VAKATEKIVU 3
3
Ai Tekitekivu ni i Valavala Ca
1Na gata sa manumanu qaseqase duadua vei ira na manumanu kecega a bulia na Kalou ko Jiova. A sa kaya na gata vua na yalewa “Sa tukuna li na Kalou mo drau kakua ni kania na vuanikau kecega sa tu ena i teitei?”#Vtaki 12.9; 20.2
2A sa kaya na yalewa, “E rawa me keirau kania na vuanikau kecega sa tu ena i teitei. 3Ia na kau ga e tiko ena lomadonu ni i teitei, sa kaya kina na Kalou me keirau kakua sara ni kania, se tara; de keirau mate.”
4A sa kaya na gata, “Drau na sega dina ni mate kevaka o drau na kania. 5Ia e kila na Kalou ni gauna o drau kania kina, ena qai rai na matamudrau, drau na qai vaka na Kalou#3.5 Kalou: se veikalou. ka kila na ka vinaka kei na ka ca.”#3.5 kila na ka vinaka kei na ka ca; se kila na ka kecega.
6Ni sa raica na yalewa na rairai vinaka ni vunikau kei na totoka ni vuana me laukana, ka vakasama ni sa ka talei na rawati ni vuku, a sa qai tauca eso na vuana ka kania. E a solia talega eso na vuana vua na watina, ka sa kania talega. 7Ia ni rau sa kania, sa qai rai na matadrau, erau sa qai raica ni rau sa luvawale. E rau a qai cula vata na drau ni lolo me rau vakaisulu kina.
8Ena yakavi, ni mudremudre vinaka na cagi, erau a qai rogoca ni lako voli na Kalou ko Jiova ena loma ni teitei. E rau a qai vunitaki rau ena veikau. 9A sa qai kacivi Atama na Kalou ko Jiova ka kaya, “O sa tiko e vei?”
10A sa qai sauma o koya ka kaya, “Au sa rogoca ni o ni sa lako voli ena loma ni i teitei; au a qai rere ka vunitaki au ni'u sa luvawale.”
11A sa taroga na Kalou, “O cei sa tukuna vei iko ni o sa luvawale? O sa kania beka na vuanikau ka'u a vakarota vei iko mo kakua ni kania?”
12A sa kaya o Atama, “Na yalewa ga o ni sa solia vei au, sa solia vei au na vuanikau, ka'u sa mani kania.”
13A sa taroga talega na yalewa na Kalou ko Jiova, ka kaya, “A cava o sa cakava kina na ka oqo?”#2Kori 11.3; 1Timo 2.14
A sa kaya na yalewa, “Sa vosa vaqaseqase vei au na gata, ka'u sa mani kania.”
Vakatauca na Nona Lewa na Kalou
14A sa qai kaya na Kalou ko Jiova vua na gata: “Ena vuku ni ka o sa cakava oqo, O sa cudruvi kina vakalevu vei ira na manumanu yava i va kecega; mo na dolo e ketemu mai na gauna oqo ka lako yani, ka o na kana mai na kuvu ni soso ena veisiga kece sara o na bula kina. 15Au na cakava mo na veimecaki kei na yalewa, era na veimecaki talega na nomudrau kawa. Ena butuqaqia na ulumu na kawa ni yalewa, ia o na katia na bukubuku ni yavadra na luvena.”#Vtaki 12.17
16A sa kaya vua na yalewa, “Au na vakalevutaka na nomu rarawa ni o sa kunekune, kei na nomu vutugu ni o sa vakasucu gone, ia o na vinakata tikoga na watimu, ka na lewai iko o koya.”
17A sa kaya vei Atama. “Ni o sa vakarorogo vua na watimu, ka kania na vuanikau, ka'u sa kaya vei iko, Mo kakua ni kania, sa cudruvi na qele ena vukumu; o na cakacaka vakaukauwa mo rawata kina na kemu kakana ena veisiga kece sara o bula kina.#Ipe 6.8 18Ena vakatubura talega vei iko na kau votovotoa kei na co gadrogadro, ka na kemu kakana na wa kei na kau ni veikau. 19Mo na cakacaka vakaukauwa ka kana mai na buno ni yadremu, me yacova na gauna o na lesu tale kina ki na qele o a buli kina. Ni o a buli ga mai na qele, ia o na suka tale ki na qele.”
20A sa vakatoka na watina o Atama#3.20 Atama: A kena i balebale, “na kawa tamata” (humanity) ena vosa vakaiperiu. me yacana o Ivi#3.20 Ivi: Na yaca oqo e balebale vaka na “sa bula” ena vosa vakaiperiu. (a kena i balebale, Sa bula), ka ni sa tinadra na kawa tamata kecega. 21A sa qai cakava na Kalou ko Jiova na i sulu kuli-ni-manumanu ka vakasulumi rau kina o Atama kei Ivi.
Rau Vakasavi o Atama kei Ivi mai na i Teitei
22A sa kaya na Kalou ko Jiova, “Raica, sa yaco na tamata me vakataki kedatou, ni sa kila na ka vinaka kei na ka ca#3.22 kila na ka vinaka kei na ka ca; se kila na veika kecega. me kakua ni tara na kau ni bula, de mani kana kina, ka qai bula ka sega ni mudu.”#Vtaki 22.14 23A sa qai vakatalai koya tani na Kalou ko Jiova mai na i teitei o Iteni, me cakacakataka na qele a buli mai kina. 24A sa vakasava tani na tamata o koya, ka sa vakatikori rau na agilosi ena Tokalau ni teitei o Iteni kei na dua na i seleiwau bukawaqa, sa veigoleyaki na yamena ki na veiyasana kecega, me kakua kina ni yacova na kau ni bula e dua na tamata.
वर्तमान में चयनित:
VAKATEKIVU 3: FNV
हाइलाइट
शेयर
कॉपी
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
