YOHANES 5
5
Yesus Kiperbor Mai Nyik ku Kulam Betesda
1Telas ajeh Yesus Kiet nu kote Yerusalem mase arik raya mai Yahudi. 2Ku pajeh mong nanek kulam de bisebot Betesda. Kulam ajeh rek beg pintu gerbang kote de bisebot “Pintu Dombe.” Kulam ajeh bikelileg ya lima beranda. 3Mong jeoi mai nyik de naidakdak ku beranda-beranda ajeh - mai buta, mai capek, ru mai lumpoh. [Enai ajeh naipoj teu kulam ajeh biyoh 4kerana kadang-kadang malikat TUHAN kiceleh nu kateh kulam ajeh ru kiyoh teu. Mase teu biyoh, mai de petame sekali kimuj nu kateh kulam ajeh doh kibor ju inyaknik.]#5:4 Bahagian adeh pek mong ku kateh memerip salinan Alkitab manah. 5Ku pajeh mong numom keral de ya 38 tahut kinyik. 6Bile Yesus Kineng kek kidakdak ku pajeh, Yesus Kipanei keral ajeh ya liu kinyik. Yesus Kitanya nu kek, “Hodka habor?”
7Mai nyik ajeh kiberlag, “Jen, bokhentok pen ku padeh de betulog eng muj nu kateh kulam adeh bile iteu ajeh kiyahyoh. Mai kilek naimuj canuk mase eng cuba ngha-muj nu kateh kulam.”
8Lalu Yesus Kiurok nu kek, “Kosloh! Kotloh ceruk hek ru ciploh.” 9Ku sarik jijeh juga sengoi ajeh pen kibor. Kek pen kikot iceruk lalu kicip.
Arik ajeh arik Sabat. 10Kerana ajeh, pemimpen-pemimpen mai Yahudi naiurok nu sengoi de pai biperbor ajeh, “Hek halanggar Hukom Taurat kerana haen ceruk hek ku arik Sabat.”
11Tapi sengoi ajeh kiberlag, “Sengoi de kiperbor eng ajeh Kior eng ngkot ceruk ru cip.”
12Lalu naitanya, “Bokka de eror hakot ceruk ru cip?”
13Tapi sengoi ajeh pek kipanei bok imai de perbor ha ilei kerana Yesus Kinyep ku engkap mai jengoi ku tempat ajeh.
14Pek liu ju kenjeh, Yesus Kiterbuk mai de Kiperbor ajeh ku laman Deg Jenang ru Kiurok, “Hunen hek ya habor. Agok bedosa nij supaye hek pek hakena pekare de lebeh terok nij.”
15Telas ajeh sengoi ajeh kipasal nu pemimpen-pemimpen mai Yahudi tentang hal ajeh. Kek kiurok Yesusloh de beperbor kek. 16Kerana Yesus Kiperbor sengoi ku arik Sabat, pemimpen-pemimpen mai Yahudi mula naimusohi Kek.
17Tapi Yesus Kiurok nu enai, “Menek Eng selalo Kikerakjak, jadi Eng pen hod Ngkerakjak begei ha Kek.”
18Kerana ajehloh, enai lebeh naikerekwat nij naiha-perdat Yesus kerana Kek pek taleh Kilanggar hukom arik Sabat tapi Kiurok juga Jenang ajeh IMenek. Iengrok ajeh imaksod Kek sama begei Jenang.
Kuasa Kenon
19Yesus Kiurok nu enai, “Cerngailoh abor, Kenon pek buleh Kibeh ma-ma Kijoi heknod Ilei sendiri. Kek Kineng ru Kibeh ma taleh de bibeh ya IMenek. Pekare de bibeh ya IMenek, bibeh juga ya IKenon. 20Menek Kihok IKenon ru Kiperneng nu IKenon dikdij ma de Kibeh. Kek doh Kiperneng nu IKenon pekare-pekare de lebeh entoi nij daripade hal perembor mai nyik. Engkek doh cengang empag engkek ku mase engkeneng pekare-pekare de lebeh entoi nij ajeh. 21Begei Menek de Kiberkos ru Kipersui mai dat, begei ajeh juga Kenon Kiog sinui nu mai de Kihod. 22Menek pek Kihukom bok-bok pen. Kek ya Kiog nu IKenon dikdij Ikuasa untok Kihukom manusia 23supaye dikdij mai naihormat IKenon begei naihormat Menek. Mai de pek naihormat IKenon, enai pek naihormat juga Menek de Kingeng IKenon ajeh.
