KAHTAMYENGHAN 1
1
Ükongwangpu Pungao
1 #
Jn 1.1. Üwangne aope Kahwange wang phang linge ngaiya peih, 2kahtoknyuwa hango ülam yenangpe ükeng me ngoh hüyange wangnyak-a ülam hango yenangpu tangme ngoh, hüyange Kahwang yaha-a yeng tang me mokh powe ngoh yangki. 3Hüyange Kahwange i, “Wangngai ngoh tüoh”; hüyange wangngai ngai. 4Kahwange wangngai-a meiye nge; hüyange Kahwange wangnyak mepu wangngai tam. 5Kahwange wangngai te Nyih she nyik, hüyange wangnyakte Iye Nyak she nyik. Hüyange yaning linne tai hüyange napning ngai, tüopa-a üwangpa nyih ne meng.
6Hüyange Kahwange i, “Yeng yo me khwngmong ngaitüoh, hüyange tüo kaiye yeng mepu yeng tamme ngaitüoh.” 7Hüyange Kahwange khwngmong linge, khwngmong ütangye me ngohpu yeng mepu khwngmong üphangye me ngohpu yeng tam; hüyange hüke ngai. 8Hüyange Kahwange khwngmong te “Wang” she nyik. Hüyange yaning linne tai hüyange napning pei, hatüowa ni shepupa nyih ne ngoh.
9Hüyange Kahwange i, “Wangmai me ngohpu yeng üken ja me jemtüoh, hüyange eawahpu kahtok ngaitüoh.” Hüyange hatüo ngai. 10Kahwange kahtok te Kahtoknyu she nyik; hüyange yeng shaijempu te Iye Yengching she nyik; hüyange Kahwange tüopa-a meinang she lei. 11Hüyange Kahwange i, “Kahtokke phümha weangyong ngai tüoh, üli lick pheipu üphao, hüyange iman üli lick pheipu pee ülam lili kahtok me ngaitüoh.” Hüyange hatüo hüke ngai. 12Hüyange kahtok-e phümha weangyong, yoi yoi ülam me üli lickpu ülick lickpu pee, ülam lili lickpu ülick hanghe me yoi yoi üli lick ngoh nang, hatüo ngaine tam. Hüyange Kahwange hatüo meinangki she lei. 13Hüyange yaning linne tai hüyange napning pei, hatüowa lüm shepupa nyih ne ngoh.
14Hüyange Kahwange i, “Wangnyak mepu wangngai tamlak jingne khwngmong me wangngai ngai tüoh; hüyange juheiwan hüyange nyih hei wangpeng itpu yepinlak ngoh tüoh, 15hüyange kahtoknyu te wangngai ngohlak jingne khwngmong me wangngai ngaitüoh;” hüyange hüke ngai. 16Hüyange Kahwange wangngai üyong ni ling, nyihning teelak jingne wanghe, hüyange yaning jingne leatnyu; lye üne-o shanhalan-o ling. 17Hüyange Kahwange kahtoknyute wangngai phalak jingne khwngmong me iman nyimtam; 18yaning hei nyihning tangme wanglam lamlak jingne, hüyange wangnyak mepu wangngai tamlak jingne ling, hüyange Kahwange hatüowa meinangki she nge. 19Yaning linne tai napning pei, hatüowa peli shepupa nyih ne ngoh.
20Hüyange Kahwange i, “Yengwo yinmok ülam lili maatüoh, hüyange awhalan khwngmong kaiye kahtok ütang yeme putüoh.” 21Tüokhei Kahwange khongkhai hüyange powe ngohpu üyin yinmok üshei, yengme powe ngohpu ülam lili hüyange üyang nyimpu awhalan ülam lili ngaine tam, hüyange hatüowa meinangki she lei ok. 22Hüyange Kahwange yinmoknyuha moiman tam me i, “Ülick wangmanne licktüoh, hüyange ngaitüoh hüyange yengching me yeng-a maatüoh; hüyange kahtoknyu me awhalan jalun tüoh.” 23Hüyange yaning linne tai hüyange napning ngai; hüyange hatüowa nga shepupa nyih ne ngoh.
24Hüyange Kahwange i, “Kahtoknyu we üyin yinmok yoi ülam lili tampu yinmok, kahtok me lih-e kempu, hüyange phao yinmok yoi ülam lili ngaitam tüoh.” Hüyange hüke ngai. 25Hüyange Kahwange kahtoknyu yinmok yoi ülam lili, hüyange tampu yinmok yoi ülam lili hüyange kahtok me kempu shemin lamphe yoi ülam lili ling. Hüyange Kahwange hatüowa meinangki she lei.
26 #
Kaht 5.1; Mt 19.4; Mk 10.6; Kol 3.10; Jas 3.9. Tüophei me Kahwange i, “Teman-e kahta teman kih-e, teman lepu me linghah; hüyange yengching nyah tangme hüyange wang awha tangme, hüyange ching yinmok tangme hüyange kahtoknyu üshei tangme hüyange kahtok me lih-e kempu üshei tangme iman nokpu ne mengtüoh,” 27Hüyange Kahwange yoi kih-e kahta linge ngai, Kahwang lepu me lye I ngaine tam; netan hüyange sheko lye iman ngaine tam. 28Hüyange Kahwange iman moimantam hüyange Kahwange iman te i, “Jaluntüoh hüyange maawe ngaitüoh, hüyange kahtoknyu maane tamme hatüo tükke oktüoh; hüyange yengching nyah tangme, hüyange wang awha tangme, hüyange kahtoknyu me popu üyin ngohpu shemin lamphe tangme, nokpu ne mengtüoh.” 29Hüyange Kahwange i, “Leitüoh, Kahtoknyu üshei me ngohpu üli lickpu phümha weangyong üshei hüyange pee üshei ümeken me üli lickpu pelick ngoh nang, Taowe numante phanang; numan jingne hatüowa hahying ne ngohlak. 30Hüyange kahtoknyu yinmok üshei te, hüyange wang awha üshei te hüyange kahtok me powe kempu üshei te ümeken me üyin ngoh, Taowe phümha weangyong ühüng hahying jingne phanang.” Hüyange hüke ngoh.
31Hüyange Kahwange Iye lingpu üshei nge, hüyange leitüoh, tüolan yeonge meiye ngoh. Hüyange wangnyak hei wangngai ngoh, hatüowa wok shepupa nyih.
वर्तमान में चयनित:
KAHTAMYENGHAN 1: KONYBSI
हाइलाइट
शेयर
कॉपी
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
