Marc 9
9
1Jésus amoomba évovo na géômbége n’aneengie mbe: Nanôbeenda ébégô édué éapie mbe avo va gatse anye nôndé éva nôsangawa ta madeo nôsiena ôkumu aNzambé ôviga na ngudi yedi.
Otô aJésus ômakoga pesu andéô
(Bono na Matt. 17:1–13, Luc 9:28–36)
2Vamoota pitsi môtôba, Jésus amakea na Pierre na Jacques na Jean na gô ngongo amôkôdi ôdooda. Vasibaké muene môma te Jésus n’aneengie atatô. Otô aJésus ômakoga va miso maô. 3Maduani medi mamakoga moobébayi avembo ti ga pemba. Gôsaba môma gô tsina égô oongôa étsigéda mônongo avembo ône. 4Vane aneengie atatô ahmeena oma abaé, Elie na Moïse amatsutsuga, na amavovo na Jésus. 5Na Pierre dôta amavovo na Jésus mbe: Môékédi te buedi gadenganiô wa n’anyô éva. Tôsaéni yeba ditatô yagébandé. Ovo woo. Ovo aMoïse. Ovo aElie. 6Pierre amavovo nane gémenye éne émavovo angô gô mangongome mamookô angô na Jacques na Jean muetso. 7Obôngé ômakukéga ôbee na ômeebéda ahngô muetso. Ogi ômookanô ôvovo g’ôbôngé mbe: Odôô te muanee ami amôtéma. Oôkéoni angô. 8Vane aneengie amageengageengana na ahsienedô môma buétsé te Jésus môtévo andé n’ahngô.
9Vamasutuméa ahngô gô môkôdi ône, Jésus amavovo n’aneengie mbe: Nômbiabeenda môma ta na môvo éne éeni anye. Nôngabeenda te vangakunduga me, Muana Amôma g’ôwa. 10Ahmakuya ébégôe éne gô mitéma miaô. Ivô ahmeevôana anguene n’anguene mbe: ?Ebégô évovi Jésus angô gôékunduga g’ôwa ékegea nayee? 11Vane ahmeevôa Jésus mbe: Anigôi amige ahvovo mbe mabégô mema n’egébuéaka, te Elie apanga étsigani. ?Avovo nane nayee? 12Jésus amaabéa mbe: Okô mbe éendéké gavovo anigôi amige mbe te Elie angapanga étsigani gôénikéa ékônza mabégô metso tambô ?nayee Matendeo MaNzambé mabeenda mbe me, Muana Amôma nangatubédu n’oma maguga mavôni na gékuanô? 13Buéyé mbe nane, nanôbeenda mbe Elie amani étsiga. Oma amamôénda gamanyôngéô ahngô. Te gabeenda matendeo MaNzambé gôndé Elie.
Jésus amadôngéda muana amabaka na gédidi gébévani
(Bono na Matt. 17:14–21, Luc 9:37–43a)
14Vamabaka Jésus n’aneengie atatô aka gôétsiga na vandé akaô ahmeena géômbé gévôni géndé n’avo aneengie. Na ahmeena anigôi amige miaNzambé andé gôénigôana n’ahngô. 15Vameena géômbége Jésus aviga ahmamôtsôkéa. Ahmakumbuga gôésambanéa n’edi. 16Jésus ameevôa aneengie edi mbe: ?Anye na omeaa nôbé nayee? 17Mômôgôô môvo amabaka gô géômbége amaabéa mbe: Môékédi, navigi na gôndé éwe na muanami amakaô na gédidi sobôbô. 18Kuka yetso vatsôpu angô na sangô agunyéga na va tsina. Muanee te aka na magudé gô mônya, na agéa ngeko. Otôe wetso te ôka na sényényée. Me nabambéyi aneegie woo mbe: Kusédani muanee gédidige gébévani. Ivô ahngô asiôngôé égékuséda. 19Jésus angô mbe: Anye oma apitsi yedi nôndé asi paga. ?Nangoomba édigaa n’anye pitsi dikee? ?Nangoomba ésipéda anye éma ékee? Viga na muanee. 20Amamôétsa muanee. Vameena gédidige gébévani géena Jésus, tsiigane ématsôpa muanee. Amamesegea na va tsina. Amabisongono na magudé gô mônya. 21Jésus ameevôa tétee amuanee mbe: ?G’ebandôgéô angô áka éma ekee? Tétee angô mbe: Emabandôa agébaka muanéngé. 22Dipo kuka gédidi gémôgunya na gô soto. Dipo kuka na gô tungu yameba gôémôyôhéda. Eena we ngeba. Okô mbe éwe ôngoongôa éwedéa we, wedaka we. 23Jésus angô mbe: ?Nayee ôénda mbe: Okô mbe ôngoongôa? Gôndé ône eetsa môtémedi westo éngeendégégéa. 24Tsina na tsina amayavôga éaabéa mbe: Me tsatsuma paga, ivô wedéa me mbe nangeetsa môtémee wetso.
