KECHENG 15
15
Abram Pen Arnam Kechejok Aloh
1Laso aphi, Abram isi thek-long-lo, lapen alangliphan Hemphu kepu ase arjulong-lo, “Phereri, Abram, Nangphan Ne kedo-an akesung pen khang thipji lapen nangphan isi thedung anong-e nangpiji.”
2Bonta Abram thak-lo, “Keklem-un a-Hemphu, nangli nong-e neliphan kopi akeme akam klempo, athema nelisomar ave? Nelipoton ke Damaskas a-Eliezer anchot-lo. 3Nangli neliphan inutnat ta oso nang nepipe det-lo, lapen neliban atum angbong inut abang nelikhi chepahemphupo.”
4Anke Hemphu alangliphan puthot kepu ase arjulong-lo: La nangban ke nangkhi chepahemphu-phelo; nangso apok si nangpoton plangpo. 5Hemphu alangliphan ingtan pondetsi pulo, “Sining anat langtha lapen chiklolongso kelakhaji bor-i-tha; lasonthotsi nangso-nangsu dopo.”#Rom 4.18; Ibr 11.12
6 Hemphu aphan Abram chikilo, lapen laso apotsi alangliphan Hemphu aningdok-lo, lapen laphan deng-lo.#Rom 4.3; Gal 3.6; Jem 2.23
7Anke laphan Hemphu pulo, “Ne ke Hemphu lo, Bebilon adet Ur pen Nesi nangphan nangkeja abang-lo, laso alongle nangphan nangkepiji aphanlo, nangmethang aphan.”
8Bonta Abram arjulo, “Keklem un a-Hemphu, la nelimar plangpo pu neli kopusonsi chinipo?”
9Alangli thak-lo, “Chainong ejon, bi ejon, lapen biresak aloso ejon, ajontin ta ningkan kethom arta, Nelong van non, lapen vothung lapen vothung animso ejon ta van non.” 10Arnam anat pi-heihei Abram vanlo, lahei achitim thatpetsi abengtin bi parlin si ren ni bilo; bonta alangli vothung that-the det-lo. 11Takun nanghirlo pi athak, bonta Abram phlungjuilo.
12Arnikangsam ahut, Abram amek jang-lot-lo, lapen alangli kephere kethirik dolo.#Job 4.13,14 13Alangliphan Hemphu pulo, “Nangso-nangsu atum bang adet donangpo; lapen latum hadak ban donangpo, lapen latum aphan ningkan 400 chenek-otpo.#Keba 1.1-14; Akam 7.6 14Bonta latum aphan ban ke-en adet aphan ne aduk piji lapen latum halaso bang adet ke-o ahut latum ongdung akhi chepon longpo.#Keba 12.40-41; Akam 7.7 15Nangmethang amat ta sar pame longji, ning ingsamjin pen thilongji, lapen chepip longji. 16Ladak nangsomar atum kevangji aphrang ovephli plangji, pima Amor atum hingnopik pen aduk kepinangji an plangpletik Ne latum aphan phlungphle.”
17Arnikangsam lapen la kangtingkuk ahut isi mehi kethurmon aphule lapen amede menmen nangklang-lo lapen pi athan-heihei angbong damlo. 18Anke hadak Abram pen Hemphu kechejok aloh chepathik lo. Alangli pulo, “Ijip ahoi pen ha Euphratis Aroi an nangso-nangsu aphan Ne kepiji aphan chechak-lo.#Akam 7.5 19Ken atum, Keniz atum Kadmon atum, 20Hitti atum Perizzi atum, Rephaim atum, 21Amor atum, Kanaan atum, Girgashi, lapen Jebusi atum alongle anta parlopon-etpo.”
वर्तमान में चयनित:
KECHENG 15: KARBIBSI
हाइलाइट
शेयर
कॉपी
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
