TƏŊMORFANNE 7
7
Bii rwãh sǝrri
1Dǝɓlii faa nyi Noa: Mo dan ɓǝr dah ne za yaŋ ɓo daŋ, mor me kwo mo njaŋ pel ɓe kǝsyil zahŋhǝǝtǝ̃ǝ mai daŋ. 2Mo syen zahban nǝǝ mai mee kwan na a pǝsãh mawǝǝ ne matǝ̃ǝ rǝŋ rǝŋ, amma mo woo mai mee kwan na a ne 'nahm gwa gwa, mawor ne matamme. 3Mo joŋ nai ne juu ta, mo syen zahban ah rǝŋ rǝŋ, mawǝǝ ne matǝ̃ǝre, ka zahban fan ma wo sǝr daŋ mo vǝr ka. 4Coŋ zah'nan ɓo rǝŋ, me ga soɓ bam tǝ gin tǝ sǝr zah'nan jemma nai, suŋ jemma nai ta. Me ga vǝr fan ma ne cee mai me joŋ daŋ gin wo sǝrri. 5Noa joŋ fan mai Dǝɓlii mo cuu nyi ko daŋ.
6Ne cok bii mo ge tǝ sǝr ka Noa joŋ syii ɓo temere yea. 7Noa dan ge pǝ dah ne wee ahe, mawin ah tǝkine ŋwǝǝ wee ah ka ǝ̃ǝ pel bii mai mo ga vǝr sǝrri. 8Kǝsyil nǝǝ masãh ne nǝǝ maɓea ahe, juu tǝkine fan ma ker tǝ sǝr daŋ, 9danra ge wo Noa pǝ dah gwa gwa tǝgbana mai Masǝŋ mo faa. 10Ne cok zah'nan rǝŋ ah mo vǝr o, bii ge tǝ sǝr daŋ.
11Ne cok ah ka Noa joŋ syii ɓo temere yea, amma ne fĩi gwa pǝ zah'nan jemma tǝtǝl rǝŋ pǝzyil fĩi ah zahtǝwoo bii gbǝr mor sǝrri, zahtǝwoo coksǝŋ gbǝr ta. 12Bam tǝ ge tǝ sǝr zah'nan jemma nai, suŋ jemma nai. 13Ne zah'nan ah Noa ne wee ah Sem, Kam, Yafet, ne mawin Noa tǝkine ŋwǝǝ wee ah daŋ danra ge pǝ dahe. 14Zahban nǝǝ cok tǝkine nǝǝ yaŋ camcam daŋ ge danra pǝ dah ah ne Noa, tǝkine fan ma ker tǝ sǝr ne juu ne zahban ɓǝǝ camcam daŋ gera gŋ gwa gwa. 15Fan ma ne cee mawǝǝ ne matǝ̃ǝ daŋ danra ge wo Noa pǝ dah gwa gwa, 16tǝgbana mai Masǝŋ mo faa nyi ko. So fahfal ah Masǝŋ coo zahfah dah ge tǝ Noa.
17Fahfal ah bii ge tǝ sǝr zah'nan jemma nai, bii ah ge pǝlli ŋhaa ɓaŋ dah ge sǝŋ. 18Bii ah ge tǝ sǝr pǝlli ŋhaa dah zoo ge tǝ bii sǝŋ. 19Bii ah ge pǝ'man no cam. Waa mawah matǝ sǝr daŋ bii muŋ tǝlǝǝ ahe. 20Ɗǝk tǝlǝǝ ah ma mor bii i jol jemma tǝtǝl dappe. 21Fan ma ne cee mai moo kyãhra tǝ sǝr daŋ wukra: juu, nǝǝ yaŋ, nǝǝ cokki, fan ma ker tǝ sǝr tǝkine dǝfuu daŋ. 22Fan ma ne cee tǝ sǝr daŋ wukki. 23Masǝŋ vǝr fan ma ne cee mai mo tǝ sǝr daŋ: dǝfuu, fan ma syee ne ɓalle, fan ma ker tǝ sǝr tǝkine juu daŋ wuk tǝɗe', sai coŋ Noa ne zan ah tǝkine fan mai mo ne ki pǝ dah to. 24Bii ah nǝn tǝ sǝr joŋ zah'nan temere ne jemma dappe.
वर्तमान में चयनित:
TƏŊMORFANNE 7: MUAR
हाइलाइट
शेयर
कॉपी
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
