonee, u bí-ti yii tí dū ataŋkpee kí yāŋkì an nimpoobee kí kpɔ̀. Mimmee, sii ká yii ba?»
Bi nìn píĺ Yeesu ki là ú sòoǹ kí kɔ́ bi-bɔtinee, ní bi cáań-u an bɔti. Ní Yeesu bōoǹ ki cáá u-ŋambiki ki ŋmà kitiŋ. Bi gbíntìi bíi bàlifī-uee, ní Yeesu yáatì, ní ki bí-bi yii: «Ni-kansikin un di yaa kaa pée ŋá ikpiti ki kée ń péé péé kí dū ditaŋkpal kí yā unimpu nee!» U lī mimmee ní ki fātìi tí bōoǹ ki bíi ŋmà kitiŋ. Binibee nín gbìl̄ mimmee, ní bi kíǹ ki sútí ubɔ ubɔ ki wàatī unimpuee, ki kíliń bitikpilib ki dāa dūu kúntì ŋwaamu, ní an tin kíǹ Yeesu baba, ní unimpuee yú ki kɔ́ĺ-u. Ní Yeesu yáatì ki bí yii: «Unimpuee, bin cáań-see bí la? Kéè, báà ubɔ kaa ŋá-si tibaa!» Ní unimpuee kíí-u yii: «Aayee, ukpil, báà ubɔ kaa ŋá-mi tiba.» Ní Yeesu bí-u yii: «Ma mun kaa làá ŋá-si tiba. Á nīn cá kí taa ti ŋá ikpiti.»]

Yeesu fātìi yōoǹ dinyɔɔbundi ki bíi sòoǹ nì kunipaauee yii: «Man di sá ŋwalifi ki tīī duulinya. Un yaa nóó-mee làá ká ŋwalifi ŋun tìì dimaŋfalee, udaan kpá kí còom̀ dibɔmbɔndin.» Ní Fariisab bí-u yii: «A nín bíi sòoǹ a-ba pu min nee, tin a sòoǹee kaa sá ibaamɔn.» Ní Yeesu kíí-bi yii: «Nì min kamaa m bíi sòoǹ m-ba pu nee, an sá ibaamɔn ní, di sá m nyí laakin m nyánnée ki nyí laakin m cée mun. Ama nimbi kaa nyí laakin m nyánnéeyaaa, kaa nyí laakin m cée mun. Nimbi sòoǹ tibɔti nniyaamin ní, man kaa sòoǹ báà ubɔ bɔti. Báà m yaa bíi sòoǹ ubɔ bɔtaaa, m sòoǹ-tì nì ibaamɔn ní, kun puee maa bí m-baba, m-Baa un túnní-mee bí m-cee. Ni-marab poonee, an ŋmàn̄ yii binib bili yaa sòon̄ tibɔti mbaantiiminee, an sá ibaamɔn ní. Míǹ di sá m sòoǹ m-ba pu, ní m-Baa un túnní-mee mun lèekī m-pu seera.» Ní bi bālifì Yeesu yii: «A-Baa bí la ní?» Ní u kíí-bi yii: «Naa nyí-maaa, kaa nyí m-Baa mun. Ni yaa bàà nyí-mi, ni bàà béetí m-Baa mun.»
Yeesu sòon̄ tibɔti nee ŋyunti ŋun u bíi dàkà samaa kunimbɔtidiin, laakin bi ŋáań saraa nimbiliŋee, ní báà ubɔ kaa tāntì u-ŋal ki gbēē-u, kun puee u-yuntiŋu kaa láá bāań.