24Cerngailoh abor, bok de kicerngai engrok Eng ru kipecaya nu Menek de ngengngeng Eng, kek kikep sinui de lei ditehjeh. Kek doh pek bihukom. Kek ya telas ju danan ru kikep sinui de lei ditehjeh. 25Cerngailoh abor, imase doh kitiba bile mai de pek pecaya doh naicerngai suara Eng Kenon Jenang. Sebenarnye hunenloh imase ajeh. Mai de naicerngai ha suara Kenon Jenang ajeh doh naikep sinui de lei ditehjeh. 26Kuasa de Kiog sinui mong ku Menek ru Kek ya Kiog kuasa de sama ajeh nu IKenon. 27Kek ya Kiog kuasa ha pehukom manusia nu Eng IKenon kerana Eng adeh Kenon Manusia.#Dan 7:13-14 28Agokloh cengang empag engkek tentang hal ajeh kerana imase doh kitiba bile dikdij mai dat ku penep doh naicerngai Icengreg 29lalu naihol ju penep. Sengoi de naibeh bor doh naikos ru naisui lei ditehjeh tapi sengoi de naibeh jehat doh naikos supaye bihukom.”
Kesaksian tentang Yesus
30Yesus Kiurok nij, “Eng pek dapat Ngbeh ma-ma joi heknod LiEng sendiri. Eng Nghukom sengoi Ngjoi ma de bior ya Menek. Nehukom Eng ajeh adel kerana Eng pek Ngjoi heknod LiEng sendiri tapi Ngjoi heknod Ilei de Kingeng Eng.
31Amen Eng Ngbesaksi tentang diri LiEng sendiri, kesaksian Eng ajeh pek betol ru pek sah. 32Tapi Menek Kibesaksi tentang diri Eng ru Ngpanei Ikesaksian tentang Eng ajeh betol ru sah. 33Bile engkengeng memerip urag nu Yohanes Pembaptis, kek kibesaksi ma de benar tentang diri Eng. 34Eng pek perlu kesaksian ju manusia tentang bokka Eng adeh tapi Ngpeingat engkek tentang kesaksian Yohanes Pembaptis ajeh supaye engkepecaya nu Eng ru bipeselamat. 35Yohanes Pembaptis ajeh begei pelite de beros ru becahaya. Had sekejap taleh engkerasa icahaya ajeh ru engketerima ikesaksian tentang Eng. 36Tapi Eng mong kesaksian de lebeh penteng daripade kesaksian Yohanes Pembaptis: Dikdij kerjak de biog ya Menek nu Eng, kerjak de tengah Ngbeh ku ngar engkek kipebukti Menekloh de Kingeng Eng. 37Menek de Kingeng Eng pen Kibesaksi tentang diri Eng. Engkek pek pernah engkecerngai Isuara atao engkeneng Irenes. 38Iengrok pek kigei ku kateh sengik engkek kerana pek engkepecaya nu Eng de bingeng ya Kek. 39Engkeselidek Alkitab kerana engkesangka engkekep sinui de lei ditehjeh ju Alkitab. Alkitab ajeh kesaksian tentang Eng 40tapi engkenyek pek engkehol nu Eng untok engkeberkep sinui de lei ditehjeh.
41Eng pek perlu penateh ju manusia. 42Eng Ngkenal engkek ru Ngpanei pek engkehok ha Jenang. 43Eng Nghol ku kateh kuasa Menek Eng tapi pek engkesamut Eng. Tapi bile mai kilek naihol ku kateh kuasa liknai sendiri, engkesamut enai. 44Engkehod penateh ju engkap liengkek tapi pek engkekerekwat engkeha-berkep penateh ju Jenang de nek nanek. Kerana ajehloh, pek engkepecaya nu Eng. 45Agok sangka Eng doh Ngtudoh engkek ku ngar Menek. Nabi Musa de engkeharap kipeselamat engkek doh de kitudoh ha engkek. 46Amen betol-betol engkepecaya nu Nabi Musa, tentu engkepecaya nu Eng juga kerana Nabi Musa mong kicot tentang Eng. 47Tapi, ha kerana pek engkepecaya nu ma de bicot ya Nabi Musa, engkek juga pek engkepecaya nu ma de Ngurok.”
वर्तमान में चयनित:
YOHANES 5: AEH
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