25Jésus ameena oma ayekani ahviga pita na gôndé angô. Vane amakangéa gédidi gébévani mbe: Gédidi, éwe ôsasinga muanee gôévovo na gôéôkô, me nagôtôma mbe: Kusa gôndé muanee ôdôô. Ombianikea éengéa na gôndé angô. 26Gédidi gébévani gémaamugana môndônga na tsiigane ématsôpa muanee na sangô gémakusa. Otô amuanee ômabaka na nyegôdani. Ayekani ahmavovo mbe: Awéyi. 27Vane Jésus amamôtsôpa g’ôgogoe gôémôtimôa. Na muanee amatema môtie.
28Jésus n’aneengie ahmeengéa agô eba. Gôsibaké muene môma. Aneengie ahngô mbe: ?Ebégô ndé ésiôngôa we ékuséda gédidige géne? 29Jésus angô mbe: Mônongo agédidi ône ôkusédu te gô ngudi yosambô.
Jésus amoomba ébeenda ôwedi na gékundugéô sedi
(Bono na Matt. 17:22–23, Luc 9:43b–45)
30Ahmatimôga gône amoota tsengene nyetso éaGalilée te ootaga. Jésus asinyôngéô émenyanganô mbe andé va tungu éasimbe. 31Gôébégô angô amabaka gôénigôa aneengie mbe: Me, Muana Amôma nangakabô na gô mogo moma angayôha me. Nangawa. Gô mbene apitsi dibaé, éne éamôtatô nangakunduga. 32Aneengie ahsiôkô événdégéô éamane mavovi angô ivô amookô gomo gôémôbambéa nyivô.
?Mômane môvôni indaa?
(Bono na Matt. 18:1–5, Luc 9:46–48)
33Ahmatsiga na gô Capernaüm. Vameengéa ahngô na gô eba, Jésus ameevôa aneengie mbe: ?Anye gô nzéa nôtsundiki mandé? 34Ahngô ahsisiié. Gôébégô gô nzéa ahmabaka gôégagana ényangee. Oô mbe: Me nootéa émenyanganô na Kumu. 35Vane Jésus amadigaa na amabambéa ahngô nzima n’aneengi abaé mbe: Vigani n’eva. Jésus angô mbe: One anyôngéô éôta na gô mbene abésanéa gô ngima. Ayanzéé akedi muetso. 36Vane Jésus amatsôpa muana muanéngé v’ogogo. Amamôweseda na va mbene aô. Amamôvaata va mitanda miedi na amavovo mbe: 37One agobeda viana gandé éevi gô inami, agobedi na me. Na ône agobedi me eembe agobedi te na ône amakudéga me.
One asaba môvingi asô n’anyô andé te asô n’anyô
(Bono na Luc 9:49–50)
38Jean amavovo na Jésus mbe: Môékédi, we tôeni mômôgôô andé gôékuséda édidie ébévani gôndé oma gô ngudi yainoo. Na we tôbaki mbe tômôdékéda gôébégô asaba gô géômbé sasô. 39Jésus amavovo mbe: Nômbiamôdékéda. Gôsaba môma oongôa éyanza ébégô éamôsôba ényônganéôni gô inami, n’angô tsina na tsina atsuava me. 40One asaba môvingi asô n’anyô andé te asô n’anyô. 41One anôétsa pengo gébungu sameba gôényua gô ina aChrist étôvambani, nanôbeenda na gô pie mbe angadiia môsenda.
Gôéyanza ébéva te ébégô édagani
(Bono na Matt. 18:6–9, Luc 17:1–2)
42Okô môma anyôngéô ébôméda muana andé môtémovo n’ami, buedi mbe nôditéga étaé évôni va môngônga amômane na nômôgunya gô mubu kabaga abômédadô muanee. 43Okô ôgogoe woo ôndé ga pagô gôégôkubéda gô mabégô mabévani, kitsa angô. Okô ôndé n’ogogo ôvo na monyo apie gô môtémoo, ésadaga gôndé éwe. Okô ôndé na mogo moo mabaé na ôkea na gô mungu asoto, te éne éôtéa édagani. Gône te gô sotoge géseemakani. [ 44Gône te gôndé misôbô miaaka ôtô misawakani na sotoge géseemakani.] 45Okô ôkôdôe ôndé ga pagô gôégôkubéda gô mabégô mabévani, kitsa angô. Okô ôndé n’okôdô ôvo na monyo apie gô môtémoo, ésadaga gôndé éwe. Okô ôndé na makôdô moo mabaé na ôkea na gô mungu asoto te éne éôtéa édagani. [ 46Gône te gôndé misôbô miaaka ôtôe misawakani na sotoge géseemakani.] 47Okô mbe isoe yoo éndé ga pagô gôégôkubéda gô mabégô mabévani yuua éangô. Gôndé éwe gôéengéa g’ôkumu aNzambé n’eso évo ésadaga. Ivô gôékea na gô mungu asoto na miso mabaé te éne édagani. 48Gône te gôndé misôbô misawakani miaaka ôtôe, na sotoge géseemakani. 49Soto géngatumbu gôndé muetso mônongovo gamuakô vianga gô mabunza.
50Vianga te sôma samôsôba. ?Ivô ôkô viangô visabadô na duegi, môma angavinikéda duegi nayee? Bakani ga vianga viaduegi. Digaani na mitéma mimasumani anyene n’anyene.
वर्तमान में चयनित:
Marc 9: TSV
हाइलाइट
शेयर
कॉपी
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