Ní Yeesu gíti bí-bi yii: «M làá nīn cá, boonee ni làá dāá nyàab̀-mi, kaa làá dāá ká-mi, ní kí dāá kpáàa kpú ni-kpitii poon. Naa làá ŋmā kí dāan̄ laakin m cée.» Niinee ní Juuda yab bíi sòoǹ yii: «Mimmee, u làá kalin kpɔ̀ u-ba naaa? Ba pu ní u bí yii, naa ŋūǹ kí dāan̄ laakin m cée?» Ní Yeesu kíí-bi yii: «Nimbi sá taapu doo yab ní, man nyánní yilpu ní. Ni sá duulinya yab ní, man kaa sá duulinya yɔu. An pu ní m tùkū-ni yii ni làá kpú ni-kpitii poon. Ni yaa kaa fōō ki kíí yii <man di sá un m sée>, ni làá kpú ni-kpitii poon ní.» Ní bi bālifì-u yii: «Sii di sá ŋma ní?» Ní u kíí-bi yii: «M nìn pée tùkū-ni doooo mpeekaam un m sée. M cáá tibɔti tikpil kí sòoǹ ni-pu kí kpɔ̀ ni-bɔti. Un túnní-mee sá ibaamɔndaan, ní tin u tùkū-mee ní m cáa bíi sòoǹ ki tùkù nimbi taapu doo nib.»
Ama Juuda yab kaa nìn nyí yii Unimbɔti Ubaati pu ní u bíi sòoǹ nì bi. Míǹ pu ní Yeesu nìn gíti tùkū-bi yii: «Ni yaa láa yōoǹ man Kinibiki yilpuee, ní ni dāa béetí m nín sá uŋyee. Maa ŋáań tiba m-ba pɔŋŋu pu, see tin m-Baa dàkà-mee ní m cáa sòoǹ. Un túnní-mee bí m-cee, waa yàntī ḿ nīn bí m-baba, kun puee m pée ŋáań baabadal min fáatì-uee ní.» Yeesu nín nìn bíi sòoǹ tibɔti gbantee, binib tikpil nìn fōō-u ki kíí.

Niinee ní Yeesu bí Juuda yab bin fōō-u ki kííyee yii: «Ni yaa ŋúb́ m-bɔti nee, ni làá nīn sá m-boonnooliibi tiŋman pu yab. Ni làá béé ibaamɔn, ní ibaamɔnee ń yàntī ní tɔ̄ ni-ba.» Ní bi kíí Yeesu yii: «Ti sá Abraam naantiibi ní, doooo nee ubɔ kaa pée cúú timbi kuyuŋu. Ba di yāntì ní a bí yii ti làá tɔ̄ ti-ba?» Ní Yeesu kíí-bi yii: «Ibaamɔn, ibaamɔn ní m sòoǹ nì ni, un sá kamaa yaa ŋáań ikpitee sá ikpiti yumbuu ní. Uyumbu kaa sá kudicaŋu poon niliu kí nīn cá, ama kudiidaan jipɔɔn úǹ làá nīn sá kudicaŋu poon niliu ní kí nīn pée cá jaanjaan. Mimmee, man Ubaati Jipɔɔn yaa tīī-ni dibatɔlee, míǹ ní ni lafun tɔ́ ni-ba tiŋman pu. M nyí yii ni sá Abraam naantiibi. Ama ni nyàab̀ kí kpɔ̀-mi. Di sá m-bɔti kaa ká mpaan ni-pɔbiliŋin. Man sòoǹ tin m-Baa dàkā-mee, ní ni mun ŋáań tin ni-baa tùkū-nee.» Ní bi fātìi kíí-u yii: «Timbi baa di sá Abraam!» Ní Yeesu bí-bi yii: «Ni yaa bàà sá Abraam biyaamuee, ni bàà ŋáań min Abraam nìn ŋáańee ní. Ama, nì min kɔkɔwoooo m sòoǹ ibaamɔn in m gbìl̄ m-Baa ceeyee, nimbi nyàab̀ kí kpɔ̀-mi. Abraam kaa nìn ŋá míǹ dalba. Ni-baa nín ŋáań puee, míǹ ní ni ŋáań!» Ní bi kíí-u yii: «Timbi kaa sá nnaayubiyaamu, ti-baa sá ubaanti ní, úǹ di sá Unimbɔti.» Ní Yeesu kíí-bi yii: «Unimbɔti yaa bàà sá ni-Baayee, ni bàà néeń-mi ní, kun puee Unimbɔti cee ní m nyánní ki dɔ́miń, maa dɔ́miń m-ba pu, an sá úǹ di túnní-mi. Ba pu ní naa gbìl̀ m-bɔti tin m sòoǹee taapu? Kun puee naa ŋūǹ kí pīlifì-tì. Nimbi baa di sá Sitaan, min min ni-baayee lèe, an ní ni là ki ŋáań. U pée sá unikpɔl doooo ŋkilkaamin ní. Waa sí ibaamɔnni kun puee waa cáá ibaamɔn u-ni. U yaa bíi mɔ́ntée, míǹ di sá u-bimbim, kun puee u sá unyimɔndaan ní, úǹ di sá inyimɔn na nì i-baa. Man nín sòoǹ nì ni ibaamɔn puee ní naa là kí fōō-mi kí kíí. Ni-kansikin, ŋma di ŋūǹ kí dàkà diyìntil din m yīntèe? Mimmee, ni nín nyí yii tin m sòoǹee sá ibaamɔnee, ba ŋá ní naa làá fōō-mi kí kíí? Un sá Unimbɔti yɔuee gbìl̀ Unimbɔti bɔti ní. Ni yaa kaa gbìl̀ Unimbɔti bɔtee, naa sá u-yab dee.»

Ní Juuda yab kpilib fātìi kíí-u yii: «Ti nín lī yii a sá usamaariija, arasinii mun kā a-puee, an kaa sá ibaamɔnaaa?» Ní Yeesu kíí-bi yii: «Arasinii ubɔ kaa kā m-pu, m-Baa ní m bíi tìì tinyool, ní nimbi kpèé ki sìŋkīǹ-mi. Man kaa nyàab̀ bí pàkà-mi. Ubɔ bí ki làá pàkà-mi, udaan di sá ubɔsoonli. Ibaamɔn, ibaamɔn ní m sòoǹ nì ni, un ŋúb́ m-bɔtee kaa ti bí kí kpú jaanjaan.»
Niinee ní Juuda yab kpilib bí-u yii: «Kɔŋkɔnnee ti lafun béè yii arasinii ubɔ kā a-pu! Di sá Abraam kpíì, Unimbɔti bɔnaatiliibi mun kpíì, ní sii bí yii un yaa ŋúb́ a-bɔtee kaa ti kúù jaanjaanaaa? Mimmee sii jítiǹ ti-baa Abraamaaa? Úǹ kpíì, ní Unimbɔti bɔnaatiliibi mun kpíì. Sii yíì a-ba ŋma ní?» Ní Yeesu kíí-bi yii: «M yaa bíi tìì m-ba tinyoolee, mimmee m-nyootee kaa sá timɔntiil dee. Un tìì-mi tinyoolee di sá m-Baa un ni bí yii u sá ni-Nimbɔtiu, ama ní kaa nyí-uee. Man nyí-u. M yaa néè yii maa nyí-u, m làá kpántí unyimɔndaan kii nimbee ní. Man nyí-u, ní ki ŋúb́ u-bɔti. Ni-naanja Abraam nín béè yii m làá dāan̄ taapu dooyee, an mɔ́ɔkiǹ-u, ní u lafun ká ní u-pɔbil píil̀.» Ní Juuda yab kpilib kíí-u yii: «Sii kaa láá bàn̄ abin imuŋku ili nì saalaa, a ká Abraam la?» Ní Yeesu kíí-bi yii: «Ibaamɔn, ibaamɔn, man pée bí ní bi nín màl̄ Abraam!» Niinee ní bi bíi píikí ataŋkpee kí yāŋkì-u, ní Yeesu nɔ̄ntì ki nyáń kunimbɔtidiin.

Slušaj Jean 8